1701090000

რესტორატორთა ასოციაციის ხელმძღვანელი აცხადებს, რომ საქართველოში სარესტორნო სექტორი გამოცოცხლებულია. როგორც შოთა ბურჯანაძე განმარტავს, ამის პარალელურად დიდ და გადაუჭრელ  პრობლემად რჩება საკადრო დეფიციტი.„თუ შედარებას გავაკეთებთ, არსებულ პერიოდსა და კოვიდ პერიოდს შორის, რა თქმა უნდა, კოლოსალურია განსხვავება და სარესტორნო სფერო გამოცოცხლებულია. აქ ყველაზე მნიშვნელოვანი ფაქტორი ის არის, რომ ინდუსტრია ვითარდება  და ახალი სარესტორნო წერტილები იქმნება. ეს ძალიან კარგია, მაგრამ ძალიან დიდ გამოწვევად რჩება საკადრო პოლიტიკა, რომელიც ჯერ ისევ გადაუჭრელია. ეს მხოლოდ გრძელვადიან პერსპექტივაში შეიძლება მოგვარდეს.“-აღნიშნა შოთა ბურჯანაძემ.მისივე განმარტებით, პანდემიის დროს სფერომ რესტორნების 50% დაკარგა, მათი ნახევარი კი უკვე ბაზარზე დაბრუნდა.„პანდემიის დროს ქვეყანაში ასეულობით რესტორანი დაიხურა და მათ ადგილზე ხშირ შემთხვევაში სხვადასხვა ქსელის მაღაზია, აფთიაქი ან სხვა დაწესებულება გაიხსნა და ის არეალი მთლიანად ათვისებულია, თუმცა ხდება ახალი რესტორნების გახსნაც. აქედან გამომდინარე, იმის შემდეგ, რაც სფერომ დაკარგა მოქმედი რესტორნების 50%, ამ 50%-ის ნახევარი ბაზარს დაუბრუნდა.“-აღნიშნა შოთა ბურჯანაძემ.მისივე თქმით, საქართველოში ბიზნესზე მიგრანტების ეფექტი ფაქტობრივად ამოიწურა და რესტორნები ახლა ძირითადად ადგილობრივ მომხმარებლებს ემსახურებიან.„მიგრანტების ეფექტი შემცირებულია. შეიძლება ითქვას, რომ რეალურად რესტორნები, რომლებიც ბაზარზე არიან, ახლა ძირითადად  ადგილობრივ ბაზარზე მუშაობენ."-აღნიშნა შოთა ბურჯანაძემ. 

1701085620

ოქროს საერთაშორისო ბირჟებზე ფასების მერყეობა ფიქსირდება. ბოლო 1 თვეში, ოქროს გლობალური ფასი 9 პროცენტით გაიზარდა და ამჟამად, 1 უნცია ძვირფასი მეტალის ღირებულება 2002 დოლარს შეადგენს. დარგის ექსპერტების თქმით, ბოლო 1 კვირაშიც ოქროს ფასები ზრდის მიმართულებით არის დაკორექტირებული.როგორც „ბიზნესპარტნიორს“ „გალტ & თაგარტის“ უფროსმა ანალიტიკოსმა  გიორგი ბერბერაშვილმა  განუცხადა, ოქროს გაძვირების მთავარი მიზეზი საერთაშორისო ბირჟაზე მასზე გაზრდილი მოთხოვნაა, რაც თავის მხრივ გეოპოლიტიკურ მოვლენებთან არის პირდაპირ კავშირში.„ზოგადად, გეოპოლიტიკური რისკების ზრდის ფონზე, კრიზისისგან თავის დასაზღვევად ინვესტორები დაბალრისკიან აქტივებს ირჩევენ და მათ შორის არის ოქრო, რომელიც კრიზისისგან ჰეჯირების ერთ-ერთ საუკეთესო საშუალებად მიიჩნევა. შესაბამისად, ბოლო პერიოდში ოქროს გაძვირების მთავარი განმაპირობებელი მიზეზი რუსეთ-უკრაინის ომი, ახლო აღმოსავლეთში დაწყებული კონფლიქტი და აშშ-სა და ჩინეთს შორის გეოპოლიტიკური ურთიერთობების გაუარესებაა. ასეთ კრიზისულ ვითარებაში, როგორც უკვე აღვნიშნეთ, ინვესტორები თავის დასაზღვევად ოქროს ყიდულობენ“, - აღნიშნა გიორგი ბერბერაშვილმა.მისივე თქმით, ბუნებრივია, ოქროზე საერთაშორისო ფასების ცვლილებას გავლენა აქვს ხოლმე საქართველოზეც.„ადგილობრივ ბაზარზე ოქროს საერთაშორისო ფასები ასახვას, დაახლოებით, 2-3 კვირიან პერიოდში ჰპოვებს ხოლმე. როგორც იცით, ოქროთი მოვაჭრეებს აქვთ ოქროს გარკვეული მარაგები, რომლებიც ძველ ფასშია შეძენილი“, - განმარტა გიორგი ბერბერაშვილმა.ცნობისთვის, წინა წელთან შედარებით, ოქროს საერთაშორისო ფასი მნიშვნელოვნად გაზრდილია, 2022 წლის განმავლობაში ის ძირითადად 1800 დოლარის ფარგლებში მერყეობდა, თუ არ ჩავთვლით გასული წლის დასაწყისს, როცა რუსეთ უკრაინის ომის დაწყების გამო, გარკვეული პერიოდი, ოქროს ფასი 2000 დოლარს გადასცდა. ბოლო წლების მაქსიმუმი კი პანდემიის პერიოდში დაფიქსირდა, როდესაც 2020 წელს, 1 უნცია ოქროს ღირებულება 1400 დოლარიდან 2400 დოლარამდე გაიზარდა.

1701085050

SOLO კულტურის სფეროს მხარდაჭერას და ხელოვნების პოპულარიზაციისკენ მიმართული ინიციატივების ხელშეწყობას განაგრძობს. სწორედ ამ მიზნით ის „თეატრი სახელოსნო 42-ის“ სეზონის გენერალური პარტნიორია.„თეატრი სახელოსნო 42“ მაყურებლის წინაშე ახალი სპექტაკლით - „დირიჟორით“ წარდგება. პრემიერა 05, 06, 13, 15, 16 და 19 დეკემბერს გაიმართება.მაყურებელს შესაძლებლობა ექნება, სცენაზე იხილოს რონალდ ჰარვუდის პიესა, რომელიც ინგლისურიდან გურამ ღონღაძემ თარგმნა.  სპექტაკლის რეჟისორი და სცენოგრაფი ლევან წულაძეა, კოსტიუმების მხატვარი ნინო სურგულაძეა, სპექტაკლის ქორეოგრაფი თინათინ წულაძეა, მუსიკალური გამფორმებელი ზურაბ გაგლოშვილია, ვიდეო ინსტალაციები შექმნილია დათა დვალიშვილის მიერ, ტექნიკური რეჟისორი კი თამარ ფრუიძეა.ექსკლუზიურად SOLO მომხმარებლებს შესაძლებლობა აქვთ, სეზონის განმავლობაში SOLO Visa ბარათით ბილეთების შეძენისას „თეატრი სახელოსნო 42-ის“ ნებისმიერ სპექტაკლზე 20%-იანი ფასდაკლებით ისარგებლებენ. სპექტაკლზე დასასწრები ბილეთების შეძენა შესაძლებელია ონლაინ, ვებგვერდებზე biletebi.ge და tkt.ge

1701079515

საქართველოს ბიზნეს ასოციაცია ყველაზე მსხვილი ბიზნეს გაერთიანებაა, რომელიც წარადგენს და ადვოკატირებას უწევს წევრი კომპანიების ობიექტურ და სამართლიან ბიზნეს ინტერესებს. ასოციაციის უმთავრესი მიზანი ქვეყნის ეკონომიკური ზრდისა და ეკონომიკური სტაბილურობის ხელშეწყობა და ბიზნესგარემოს გაუმჯობესებისთვის ზრუნვაა, რასაც შედეგად ძლიერი და წარმატებული ბიზნეს სუბიექტების ფორმირება უნდა მოჰყვეს. ამასთან, მიგვაჩნია, რომ, ნებისმიერი ნორმალური ქვეყნისთვის ძლიერი და მდგრადი ბიზნესისა და შესაბამისად ძლიერი ეკონომიკის შექმნა არის ქვეყნის წარმატებისა და საზოგადოებრივი განვითარებისა და კეთილდღეობის მთავარი საწინდარი. ვფიქრობთ, რომ ეს არის ის იდეა, რომლის ირგვლივ ყველას გაერთიანება და ამ გზით ქვეყნის მშენებლობა უაღრესად ფასეულია. საქართველოს ბიზნეს ასოციაციისათვის განსაკუთრებულ ღირებულებას წარმოადგენს დამოუკიდებლობა და მიუკერძოებლობა. ამ პრინციპებით ვსარგებლობთ ჩვენ საკუთარი საქმიანობის წარმართვისას და ანალოგიურს ვითხოვთ სხვისგანაც. ჩვენ არასოდეს ვცდებით ჩვენი კომპეტენციის ფარგლებს და ჩვენს ქმედებებში ყოველთვის ვიფარგლებით იმ თემატიკით, რომელიც ეხება და არ სცდება ბიზნესსა და ეკონომიკას. ასე იყო დღემდე და ასე იქნება ყოველთვის. ამ ფონზე, ჩვენთვის სრულიად მიუღებელია, დროდადრო, გარკვეული სუბიექტების მხრიდან, ბიზნესზე პირდაპირი თუ ირიბი ხასიათის შეტევები. ვფიქრობთ, ელემენტარული დაფიქრების შემთხვევაში, არ უნდა იყოს რთული იმის გააზრება და იმაში დარწმუნება, რომ ბიზნესზე შეტევა საშუალო თუ გრძელვადიან პერსპექტივაში ვერცერთ სუბიექტს ვერ მოუტანს სიკეთეს და, პირიქით, უფრო მეტად დამაზიანებელი იქნება მათივე რეპუტაციისთვის, ვიდრე იმათთვის, ვისკენაც მიმართული იყოს ის. ჩვენ ყოველთვის მაქსიმალურად ვიზრუნებთ ჩვენი ქვეყნის ეკონომიკურ განვითარებასა და მის სტაბილურობაზე. დარწმუნებული ვართ, რომ ძლიერი ეკონომიკის შექმნა თითოეული ჩვენთაგანის საზრუნავი უნდა იყოს და ამ მიზნის ირგვლივ ყველას კონსოლიდაცია ნამდვილად ღირს. 

1701074350

Galt & Taggart-ის ჩატარებულ კვლევაში გამოიკვეთა რომ თბილისის უძრავი ქონების ბაზარზე მოთხოვნა 2 ძირითად კატეგორიაზეა დამოკიდებული: 1) საჭიროებაზე დაფუძნებული შენაძენი, რომელსაც ფუნდამენტური ფაქტორები განსაზღვრავს და 2) საინვესტიციო შენაძენი, რომელსაც ქირით მიღებული შემოსავალი და კაპიტალის ნამატი განსაზღვრავს.საჭიროებაზე დაფუძნებული შენაძენების მოთხოვნას განაპირობებს შემდეგი ფუნდამენტური ფაქტორები: ოჯახის საშუალო ზომის შემცირება, ურბანიზაციის ზრდა, მოსახლეობის შემოსავლების ზრდა და საცხოვრებელი პირობების გაუმჯობესების სტიმულები, მიგრაცია და ა.შ.ოჯახის საშუალო ზომის შემცირება წლიურად დაახლოებით 5,000 ბინაზე ქმნის მოთხოვნას თბილისში, Galt & Taggart-ის შეფასების მიხედვით. საქართველოში ოჯახის საშუალო ზომა 3.25-ს შეადგენდა 2022 წლის მდგომარეობით, მაშინ როცა ევროკავშირის საშუალო მაჩვენებელი 2.3-ს. როგორც წესი, ადამიანები განვითარებად ქვეყნებში შედარებით უფრო დიდ ჯგუფებად ცხოვრობენ და ეკონომიკის ზრდასთან ერთად ოჯახების ზომა თანდათანობით მცირდება. მოსალოდნელია რომ მსგავსი კანონზომიერება საქართველოს შემთხვევაშიც გაგრძელდება გრძელვადიან პერიოდში, რასაც ის ფაქტიც ადასტურებს რომ 2002 წელს ოჯახის საშუალო ზომა 3.5 იყო და ბოლო 20 წლის განმავლობაში ეს რიცხვი საგრძნობლადაა შემცირებული.ურბანიზაციის ზრდა წლიურად დაახლოებით 4,000 ბინაზე ქმნის მოთხოვნას თბილისში, Galt & Taggart-ის შეფასების მიხედვით. ურბანიზაციის მაჩვენებელი საქართველოში 60%-ს შეადგენდა 2022 წელს, მაშინ როცა ევროკავშირის საშუალო მაჩვენებელი 75% იყო. როგორც წესი, ეკონომიკის ზრდასთან ერთად ურბანიზაციის მაჩვენებელი იზრდება, რადგან ადამიანების უფრო მეტი რაოდენობა ირჩევს საქალაქო ტიპის დასახლებაში ცხოვრებას. მოსალოდნელია რომ საქართველოში ურბანიზაციის ზრდა გრძელვადიან პერიოდშიც გაგრძელდება, რასაც ადასტურებს ის ფაქტიც რომ ურბანიზაციის მაჩვენებელის 2000 წელს 53%-ს შეადგენდა. ცნობისთვის, ოფიციალური მონაცემების თანახმად თბილისის მოსახლეობა 2014-2022 წლებში დაახლოებთ 140,000-ით გაიზარდა. 

1701070916

"თუ ჩვენ გვჭირდება კვალიფიციური კადრები, პასუხისმგებლობა გვაქვს, რომ თანამშრომლებს საჭირო უნარების ასათვისებლად ტრენინგები ჩავუტაროთ,"- ამის შესახებ გადაცემა "ბიზნესპარტნიორთან" კომპანია GWP-ის გენერალურმა დირექტორმა, ხოსე მიგელ სანტოსიმ განაცხადა.მისი ინფორმაციით, კადრების გადამზადების კუთხით გეგმები აქვთ, რომელსაც მათი მმართველობის პერიოდში, ყოველწლიურად განახორციელებენ."ჩვენ, ჩვენსავე თანამშრომლებში ვაპირებთ ინვესტიციების განხორციელებას, რომელიც მათ ტრენინგებსა და ახალი უნარების ათვისებას მოხმარდება. ეს კი, მათ ყოველდღიური ამოცანების შესრულებაში დაეხმარებათ,"- აცხადებს სანტოსი.აღსანიშნავია, რომ GWP-ში ამ ეტაპზე 3000-ზე მეტი ადამიანია დასაქმებული, რომლებიც სხვადასხვა მიმართულებით აქტივობებს ახორციელებენ.ცნობისთვის, Aqualia-მ  ქართული GGU-ს (Georgia Capital-ის შვილობილი კომპანია Georgia Global Utilities)  65%-იანი წილი 2022 წელს,$180 მლნ-ად შეიძინა. ესპანური კომპანია Aqualia მსოფლიო ათეულში შედის და 17-ზე მეტ ქვეყანაში ოპერირებს, რომელთა შორისაა, საფრანგეთი, ესპანეთი, იტალია და პორტუგალია.

1700826834

ევროკავშირის წევრობის კანდიდატის სტატუსის მიღება ბევრ სიკეთეს მოგვიტანს და ამას ბიზნესი 6-12 თვეში საკუთარ თავზე გამოცდის - ამის შესახებ „ბიზნესპარტნიორთან“ „საქართველოს ბიზნეს ასოციაციის“ პრეზიდენტი სოსო ფხაკაძე საუბრობს.მისი თქმით, მომავალი წლის დასაწყისში ასოციაცია წევრ კომპანიებთან ერთად წარადგენს ვრცელ კვლევას, თუ რა გავლენა ექნება ევროკავშირის წევრობის კანდიდატის სტატუსს ბიზნესზე.„თუ შევხედავთ საქართველოს უახლეს ისტორიას, სადაც ქართული ბიზნესი სამი ათეული წლის არის, ვნახავთ, რომ ჩვენ  ვიზრდებოდით, მაგრამ, ახლა თვისებრივად განსხვავებულ ეპოქაში შევდივართ. იმ ქვეყნებში, რომლებმაც მიიღეს კანდიდატის სტატუსი, თითქმის 5-10-ჯერ გაიზარდა პირდაპირი უცხოური ინვესტიციები. ჩვენ ახლა გვაქვს 2.1 მლრდ-ის ინვესტიციები და ბიზნესმა ძალიან კარგად იცის, რას ნიშნავს, თუ ეს მაჩვენებელი 5-ჯერ და 10-ჯერ გაიზარდა. ეს არის ის, რაც მოხდა სხვა ქვეყნებში და დარწმუნებული ვარ, ჩვენს ქვეყანაშიც ასე იქნება.ეს ნიშნავს დამატებით სამუშაო ადგილებს, ტექნოლოგიების ტრანსფერს ევროპული ქვეყნებიდან, ეს ნიშნავს, რომ ქართული ბიზნესი უფრო მეტად ინტეგრირებული იქნება ევროპის ერთიან ბაზართან. ყოველთვის ვამბობთ, რომ ჩვენი ქვეყანა პატარაა, მაგრამ რაც შეეხება ბიზნესს და მის მასშტაბებს - როდესაც წვდომა გვექნება ევროკავშირის 27 ქვეყანასთან, რასაკვირველია ეკონომიკის მასშტაბები გაიზრდება და ბიზნესს საშუალება ექნება, რომ როგორც საკუთარ ბაზარს, ასევე, ევროკავშირის ქვეყნების ბაზრებს მოემსახუროს. ძალიან ბევრი სიკეთეები იქნება და მე პირადად, ვფიქრობ, რომ 6-12 თვეში ამას ძალიან ბევრი ბიზნესი უკვე საკუთარ თავზე გამოცდის და იგრძნობს“ - განაცხადა სოსო ფხაკაძემ „ბიზნესპარტნიორთან“.შეგახსენებთ, 8 ნოემბერს ევროკომისიამ საქართველოსთვის კანდიდატის სტატუსის მინიჭების რეკომენდაცია გასცა გარკვეული პირობებით. ევროკავშირში გაწევრიანებისთვის, საქართველომ შემდეგი ეტაპები წარმატებით უნდა გაიაროს: კანდიდატის სტატუსის მინიჭება, გაწევრიანების მოლაპარაკებები და შეთანხმებაზე ხელის მოწერა.ამ დროისთვის ევროკავშირთან ეკონომიკური ურთიერთობის შედეგები ასეთია: 2023 წლის პირველი 9 თვის მონაცემებით, საქართველოს ტურიზმში ევროკავშირის წილი 11%-ია, ექსპორტში - 12%, იმპორტში - 24%, პირდაპირ უცხოურ ინვესტიციებში კი - 43%.

1700821619

კერძო სექტორი მიუთითებს, რომ ფინანსური რესურსი კვლავ  ძვირია, რაც ეკონომიკურ აქტივობას ხელს უშლის. როგორც „დიოს“ მმართველი პარტნიორი  თამაზ დაუშვილი „ბიზნესპარტნიორთან“  აცხადებს, კერძო სექტორისთვის გაძვირებულია როგორც ლარის ისე  სავალუტო სესხები.„სესხზე ხელმისაწვდომობა ბიზნესისთვის არ არის იმდენად დიდი პრობლემა. ბანკები და საფინანსო ინსტიტუტები ამ კუთხით ძალიან მოწადინებულები არიან. რესურსიც არის, რომ მოხდეს მეტი სესხის გაცემა, თუმცა აქ პრობლემა გვაქვს ის, რომ სესხის პროცენტი არის გაზრდილი და გაძვირებულია ზოგადად ფინანსური რესურსი, არა მხოლოდ ჩვენს ქვეყანაში. ალბათ ამასაც გარკვეული დრო სჭირდება, რომ დაბრუნდეს მეტ-ნაკლებად ძველ ნიშნულზე. ბუნებრივია, ფინანსებზე წვდომა არის ერთ-ერთი მთავარი ფაქტორი ეკონომიკის ზრდისთვის.“-აღნიშნავს თამაზ დაუშვილი.მისივე თქმით, ბიზნესს აქვს მოლოდინი, რომ შემცირდება რეფინანსირების განაკვეთი და ლარში დაკრედიტება უფრო ხელმისაწვდომი გახდება.„ლარის სესხიც და სავალუტო სესხიც გაძვირებულია.  ინფლაცია მიზნებრივ, სასურველ მაჩვენებელთანაა და შესაბამისად, ეს მოლოდინი, რომ შემცირდება რეფინანსირების განაკვეთი და ლარში დაკრედიტება უფრო ხელმისაწვდომი გახდება, ყველას გვაქვს. ყველა, მათ შორის ეროვნული ბანკიც დაინტერესებულია, რომ  სესხები გაიფდეს.“-აღნიშნა თამაზ დაუშვილმა.ცნობისთვის, 2023 წლის სექტემბერში, იურიდიულ პირებზე ეროვნული ვალუტით გაცემული სესხების საპროცენტო განაკვეთი 0.4 პროცენტული პუნქტით შემცირდა და 12.9% შეადგინა.  რაც შეეხება სავალუტო სესხებს, აქ პირიქით ზრდა ფიქსირდება და  სექტემბერში, წინა თვესთან შედარებით, იურიდიულ პირებზე უცხოური ვალუტით გაცემული სესხების საპროცენტო განაკვეთი 0.3 პროცენტით 9.2%-მდე გაიზარდა.  ეროვნული ბანკის მონაცემებით, 2023 წლის სექტემბერში იურიდიულ პირებზე 1.1 მილიარდი ლარის სესხები გაიცა. ყველაზე დიდი მოცულობის სესხი ვაჭრობის სექტორშია, დაკრედიტების მიხედვით პირველ სამეულშია მრეწველობისა და მშენებლობის სექტორები.

1700814135

საზოგადოებრივი მაუწყებლის შენობის ადგილზე მრავალფუნქციური კომპლექსის ასაშენებლად „ვისოლ ჯგუფმა“ საერთაშორისო არქიტექტორები დაიქირავა.როგორც „ბიზნესპარტნიორს“ კომპანიის პრეზიდენტმა სოსო ფხაკაძემ განუცხადა, ვიდრე არხი შენობას შეიცვლის, კიდევ რამდენიმე თვეა საჭირო, მანამდე კი, ჯგუფი საინტერესო კონცეფციაზე მუშაობს.„საზოგადოებრივ მაუწყებელს კიდევ გარკვეული პერიოდი სჭირდება, სანამ ახალ შენობაში გადავა და ამას რამდენიმე თვე კიდევ დასჭირდება მინიმუმ. ჩვენ უკვე დავიქირავეთ ძალიან ცნობილი არქიტექტორები, რომლებიც საერთაშორისო ასპარეზზე მუშაობენ და მათთან ერთად თითქმის ყოველდღიურად ვმუშაობთ ძალიან საინტერესო კონცეფციაზე. ყველა ამ დეტალს - მოვა დრო, ჩვენ საზოგადოებას აუცილებლად გავაცნობთ“ - აცხადებს სოსო ფხაკაძე.მისივე თქმით, დაგეგმილი პროექტი საკმაოდ მსხვილია და განსახორციელებლი ინვესტიციის მოცულობა ათეულობით  მილონ დოლარს აჭარბებს.„არა ათეულ მლნ დოლარზე, არამედ, უფრო დიდ რიცხვზეა საუბარი, მაგრამ ჩვენ ამას გავაკეთებთ ძალიან კარგად - ლამაზი არქიტექტურა, ლამაზი დიზაინი იქნება და ვფიქრობ, რომ თბილისს კიდევ ერთი, ძალიან საინტერესო მულტიფუნქციური კომპლექსი შეემატება“ - აცხადებს სოსო ფხაკაძე „ბიზნესპარტნიორთან“.საქართველოს საზოგადოებრივი მაუწყებლის შენობა "ვისოლ ჯგუფმა" გასული წლის სექტემბერში შეიძინა. კოსტავას ქ.N68-ში მდებარე შენობა და მიწის ნაკვეთი რიგით მერვე აუქციონზე 65 100 000 ლარად გაიყიდა.