1714197600

"სნეპ ფიტნესი" 2024 წელს თბილისში 2 ფილიალის დაამატებას გეგმავს. ქსელის დირექტორი, სოფო სოლოღაშვილი "ბიზნესპარტნიორთან" აცხადებს, რომ თითოეულის ინვესტიცია, დაახლოებით, 1.5 მლნ ლარი იქნება.მისივე ინფორმაციით, ერთი ფილიალი სექტემბერში გაიხსნება, ხოლო მეორესთან დაკავშირებით მოლაპარაკებები მიმდინარეობს.„დიდ დიღომში მირიან მეფის ქუჩაზე გაიხსნება ერთი ფილიალი. ამ ეტაპზე სარემონტო სამუშაოები მიმდინარეობს. რაც შეეხება მეორე ფილიალს, ლოკაცია უკვე შერჩეულია და გარკვეული მოლაპარაკებები მიმდინარეობს, - აღნიშნავს სოლოღაშვილი. მისი განცხადებით, გასულ წელთან შედარებით მომხმარებელთა რაოდენობა დარბაზებში გაზრდილი არ არის. "წინა წელს რუსეთ-უკრაინის ომის გამო, მიგრანტებით დარბაზების აბსოლუტური გადავსება მოხდა. მაგ პერიოდში ჩვენ 1-თვიანი აბონიმენტების გაყიდვა შევაჩერეთ. შესაბამისად, წინა წლის ზრდის ფონზე ვერ ვიტყვი, რომ გაზრდილია, თუმცა ტრენდი შენარჩუნებულია. ჩვენი მომხმარებლების დაახლოებით, 15-20% უცხოელები არიან", - აცხადებს სოფო  სოლოღაშვილი.ცნობისთვის, ამ ეტაპზე, „სნეფ ფიტნესს“ საქართველოს მასშტაბით 4 ფილიალი აქვს.

1714135750

Hualing Plaza კომპანიაში ციფრული ტექნოლოგიების დანერგვას გეგმავს. კერძოდ,დაახლოებით, სექტემბრისთვის განიხილება  ელექტრონული პლატფორმის შექმნა.  როგორც Hualing Group-ის  მარკეტინგის დეპარტამენტის ხელმძღვანელი ნოდარ ჯავახიშვილი „ბიზნესპარტნიორთან“ აცხადებს,  საიტზე   სავაჭრო ცენტრ Hualing Plaza-ში არსებული თითქმის ყველა ბრენდის პროდუქცია იქნება წარმოდგენილი. მისივე თქმით, აღნიშნულის გარდა, სავაჭრო ცენტრი მომხმარებლებს ზაფხულის სეზონზე სხვა სიახლეებსაც შესთავაზებს.„დაახლოებით, 2 წელია ახალ კონცეფციაზე გადავედით, რის შემდეგაც სავაჭრო ცენტრზე მოთხოვნა ლოკაციიდან და კონცეფციიდან გამომდინარე, ძალიან გაიზარდა. პირველი ორი სართული და პავილიონები არის სავაჭრო სივრცეები, ხოლო რაც შეეხება ზედა ორ სართულს - აქ განთავსებულია ოფისები. ჩვენს ცენტრში იუსტიციის სახლია, რომელიც არც ერთ სხვა მოლში არ არის. გარდა ამისა, არის სპორტ დარბაზი, სხვადასხვა ბრენდის მაღაზია, ცეკვის სტუდია, ასევე, ყველაზე დიდი საკონცერტო დარბაზი, ამიერკავკასიაში ყველაზე დიდი სამშენებლო-სარემონტო მასალების ჰიპერმარკეტი „მიჰაუსი“ და ა.შ.ბიზნესის მხრიდან დაინტერესება არის. კონკრეტული ბრენდები მოლოდინის რეჟიმში არიან, კონკრეტულ ბრენდებთან მოლაპარაკებები მიმდინარეობს. მაგალითად, გუშინ გაიხსნა „ნავნეს“ ყველაზე დიდი ობიექტი, რაც იმას ნიშნავს იმას, რომ ჩვენი კონცეფციის შესაბამისი მაღაზიებისთვის სასურველი სივრცე გვაქვს“, - აცხადებს ნოდარ ჯავახიშვილი.მისივე  ინფორმაციით, დღეის მდგომარეობით სავაჭრო ცენტრი Hualing Plaza, დაახლოებით, 90%-ით არის დატვირთული. მისივე თქმით, მოთხოვნა ბიზნესის მხრიდან წლიდან წლამდე იზრდება.ცნობისთვის, Hualing Group-მა საქართველოში ინვესტიციის განხორციელება  2007 წლიდან დაიწყო და ამ დრომდე რამდენიმე მსხვილი საინვესტიციო პროექტი, მათ შორის, Hualing Plaza (თბილისის ზღვის პლაზა) განახორციელა. „თბილისის ზღვის პლაზას“ საერთო სამშენებლო ფართობი 160 000 მ2-ია. სავაჭრო ცენტრი ოფიციალურად 2017 წელს გაიხსნა.

1714132800

„უძრავ ქონებაში ინვესტირება ფაქტია, რომ მიმზიდველი ხდება.“ -ამის შესახებ  „ექსპო ჯორჯიას“ დირექტორმა განაცხადა. რესან ქიქავას თქმით, კანდიდატის სტატუსის მიღებამ ამ კუთხით ინტერესი კიდევ უფრო გაზარდა.„იქიდან გამომდინარე,  რომ კანდიდატის სტატუსი მივიღეთ, ყველას აქვს მოლოდინი, რომ სულ სხვა სურათი გვექნება უძრავი ქონების ბაზარზე. ამიტომ ამ გზაზე  თუ ხელს არაფერი შეგვიშლის, ყველაფერი კარგად იქნება. ეს არის ძირითადი სტიმული, რაც საშუალებას მისცემს საქართველოს, რომ გამოჩნდეს კიდევ უფრო კარგად საინვესტიციო რადარზე. ამ კუთხით გვმართებს ყველას მეტი მუშაობა“,-აღნიშნავს რესან ქიქავა.მისივე თქმით, უძრავი ქონების ბაზრის მიმზიდველობაზე ის ფაქტიც მეტყველებს, რომ უძრავი ქონების ბაზრის გამოფენაზე მონაწილეთა რაოდენობა ყოველწლიურად მზარდია.

1714119577

ჯანსაღი კვების სრული დღიური რაციონის ადგილზე მიტანის სერვისზე მოთხოვნა ყოველწლიურად, დაახლოებით, 30%-მდე იზრდება.როგორც აღნიშნული სერვისის მიმწოდებელი კომპანიის "ინებეს" მენეჯერი ეთი შოშიაშვილი "ბიზნესპარტნიორთან" აცხადებს, მათი მომხმარებლები ძირითადად ადგილობრივები არიან, თუმცა პერიოდულად უცხოელებიც.მისივე თქმით, ჯანსაღი კვების მიმართულება ყოველწლიურად უფრო და უფრო აქტუალური ხდება ."ჩვენს მენიუებს ნუტრიციოლოგები შეფ მზარეულთან ერთად ადგენენ. გვაქვს რამდენიმე დასახელების დიეტის მენიუ და მათგან ყველაზე მოთხოვნადი ექსპრეს დიეტაა. ჩვენი მომხმარებლები ძირითადად არიან 70 წლამდე მოქალაქეები”, - აღნიშნა ეთი შოშიაშვილმა.კომპანიის მენეჯერის განცხადებით, "ინებე" სამომავლოდ ასორტიმენტის გაზრდას და გაფართოებას გეგმავს.ჯანსაღი კვების დღიური რაციონის ადგილზე მიტანის სერვისი თბილისში - “ინებე” ბაზარზე 8 წლის წინ გამოჩნდა. კერძები მათივე სამზარეულოში მზადდება და კომპანიაში ამჟამად 12 ადამიანია დასაქმებული.

1714048662

არემჯის ჟენევის უნივერსიტეტის პროფესორი, რობერტ მორიცი, და ამავე უნივერსიტეტის უფროსი მეცნიერი, შაფაკ სონმეზი სტუმრობდნენ. კომპანიის წამყვან სპეციალისტებთან ერთად, სტუმრებმა მოინახულეს  კომპანიის საბადოები, ჩაატარეს საველე სამუშაოები და აიღეს სამეცნიერო კვლევისათვის საჭირო ნიმუშები. ვიზიტის ფარგლებში გაიმართა სამეცნიერო სემინარიც, რომელსაც არემჯი ჯგუფის გეოლოგიური დეპარტამენტის თანამშრომლები და საქართველოს უმაღლესი სასწავლებლებიდან მოწვეული სტუდენტები და პროფესორები ესწრებოდნენ.  არემჯი უკვე მრავალი წელია თანამშრომლობს ჟენევის უნივერსიტეტთან,  კომპანიის გეოლოგიისა და გრძელვადიანი სამთო დაგეგმარების საკითხებში აღმასრულებელი დირექტორის მოადგილის მალხაზ ნაცვლიშვილისა და კარტირების სამსახურის  ხელმძღვანელის ნინო ფოფხაძის ინიციატივითა და ჩართულობით.  თანამშრომლობა  ბოლნისის საბადოების, მათი გავრცელებისა და არსებული საბადოების გეოლოგიური კრიტერიუმების შესწავლას ითვალისწინებს. „პროფესორი მორიცი და მეცნიერი სონმეზი ძალიან მაღალი კვალიფიკაციის  გეოლოგები არიან და გვსურდა, მათი გამოცდილება, რაც შეიძლება მეტი ადგილობრივი სპეციალისტისთვის გაგვეზიარებინა. სწორედ ამიტომ  დავაორგანიზეთ სემინარის ფორმატის შეხვედრა, მოვიწვიეთ სტუდენტები და პროფესორები. დარწმუნებული ვარ, ყველასათვის ძალიან საინტერესო დღე იყო, რადგან სტუმრებმა გაგვიზიარეს ისეთი ინფორმაცია, რომელიც შეეხებოდა მადნეულის საბადოების გეოლოგიის კუთხით არსებულ ტენდენციებს, თანამედროვე მეთოდების ინტენსიურ გამოყენებას და მსოფლიოში არსებულ საუკეთესო სტანდარტებს გეოლოგიის სფეროში.“ - მალხაზ ნაცვლიშვილი, არემჯის აღმასრულებელი დირექტორის მოადგილე გეოლოგიისა და გრძელვადიანი სამთო დაგეგმარების საკითხებში.„ჩვენი ვიზიტის მიზანი იყო შევხვედროდით არემჯის სპეციალისტებს.  წლებია ვთანამშრომლობთ და კომპანია ყოველთვის ღია იყო ჩვენი უნივერსიტეტის სტუდენტებისთვის. შაფაქ  სონმეზი ერთ-ერთი სტუდენტია, რომელიც ამ თანამშრომლობის ფარგლებში ჩემთან ერთად საქართველოს ეწვია, თუმცა ამ დრომდე გვყოლია სხვა სტუდენტებიც, რომლებიც ჩართულები იყვნენ მსგავს კვლევებში.თანამშრომლობის დაწყებიდან დღემდე, შევძელით შეგვეგროვებინა საკმაო მასალა და ვფიქრობ, რომ ეს კომპანიისთვისაც სასარგებლოა. სასიამოვნოა, რომ შეგვიძლია ქართველ კოლეგებთან ერთად განვიხილოთ ისეთი საკითხები, რაც ერთის მხრივ ჩვენთვის არის საინტერესო, მეორე მხრივ კი - კომპანიისთვის.“ - რობერტ მორიცი, ჟენევის უნივერსიტეტის პროფესორი.„ჟენევის უნივერსიტეტის გეოლოგიის ფაკულტეტთან უკვე 15 წელზე მეტია ვთანამშრომლობთ, არაერთი პროექტი განხორციელებულა შვეიცარიის სამეცნიერო ფონდის, ჟენევის უნივერსიტეტისა და არემჯის ჩართულობით ამ დროის განმავლობაში. უნივერსიტეტის მიერ განხორციელებული კვლევები აკადემიური ხასიათისაა, თუმცა კერძო კომპანიების ასეთი ტიპის კვლევებში ჩართულობა ძალიან მნიშვნელოვანია. ჩვენი მხრიდან უნივერსიტეტს და მის სტუდენტებს საშუალებას ვაძლევთ ჩვენს საწარმოო ტერიტორიაზე ჩაატარონ აკადემიური კვლევებისთვის საჭირო სამუშაოები, ხოლო მეორე მხრივ, უნივერსიტეტი  ყველა ამ მონაცემს და შედეგს, რომელსაც იღებენ ჟენევის და ლოზანას მაღალრეიტინგული ლაბორატორიებიდან სრულად გვიზიარებენ კომპანიას.  ასეთი კვლევებისა და ინტერესების შერწყმა ერთი მხრივ აკადემიური და მეორე მხრივ პრაქტიკული აპრობირებული მეთოდია მსოფლიოს სხვადასხვა კომპანიებში, რაც მეტად ზოგავს დროსა და რესურსებს კომპანიებისთვის და საშუალებას აძლევს მისი ინტერესების განხორციელებას“  - ნინო ფოფხაძე, გეოლოგიის მეცნიერებათა დოქტორი/არემჯის გეოლოგიური კარტირების სამსახურის ხელმძღვანელი. 

1714039200

"ჯინო აკვაპარკის" ღია სივრცეები მაისის დასაწყისში გაიხსნება. როგორც “ბიზნესპარტნიორს” კომპანიაში განუცხადეს, აკვაპარკი ზაფხულის სეზონს სიახლეებით შეხვდება.მათივე ცნობით, ინფრასტრუქტურის მიმართულებით განახლდა ტალღოვანი აუზი, გემი და ასევე, შეიცვალა სამზარეულოს მიმართულება.“სიახლეები ბევრი მიმართულებით იქნება ჩვენს აკვაპარკში. მიუხედავად იმისა, რომ ერთადერთი აკვაპარკი ვართ საქართველოში, მუდმივად ვცდილობთ მომხმარებლებს შევთავაზოთ სიახლეები და განახლებული გარემო. “ჯინოში” გვაქვს რებრენდინგიც, რომლის ფარგლებშიც ჩვენს მომხმარებლებს კიდევ უფრო მეტ ხალისს, დასვენებასა და განსაკუთრებულ გარემოს ვპირდებით. ინფრასტრუქტურის მიმართულებით განახლდა ჩვენი სტუმრების ერთ-ერთი ყველაზე საყვარელი და პოპულარული ტალღოვანი აუზი. მის განახლებაში  საკმაოდ დიდი ინვესტიცია  ჩაიდო. განახლდა  ერთ-ერთი წამყვანი პროდუქტი -  გემი, რომელიც უნიკალურია მისი ვიზუალით და მასაჟორებიანი ჯაკუზით, რომლის ანალოგიც საქართველოში არ არის. ასევე განახლდა სამზარეულოს მიმართულება, არსებულ კერძებს ემატება სხვადასხვა სივრცეები, განსხვავებული კონცეფციებით. ჩვენი შეფი სტუმრებს ამ სეზონზე, მექსიკურ სამზარეულოს, აზიურ კუთხესა და მრავალფეროვან მენიუს შესთავაზებს. დაგვემატება “ჯინოს” საკუთარი ჩამოსასხმელი ლუდი, რომელიც განსაკუთრებული გემოვნური თვისებებით გამოირჩევა. გარდა ამისა,  “ჯინო აკვაპარკი” წელს ხდება 10 წლის, რაც ნიშნავს, რომ ჩვენს ერთგულ მომხმარებლებს აუცილებლად გადავუხდით მადლობას და შევთავაზებთ ლოიალობის პროგრამას, რომელიც საშუალებას მისცემს მათ განსაკუთრებული ბენეფიტებით ისარგებლონ.პირველი ღია ბარი-აუზი გაიხსნა 15 აპრილს. ამინდებმა და ჩვენი მომხმარებლების განსაკუთრებულმა მოთხოვნამ, ღია აუზებთან დაკავშირებით, საშუალება მოგვცა ასეთი ადრეული გახსნა მოგვეწყო. ხვალ ოლიმპიური აუზი იხსნება, ხოლო მაისში მთლიანი კომპლექსი გაიხსნება”, - აღნიშნავენ კომპანიაში.რაც შეეხება მოთხოვნას, როგორც “ჯინოში”  აცხადებენ,  წინა წლის ანალოგიურ პერიოდთან შედარებით, კვარტალური მონაცემებით, ვიზიტორების რაოდენობა დაახლოებით, 30%-ით არის გაზრდილი და ეს ტენდენცია მზარდია.კომპანიის ინფორმაციით, მომხმარებლების ძირითადი ნაწილი (85%) ადგილობრივი ვიზიტორია, ხოლო 15%-ს უცხოელი სტუმრები წარმოადგენენ.„მოთხოვნა მკვეთრად გაზრდილია და შესაბამისი მოლოდინებიც გვაქვს. ვფიქრობთ, რომ სეზონი იქნება ძალიან დატვირთული და თუ აქამდე 2500 სტუმარს ვმასპინძლობდით დღეში, ახლა კიდევ უფრო მეტის შესაძლებლობა გვექნება.მაგალითად, გაორმაგდა მასაჟების რაოდენობა, სტუმრების ვიზიტი სპა სივრცესა და აკვაპარკში. ძალიან მაღალი შედეგები აჩვენა ჩვენმა დაბადების დღის ცენტრმა „ჯინო ჯუნიორმა“, სადაც დაბადების დღეების რაოდენობა თითქმის 40%-ით გაიზარდა.  ძალიან პოპულარულია სკოლის ექსკურსიები, სადაც პატარები გვსტუმრობენ მშობლებთან ან მასწავლებლებთან ერთად და მთელი დღის მანძილზე შემეცნებით და გასართობ ღონისძიებებში იღებენ მონაწილეობას”, - აცხადებენ კომპანიაში.რაც შეეხება ფასებს  - “ჯინო აკვაპარკი” წელს პირველად მომხმარებლებს წინასწარი ჯავშნების სისტემით სარგებლობას სთავაზობს, რისი მიხედვითაც მათი ვიზიტის ფასი შესაძლოა 29 ლარიდან დაიწყოს.გარდა ამისა, კომპანიაში აცხადებენ, რომ მომხმარებლები გასულ სეზონებზე უფრო ხშირად დღიურ აბონემენტებს ყიდულობდნენ.“გვინდა შესაძლებლობა მივცეთ ნებისმიერ ადამიანს გვესტუმროს და ისარგებლოს ყველა იმ ბენეფიტით, რომელსაც სხვაგან საქართველოში და უფრო მეტიც, ამიერკავკასიაშიც კი ვერ მიიღებენ. ფასების პოლიტიკა იქნება აბსოლუტურად განსხვავებული.ჩვენს პროდუქტებზე ვრცელდება, როგორც რამდენიმე თვიანი, ასევე დღიური ვიზიტის აბონემენტები. დიდი წილი ამ მიმართულებით დღიურ აბონიმენტებს უჭირავს, თუმცა ჩვენს ვებგვერდზე შეინიშნება ტენდენცია, რომ იზრდება უფრო გრძელვადიანი აბონიმენტების რეალიზაციაც”, - აცხადებენ კომპანიაში.როგორც “ჯინო აკვაპარკში” აცხადებენ, აკვაპარკმა ზამთრის სეზონიც წარმატებით დაასრულა და წინა წლის ზამთრის მონაცემებთან შედარებით, ვიზიტორთა და შემოსავლის რაოდენობა მკვეთრად იყო გაზრდილი.“ჩვენ რამდენიმე განსაკუთრებული პროდუქტი გვაქვს, რომელიც ზამთრის სეზონზე ზაფხულს გვანარჩუნებინებს ჩვენს სივრცეში. სპა, რომელიც 6 საუნას მოიცავს, მათ შორის საუნებს, რომლის ანალოგიც თბილისში არ არსებობს. გვაქვს პრივატული სპა „ექსელენთ“ სივრცე, სადაც ხშირად იგეგმება დახურული ღონისძიებები, დაბადების დღეები და ა.შ. ამ სივრცეში მომხმარებლებს საშუალება აქვთ ყველა საუნით ისარგებლონ, აქვეა ღვინის და ლუდის აბაზანები, კლეოპატრას აბაზანა და საკუთარი ტერასა. ზამთარში განსაკუთრებულად პოპულარულია დახურული აუზები და გემის ჯაკუზი. მნიშვნელოვანია, რომ მოთხოვნის გაზრდის ნიშნები ჩვენს აკვაპარკში ზამთრის სეზონზევე შეინიშნებოდა. ეს კი გამოწვეულია ჩვენი პროდუქტების მრავალფეროვნებით. ჩვენი დახურული აუზები და უნიკალური სპა სივრცე შესაძლებლობას ქმნის ოთხივე სეზონზე თავი იგრძნოთ კურორტზე, რომელიც საკუთარ ქალაქშივეა”, - აცხადებენ კომპანიაში.ცნობისთვის, “ჯინო აკვაპარკი” - კურორტი თბილისში, მოიცავს აკვაპარკს დახურული და ღია საცურაო აუზებით, ტოპოგანს 6 სლაიდით, დაბადების დღის ცენტრს „ჯინო ჯუნიორს“, უნიკალურ სპა სივრცეს, პირად სპას „ექსელენთ სივრცეს“ სავარჯიშო დარბაზს და ასევე, გემს უნიკალური ჯაკუზით და მასაჟორებით.

1714030982

სახლიდან დაწყებული ბიზნესი  "ფუსფუსი" გაფართოვდა და მომხმარებლებს უკვე ფიზიკურ სივრცეში მიიღებს. როგორც მეწარმე ნათია ყურბუშაძე  "ბიზნესპარტნიორთან“ აცხადებს,  "ბუტიკ კაფე" ფუსფუსი“ 9 მარტს გაიხსნა და მომხმარებლებს ტკბილეულსა და სხვადასხვა სახეობის დესერტებს სთავაზობს, როგორიცაა ნამცხვრები, ტორტები, ფუმფულა (პონჩიკები), პასკები, სენდვიჩების ხუთი სახეობა და ლიმონათები.აქამდე საოჯახო სამზარეულოში დამზადებული პროდუქციის შეძენა ონლაინ  იყო შესაძლებელი, მოქმედებდა ადგილიდან გატანის სერვისიც. როგორც ყურბუშაძე აცხადებს, პროდუქციის რეალიზაცია ახლა უკვე შესაძლებელი იქნება როგორც ონლაინ, ისე ფიზიკურ სივრცეში.  პროექტი საქართველოს ბანკის მხარდაჭერით განხორციელდა, რისთვისაც მეწარმემ ბანკისგან 35 000 ლარიანი სესხი მიიღო.კონკრეტულად, თუ რა შესაძლებლობას მისცემს კვების ობიექტის  გახსნა, კონდიტერი პასუხობს, რომ დაახლოებით ორ თვეში გამოიკვეთება, როცა რეალური სარგებელი ცნობილი გახდება.‘’ოთხ წელზე მეტხანს  ბიზნესს სახლიდან ვაკეთებდი, რის გამოც სესხის დამტკიცებასთან დაკავშირებით პრობლემა იყო. შემოსავალს ვერ ვადასტურებდი ისე, როგორც  სტანდარტი ითხოვდა.  თუმცა ბანკმა გამონაკლისი დაუშვა.  ბუტიკ კაფეს მეშვეობით წარმოებას უკვე საჯაროდ, განსხვავებულ გარემოში ვქმნი, რაც წარმოების ზრდის დიდ შესაძლებლობას მაძლევს“, - აცხადებს ნათია ყურბუშაძე.მისი განცხადებით, დამწყების ბიზნესისთვის გარკვეული გამოწვევა ნედლეულის არასტაბილური ფასი და იჯარის მაღალი გადასახადია.„სირთულეს ქმნის ფასის არასტაბილურობა, რაც ამ ტიპის საქმიანობაში გარკვეული დაბრკოლებაა.  საკმაოდ ხშირად იცვლება ფასი და წარმოებაზეც აისახება, რაც მომხმარებელთან უხერხულობას ქმნის. მაქსიმალურად ვცდილობ, დისკომფორტი არ შევუქმნა მყიდველს და ხშირად არ ვცვალო ფასი, როგორც ადრე ვაკეთებდი.ერთ-ერთი გამოწვევაა იჯარის მაღალი გადასახადიც,  რეალტორებს კომერციულ ფართებზე აქვთ მაღალი გადასახადები, რაც მცირე მეწარმეებისთვის დიდი პრობლემაა. მეტი განვითარებისა და წარმატებისთვის ეს ფაქტორიც ხელისშემშლელია, რასაც ვცდილობ, გავუმკლავდე“ -  აცხადებს ნათია ყურბუშაძე.ამ ეტაპზე ‘’ფუსფუსი“ ინდივიდუალურ შეკვეთებზეც მუშაობს. კონდიტერის  ინფორმაციით, ამ ეტაპზე შეკვეთებს ძირითადად პასკებზე იღებს. დაგეგმილია 1000-მდე ერთეული პასკის წარმოება, რომლის სარელიზაციო ფასი 29 ლარია (600 გრამიანი შეფუთვა).რაც შეეხება კომპანიის სამომავლო გეგმას,  ყურბუშაძის თქმით,  მაქსიმალურად შეეცდება, რომ  საკონდიტრო არ იყოს  ადგილი, სადაც მხოლოდ მენიუზე იმუშავებენ, არამედ სივრცე ქალთა შეკრებების, აზრთა გაზიარებისა და ახალი აღმოჩენებისთვის.ცნობისთვის,  ‘’ფუსფუსი“ სახლურ პირობებში დამზადებულ ტკბილეულს მომხმარებელს 2021 წლიდან სთავაზობს. ამავე დასახელების ბუტიკ კაფე საბურთალოზე, სვიმონ კანდელაკის ქუჩაზე მდებარეობს.

1714018980

ამჟამად, ქართული ავტობაზარი ჩინურ მანქანებს ტესტავს, - ამის შესახებ „ბიზნესპარტნიორს“  ავტოიმპორტიორთა ასოციაციის თავმჯდომარემ, ალექსი ნონიაძემ განუცხადა.მისი თქმით, საქართველოში ჩინეთიდან მანქანების იმპორტის ზრდა შეინიშნება. ოფიციალური სტატისტიკური მაჩვენებლების თანახმად, 2024 წლის პირველ ორ თვეში ქვეყანაში 5 მილიონი დოლარის ღირებულების მანქანა შემოვიდა, რაც წინა წლის ანალოგიურ პერიოდს 80%-ით აღემატება. ამასთან, 658%-ით გაიზარდა იმპორტი 2022 წლის იანვარ-თებერვალთან შედარებით, როცა საქართველოდ ჩინეთიდან 687 ათასი დოლარის ღირებულების ავტომობილი შემოიყვანეს. რაც შეეხება ელექტრო ავტომობილების იმპორტს, აქაც აღმავალი ტრენდი ფიქსირდება.„თუმცა, საბოლოო ჯამში, ჩინური მანქანების წილი ქართულ ბაზარზე დღეს ძალიან მცირეა და მაღალი სტატისტიკური მაჩვენებლები უკავშირდება იმას, რომ წინა წლებში ჩინური მანქანების იმპორტი თითქმის არ ხდებოდა, ან ძალიან მცირე რაოდენობით ხდებოდა“, - აღნიშნა ალექსი ნონიაძემ.ავტოდილერების ნაწილი ფიქრობს, რომ ჩინეთიდან მსუბუქი ავტომობილების იმპორტის ზრდას ხელი, შესაძლოა, ახალმა რეგულაციამ შეუწყო, რომლის მიხედვითაც, 2024 წლის იანვრიდან, საქართველოში 10 წელზე მეტი წლოვანების ავტომობილების იმპორტი აიკრძალა. მათი თქმით, მას შემდეგ, რაც 2013 წლამდე გამოშვებული ავტომობილების შემოყვანა, განბაჟება აიკრძალა, ახალ ავტომობილებზე წამოვიდა მოთხოვნა. ჩინეთი კი ერთ-ერთია იმ ბაზრებიდან, საიდანაც ახალი და ამავე დროს, შედარებით ბიუჯეტური ავტომობილების ჩამოყვანაა შესაძლებელი.„ახლა ქართული ბაზარი ჩინურ მანქანებს ტესტავს, რამდენად გაამართლებს მათი შემოყვანა საქართველოში და შემდეგ გამოიკვეთება, კიდევ გაგრძელდება თუ არა ჩინეთიდან იმპორტი“, - განმარტა ავტოიმპორტიორთა ასოციაციის თავმჯდომარემ.რაც შეეხება საავტომობილო ბიზნესში არსებულ სხვა სიახლეებს და რეალიზაციას როგორც ადგილობრივ, ისე უცხოურ ბაზრებზე - ექსპორტის კუთხით, მიმდინარე წლის პირველ კვარტალში, ავტოდილერები მცირე ზრდაზე საუბრობენ და ამბობენ, რომ დღევანდელი მოცემულობით, საქართველოდან ყველაზე დიდი რაოდენობით მანქანები ყირგიზეთში, ყაზახეთსა და აზერბაიჯანში იყიდება. საექსპორტო ბაზრებზე ყველაზე მოთხოვნადი 20 ათასი დოლარის ღირებულების მანქანებია, მაშინ როცა წინა წლებში ეს მაჩვენებელი 10 ათასი დოლარის ფარგლებში იყო.ადგილობრივ ბაზარზე კი ისევ საავტომობილო პროფიციტია და კვლავ ფინანსური კრიზისის წინაშე არიან ამ ბიზნესით დაკავებული ადამიანები. საქართველოს ავტოიმპორტიორთა ასოციაციაში ამბობენ, რომ ავტოდილერების უმეტესობას უწევს ჩამოყვანილი მანქანები არათუ თვითღირებულებით, არამედ, თვითღირებულებაზე ნაკლებ ფასში გაყიდოს, რადგან, თვეებია ჩამოყვანილი ჰყავთ მანქანები და რეალიზაციას ვერ ახდენენ. აქედან გამომდინარე, ავტომობილების იმპორტის მაჩვენებლებში კვლავ კლება ფიქსირდება. მაგალითისთვის, 2024 წლის იანვარ-თებერვალში საქართველომ 258 მილიონი დოლარის ღირებულების ავტომობილები შეიძინა, რაც წინა წლის ანალოგიურ პერიოდთან შედარებით, თითქმის 36%-ით შემცირებული მაჩვენებელია.

1713974400

სანთლების მწარმოებელი კომპანია „ანათე“ თბილისში ბრენდული მაღაზიის გახსნას გეგმავს. როგორც კომპანიის დამფუძნებელი ქეთევან კანდელაკი „ბიზნესპარტნიორთან“ აცხადებს, მაღაზიაში სანთლების გარდა, წარმოდგენილი იქნება სადგამები და სანთლის შექმნისთვის საჭირო პროდუქტები.მისივე ინფორმაციით, სანთლებზე მოთხოვნა წინა წელთან შედარებით, 70%-ით არის გაზრდილი.„მოთხოვნა ძირითადად თემატურ პროდუქციაზეა ხოლმე. მაგალითად, ახლა მოთხოვნაა სააღდგომო, კვერცხის ფორმის და საეკლესიო სიმბოლიკის სანთლებზე. ჩვენ შეკვეთები გვაქვს, როგორც საქართველოდან, ასევე უცხოეთიდან, ემიგრანტებისგან.ამჟამად ონლაინ ხდება ჩვენი პროდუქციის რეალიზაცია, თუმცა პერიოდულად გვაქვს ხოლმე სტენდები გახსნილი. ვგეგმავ, რომ ბრენდული მაღაზია გავხსნა, რადგან დაინტერესება ძალიან დიდია. სავარაუდოდ, სექტემბრიდან გაიხსნება მაღაზია. აღნიშნული პროექტის ინვესტიცია დაახლოებით, 15 000 ლარი იქნება. ლოკაცია უკვე შერჩეული გვაქვს, ეს იქნება თავისუფლების მოედანზე, სავაჭრო ცენტრში“, - აცხადებს ქეთევან კანდელაკი.გარდა ამისა, კომპანიის დამფუძნებლის ინფორმაციით, „ანათე“ დაახლოებით, 2 კვირაში ახალ პროდუქტს - სანთლის სადგამებს გამოუშვებს.„გამოიხატა ინტერესი სადგამების მიმართულებით და აქედან გამომდინარე, გადავწყვიტეთ აღნიშნულზე მუშაობის დაწყება“, - აცხადებს ქეთევან კანდელაკი.ცნობისთვის, სანთლების მწარმოებელი კომპანია „ანათე“ ბაზარზე 2 წლის წინ გამოჩნდა. კომპანია სანთლებს სოიოს ცვილითა და სურნელოვანი ეთერზეთებით ამზადებს. საწარმო თბილისში, ვაზისუბანში მდებარეობს და ამ ეტაპზე პროდუქციის შეძენა ონლაინ არის შესაძლებელი.