logo
Loading data...
1718985120
დავით ნარმანიამ GWP-ის ხელმძღვანელობისგან წყალმომარაგების ცენტრალურ მილსადენზე მიმდინარე სამუშაოებზე დეტალური ანგარიში მოისმინა

საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარემ, დავით ნარმანიამ ადგილზე შეაფასა წიწამურის მიმდებარედ წყალმომარაგების ცენტრალურ მაგისტრალურ მილსადენზე მიმდინარე სამუშაოები, რომელზეც სემეკი მონიტორინგს 16 ივნისიდან ახორციელებს.სემეკის თავმჯდომარემ ტექნიკური საკითხების შესახებ დეტალური ინფორმაცია მიიღო შპს „ჯორჯიან უოთერ ენდ ფაუერის“ ხელმძღვანელი პირებისგან, რომლებიც უშუალოდ არიან ჩართულნი მაგისტრალური მილსადენის აღდგენით სამუშაოებში.„ჯორჯიან უოთერ ენდ ფაუერის“ მიერ სამუშაოები ხორციელდება 24 საათიან რეჟიმში. სემეკის წყალმომარაგების დეპარტამენტი მონიტორინგს უწევს პროცესის ინტენსივობასა და ხარისხს. კომპანიამ გამოიყენა ყველა შესაძლებლობა, რომ რაც შეიძლება მოკლე დროში დასრულდეს სამუშაოები და სრულად აღდგეს წყალმომარაგება.სრულად გასაგებია მოსახლეობის მწვავე რეაქცია წყალმომარაგების საგანგებო რეჟიმთან დაკავშირებით. „ჯორჯიან უოთერ ენდ ფაუერი“ 24 საათიან რეჟიმში მოსახლეობას აწვდის ინფორმაციას წყალმომარაგების განრიგისა და სასმელი წყლის ცისტერნების განთავსებასთან დაკავშირებით.2023 წლის დეკემბერში, კომისიამ შეითანხმა „ჯორჯიან უოთერ ენდ ფაუერის“ მიერ წარმოდგენილი საინვესტიციო პროექტები და განისაზღვრა სარეაბილიტაციო სამუშაოების განხორციელება პრობლემურ და მწვავე ლოკაციებზე. პროექტების შეთანხმებისას, წიწამურთან არსებული მილსადენი სარეაბილიტაციო სამუშაოებს არ საჭიროებდა. შესაბამისად, საინვესტიციო გეგმის ფარგლებში მილსადენზე სამუშაოების განხორციელება დღის წესრიგში არ დამდგარა“, - განაცხადა დავით ნარმანიამ.დავით ნარმანიასთან ერთად წყალმომარაგების ცენტრალურ მაგისტრალურ მილსადენზე მიმდინარე სამუშაოები დაათვალიერეს სემეკის წევრებმა და სემეკის წყალმომარაგების დეპარტამენტის წარმომადგენლებმა.

1718621038

"წელს ბევრი ელექტროსადგური შევა ექსპლუატაციაში, აქტიურად ხორციელდება ინვესტიციები" - ლევან დავითაშვილი

საქართველოს მთავრობამ განახლებადი ენერგიის პროექტების მხარდაჭერის არსებულ სქემაში ცვლილება შეიტანა. პირველი ვიცე-პრემიერის, ეკონომიკისა და მდგრადი განვითარების მინისტრის ლევან დავითაშვილის განცხადებით, მხარდაჭერის ახალი მექანიზმი განახლებადი ენერგორესურსების ათვისების მიმართულებით პროცესს მნიშვნელოვნად დააჩქარებს და ინვესტიციებს წაახალისებს.მთავრობის ადმინისტრაციაში გამართულ ბრიფინგზე ლევან დავითაშვილმა განაცხადა, რომ საერთაშორისო პარტნიორებთან, საერთაშორისო სავალუტო ფონდთან და მსოფლიო ბანკთან მჭიდრო თანამშრომლობით მთავრობამ ჩამოაყალიბა განახლებადი ენერგიების ათვისების მხარდაჭერის მექანიზმი. მისი თქმით, საუბარია ფიქსირებული ფასის მხარდაჭერაზე, რაც პრინციპული ფაქტორია კომერციული რისკების დასაზღვევად ენერგეტიკული პროექტების განხორციელებისას და ამან მეტ დეველოპერს, კერძო ინვესტორს მისცა საშუალება, რომ განახლებადი ენერგიების პროექტებში განეხორციელებინათ ინვესტიციები. განახლებადი ენერგიის პროექტების მხარდაჭერის არსებულ სქემაში შეტანილი ცვლილების შესახებ პირველმა ვიცე-პრემიერმა აღნიშნა, რომ ის საშუალებას მისცემს მთავრობას აუქციონებზე დაფიქსირებული ფასით პოტენციურ ინვესტორებს ენერგეტიკული პროექტების განხორციელება შესთავაზოს. „ჩვენ საშუალება გვექნება, რომ იქიდან გამომდინარე, რომ იყო ძალიან დიდი მოთხოვნა, ბევრად უფრო მეტი, ვიდრე ჩვენ შევძელით 1100 მგვტის სიმძლავრის პროექტებისთვის ფასის შეთავაზება, მაღალი კონკურენციის პირობებში ჩამოყალიბებული, საკმაოდ რეალისტური ფასის შემთხვევაში ინვესტორებს მივცეთ პირდაპირი მოლაპარაკებით ასეთი პროექტების განხორციელების საშუალება. ეს მოგვცემს იმის საშუალებას, რომ ბევრად უფრო სწრაფად და მოქნილად მოვახდინოთ პროექტების მხარდაჭერა მიმდინარე წლის განმავლობაში. ყველა ის პროექტი, რომელიც მონაწილეობდა აუქციონში და გამომდინარე იქიდან, რომ სიმძლავრის კვოტა იყო შეზღუდული, მათ უკვე შეეძლებათ, რომ მიზანშეწონილი პროექტები, რომლებიც ტექნიკურ - ეკონომიკური კუთხით დასაბუთებულია და საქართველოს კანონმდებლობასთან შესაბამისობაშია, სამინისტროსთან პირდაპირი მოლაპარაკებით მიიღონ მხარდაჭერის სქემა, მიიღონ კონკრეტული ფიქსირებული ფასი არაუმეტეს იმისა, რაც მედიანურად დაფიქსირდა სხვადასხვა ტიპის პროექტებზე, და ამ შემთხვევაში, თუ ისინი სურვილს გამოთქვამენ, რომ განახორციელონ პროექტები, სახელმწიფო ამას ხელს შეუწყობს. ვფიქრობ, რომ ეს მნიშვნელოვნად დააჩქარებს პროცესს და წაახალისებს ინვესტიციებს განახლებადი ენერგორესურესების მიმართულებით,“ - აღნიშნა პირველმა ვიცე-პრემიერმა.  ლევან დავითაშვილი ასევე შეეხო ისეთ პროექტებს, რომლებიც ვერ ხორციელდებოდა. „აქაც მკაფიო მექანიზმები გვაქვს - გაზრდილი გარანტიების კუთხით მოთხოვნები. ამიტომ კვალიფიციური დეველოპერები შეძლებენ, მიიღონ მხარდაჭერა სახელმწიფოს მხრიდან და განახორციელონ ინვესტიციები. ვფიქრობ, ეს მნიშვნელოვანი შედეგის მომტანი იქნება შემდეგ წლებში. თუ ჩვენ მიმდინარე წელს მნიშვნელოვან სიმძლავრეებს მხარს დავუჭერთ და მოხდება ე.წ. ბიუროკრატიული პროცედურების დასრულება, ამ შემთხვევაში, მომავალ წლებში გვექნება ამ პროექტებში იქნება საკმაოდ მაღალი დინამიკა ინვესტიციების ხილვის კუთხით. მიმდინარე წელიც ძალიან აქტიურია, ბევრი სადგური შევა ექსპლუატაციაში. აქტიურად მიმდინარეობს ინვესტიციები და განსაკუთრებით აქტიური იქნება, ჩვენი მოლოდინით, 2025 – 26 წლები,“ - აღნიშნა პირველმა ვიცე-პრემიერმა.

1718610055

სემეკთან არსებულ ენერგეტიკის სასწავლო ცენტრში მიმდინარე "ვიშეგრადის" პროექტის ფარგლებში კომუნალურ მომსახურებებზე საინფორმაციო ბიულეტენები გამოქვეყნდა

საქართველოს ენერგეტიკისა და წყალმომარაგების მარეგულირებელ ეროვნულ კომისიასთან (სემეკ) არსებულ ენერგეტიკის სასწავლო ცენტრში ვიშეგრადის საერთაშორისო ფონდის (IVF) მხარდაჭერით, მიმდინარე პროექტის ფარგლებში პოლონეთისა და სლოვაკეთის გამოცდილების გაზიარების მიზნით კომუნალური მომსახურების მარეგულირებელი ჩარჩოს შესახებ საინფორმაციო ბიულეტენები გამოქვეყნდა. დოკუმენტის ავტორები არიან  სლოვაკეთის საგარეო პოლიტიკის ასოციაციის კვლევითი ცენტრი (RC SFPA) და ფონდი "პარტნიორები კლიმატისთვის" (P4C).საინფორმაციო ბიულეტენები შეეხება პარტნიორ ქვეყნებში  კომუნალური მომსახურებების, მომხმარებელთა უფლებების დაცვის კუთხით არსებულ მდგომარეობასა და საკანონმდებლო ბაზის მიმოხილვას.  დოკუმენტები განთავსებულია პროექტის საიტზე:ვიშეგრადის საერთაშორისო ფონდის (IVF) მხარდაჭერით, საქართველოს ენერგეტიკისა და წყალმომარაგების მარეგულირებელ ეროვნულ კომისიასთან (სემეკ) არსებულმა ენერგეტიკის სასწავლო ცენტრში პროექტი განხორციელება სახელწოდებით: „ვიშეგრადის ქვეყნების გამოცდილების გაზიარება კომუნალური მომსახურების რეგულირების შესახებ“.პროექტის პარტნიორები არიან: სლოვაკეთის საგარეო პოლიტიკის ასოციაციის კვლევითი ცენტრი (RC SFPA) (სლოვაკეთი), კარლის უნივერსიტეტის გარემოსდაცვითი ცენტრი (ჩეხეთი), ფონდი "პარტნიორები კლიმატისთვის" (P4C) (პოლონეთი).პროექტის მიზანია პოლონეთის, ჩეხეთისა და სლოვაკეთის გამოცდილების გაზიარება საქართველოსთვის კომუნალური მომსახურების რეგულირების საკითხებში. მარეგულირებელი ბაზის შესწავლა, ანალიზი და მიღებული შედეგების საფუძველზე, ვიშეგრადის ქვეყნების საუკეთესო პრაქტიკის გათვალისწინებით, პროექტის ადგილობრივი მონაწილეების  შესაძლებლობების განვითარების ხელშეწყობა.  პროექტის ფარგლებში შექმნილია სპეციალური ვებგვერდი www.v4share.comპროექტის ფარგლებში გათვალისწინებულია კომუნალური მომსახურების მარეგულირებელი ჩარჩოს შესახებ კვლევითი დოკუმენტის შემუშავება, საუკეთესო საერთაშორისო პრაქტიკული მაგალითების მომზადება, ვიშეგრადის ქვეყნების პარტნიორების მიერ სტატიების მომზადება, საგანმანათლებლო ღონისძიებების -ტრენინგებისა და საჯარო ლექციების ორგანიზება. პროექტის სხვადასხვა აქტივობები განხორციელდება  სამეგრელო-ზემო სვანეთის რეგიონში. პროექტი დასრულდება 2025 წლის თებერვალში.ვიშეგრადის საერთაშორისო ფონდი  (IVF)ვიშეგრადის საერთაშორისო ფონდი (IVF) ახორციელებს რეგიონული თანამშრომლობის მხარდაჭერას სამოქალაქო საზოგადოების ორგანიზაციებს შორის ურთიერთობების გაღრმავების, იდეების გაცვლისა და ურთიერთთანამშრომლობის ხელშეწყობის მიზნით. ფონდი მხარს უჭერს  ცენტრალურ ევროპაში ევროპული ღირებულებების პოპულარიზაციას, ისწრაფვის გააძლიეროს კავშირები უკეთესი მომავლის შექმნისთვის.ელიზბარ ერისთავის ენერგეტიკის სასწავლო ცენტრი  ელიზბარ ერისთავის ენერგეტიკის სასწავლო ცენტრი (ENTC), რომელიც დაარსდა საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) მიერ, აძლიერებს დაინტერესებული მხარეების შესაძლებლობებს ელექტროენერგიის, ბუნებრივი გაზის, წყალმომარაგებისა და მელიორაციის სექტორებში. საგანმანათლებლო პროგრამების, ცნობიერების ამაღლებისა და ცოდნის გაცვლის გზით ცენტრი პასუხობს სექტორებში არსებულ გამოწვევებს, ხელს უწყობს თანამშრომლობას და იყენებს ინოვაციურ ინსტრუმენტებს  ქვეყნის ენერგეტიკული მომავლის გაძლიერებისათვის.პროექტის პარტნიორები:  სლოვაკეთის საგარეო პოლიტიკის ასოციაციის კვლევითი ცენტრი (RC SFPA)სლოვაკეთის საგარეო პოლიტიკის ასოციაციის კვლევითი ცენტრი (RC SFPA) ბრატისლავაში დაფუძნებული ანალიტიკური ცენტრია, რომელიც ხელს უწყობს ინფორმირებულ საგარეო პოლიტიკას დამოუკიდებელი კვლევის, აქტიური დებატებისა და გადაწყვეტილების მიმღებთათვის, პრაქტიკული რეკომენდაციების მეშვეობით. კრიტიკული ანალიზის გამოყენებით და საზოგადოების ჩართულობით, ორგანიზაცია აქვეყნებს მრავალფეროვან პუბლიკაციებს, მასპინძლობს საერთაშორისო ექსპერტთა ფორუმებს და აძლიერებს მომავალ თაობებს, რათა გაუმკლავდნენ გლობალურ გამოწვევებს.კარლის უნივერსიტეტის გარემოსდაცვითი ცენტრი, ჩეხეთი კარლის უნივერსიტეტის გარემოსდაცვითი ცენტრი, როგორც კარლის უნივერსიტეტის ნაწილი, არის წამყვანი დაწესებულება გარემოსდაცვითი კვლევის სფეროში, რომელიც საქმიანობას ახორციელებს სოციალურ-ეკონომიკური მიმართულებით. ცენტრი უზრუნველყოფს საკონსულტაციო და საექსპერტო მხარდაჭერას, როგორც უნივერსიტეტის თანამშრომლებისა და სტუდენტებისთვის, ასევე ფართო საზოგადოებისთვის გარემოსდაცვით და ენერგეტიკის ეკონომიკის სფეროში მდგრადობის ინდიკატორებისა და განათლების მხარდაჭერისთვის, პროეკოლოგიური ქცევის ჩამოყალიბებისთვის.ფონდი "პარტნიორები კლიმატისთვის" (P4C), პოლონეთი  ფონდი "პარტნიორები კლიმატისთვის" (P4C) მოქმედებს, როგორც აქტივატორი პოლონეთსა და მის ფარგლებს გარეთ ნეიტრალური  კლიმატის მომავლის შექმნის მიზნით. მხარდაჭერილი ინიციატივებით, რომელთა მიზანია CO2-ის ემისიების შემცირება, P4C ხელს უწყობს რეალურ ცვლილებებს ადგილობრივ და საერთაშორისო დონეზე. P4C მიისწრაფვის  მდგრადი მომავლის უზრუნველყოფისკენ.

1718605240

"ბირჟის ეტაპობრივად გასახსნელად ყველა მომხმარებელი მომზადებულია" - კახაბერ ქებურია

სამი წელია სიმულაციური ვაჭრობა მიმდინარეობს და ყველა მომხმარებელი მომზადებულია ბირჟის ეტაპობრივად გასახსნელად - ამის შესახებ საქართველოს ელექტროენერგეტიკული ბაზრის ოპერატორის (ესკო) გენერალური დირექტორი კახაბერ ქებურია აცხადებს.მისი თქმით, 6-ჯერ გადავადებული ბირჟა 1 ივლისს არასავალდებულო რეჟიმში გაიხსნება - სხვადასხვა უწყებების ჩართულობით შემუშავებულია მოდელი, რომელიც გარდამავალ მოდელს გულისხმობს და რომელიც, ამ ფორმატში მხოლოდ 1 წელი იმუშავებს.„დღეს არსებული მოდელით, ესკო-სთან მუშაობა იქნება ისევ უცვლელი, ანუ, არანაირი ვალდებულება არ შემოდის, უბრალოდ მონაწილეებს შესაძლებლობა მიეცემათ რომ პლატფორმაზე უფრო იაფად შეისყიდონ ელექტროენერგია, ვიდრე ეს დღეს არის ბაზარზე. ასევე, ვინაიდან დღეს ძალიან დიდი ინვესტიციებია ენერგეტიკაში და მიმდინარეობს ძალიან დიდი პროექტები, ინვესტორებს შესაძლებლობა ექნებათ უფრო კარგ ფასად გაყიდონ ელექტროენერგია.პირველ ეტაპზე, ბირჟაზე მონაწილეობას მიიღებს ყველა გარდა ექსპორტიორების, იმპორტიორებისა და ტრეიდერებისა. ხოლო ერთი წლის შემდეგ, ყველას გაუჩნდება მონაწილეობის ვალდებულება. ბირჟა საფეხურებრივად იხსნება და მოწინავე ქვეყნების გამოცდილებაც ასეთია“ - განმარტავს კახაბერ ქებურია.მისივე თქმით, გარდამავალი მოდელი მოიწონა Europex-მაც - ევროპის ენერგეტიკული ბირჟების გაერთიანებამ, ასევე, „ევროპის ენერგეტიკულმა გაერთიანებაც“, რადგან რისკები მინიმუმამდეა დაყვანილი.„სამი წელია სიმულაციური ვაჭრობა მიმდინარეობს და ყველა მომხმარებელი მომზადებულია. კიდევ ერთ წელიწადში, შესაძლებლობა ექნებათ ელექტროენერგია რეალურად იყიდონ და გაყიდონ. ჩვენც დავაკვირდებით ყველა მომხმარებელს, როგორ წარიმართება ვაჭრობა და უკვე ერთ წელიწადში შესაძლებელი იქნება სამიზნე მოდელის გახსნა. მანამდე კი, ბირჟაზე საშუალება იქნება მონაწილეებმა ელექტროენერგია შეისყიდონ უფრო დაბალ ფასად ვიდრე დღეს ეს აქვთ მწარმოებლებს“ - ამბობს კახაბერ ქებურია.energynews.ge 

1718353966

საქართველოსა და ისლანდიას შორის გეოთერმული ენერგიების განვითარების შესახებ მემორანდუმი გაფორმდა

საქართველო და ისლანდია გეოთერმული ენერგიების განვითარების სფეროში თანამშრომლობაზე შეთანხმდნენ.ურთიერთგაგების მემორანდუმს ხელი მოეწერა ისლანდიის ქალაქ რეიკიავიკში გამართული საერთაშორისო კონფერენციის ფარგლებში. მემორანდუმი მიზნად ისახავს თანამშრომლობას ენერგოეფექტურობის, განახლებადი და გეოთერმული ენერგიის განვითარების მიმართულებით. მემორანდუმს ხელი მოაწერა საქართველოს დელეგაციის ხელმძღვანელმა, ეკონომიკისა და მდგრადი განვითარების ენერგოეფექტურობისა და განახლებადი ენერგიების პოლიტიკისა და მდგრადი განვითარების დეპარტამენტის  უფროსმა მარიტა არაბიძემ.დოკუმენტის თანახმად, მხარეებმა აიღეს ვალდებულება, წაახალისონ თანამშრომლობა საქართველოში ევროკავშირის ენერგეტიკული კანონმდებლობის ჰარმონიზაციასა და საჯარო შენობებში ენერგოეფექტურობის გაზრდის მიმართულებით. მემორანდუმის ძირითადი ასპექტებია სამთავრობო ინსტიტუტებს შორის კომუნიკაციისა და თანამშრომლობის ხელშეწყობა, პროფესიულ ორგანიზაციებსა და სავაჭრო პალატებს შორის კავშირების დამყარება და განახლებადი ენერგეტიკის სფეროში თანამშრომლობის გაღრმავება. ხელმოწერამდე საქართველოს დელეგაციამ ასევე გამართა შეხვედრა ისლანდიის გარემოს დაცვის, ენერგეტიკისა და კლიმატის მინისტრ გუდლაუგურ თორ თორდარსონთან, რომლის დროსაც განხილულ იქნა სამომავლო თანამშრომლობის პრიორიტეტული მიმართულებები ორ ქვეყანას შორის გეოთერმული ენერგიების განვითარების განხრით. ფორუმის ფარგლებში, საქართველოს დელეგაციამ ასევე მონაწილეობა მიიღო თემატურ დისკუსიაში, რომლებიც ისლანდიაში გეოთერმული ენერგიის გამოცდილებას შეეხებოდა.დისკუსიაში მონაწილეობას იღებდა დაახლოებით 50 ქვეყნის 800 დელეგატი. საქართველოს დელეგაციას ასევე წარმოადგენდნენ ნავთობისა და გაზის კორპორაციისა და საქართველოს ენერგეტიკის განვითარების ფონდის წარმომადგენლები. ასევე გაიმართა შეხვედრები როგორც სხვადასხვა ქვეყნების დელეგაციებთან, ისე საერთაშორისო ბიზნესის წარმომადგენლებთან, რომელზეც განიხილეს საერთაშორისო გამოცდილებები და თანამშრომლობის განვითარების სამომავლო პერსპექტივები.

1718350435

სემეკში წყალმომარაგების საკითხებზე FCC Aqualia-ს წარმომადგენლებთან შეხვედრა გაიმართა

საქართველოს ენერგეტიკისა და წყალმომარაგების მარეგულირებელ ეროვნულ კომისიაში (სემეკ), ქ. თბილისის, ქ. რუსთავისა და ქ. მცხეთის წყალმომარაგების საკითხებზე შპს „ჯორჯიან უოთერ ენდ ფაუერის“ ინვესტორი კომპანიის FCC Aqualia-ს აღმასრულებელ დირექტორთან სანტიეგო ლაფუენტეს პერეს ლუკასთან, რეგიონულ დირექტორთან ხოსე ენრიკე ბოფილ მაესტრესთან და შპს „ჯორჯიან უოთერ ენდ ფაუერის“ მენეჯმენტთან შეხვედრა გაიმართა.სემეკის მხრიდან შეხვედრას ესწრებოდნენ კომისიის თავმჯდომარე დავით ნარმანია, კომისიის წევრები და წყალმომარაგების დეპარტამენტის წარმომადგენლები. შეხვედრაზე მხარეებმა განიხილეს სექტორში არსებული მარეგულირებელი ნორმები და სტანდარტები, შპს „ჯორჯიან უოთერ ენდ ფაუერის“ მომსახურების არეალში წყალმომარაგების გაუმჯობესების მიზნით მიმდინარე და დაგეგმილი საინვესტიციო პროექტები. ასევე, ისაუბრეს კომპანიის სამომავლო გეგმებზე.FCC Aqualia-მ 2022 წელს 180 მილიონ დოლარიანი ინვესტიცია განახორციელა და შპს „ჯორჯიან უოთერ ენდ ფაუერის“ 80%-იანი წილი შეისყიდა. Aqualia დასახელებულია როგორც მსოფლიოში საუკეთესო წყლის მენეჯმენტის კომპანია, რომლის აქციონერებიც არიან უმსხვილესი საერთაშორისო ორგანიზაციები FCC (51%) და IFM (49%).

1718344365

10 საკითხი, რაც უნდა გაითვალისწინოთ ენერგეტიკული გაერთიანების ჩამოყალიბებამდე

ენერგეტიკული გაერთიანებები, რომლებიც აერთიანებს რამდენიმე ათას მოქალაქეთა ინიციატივას ევროკავშირის მასშტაბით, ეწევიან მრავალფეროვან აქტივობებს, როგორიცაა ელექტროენერგიის და სითბოს გამომუშავება, მიკროქსელის ექსპლუატაცია და ენერგიის მიწოდება. აღნიშნული საკითხები ოფიციალურად იქნა აღიარებული და რეგულირდება ევროკავშირის „სუფთა ენერგია ყველა ევროპელისთვის” პაკეტის (CEP) ფარგლებში, რომელიც ხაზს უსვამს მოქალაქეების და ადგილობრივი დაინტერესებული მხარეების გაძლიერებას ენერგეტიკულ ბაზრებზე. ამგვარი საკითხების საკანონმდებლო ჩარჩო შეიქმნა ელექტროენერგიის შიდა ბაზრის (EU) 2019/944 (IMED) და განახლებადი ენერგიის დირექტივის (EU) 2018/2001 (RED II), შესაბამისად.საქართველო, როგორც ევროპის ენერგეტიკული გაერთიანების წევრი ქვეყანა, უახლოეს მომავალში გეგმავს ენერგეტიკული გაერთიანებების კონცეფციის შემოღებასა და მის სამართლებრივ დარეგულირებას.ქართულ კანონმდებლობაში ენერგეტიკული გაერთიანების ცნების გაჩენამდე,  ენერგეტიკული გაერთიანებების ჩამოყალიბების მსურველები შემდეგ პირობებზე საკითხებზე უნდა შეთანხმდნენ: იურიდიული ფორმა და სტრუქტურა: გადაწყვიტეთ შესაბამისი იურიდიული ფორმა (მაგ., კოოპერატივი, არაკომერციული იურიდიული პირი (ასოციაცია), პარტნიორობა), რომელიც შეესაბამება ენერგეტიკული გაერთიანების მიზნებს და შეესაბამება ეროვნულ კანონმდებლობას. წევრობის კრიტერიუმები: უნდა განისაზღვროს ვის შეუძლია შეუერთდეს ენერგეტიკულ გაერთიანებას (ფიზიკური პირები, ადგილობრივი ხელისუფლება, მცირე და საშუალო ბიზნესი) და ჩამოყალიბდეს წევრობის მკაფიო, არადისკრიმინაციული კრიტერიუმები. მმართველობის სტრუქტურა: უნდა ჩამოყალიბდეს მმართველობის ჩარჩო, რომელიც მოიცავს გადაწყვეტილების მიღების პროცესებს, წევრების უფლებებსა და პასუხისმგებლობებს. მმართველობის სტრუქტურამ ხელი უნდა შეუწყოს საზოგადოების წევრების გამჭვირვალობას, მონაწილეობას და ეფექტურ კონტროლს. წევრების უფლებები და მოვალეობები: გამოკვეთილი უნდა იყოს წევრების უფლებები, მათ შორის ხმის მიცემის უფლება, მოგების გაზიარება და მონაწილეობა ენერგეტიკული გაერთიანების საქმიანობაში. ამასთან, დეტალურად უნდა იყოს გაწერილი წევრების ვალდებულებები, როგორიცაა ენერგეტიკული გაერთიანების კაპიტალში წვლილის შეტანა, მმართველობის წესების დაცვა და გადაწყვეტილების მიღების პროცესში მონაწილეობა. მიზანი და ამოცანები: მკაფიოდ უნდა გამოიკვეთოს, რომ ენერგეტიკული გაერთიანების მთავარი მიზანი არის გარემოსდაცვითი, სოციალური და ეკონომიკური სარგებლის მიღება და გაზიარება და არა ფინანსური მოგების მიღება. აღნიშნული მკაფიოდ უნდა იყოს მითითებული ენერგეტიკული გაერთიანების დამფუძნებელ დოკუმენტებში. ასევე, უნდა განისაზღვროს ის აქტივობები, რომლებშიც ენერგეტიკული გაერთიანება ჩაერთვება, როგორიცაა ენერგიის გამომუშავება, მიწოდება, შენახვა, ენერგოეფექტურობის სერვისები, ელექტრომანქანების დატენვის სერვისები და ა.შ. მონაწილეობისა და კონტროლის მექანიზმები: უნდა ჩამოყალიბდეს წევრობის ღიაობისა და ნებაყოფლობითობის პრინციპები, რაც საშუალებას მისცემს ინდივიდებსა და სუბიექტებს შეუერთდნენ ან დატოვონ ენერგეტიკული გაერთიანება გაუმართლებელი პირობების გარეშე. აუცილებელია განისაზღვროს თუ ვის აქვს ეფექტური კონტროლი ენერგეტიკულ გაერთიანებაზე, რათა უზრუნველყოფილი იყოს, რომ პროექტების ყველაზე მეტად დაზარალებული წევრებს აქვთ გადამწყვეტი გავლენა. განახლებადი ენერგიის გაერთიანებებისთვის ეს ჩვეულებრივ ნიშნავს ენერგეტიკული ობიექტების მახლობლად მდებარე წევრებს. დაფინანსების წყაროები: შემუშავებული უნდა იყოს მკაფიო ფინანსური გეგმები, მათ შორის დაფინანსების წყაროები, საინვესტიციო სტრუქტურები და წამახალისებელი სქემები. ენერგეტიკული გაერთიანების დაფუძნების მომენტისთვის გამოკვლეული უნდა იყოს გრანტების, სუბსიდიების და სესხების შესაძლებლობები განახლებადი ენერგიის პროექტებისთვის. ეკონომიკური სარგებლის განაწილება: ჩამოყალიბებული უნდა იყოს ეკონომიკური სარგებლის განაწილების მექანიზმები, როგორიცაა ენერგიის შემცირებული გადასახადები, მოგება ან რეინვესტიცია სათემო პროექტებში. ენერგეტიკულ ბაზრებზე და ქსელზე წვდომა: უნდა განისაზღვროს ენერგეტიკული გაერთიანების უფლებები და მოვალეობები ენერგეტიკულ ბაზრებზე, მათ შორის ჭარბი ენერგიის გაყიდვის, მოთხოვნაზე რეაგირების პროგრამებში მონაწილეობის ან ენერგიით ვაჭრობაში ჩართვის შესაძლებლობების ჩათვლით. ასევე, მნიშვნელოვანია დეტალურად განისაზღვროს ქსელის მიერთების და ელექტროენერგიის ბაზარზე წვდომის პროცესები და მათი ტექნიკურ და მარეგულირებელ სტანდარტებთან შესაბამისობა. კონფლიქტის მოგვარებისა და დავის მექანიზმები: ჩამოყალიბებული უნდა იყოს დავების გადაწყვეტის მექანიზმები წევრებს შორის ან ენერგეტიკულ გაერთიანებასა და გარე მხარეებს შორის, მათ შორის მედიაცია, სამართლებრივი წარმოება და ა.შ. იდენტიფიცირებული უნდა იყოს პროცედურები რეგულარული მონიტორინგისა და შესაბამისობის შემოწმებისთვის, რათა უზრუნველყოფილი იქნას სამართლებრივი და მარეგულირებელი მოთხოვნების მუდმივი დაცვა. ამ საკითხების ყოვლისმომცველი განხილვა ხელს შეუწყობს ძლიერი, და მდგრადი ენერგეტიკული გაერთიანებების ჩამოყალიბებას საქართველოში, რომლებსაც შეუძლიათ ხელი შეუწყონ მნიშვნელოვნად ენერგეტიკულ ტრანზიციას და საზოგადოების გაძლიერებას.წინამდებარე სტატია მომზადდა ევროკავშირის მიერ დაფინანსებული პროექტის SHAREs-ის ფარგლებში. დამატებითი ინფორმაციისთვის, გთხოვთ ეწვიოთ, საინფორმაციო პორტალს საქართველოში ენერგეტიკული გაერთიანებების შესახებ - www.energy4all.ge. 

1718339280

მსოფლიოში ბუნებრივი აირი ძვირდება, ნავთობი კი - იაფდება

საერთაშორისო ბაზარზე, ბუნებრივი აირის ფასები, დღევანდელი ნიშნულიდან, შესაძლოა 50-60%-ით გაიზარდოს, - ამის შესახებ „ბიზნესპარტნიორს“  Galt & Taggart-ის უფროსმა ანალიტიკოსმა სერგი ყურაშვილმა განუცხადა.მისი თქმით, 2024 წლის მაისში ბუნებრივი აირის ფასი თვიურად  20%-ით უკვე გაიზარდა. როგორც ანალიტიკოსები ამბობენ, ევროპული გაზის ნეტ ყიდვის პოზიციებმა, 2022 წლის თებერვლის შემდეგ, უმაღლეს ნიშნულს მიაღწია.„ენერგოკრიზისის დროს, გათხევადებული ბუნებრივი აირის შესყიდვებით, ევროპის კონტინენტმა შეძლო რუსულ გაზზე დამოკიდებულებისგან გათავისუფლება. თუმცა, მეორეს მხრივ, ახლა მას გათხევადებული ბუნებრივი აირისთვის, აზიის კონტინენტთან უწევს კონკურენციის გაწევა. დარგის ექსპერტები მიიჩნევენ, რომ ენერგოკრიზისი მხოლოდ მას შემდეგ შეიძლება გამოცხადდეს დასრულებულად, როცა ცივი ზამთრის დროს, ევროპაც და აზიაც შეძლებენ საკმარისი მიწოდების მოძიებას. თუმცა, შესაძლოა, გლობალური მიწოდების გადანაწილება, ცივ თვეებამდე ბევრად ადრეც გახდეს საჭირო. რადგან, გარდა იმისა, რომ ბუნებრივი აირი დიდ როლს ასრულებს გათბობაში, ის ასევე მნიშვნელოვანი კომპონენტია ცხელ თვეებში გაგრილების კუთხით. წელს კი რეკორდულად ცხელი ზაფხულია ნავარაუდევი, რაც შესაბამისად, გაზრდის მოთხოვნას ბუნებრივ აირზე. მაგალითად, ეგვიპტემ, რომელიც როგორც წესი ექსპორტიორია, გათხევადებული ბუნებრივი აირის შესყიდვა უკვე დაიწყო, რათა ცხელ თვეებში გამაგრილებელი სისტემების გამართულად ფუნქციონირება შეძლოს. ასევე მზარდია მოთხოვნა ინდოეთსა და სხვა ქვეყნებშიც“, - აღნიშნა Galt & Taggart-ის უფროსმა ანალიტიკოსმა.მან იმ გამოწვევებზეც ისაუბრა, რის გამოც, შესაძლოა, ბუნებრივ აირზე გაზრდილი მოთხოვნა სრულად ვერ დაკმაყოფილდეს.„ცხელი ამინდები ჩრდილოეთ ამერიკაში ქარიშხლების წარმოშობას უწყობს ხელს, რაც აშშ-ს LNG წარმოებას უქმნის საფრთხეს. დამატებით, გვალვების გამო, შესაძლოა ლათინურ ამერიკაში ჰიდრო გენერაცია შემცირდეს და საპირწონედ თერმო გენერაცია გაიზარდოს. Citigroup-ის მიხედვით, ამ ორ კომპონენტს თუ ევროპა-აზიის მნიშვნელოვანი მოთხოვნაც დაემატება, შესაძლებელია, ბუნებრივი აირის ფასები ახლანდელი ნიშნულიდან 50-60%-ით გაიზარდოს“, - განმარტა სერგი ყურაშვილმა.მან სანავთობო ბირჟებზეც ისაუბრა და თქვა, რომ აქ ფასების კლების ტენდენცია შეინიშნება. კერძოდ, 2024 წლის მაისში ნავთობის ფასი თვიურად 7 %-ით შემცირდა. ამჟამად კი, მისი ღირებულება ბარელზე - 82 დოლარია.„გაიაფების მიზეზი მთელ მსოფლიოში მიმდინარე პოლიტიკური მოვლენები აღმოჩნდა. კერძოდ, ისრაელ-ჰამასს შორის მოსალოდნელმა ზავმა, ფასები დასწია. გარდა ამისა, გასულ თვეს შედგა OPEC-ი პლუსის წევრი ქვეყნების შეხვედრა, სადაც რამდენიმე საკითხი განიხილეს. მათ შორის ის, რომ მსოფლიოში ნავთობის წარმოება გაიზრდება. კერძოდ, ოქტომბრიდან „ოპეკი პლუსის“ რიგ წევრებს შეეძლებათ თანდათანობით გაზარდონ ამჟამინდელი წარმოების ლიმიტები. მიუხედავად იმისა, რომ ეს ზრდა, ჯამური შეზღუდვების, დაახლოებით მესამედს მოიცავს, მას მაინც შეეძლება მოთხოვნა-მიწოდების დინამიკაზე მნიშვნელოვანი გავლენის მოხდენა და ფასების დაკორექტირება კლების მიმართულებით. თუმცა, ანალიტიკოსებს პროგნოზების გაკეთება მაინც უჭირთ, რადგან ამბობენ, რომ წელს მთელ მსოფლიოში მოგზაურობაზე მაღალი მოთხოვნა ფიქსირდება, შესაბამისად, ავიასაწვავის მოხმარება გაიზრდება, რამაც შესაძლოა, ნავთობის ფასები ისევ გაზარდოს“, - აღნიშნა სერგი ყურაშვილმა.რაც შეეხება ქართულ ბაზარს, უნდა ითქვა, რომ საერთაშორისო ბირჟებზე გაიაფებულმა ნავთობმა მასზე გავლენა უკვე იქონია. ნავთობიმპორტიორ კომპანიებში ამბობენ, რომ ბოლო 1 თვეში, ყველა ტიპის საწვავზე ფასებმა დაიწია.

1718272628

სემეკმა ახალ ჰიდროელექტროსადგურებზე წარმოების ლიცენზიები გასცა

საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) გადაწყვეტილებით, შპს „მესტიაჭალა ენერჯიზე“ (მესტიაჭალა 1) ელექტროენერგიის წარმოების  ლიცენზია ამოქმედდა. აღნიშნული გადაწყვეტილების შედეგად, საქართველოს ელექტროენერგიის ადგილობრივ წარმოებას კიდევ ერთი ჰიდროელექტროსადგურის გამომუშავება დაემატა.მესტიის მუნიციპალიტეტში მდებარე ჰიდროელექტროსადგურ „მესტიაჭალა 1“-ის დადგმული სიმძლავრე 20 მგვტ-ია, 2 აგრეგატი, თითო 10 მგვტ-იანი. საპროექტო წლიური გამომუშავება შეადგენს 69 მლნ.კვტსთ-ს.გარდა ამისა, კომისიის მიერ მიღებული გადაწყვეტილებით, ელექტროენერგიის წარმოების წინასწარი ლიცენზია გაიცა შპს „ქართულ საინვესტიციო ჯგუფ ენერგიაზე“ (ხობი 2).კომპანიას დაევალა 6 თვის ვადაში, ჩხოროწყუს მუნიციპალიტეტში მდებარე 44.5 მგვტ სიმძლავრის ჰიდროელექტროსადგურ „ხობი 2“-ის ექსპლუატაციაში მიღებისა და ელექტროენერგიის წარმოების ლიცენზიის გაცემისათვის საჭირო  დოკუმენტაციის სემეკში წარდგენა. ჰესი „ხობი 2“-ის საპროექტო წლიური გამომუშავება შეადგენს 194 მლნ.კვტსთ-ს, შედგება 2 აგრეგატისგან, თითოეულის დადგმული სიმძლავრე - 22.25 მგვტ-ია.

1718260686

სემეკთან არსებული ენერგეტიკის სასწავლო ცენტრის დირექტორმა აგრარულ სექტორში ელექტროენერგიის აქტიური მომხმარებლის როლსა და პერსპექტივებზე ისაუბრა

საქართველოს ენერგეტიკისა და წყალმომარაგების მარეგულირებელ ეროვნულ კომისიასთან (სემეკ) არსებული ენერგეტიკის სასწავლო ცენტრის დირექტორი, ტექნიკის მეცნიერებათა დოქტორი, ნუგზარ ბერიძე საქართველოს სოფლის მეურნეობის მეცნიერებათა აკადემიის მიერ ორგანიზებულ ღონისძიებაზე სიტყვით წარდგა. მან ისაუბრა აგრარულ სექტორში ელექტროენერგიის აქტიურ მომხმარებელსა და მის პერსპექტივებზე. ღონისძიებას ესწრებოდნენ მეცნიერებათა აკადემიის წარმომადგენლები.ნუგზარ ბერიძის თქმით საქართველო, როგორც ენერგეტიკული გაერთიანების წევრ სახელმწიფოს, აქვს ვალდებულება მიუერთდეს მე-4 ენერგეტიკულ პაკეტს და მოახდინოს მისი იმპლემენტაცია ეროვნულ კანონმდებლობაში. აღნიშნული საუკეთესო საშუალებაა „ნეტო-აღრიცხვის“ რეგულაციის  განსავითარებლად. ენერგეტიკის სასწავლო ცენტრის დირექტორმა დეტალურად ისაუბრა ნეტო აღრიცხვის ახალ პერსპექტივებზე.„განახლებადი ენერგიის თვითმომხმარებელი (პროსიუმერი - Produser+Consumer)  არის საბოლოო მომხმარებელი, რომელიც მის მფლობელობაში არსებულ  შენობა-ნაგებობაში აწარმოებს განახლებად ელექტროენერგიას საკუთარი მოხმარებისთვის და რომელსაც შეუძლია შეინახოს ან გაყიდოს წარმოებული განახლებადი ელექტროენერგია, გარდა იმ შემთხვევებისა, როდესაც არასაყოფაცხოვრებო განახლებადი ენერგიის თვითმომხმარებლისთვის ეს საქმიანობა წარმოადგენს ძირითად კომერციულ ან პროფესიულ საქმიანობას. ამ შემთხვევაში უმთავრესი ამოცანაა საკუთარი მოხმარების მაქსიმალური დაკმაყოფილება, ხოლო გამანაწილებელ ქსელში გაცემული ენერგია, ყოველსაათური სიდიდით იყიდება ან/და გადაეცემა სხვა მომხმარებლებს. ქსელში გაცემული ელექტროენერგიის ვირტუალური დაგროვება და გაქვითვა არ ხდება. თვითმომხმარებლის წარმოების საშუალების მიერ წარმოებული ელექტროენერგია სრულად უნდა იქნეს აღრიცხული, ადგილზე მოხმარებული ენერგიის ჩათვლით. ქსელში გაცემული ელექტროენერგია შეიძლება სარგებლობდეს მხარდაჭერის სქემებით ან გაიყიდოს  ბაზარზე შესაბამისი საბითუმო ფასით ინდივიდუალური პირის ან აგრეგატორის მიერ ან გაზიარდეს გარკვეული ჯგუფის ფარგლებში,“ - განაცხადა ნუგზარ ბერიძემ.საქართველოს სოფლის მეურნეობის მეცნიერებათა აკადემიის მიერ ენერგეტიკის სასწავლო ცენტრს ეთხოვა  ფერმერებისა და შინამეურნეთათვის მიკროსიმძლავრის ელექტროსადგურის ტექნიკურ-ეკონომიკურ და სამართლებრივ საკითხებზე სასწავლო კურსების ორგანიზება.

info@bp.ge

+995595334912

გამოგვყევით