1712925736

ქალთა ინტერესების და ეკონომიკური ფაქტორის გაძლიერებისთვის მნიშვნელოვანია ჯანმრთელობის შენარჩუნება და ეს შესაძლებელია პრევენციისა და სკრინინგის საშუალებით, - ამის შესახებ ჯანდაცვის მინისტრის მოადგილემ თამარ გაბუნიამ გადაცემა "ბიზნესპარტნიორში" განაცხადა.მისივე თქმით, სახელმწიფო ახორციელებს სკრინინგის პროგრამებს და სკრინინგიდან დიაგნოსტიკამდე და პროგრამაში ჩართვამდე პერიოდი უნდა იყოს უწყვეტი."ონკოლოგიური პროგრამა ძალიან კომპლექსური პროგრამაა და რა თქმა უნდა, საჭიროებს ისევ და ისევ ერთობლივ ძალისხმევას. გასული ორი წლის განმავლობაში დიდი სამუშაო იქნა გაწეული ამ მიმართულებით. პოსტპანდემიურ პერიოდში პირველი პრიორიტეტი, რაც წინ წამოვიდა - ეს იყო ონკოლოგიური პაციენტებისთვის პროგრამის გაუმჯობესება. მთავარი აქცენტი მედიკამენტების ხელმისაწვდომობაზე გაკეთდა და ყველა სხვა საჭიროებაზე, რომელიც ამ პერიოდში დგება.ცვლილება, რომელიც ბოლო პერიოდში დაანონსდა შეეხება ფინანსური ბარიერის მოხსნას მედიკამენტებზე (არსებობდა 25 000 ლარიანი ზღვარი). პაციენტების 85%-სთვის საკმარისი იყო 25 000 ამ საჭიროების დასაფარად, მაგრამ რჩება პაციენტების ჯგუფი, დაახლოებით, 3000 პაციენტი, რომელსაც ეს თანხა არ ყოფნის. ეს მოიხსნება და მკურნალობის სრული კურსი დაიფარება საყოველთაო ჯანდაცვის პროგრამის ფარგლებში.უკვე დაძრულია ცვლილება და ვფიქრობ რამდენიმე დღეში ეს პროცესი დასრულდება ფორმალურად. მანამდე ისევ რეფერალური დახმარების მექანიზმს ვიყენებთ, ანუ ეს არ ნიშნავს, რომ პაციენტი უნდა დაელოდოს როდის ამოქმედდება ეს ცვლილება.და 25 000-იანი ლიმიტის ფარგლებში რჩება ისევ გამოკვლევები, რომლებიც უკავშირდება მკურნალობის პროცესს, სერვისი, სხივური თერაპია. ონკოლოგიური პაციენტებისთვის ონკოქირურგიაც ფინანსდება საყოველთაო ჯანდაცვის პროგრამით. საშვილოსნოს ყელის კიბო არის ერთადერთი თავიდან აცილებადი კიბო, რომლისგანაც ქალს ვაქცინა იცავს", - განაცხადა თამარ გაბუნიამ.

1712921220

ორსულობა, დედათა და ბავშვთა გარკვეული ნიუანსები ქალებს მამაკაცებზე მეტი საჭიროებების წინაშე აყენებს, - ამის შესახებ პარლამენტის წევრმა, გენდერული თანასწორობის საპარლამენტო საბჭოს წევრმა ირმა ზავრადაშვილმა გადაცემა "ბიზნესპარტნიორში" განაცხადა.მისივე თქმით, საბჭოს მიერ განხორციელებულ თემატურ კვლევაში გამოიკვეთა ის განსაკუთრებული საჭიროებები რაც კონკრეტულად ქალებზე იყო ორიენტირებული და განსხვავებულ მიდგომებს საჭიროებდა."2 წლის წინ "ქართული ოცნების" პარტიაში შეიქმნა ქალთა ორგანიზაცია, სადაც ჯანდაცვა და სოციალური მიმართულება კონკრეტულად ჩემი საკურაციო სფერო იყო და მთელი საქართველოს მასშტაბით დავიწყეთ როგორც პრობლემების იდენტიფიცირება, ისე მოგვარების გზების მიგნებები. ჯანდაცვის კომიტეტის ეს თემატური მოკვლევა ემსახურებოდა არამარტო ქალების, არამედ ქალების და მამაკაცების, კონკრეტულად ონკოლოგიური პაციენტების დაფინანსების ნაწილში ხელმისაწვდომობის შესახებ ინფორმაციის მოძიებას. ამ კვლევაში გამოიკვეთა ის განსაკუთრებული საჭიროებები, რაც კონკრეტულად ქალებზე იყო ორიენტირებული და განსხვავებულ მიდგომებს საჭიროებდა. მაგალითად, ქალს მამაკაცისგან განსხვავებით ორსულობა უდგება დღის წესრიგში და შესაბამისად, ამ ნაწილში წინა ორსულობის პერიოდისთვის, ქალის მოსამზადებლად, თვითონ ორსულობა, დედათა და ბავშვთა მიმართულებით გარკვეული ნიუანსები ბევრად უფრო მეტი საჭიროებების წინაშე აყენებს ქალებს, ვიდრე მამაკაცებს.თუმცა ონკოლოგიის ნაწილში განსხვავებული მიდგომა არ არის. ონკოლოგიური პაციენტების დაფინანსების ხელმისაწვდომობის ნაწილში ძალიან მალე მზად გვექნება ჩვენ ის მიგნებები, რომელიც გადაეგზავნება ჯანდაცვის სამინისტროს. ამ მოკვლევაში სამინისტროს გარდა ჩართულები იყვნენ ონკოლოგიური კლინიკები, ექსპერტები და პაციენტების ოჯახები, ასევე, პალიატიური მედიცინის ცენტრები. თემატური მოკვლევის ფარგლებში აღმოჩნდა, რომ დაფინანსების ნაწილში იმდენი პრობლემა არ არის და აბსოლუტურად თანაბარი წარმატებით ფინანსდება ქალიც და მამაკაციც შესაბამისი იდენტიფიცირებული კიბოს შემთხვევაში. აქ პრობლემა სხვა რამეში გამოიკვეთა. უწყვეტი ჯაჭვის არსებობის ნაწილში რამდენიმე რგოლის სისუსტე დავინახეთ და ამ საკითხთან დაკავშირებით აქტიურად ვთანამშრომლობთ სამინისტროსთან, რომ შეივსოს ჯაჭვი", - განაცხადა ირმა ზავრადაშვილმა.

1712830372

"მნიშვნელოვანია ისეთი პოლიტიკის დანერგვა, რომელიც ხელს შეუწყობს ქალთა ჩართვას სამუშაო ძალაში,"- ამის შესახებ აზიის განვითარების ბანკის (ADB) ახალ ანგარიშშია აღნიშნული. "საქართველოს მოსახლეობა ბერდება, მოსახლეობის ჩანაცვლების დონეზე დაბალი შობადობის, სიცოცხლის ხანგრძლივობის გაუმჯობესებისა და შრომისუნარიანი ასაკის ადამიანების ემიგრაციის გამო. სახელმწიფოს შეუძლია გაზარდოს დასაქმებულთა შრომის ნაყოფიერება უნარ-ჩვევების განვითარებისა და ტექნოლოგიების გამოყენების ზრდით. მუშახელის სტაბილური დეფიციტის მიუხედავად, დიდი განსხვავება რჩება მამაკაცებისა და ქალების სამუშაო ძალაში მონაწილეობის მაჩვენებლებს შორის. შესაბამისად, ძალიან მნიშვნელოვანია ისეთი პოლიტიკის დანერგვა, რომელიც ხელს შეუწყობს ქალთა ჩართვას სამუშაო ძალაში,"-ნათქვამია ანგარიშში. ADB საქართველოს მხარდამჭერია 2007 წლიდან და ქვეყნის განვითარების ერთ-ერთი უდიდესი მულტილატერალური პარტნიორია. ADB-ის საქართველოსთვის გაღებული აქვს 4 მილიარდი აშშ დოლარის ღირებულების სესხი, გრანტი და ტექნიკური დახმარება. ADB-ის ახალი, საქართველოსთან თანამშრომლობის ხუთწლიანი სტრატეგია მიზნად ისახავს ქვეყანას დაეხმაროს განვითარდეს მწვანე და ინკლუზიურ რეგიონულ კარიბჭედ, ხელი შეუწყოს სახელმწიფო და კერძო სექტორის ინვესტიციებს, რეფორმებს, ცოდნის გაღმარვებას, კლიმატგამძლე ინფრასტრუქტურის შენებას და რეგიონულ ინტეგრაციას. ADB-ის მიზანია, ხელი შეუწყოს აზიისა და წყნარი ოკეანის რეგიონის წარმატებულ, მრავალმხრივ, მედეგ და მდგრად განვითარებას. ამავდროულად, ის აგრძელებს მუშაობას რეგიონში უკიდურესი სიღარიბის აღმოსაფხვრელად. 1966 წელს დაარსებული ორგანიზაცია აერთიანებს 68 ქვეყანას, მათ შორის 49 აზიის რეგიონიდანაა წარმოდგენილი.

1712549280

ტექნოპარკების ბენეფიციარების 52% ქალები არიან, - ამის შესახებ ინოვაციების საზოგადოების განვითარების დეპარტამენტის უფროსმა სალომე ნეფეტვარიძემ გადაცემა „ბიზნესპარტნიორში“ განაცხადა.მისივე ინფორმაციით, ტექნოლოგიების სექტორის მიმართ ინტერესი ცალსახად იზრდება.„ინოვაციებისა და ტექნოლოგიების სააგენტო ქალების ტექნოლოგიებში ჩართულობის გასაზრდელად, სხვადასხვა ხელმისაწვდომობას სამი მიმართულებით უზრუნველყოფს. პირველი ნაწილი არის ინფრასტრუქტურაზე ხელმისაწვდომობა, განსაკუთრებით რეგიონებში. ჩვენ ქვეყანაში  9 ტექპარკი გვაქვს და ძალიან მნიშვნელოვანია, რომ ტექნოლოგიურ პარკებში, თავისივე რეგიონში შესაძლებლობა აქვთ ისარგებლონ მაღალტექნოლოგიური დანადგარებით და მიიღონ ტრენინგებში მონაწილეობა.ძალიან მნიშვნელოვანია ტრენინგებზე და "მენტორშიპზე" ხელმისაწვდომობა. ჩვენ ვახორციელებთ პრეაქსელერაციის პროგრამებს მთელ საქართველოში, რომელიც ხელს უწყობს რეგიონალური სტარტაპების ფორმირებას და რეგიონის საზოგადოების მეტი წევრის ჩართულობას სტარტაპ სამყაროში.ჩვენ 2 წლის წინ დავამატეთ ტექნოლოგიური ბანაკი, რომელიც სპეციალურად სკოლის მოსწავლე გოგონებისთვის არის, რომ მათი კარიერული განვითარება ამ ინდუსტრიისკენ მივმართოთ. ბოლო წლების განმავლობაში 500-ზე მეტი სკოლის მოსწავლე და სტუდენტი გოგონაა ბანაკების ჭრილში გადამზადებული. გარდა ამისა, გასულ წელს ჩვენ გავუშვით ყველაზე დიდი IT ტრენინგების პლატფორმა, სადაც მონაცემებმა აჩვენა, რომ მონაწილეთა 61% არის ქალი“, - განაცხადა სალომე ნეფეტვარიძემ.

1712317140

"საინტერესოა ის, რომ საერთაშორისო IT კომპანიის სტატუსით მოსარგებლე კომპანიებში 8 000 ლარამდე მერყეობს ხელფასი და ეს ისეთი დასაქმების შესაძლებლობაა, რომელიც ნამდვილად გვჭირდება ქალებს, რომ ამ მიმართულებით უფრო მეტად ვიყოთ ჩართული", - ამის შესახებ პარლამენტის წევრმა ნინო წილოსანმა გადაცემა „ბიზნესპარტნიორში“ განაცხადა.მისივე თქმით, ნიშანდობლივია, რომ დასაქმების ბაზარზე ძალიან მზარდი მოთხოვნაა IT მიმართულებით.„25 აპრილს მსოფლიოში საერთაშორისო დღე „გოგოები ტექნოლოგიებში“ აღინიშნება. შესაბამისად, გენდერული საბჭოს ფარგლებში მთლიანად აპრილის თვე გამოცხადებული გვაქვს „ქალები და გოგოები ტექნოლოგიებში“. რა თქმა უნდა, ეს პასუხობს იმ სახელმწიფო მიზნებს, რომელიც გაცხადებული გვაქვს. საქართველო შეუერთდა გაეროს თანასწორობის თაობის ფორუმს და ვალდებულება ავიღეთ, რომ ქალების და გოგოების რაოდენობას გავზრდიდით ტექნოლოგიებში. მეოთხე ინდუსტრიული რევოლუცია მიმდინარეობს და ტექნოლოგიები და ეს მიმართულება გვაიძულებს, რომ ახალ პროფესიებზე, სპეციალისტებზე და ახალ მიმართულებებზე გავაკეთოთ აქცენტი. როდესაც ვსაუბრობთ ქალებს და კაცებს შორის სახელფასო სხვაობაზე, როდესაც ვსაუბრობთ ქალების დასაქმების უფრო მეტ შესაძლებლობაზე, გენდერულ დისბალანსზე - არ გვეპატიება, რომ ტექნოლოგიები, რომელიც მზარდი მიმართულებაა და 10-20 წელში სრულიად შეცვლის დასაქმების ბაზარზე კონიუნქტურას, ქალები ჩამოვტოვოთ ამ შესაძლებლობიდან“, - განაცხადა წილოსანმა.

1712309862

„თიბისიმ“ USAID-თან ერთად პროექტი დაიწყო, რომელიც 9 სხვადასხვა ტექნოლოგიური მიმართულებით 760-ზე მეტი ადამიანის გადამზადებას და შემდეგ დასაქმების ხელშეწყობას მოიცავს. ამის შესახებ „თიბისი IT აკადემიის“ ლიდმა თათა ანჯაფარიძემ გადაცემა „ბიზნესპარტნიორში“ განაცხადა.მისივე ინფორმაციით,  კურსებზე დარეგისტრირება 18 წელს ზემოთ მოქალაქეებს შეუძლიათ.„პროექტის ფარგლებში ხელს ვუწყობთ რეგიონებსაც და ქალთა გაძლიერებასაც. ძალიან გვეამაყება, რომ მიმდინარე 350 ადამიანში გვაქვს  ასეთი სტატისტიკა - 35% არის რეგიონებიდან და 40% არის ქალი. ძალიან მნიშვნელოვანია, რომ ეს მიმართულება განვავითაროთ. საკმაოდ დიდია ამ პროექტის მიმართ დაინტერესება. სწავლება არის 3-დან 4-თვემდე. სხვადასხვა მიმართულებებს ვასწავლით და სხვადასხვა ხანგრძლივობა აქვს“, - განაცხადა თათა ანჯაფარიძემ.

1711955280

„დასაქმების პრობლემა, მიუხედავად იმისა, რომ ამ კუთხით ქვეყანაში საკმაოდ ბევრი ნაბიჯი იქნა გადადგმული, მაინც მთავარ გამოწვევად რჩება,“- ამის შესახებ  პარლამენტის წევრმა, ფრაქცია “ქართული ოცნების” თავმჯდომარის მოადგილე, გენდერული საბჭოს წევრი რიმა ბერაძემ  გადაცემაში “ბიზნესპარტნიორი“ განაცხადა.მისი ინფორმაციით, განსაკუთრებით გამოწვევას წარმოადგენს ქალთა დასაქმება, ამ კუთხით  მუშაობა მიმდინარეობს.„ქალთა ეკონომიკური გაძლიერება პირდაპირ გულისხმობს, რომ მოხდეს მათთვის ხელშეწყობა იმისათვის, რათა დასაქმდნენ. ჯერ კიდევ 2018 წლიდან, ამ კუთხით ძალიან ბევრი რამ  იქნა გაკეთებული. კერძოდ, ჯანდაცვის სამინისტროსთან ერთად  შეიქმნა  სპეციალური სამსახური, სადაც მიმდინარეობდა გამოკვლევები, თუ რა ინტერესები არსებობდა ჩვენს საზოგადოებაში და ქალბატონებს რა სურდათ.  გამოიკვეთა ყველაზე მთავარი გამოწვევა, რომ არ იყვნენ ინფორმირებულები აღნიშნულ საკითხთან დაკავშირებით. შრომის ბაზარზე იყო შესაბამისობა, არსებობდა ვაკანსიები, მაგრამ არ ჰქონდათ ინფორმაცია. ამისათვის ჩვენი მთავარი ამოცანა გახდა, მიგვეწოდებინა ინფორმაცია ქალბატონებისთვის და  სამიზნე ჯგუფებს შევხვედროდით. საწყის ეტაპზე თბილისის მასშტაბით ქალბატონების 65%-მა, 2500-მა ადამიანმა მოგვმართა, თითქმის ყველა რაიონის წარმომადგენლობა იყო, შესაბამისი დასაქმების კუთხით ბიუროები შეიქმნა, სადაც ხდებოდა მათი წარმოდგენა, დამსაქმებლისა და სამუშაოს მაძიებლის  შეხვედრა, იქვე ხდებოდა ონლაინ რეჟიმში ახსნა, თუ რა შესაძლებლობა, რა უნარები გააჩნდათ ქალბატონებს და რა გამოწვევების წინაშე იდგნენ. სოციალური სამსახურები ასევე ძალიან აქტიურად იყვნენ ჩართულები, შეიქმნა სპეციალური საინფორმაციო ვიდეორგოლები და ვებგვერდი, სადაც მოქალაქეს შეეძლო აეტვირთა თუ რა ინტერესები ჰქონდათ, რა გამოწვევები იყო მათ წინაშე დამდგარი. ძალიან მნიშვნელოვანი და საინტერესო ნაბიჯები გადაიდგა, თუმცა ჩვენს წინაშე მთავარი პრიორიტეტი კვლავ რჩება  დასაქმების საკითხი ქალბატონებსა და მამაკაცებშიც მთავარ გამოწვევად", - განაცხადა რიმა ბერაძემ.საჯარო სექტორში დასაქმებასთან დაკავშირებით ბერაძემ აღნიშნა, რომ ქალებს აქვთ სურვილი, ამ სფეროში დასაქმდნენ, თუმცა ამის საშუალება არ ეძლევათ.  ამის მიზეზად მან ინფორმაციის  და საზოგადოების ცნობიერება ნაკლებობის პრობლემა დაასახელა.,,როცა ჩვენ ვსაუბრობთ ქალების დასაქმებაზე, მათი ეკონომიკურად გაძლიერებასა და ხელშეწყობაზე, ერთ-ერთი პირობა იყო მათი ჩართულობა სხვადასხვა სფეროში, მათ შორის საჯარო სექტორში. სახელმწიფო სთავაზობს ტრენინგებს, სასწავლო კურსებს, მაქსიმალურ ჩართულობას ყველა იმ ინფორმაციასთან დაკავშირებით, რამაც შესაძლოა მათთვის ეს ფორმატი ხელმისაწვდომი გახადოს. თუმცა ვხედავთ, რომ ხშირად, როცა ვაკანსიები არის გამოცხადებული, ცოტა მონაწილეობს. როდესაც საბაზრო მოთხოვნა არის, თუნდაც საჯარო, ესა თუ ის პირი ამ მოთხოვნას ვერ აკმაყოფილებს. საჭიროა სამოქალაქო საზოგადოების აღზრდა და გაზრდა იმისთვის, რომ გვყავდეს მაღალი პროფესიონალები და ისეთი მუშაკები, როგორიც დამსაქმებელს სჭირდება. ვიდეორგოლების და სოციალური ქსელების საშუალებით სისტემატურად მიეწოდებათ ინფორმაცია ვაკანსიებთან დაკავშირებით", - განმარტა რიმა ბერაძემ.დასაქმების კუთხით ერთ-ერთი ყველაზე მნიშვნელოვან საკითხად მან არაფორმალური დასაქმება დაასახელა და აღნიშნა, რომ ამ მიმართულებაშიც მთავარი გამოწვევა ცნობიერების ნაკლებობაა.,,არიან დიასახლისები, რომლებსაც მიუხედავად იმისა, რომ შეუძლიათ თავიანთი თავის რეალიზება მოახდინონ, ვერ იღებენ გადაწყვეტილებას. სწორედ ეს არის ყველაზე მნიშვნელოვანი საკითხი, დავეხმაროთ გადაწყვეტილების მიღებაში და იმ ვაკანსიების შერჩევაში, რომელიც ბაზარს აქვს გამოცხადებული. სოციალური წარმომადგენლები ხვდებიან ამ კონკრეტულ ადამიანებს, ვინც აკეთებს განაცხადს. დახმარება მაქსიმალურია, თუმცა კიდევ ბევრი სამუშაოა გასატარებელი, რომ ამაღლდეს საზოგადოების აქტივობა და ცნობიერება იმ თვალსაზრისით, რომ დამსაქმებელმა და სამუშაოს მაძიებელმაც გაათვითცნობიეროს, რა გვინდა, სად გვინდა და როგორ გვინდა, რისი გაკეთება შეგვიძლია", - განაცხადა რიმა ბერაძემ.რაც შეეხება დასაქმების ფორმატში  რეგიონების ჩართულობას, როგორც  “ქართული ოცნების” თავმჯდომარის მოადგილემ, გენდერული საბჭოს წევრმა აღნიშნა, მთელი რეგიონის მასშტაბით შექმნილია ქალთა ორგანიზაციები, რომლებშიც ძალიან აქტიური ქალბატონები არიან ჩართული.,,რეგიონებში  ერთ-ერთი მთავარი გამოწვევაა ეკონომიკური ხელშეწყობა ქალბატონებისთვის, ამ კუთხით დიდი მუშაობა მიმდინარეობს სოციალურ სამსახურებთან და მიზნობრივ ჯგუფებთან  ერთად, რომლებიც ხვდებიან დასაქმების მაძიებელ ქალბატონებს, რომლებსაც აქვთ ინტერესი და ჩვენი თანადგომა სჭირდებათ. აბსოლუტურად ყველა რეგიონში მიმდინარეობს მუშაობა. ჯერჯერობით ხდება მოკვლევა, თუ ვინ არის დაინტერესებული და შემდეგ ხდება შეთავაზება, რა შეუძლია თითოეულ მათგანს. სად დასაქმდნენ იმისათვის, რათა მათი ეკონომიკური მდგომარეობა გაიზარდოს. მიზნობრივი ჯგუფების შერჩევისას გამოიკვეთა, რომ ბევრი ქალბატონია, რომელსაც სურდა ბიზნესის წამოწყება, მაგრამ არ იცოდა, საიდან დაეწყო. ორგანიზება მოვახდინეთ და ამ ჯგუფებთან ჩატარდა სპეციალური მუშაობა, შეემუშავებინათ ბიზნესგეგმა, როგორ გაეკეთებინათ პროექტები ანუ პირველადი ნაბიჯების გადადგმა ხდებოდა ჩვენთან ერთად.  როდესაც ინტერესთა სფერო გამოხატულია, მაქსიმალურად ვეხმარებით, ,,აწარმოე საქართველოში"  და აგროპროექტებში  ჩაერთონ. ამ ეტაპზე გამოწვევებთან ერთად, გვაქვს წარმატების ძალიან კარგი მაგალითი, თუ რა შედეგს მიაღწიეს ქალბატონებმა შრომის ბაზარზე", - განაცხადა რიმა ბერაძემ ''ბიზნესპარტნიორთან".  მისი ინფორმაციით, ყველა რეგიონში არსებობს ,,ქართული ოცნების" ქალთა ორგანიზაციები,  სოციალური სამსახურები და სპეციალური ვებგვერდი, სადაც ქალბატონებს  შეუძლიათ მივიდნენ,  დარეგისტრირდნენ, გაეცნონ გამოცხადებულ ვაკანსიებს.  სახელმწიფო კი მზადაა, მათ საკუთარი უნარების რეალიზაციაში დაეხმაროს.

1711708260

პარლამენტის დეპუტატი, გენდერული საბჭოს წევრი, ხატია წილოსანი აცხადებს, რომ  ქალთა არაფორმალური დასაქმების აქტულიზაციასა და ამ კუთხით გამოწვევებზე სახელმწიფო დონეზე მუშაობა აქტიურად მიმდინარეობს. როგორც მან გადაცემაში "ბიზნესპარტნიორი" განაცხადა, ქალთა არაფორმალურად დასაქმების აქტუალიზაცია  გამოჩნდა  განსაკუთრებით იმ დროს, როდესაც ქვეყანა კოვიდ პანდემიის წინაშე დადგა. შესაბამისად, დადგა საჭიროება  ქვეყანას ჰქონოდა ინფორმაცია ადამიანებისთვის რა დახმარება იყო საჭირო. სწორედ მაშინ  დაიწყო მუშაობა ოჯახში დასაქმებულთა სტატისტიკის შემუშავების, მათი უფლებლივი მდგომარეობის გაანალიზების შესახებ.  ასევე  რა უნდა გაკეთებულიყო  სახელმწიფოს მხრიდან პოზიტიური ვალდებულების ჭრილში.„აქედან  გამომდინარე, მოგვეცა საშუალება გაგვეანალიზებინა ეს მონაცემები, რომელიც გვქონდა. როდესაც სახელმწიფომ გამოაცხადა დახმარების პროგრამა, რაც გულისხმობდა პანდემიის დროს  დასაქმების გარეშე დარჩენილი ადამიანების მინიმალური შესაძლებლობებით უზრუნველყოფას, აღმოჩნდა, რომ დაახლოებით 255 000-მა ადამიანმა წარმოადგინა განაცხადი ამ საკითხზე, აქედან 70%-ზე მეტი ქალი იყო,რომელიც   ოჯახში დამხმარედ, ძიძად და სხვა ვალდებულებებით მუშაობდა. აქედან 55%-მა ვერ დაასაბუთა  თავიანთი შრომითი საქმიანობა სწორედ იმიტომ, რომ ისინი ეკონომიკის მიღმა იყვნენ. შესაბამისად, დადგა საჭიროება იმისა, გვეფიქრა ამ კუთხით  რა უნდა გაკეთებულიყო.  შედეგად, დევნილთა, შრომის, ჯანმრთელობისა და სოციალური დაცვის სამინისტროსთან ერთად  ჩვენ დავიწყეთ მუშაობა ჩვენი პარტნიორების აქტიური მხარდაჭერით, რომ გვენახა რა უნდა გაკეთებულიყო ქართულ კანონმდებლობაში ისეთი, რომ ერთი მხრივ, ოჯახში დასაქმებულს ჰქონოდა უფლებრივი მდგომარეობა მოწესრიგებული, ესარგებლა იმ შეღავათით, რაც შრომითი კანონმდებლობით არის  საქართველოში. ეს არის ანაზღაურებადი შვებულება, საპენსიო სქემებში ჩართვის შესაძლებლობები. მეორე მხრივ, დავხმარებოდით დამსაქმებელსაც", -აცხადებს წილოსანი.მისივე ინფორმაციით, ასეთ დროს  არანაკლებ მძიმე მდგომარეობაშია დამსაქმებელიც გამომდინარე იქიდან, რომ მისთვისაც რთულია იპოვოს კვალიფიციური, მაღალი სერვისის მიმწოდებელი  ადამიანი, რომელიც მას შრომით საქმიანობაში დაეხმარება."აქედან  გამომდინარე შევიმუშავეთ საკმაოდ კარგი რეკომენდაციები, რომლის შესრულების მოტივაციისკენ მოვუწოდოეთ აღმასრულებელ ხელისუფლებას. ამ მიმართულებით მუშაობა ისევ გრძელდება და მაქვს ძალიან დიდი იმედი, რომ მოკლე დროში ჩვენ, ოჯახში დასაქმებულთა უფლებრივი მდგომარეობის შესახებ გვექნება მნიშვნელოვანი გაუმჯობესება, მათ შორის, საკანონმდებლო მოწესრიგების კუთხით",-აცხადებს ხატია წილოსანი. 

1711697654

შვილის გაჩენისას, დედის საშუალო ასაკის ზრდა, რაც საქართველოში ფიქსირდება, ევროპაში მიმდინარე ტენდენციას ფეხდაფეხ მისდევს და ის ქვეყნის ეკონომიკურ გაძლიერებასთან ერთად, კიდევ გაგრძელდება.  ამის შესახებ სპეციალისტები "საქსტატის" მიერ გამოქვეყნებული იმ მონაცემის შეფასებისას აცხადებენ, რომლის თანახმად, საქართველოში, პირველი შვილის გაჩენისას, დედის საშუალო ასაკი 26.7 წელია, ათი წლის წინ, 2013 წელს ეს მაჩვენებელი 24,4 იყო. 40 წლის და უფროსი ასაკის დედებში ეს მაჩვენებელი 4.0 პროცენტიდან 6.0 პროცენტამდე გაიზარდა.ტენდენცია მზარდია ევროპაშიც - statista.com-ის მონაცემებით, ევროპაში დედის საშუალო ასაკი პირველი ბავშვის დაბადებისას 30,2 წელია.გაგუას კლინიკის საოპერაციო დირექტორი ირაკლი გაგუა საზოგადოებრივი მაუწყებლისთვის მიცემულ ინტერვიუში ამბობს, რომ ეს სტატისტიკა ევროპულ ტენდენციებს ფეხდახებ მიყვება და ამას თავისი მიზეზები აქვს."ერთ-ერთი ფაქტორი, რის გამოც საშუალო ასაკი შეიძლება გაიზარდოს, არის დამხმარე რეპროდუქციული სერვისები, რითაც ქალები უფრო გვიან ასაკში წყვეტენ და ახერხებენ კიდეც დაორსულებას. საშუალო ასაკის გაზრდა ასევე აღინიშნება ევროპის ქვეყნებში, მათ შორის - ქვეყნის განვითარებასთან, ქალების გაძლიერებასთან და მეტ დასაქმებასთან ერთად. სწორედ ამიტომ ქალები შედარებით გვიან ასაკში წყვეტენ შვილის გაჩენას,“ - განაცხადა ირაკლი გაგუამ.საქართველოში, პირველი შვილის გაჩენისას, დედის საშუალო ასაკი 26.7 წელია, ევროპაში  - 30.2.jandacva.ge