1714042095

სააგენტომ „აწარმოე საქართველოში" კაპიტალის ბაზრის მხარდაჭერის სახელმწიფო პროგრამის ოფიციალური პრეზენტაცია გამართა. პროგრამის განხორციელებაში სააგენტოს პარტნიორია USAID-ის ფინანსური ინოვაციების პროგრამა.პრეზენტაცია მისასალმებელი სიტყვით გახსნეს ეკონომიკისა და მდგრადი განვითარების მინისტრის მოადგილემ ირაკლი ნადარეიშვილმა და USAID-ის მისიის დირექტორმა ჯონ პენელმა. კაპიტალის ბაზრის მხარდაჭერის სახელმწიფო პროგრამა მოწვეულ სტუმრებს სააგენტოს დირექტორმა მიხეილ ხიდურელმა წარუდგინა.„აწარმოე საქართველოში“ ახალი მიმართულება მიზნად ისახავს მცირე და საშუალო ბიზნესისთვის ფინანსებზე წვდომის გაუმჯობესებას და კაპიტალის ბაზრის ხელშეწყობას ფასიანი ქაღალდების განთავსების სტიმულირების გზით.აღნიშნული მიმართულებით, 2024 წელს სააგენტო კომპანიებს ობლიგაციების გამოშვებაში დაეხმარება. დაგეგმილია 15-მდე ბენეფიციარის მხარდაჭერა, რომლებიც 150 მილიონამდე ლარის დამატებით საინვესტიციო რესურსს მოიზიდავენ საფონდო ბაზარზე.ახალი პროგრამის მიხედვით, მეწარმე სუბიექტებს, რომელთა წინა სამეურნეო წლის აკუმულირებული ჯამური შემოსავალი არ აღემატება 60 მლნ ლარს, სააგენტო მისცემს შესაძლებლობას პროგრამის ორ - თანადაფინანსებისა და ტექნიკური დახმარების კომპონენტებში ჩაერთონ. ხოლო, 60 მილიონ ლარზე მეტი შემოსავლის ან/და ფინანსურ სექტორში მოქმედი კომპანიებისთვის, თანადაფინანსების კომპონენტს, USAID-ის ფინანსური ინოვაციების პროგრამა უზრუნველყოფს. აღნიშნული პროგრამა მონაწილეობას მიიღეს 60 მილიონამდე შემოსავლების მქონე მეწარმე სუბიექტების მხარდაჭერაშიც.კაპიტალის ბაზრის მხარდაჭერის პროგრამის პრეზენტაციას სახელმწიფო და ფინანსური ინსტიტუტების, ბიზნეს სექტორისა და დონორი ორგანიზაციების წარმომადგენლები დაესწრნენ.2024 წელს კაპიტალის ბაზრის განვითარების მიმართულებით „აწარმოე საქართველოში“ მთელ რიგ ღონისძიებებს განახორციელებს, რომლებიც ხელს შეუწყობს დაფინანსების ალტერნატიული მექანიზმების განვითარებას. ობლიგაციების გამოშვების თანადაფინანსებასთან ერთად, ეს იქნება საინვესტიციო ფონდების განვითარება და აქტივებზე დაფუძნებული დაფინანსების ხელშეწყობა

1714039998

„ეს არის ახალი თავი სააგენტოს და რა თქმა უნდა ქვეყნის ისტორიაში, რადგან ქვეყანა ოფიციალურად იწყებს კაპიტალის ბაზრის მიმართულებით კონკრეტული პროგრამების განხორციელებას“ - ამის შესახებ „აწარმოე საქართველოში“ დირექტორმა მიხეილ ხიდურელმა კაპიტალის ბაზრის მხარდაჭერის სახელმწიფო პროგრამის პრეზენტაციაზე განაცხადა.„სააგენტო ბანკებთან პარტნიორობით რამდენიმე პროგრამას ახორციელებს, მრავალმილიარდიანი პორტფელი გვაქვს, სადაც წარმატებით დაფინანსდა მცირე და საშუალო ბიზნესის წარმომადგენლები. თუმცა, ალტერნატიული დაფინანსების წყარო ქვეყანაში აუცილებელია, შესაბამისად, მთავრობის და ეკონომიკის სამინისტროს ახალი პოლიტიკით, დავამუშავეთ და უკვე ჩავუშვით ახალი პროგრამა - ფასიანი ქაღალდების გამოშვების სტიმულირების მიმართულებით.პირველ რიგში, უნდა ავუხსნათ ბიზნესს, რამდენად მნიშვნელოვანია კომპანიამ გამოუშვას ფასიანი ქაღალდები, რამდენად დაეხმარება ეს მას განვითარებაში. სააგენტოს კონკრეტული მექანიზმებით: 100 000 ლარამდე საკრედიტო რეიტინგის ხარჯის ანაზღაურებით და განთავსების საკომისიოს ანაზღაურებით, გვექნება გრანტები, რაც საშუალებას მისცემს კომპანიას, ბროკერებთან თანამშრომლობით გამოუშვას ფასიანი ქაღალდები. ეს არის ახალი თავი სააგენტოს და რა თქმა უნდა ქვეყნის ისტორიაში, რადგან ქვეყანა ოფიციალურად იწყებს კაპიტალის ბაზრის მიმართულებით კონკრეტული პროგრამების განხორციელებას.დაინტერესება და მოთხოვნა უკვე ძალიან დიდია. პროგრამა არის ყველასთვის და ნებისმიერ კომპანიას შეუძლია მოგვმართოს - ჩვენ მხოლოდ ფინანსურად არ დავეხმარებით მათ, ტექნიკური დახმარების თვალსაზრისითაც დავუჭერთ მხარს, რომ მზად იყვნენ ფასიანი ქაღალდების გამოსაშვებად. პროგრამის განხორციელების პროცესში, ისევე როგორც სხვა ბევრ პროგრამაში, ჩვენი პარტნიორია USAID“ - განაცხადა ხიდურელმა.მისივე თქმით, კაპიტალის ბაზრის განვითარების მიმართულებით ეს პირველი პროგრამაა, ბიზნესისთვის ფინანსებზე ხელმისაწვდომობის კუთხით სააგენტო კიდევ რამდენიმე მექანიზმის ამოქმედებას აპირებს:„წელს ასევე ვგეგმავთ მცირე და საშუალო ბიზნესის ფონდის ჩამოყალიბებას. ეს იქნება ე.წ. ექვითი ფონდი, სადაც სააგენტო ლიმიტირებულ პარტნიორად იქნება წარმოდგენილი და საერთაშორისო ფინანსურ ინსტიტუტებთან, ინვესტორებთან ერთად, საშუალებას მივცემთ კომპანიებს გამოიყენონ ფონდის დახმარების მექანიზმი“ - აღნიშნა მიხეილ ხიდურელმა.სააგენტომ „აწარმოე საქართველოში" კაპიტალის ბაზრის მხარდაჭერის სახელმწიფო პროგრამის ოფიციალური პრეზენტაცია გამართა. პროგრამის განხორციელებაში სააგენტოს პარტნიორია USAID-ის ფინანსური ინოვაციების პროგრამა.აღნიშნული მიმართულებით, 2024 წელს სააგენტო კომპანიებს ობლიგაციების გამოშვებაში დაეხმარება. დაგეგმილია 15-მდე ბენეფიციარის მხარდაჭერა, რომლებიც 150 მილიონამდე ლარის დამატებით საინვესტიციო რესურსს მოიზიდავენ საფონდო ბაზარზე

1713969900

საქართველოს ინოვაციების და ტექნოლოგიების სააგენტო უერთდება პროექტს „მცირე და საშუალო საწარმოების ციფრული ტრანსფორმაცია აღმოსავლეთ პარტნიორობის ქვეყნებში“ (DT4SME) და იწყებს საგრანტო პროგრამას, რომლის  მიზანია მცირე და საშუალო მეწარმეთა ციფრული ტრანსფორმაციის ხელშეწყობა R&D-ის მეშვეობით.პროექტი მოიცავს რამდენიმე კომპონენტს:მცირე R&D (კვლევა და განვითარება) გრანტების მეშვეობით ახალი გადაწყვეტილებების შექმნა ან არსებული გადაწყვეტილებების გაუმჯობესება. ამ კომპონენტის ჯამური ბიუჯეტი 100 000 ევროა, რომელიც გაიცემა სააგენტოს მიერ გამოცხადებული საგრანტო კონკურსის მეშვეობით. ამ პროცესში ასევე  ჩართულნი იქნებიან საერთაშორისო ექსპერტები.შეიქმნება ერთიანი პლატფორმა, რომელიც წარმოაჩენს ქართულ სტარტაპ ეკოსისტემას და საშუალებას მისცემს ნებისმიერ დაინტერესებულ პირს გაეცნოს იმ ინოვაციურ გადაწყვეტილებებს, რომელიც იქმნება საქართველოში. აღნიშნული კომპონენტი დამატებით მოიცავს ასევე სამუშაო შეხვედრებს დაინტერესებულ მხარეებს შორის და შემეცნებით ღონისძიებებს პროექტის ბენეფიციარებისთვის.ადგილობრივი და საერთაშორისო ექსპერტების ჩართულობით, მოხდება სააგენტოს თანამშრომელთა კვალიფიკაციის ამაღლება ციფრული ტრანსფორმაციის მიმართულებით, გლობალური ტენდენციების გათვალიწინებით.პროექტი ხორციელდება 2022 წლის 12 დეკემბერს გერმანიის ფედერაციული რესპუბლიკის მთავრობასა და საქართველოს მთავრობას შორის გაფორმებული ხელშეკრულებით გათვალისწინებული შეთანხმების საფუძველზე.GITA-ს ინიციატივას მხარს უჭერს პროექტი „მცირე და საშუალო საწარმოების ციფრული ტრანსფორმაცია აღმოსავლეთ პარტნიორობის ქვეყნებში“ (DT4SME), რომელიც მიმდინარეობს გერმანიის ეკონომიკური თანამშრომლობისა და განვითარების ფედერალური სამინისტროს (BMZ) დაფინანსებით და მას გერმანიის საერთაშორისო თანამშრომლობის საზოგადოება (GIZ) ახორციელებს.

1713876300

ბიზნესი მხარს უჭერს „ქართულ ოცნებას“, ხელისუფლებას, გამომდინარე იქიდან, რომ ჩვენი უმთავრესი მიღწევა ამ ქვეყანაში არის ბიზნესის რეკეტის ერთხელ და სამუდამოდ დასრულება, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.როგორც პრემიერმა აღნიშნა, 2004-2012 წლები, გარდა ბევრი სხვა უმძიმესი მანკიერებისა, გამორჩეული იყო სწორედ ბიზნესის რეკეტით.„ბიზნესი მხარს უჭერს „ქართულ ოცნებას“, ხელისუფლებას. გამომდინარე იქიდან, რომ ჩვენი უმთავრესი მიღწევა ამ ქვეყანაში არის ბიზნესის რეკეტის ერთხელ და სამუდამოდ დასრულება. 2004-2012 წლები, თუკი რამით იყო გამორჩეული, გარდა ბევრი სხვა უმძიმესი მანკიერებისა, იყო სწორედ ბიზნესის რეკეტი. ბიზნესი დღეს არის თავისუფალი და რა თქმა უნდა, ამას აფასებენ ბიზნესმენები, მეწარმეები. მადლობა თითოეულ კომპანიას და მეწარმეს, რომელმაც შესწირა თანხები „ქართულ ოცნებას“. რა თქმა უნდა, წელს კიდევ უფრო აქტიურად ვიმუშავებთ, რათა მეტი შემოწირულობა მოვიზიდოთ, რადგან არჩევნებია და არჩევნებს რა თქმა უნდა, სჭირდება დაფინანსება. განსხვავებით „ენჯეოებისგან“, ყველაფერი გამჭვირვალეა და ყველას შეუძლია, ჩაიხედოს, როგორ წარიმართება ამ კომპანიების საქმიანობა, საიდან აქვთ შემოსავლები და როგორ ახერხებენ ისინი ტენდერების მოგებას. ყველაფერი არის გამჭვირვალე, შესაბამისად, ყველას შეუძლია ყველაფრის გადამოწმება. ის, რომ ამ კომპანიებს შორის არიან როგორც ტენდერში მონაწილე, ისე არა მონაწილე კომპანიები, ამაში გასაკვირი არაფერია“, – განაცხადა პრემიერმა.

1713857580

საქართველოს სტატისტიკის ეროვნული სამსახურის ინფორმაციით, 2024 წლის პირველ კვარტალში, წინა კვარტალთან შედარებით საცხოვრებელი უძრავი ქონების ფასების ინდექსი (RPPI) 1.1 პროცენტით გაიზარდა, ხოლო ინდექსის წლიურმა ზრდამ 13.0 პროცენტი შეადგინა.მათივე ცნობით, 2020 წლის საშუალოსთან შედარებით ინდექსი 41.3 პროცენტით არის გაზრდილი.RPPI-ის დაფარვა შემოიფარგლება ქ. თბილისით და მოიცავს მხოლოდ ახალი საცხოვრებელი უძრავი ქონების ბაზარს, როგორც მრავალსართულიანი სახლების (ბინების), ისე კერძო სახლების სეგმენტებს.2024 წლის პირველ კვარტალში, წინა კვარტალთან შედარებით ფასების ზრდა დაფიქსირდა როგორც საცხოვრებელი ბინების სეგმენტში (1.2 პროცენტი), ისე კერძო სახლების სეგმენტში (0.7 პროცენტი).2023 წლის პირველ კვარტალთან შედარებით ფასების ზრდა დაფიქსირდა ორივე სეგმენტში - ბინებზე 12.9 პროცენტით, ხოლო კერძო სახლებზე 13.3 პროცენტით. ქვემოთ მოცემულ გრაფიკზე წარმოდგენილია ჯამური RPPI-ის და მისი ქვეინდექსების, ასევე სამომხმარებლო ფასების ინდექსის (CPI) შედარებითი დინამიკა.

1713794805

„ვფიქრობ, გამჭვირვალობა არის უმაღლესი სტანდარტი, რომელიც მოეთხოვება ყველას, მათ შორის, განსაკუთრებით, საზოგადოებრივ ორგანიზაციებს, რადგან მათი ამოცანა არის საზოგადოებრივი მნიშვნელობის საკითხები, რომ ემსახურებოდნენ საზოგადოების ინტერესებს და ემსახურებოდნენ სწორად. შესაბამისად, მიმაჩნია, რომ გამჭვირვალობის მოთხოვნა აბსოლუტურად ლეგიტიმურია“ - ამის შესახებ ლევან დავითაშვილმა  „უცხოური გავლენის გამჭვირვალობის შესახებ“ კანონპროექტთან დაკავშირებით მედიის მიერ დასმული კითხვის საპასუხოდ განაცხადა.როგორც პირველმა ვიცე-პრემიერმა განმარტა, საპარლამენტო ფორმატში მოხდება კანონპროექტის პუნქტობრივი განხილვა და საზოგადოებას ექნება მისი შეფასების უფრო უკეთესი შესაძლებლობა.„კანონის მიღების პროცესში იქნება შინაარსობრივი განხილვები საპარლამენტო ფორმატში, ვფიქრობ, რომ ეს სწორი ფორმატი, ვიმსჯელოთ კონკრეტულ საკითხებზე. იცით, რომ  პარლამენტში წარმოდგენილია სხვადასხვა პოლიტიკური ძალა, ამიტომ, ოპოზიციონერ დეპუტატებს, რომლებსაც განსაკუთრებული წინააღმდეგობა აქვთ ამ კანონის მიღებასთან დაკავშირებით, შეეძლებათ, კონკრეტულ მუხლებზე, კონკრეტულად შინაარსზე დასვან კითხვები და საზოგადოება შეაფასებს, თუ რა არის ამ კანონის შინაარსის მიღმა, ყველა გაიგებს, რა არის არგუმენტები, რა არის კონტრარგუმენტები და დასკვნას გამოიტანს“ - აღნიშნა მინისტრმა.მისივე შეფასებით, როცა საუბარია გამჭვირვალობის მოთხოვნაზე, ანგარიშვალდებულებაზე, მნიშვნელოვანია, რომ საზოგადოებრივი ორგანიზაციების საქმიანობის შესახებ საზოგადოებას ჰქონდეს სრული ინფორმაცია. 

1713790920

„კანონი იძლევა საშუალებას, რომ ჩვენ ქვეყანაში მოვიზიდოთ უფრო მეტი კაპიტალი, მეტი ინვესტიცია, მეტი ქონება და საქართველო იყოს მიმზიდველი საინვესტიციო დანიშნულების მქონე ქვეყანა ინვესტორებისთვის. ეს არის მნიშვნელოვანი ამოცანა და ზუსტად ეს არის კანონის მოტივაცია,“ - ასე შეაფასა პირველმა ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა მთავრობის ადმინისტრაციაში გამართულ ბრიფინგზე საპარლამენტო უმრავლესობის დეპუტატთა ჯგუფის მიერ ინიცირებული ცვლილებები საგადასახადო კოდექსში, რომელიც შეღავათიანი დაბეგვრის მქონე ქვეყნებიდან საქართველოში აქტივების გადმოტანის საკითხს შეეხება. ლევან დავითაშვილის განცხადებით, აქამდეც საქართველოს მთავრობამ არაერთი გადაწყვეტილება მიიღო, რომელიც ითვალისწინებდა სხვადასხვა მიმართულების წახალისების მიზნით საგადასახადო შეღავათის შემოღებას.„ეს არის სახელმწიფოს ეკონომიკური პოლიტიკა, რომელსაც ქვეყანა, ვფიქრობ, რომ წარმატებით ახორციელებს. წინა წლებში ჩვენ საგადასახადო ლიბერალიზაცია მოვახდინეთ ამა თუ იმ მიმართულებით, რათა ჩვენი საინვესტიციო გარემო ყოფილიყო კიდევ უფრო მიმზიდველი. ვფიქრობ, რომ კანონი  აბსოლუტურად ადეკვატურია იქიდან გამომდინარე, რომ ზოგადად მსოფლიოში ტენდენციებია ასეთი, ნაკლებია ნდობა შეღავათიანი საგადასახადო რეჟიმის ქვეყნების მიმართ. აქედან გამომდინარე, კარგი შესაძლებლობებია, რომ ჩვენ მოვიზიდოთ ამ პირობებში ახალი დამატებითი ინვესტიციები და კაპიტალი ქვეყანაში,“ - აღნიშნა მინისტრმა. „ჩვენ ვსვამთ კითხვას, როგორ გადავაქციოთ ქვეყანა საინვესტიციოდ მიმზიდველად და საფინანსო ცენტრად, საფინანსო ჰაბად. ამ კუთხით ვფიქრობ, რომ ეს საკანონმდებლო ინიციატივა, რომლებიც, ამ შემთხვევაში, უმრავლესობის დეპუტატებს ჰქონდათ, სრულ თანხვედრაშია იმ მიზანთან, რასაც ჩვენ ვაცხადებთ, რომ ქვეყანაში მეტი კაპიტალი და მეტი ინვესტიციები შემოვიდეს და ეს ყველაფერი ეხმარებოდეს ქვეყნის ეკონომიკურ ზრდა -  განვითარებას,“ - აღნიშნა ლევან დავითაშვილმა.მისი თქმით, დღეს მსოფლიოში კაპიტალის მოძრაობა იძლევა იმის შესაძლებლობას, რომ საქართველოს მსგავსმა ქვეყნებმა ახალი ინვესტიციების მოზიდვა შეძლონ. ლევან დავითაშვილმა ასევე დააანონსა ახალი საგადასახადო შეღავათების შემოღების შესაძლებლობა.„ვფიქრობთ, რომ მთავრობის გუნდში ახალი საგადასახადო შეღავათების  ინიციატივები გვექნება. რა თქმა უნდა, ამაზე ეკონომიკური გუნდი იმსჯელებს, რაც მერე შეიძლება გადაიზარდოს საკანონმდებლო ინიციატივებში, რომლებიც ეხება მოსახლეობის სხვადასხვა ჯგუფს და ფართო მასებს,“ - აღნიშნა მინისტრმა. მისი თქმით, აქტივების გადმოტანის საკანონმდებლო ინიციატივების ლოგიკა და მოტივაცია საქართველოს ინტერესებშია.

1713790153

აწარმოე საქართველოში“ დირექტორმა მიხეილ ხიდურელმა უნგრეთის დედაქალაქ ბუდაპეშტში, მრგვალი მაგიდის ფორმატით გამართულ დისკუსიაში მიიღო მონაწილეობა, რომელიც ეძღვნებოდა თემას - „ინვესტირება საქართველოში“.საქართველოს საინვესტიციო პოტენციალის წარმოსაჩენად, მიხეილ ხიდურელი ღონისძიებაზე მთავარ მომხსენებლად იყო მიწვეული. სააგენტოს დირექტორმა უნგრეთის ბიზნეს სექტორის წარმომადგენლებისთვის გამართულ პრეზენტაციაზე, საქართველოს საინვესტიციო მიმზიდველობასა და პოტენციალს გაუსვა ხაზი.„მოგეხსენებათ, რომ სააგენტო აქტიურად მუშაობს ინვესტიციების მოზიდვის მიმართულებით და ინტენსიურ შეხვედრებს ვმართავთ პოტენციურ ინვესტორებთან, როგორც ქვეყნის შიგნით, ასევე მის ფარგლებს გარეთ. უნგრეთში ნაყოფიერი შეხვედრები გვქონდა. განვიხილეთ სამომავლო თანამშრომლობის საკითხები და უკვე არის დაინტერესება ადგილობრივი ინვესტორებისგან“ - განაცხადა მიხეილ ხიდურელმა.ღონისძიებაში მონაწილეობა მიიღეს უნგრეთის საგარეო საქმეთა და ვაჭრობის სამინისტროს სახელმწიფო მდივნის მოადგილემ საგარეო ეკონომიკურ ურთიერთობებში კატალინ ბიჰარიმ და უნგრეთის ექსპორტის ხელშეწყობის სააგენტოს (HEPA) აღმასრულებელმა დირექტორმა გაბორ იენეიმ.დისკუსიას ესწრებოდნენ იმ კომპანიის წარმომადგენლები, რომელთაც უნგრეთის ფარგლებს გარეთ სურთ ინვესტირება და აინტერესებთ საქართველოს საინვესტიციო შესაძლებლობების, ასევე ბიზნეს გარემოს გაცნობა. გაიმართა ორმხრივი შეხვედრები უნგრული კომპანიებისა და სხვადასხვა ორგანიზაციების წარმომადგენლებთან.ღონისძიება უნგრეთში საქართველოს საელჩოსა და კომპანია "დენტონს ბუდაპეშტის" თანამშრომლობით გაიმართა

1713769128

უცხოელ შემსყიდველებთან დაკავშირების პროგრამის ფარგლებში, საქართველოს ე.წ. ბაიერები ესტუმრნენ. ექსპორტის მხარდამჭერ პროგრამას „აწარმოე საქართველოში“ USAID-ის მხარდაჭერითა და საერთაშორისო საკონსულტაციო კომპანია OCO Global-ის ჩართულობით ახორციელებს.„საქართველოში ვმასპინძლობთ შემსყიდველებს ბრიტანეთიდან, ნიდერლანდებიდან, საფრანგეთიდან. მნიშვნელოვანია, რომ ისინი თავად მოინახულებენ საწარმოებს და ნახავენ რა შესაძლებლობები აქვთ ქართულ კომპანიებს ექსპორტის მიმართულებით. პროგრამა პირველად ხორციელდება ამ ფორმატში და იმედი გვაქვს, ქართულ კომპანიებთან სხვადასხვა შეთანხმების მიღწევა მოხდება, სწორედ ამ ვიზიტის ფარგლებში. ჩვენი საბოლოო მიზანია, მეტი ექსპორტის წახალისება საქართველოდან“ - განაცხადა „აწარმოე საქართველოში“ დირექტორის მოადგილემ თორნიკე ზირაქიშვილმა.„პროგრამის განხორციელების პროცესში, USAID-ის მხარდაჭერით ჩვენი საკონსულტაციო კომპანია მჭიდროდ პარტნიორობს სააგენტოსთან „აწარმოე საქართველოში“. ვეხმარებით 50 ქართულ კომპანიას, რომლებსაც საექსპორტო კავშირებისა და ბაზრების გაფართოვება სურთ. ჩვენ ხელს ვუწყობთ კომპანიებს გაიგონ რა შესაძლებლობები აქვთ უცხოურ ბაზრებზე, დაუკავშირდნენ შემსყიდველებს სხვადასხვა ქვეყნიდან.თბილისში სამდღიანი ვიზიტით ვიმყოფებით საერთაშორისო შემსყიდველებთან ერთად, რომლებიც  დაათვალიერებენ ექსპორტზე ორიენტირებული ქართული კომპანიების საწარმოებს, შეხვდებიან და გაესაუბრებიან მათ წარმომადგენლებს. ეს ვიზიტი ხელს შეუწყობს მჭიდრო კავშირების დამყარებას ქართულ კომპანიებსა და საერთაშორისო შემსყიდველებს შორის, რაც თავის მხრივ დაეხმარება კომპანიებს საერთაშორისო ასპარეზზე წარმოჩენასა და ახალი საექსპორტო ბაზრების მოძიებაში“ - განაცხადა OCO Global -ის მთავარმა კონსულტანტმა ელენა მოლინარიმ.ვიზიტის ფარგლებში, უცხოელმა „ბაიერებმა“ 20-მდე ექსპორტიორი საწარმო მოინახულეს საფეიქრო ინდუსტრიის, შესაფუთი მასალებისა და სათამაშოების სექტორიდან. გაცნობითი ხასიათის შეხვედრებზე უცხოელმა შემსყიდველებმა კომპანიებისგან მიიღეს ინფორმაცია სამუშაო პროცესისა და საწარმოო სიმძლავრეების შესახებ.ექსპორტის საბაზრო კავშირების პროგრამის მიზანია ხელი შეუწყოს ქართულ კომპანიებს ახალი უცხოური ბაზრების ათვისებაში. პროგრამა ერთი წლის განმავლობაში ხორციელდება და მასში 50  ქართული კომპანია მონაწილეობს. სხვადასხვა ეტაპზე, პროგრამის ფარგლებში შემუშავდა თითოეულ საწარმოზე მორგებული მარკეტინგული გეგმა, ვორკშოფები პროგრამის მონაწილეებისთვის და საერთაშორისო შემსყიდველებთან პირდაპირი კავშირების დამყარების სხვა შესაძლებლობები.პროგრამის მონაწილე კომპანიებმა უკვე ისარგებლეს სხვადასხვა სერვისით, მათ შორის მარკეტინგული მხარდაჭერით (ბაზრის კვლევა, მომხმარებელთა და კონკურენტების ანალიზი, ბაზარზე შეღწევის სტრატეგია, საერთაშორისი შემსყიდველების იდენტიფიცირება), რაც ხელს უწყობს მათ სწორად პოზიციონირდნენ და გაზარდონ გაყიდვები საერთაშორისო ბაზრებზე