1713943983

გარემოს დაცვისა და სოფლის მეურნეობის მინისტრმა ოთარ შამუგიამ საქართველოს მასშტაბით ფერმერებისათვის  მიზნობრივი ტრენინგების მნიშვნელობაზე ისაუბრა და აღნიშნა, რომ მსგავსი ტიპის აქტივობა ფერმერებს საშუალებას აძლევს, სწორად წარმართონ თხილის მოვლის პროცესი და მაღალი ხარისხის პროდუქცია მიიღონ.„სოფლის განვითარების სააგენტოს ორგანიზებით მიმდინარე ტრენინგების  მიზანია, დარგობრივი ცოდნა და რეალურ გამოწვევებთან დაკავშირებული ინფორმაცია მიაწოდოს მეთხილე ფერმერებს, რათა მათ შეძლონ მოსავლის როგორც ხარისხობრივი, ასევე რაოდენობრივი მაჩვენებლების გაუმჯობესება“, - განაცხადა ოთარ შამუგიამ.თხილის მწარმოებელთა ასოციაციის დირექტორის გიორგი თოდუას განცხადებით, სწავლების პროცესში 10 ათასობით ფერმერია ჩართული, რომლებიც თხილის ბაღებში შესაბამისი ვადების გათვალისწინებით გასატარებელი აგროტექნიკური სამუშაოების  შესახებ ყველა საჭირო ინფორმაციას და რეკომენდაციას იღებენ.„ფერმერებს ინფორმაციას ვაწვდით, თუ რამდენად მნიშვნელოვანია წამლობების აგროვადებში ჩატარება. მოსავლის აღების პროცესში, ფერმერმა, მაქსიმალურად მოკლე ვადაში უნდა აიღოს მოსავალი, სათანადოდ გააშროს და დაასაწყობოს. ამ ნაბიჯების გათვალისწინება, საბოლოოდ, მაღალი ხარისხის პროდუქციას მოგვცემს“, - განაცხადა გიორგი თოდუამ.

1713932820

საქართველო აპირებს, საერთაშორისო ბაზრებზე უმაღლესი ხარისხის, ნიგვზის მწარმოებელი ქვეყნის სტატუსი დაიმკვიდროს. მწარმოებლები ამბობენ, რომ ამ მიზნისკენ კონკრეტული ნაბიჯების გადადგმა უკვე დაწყებულია .ქართული ნიგვზის პოტენციალის შესახებ  საუბრისას კაკლის გადამმუშავებელი საწარმო „ანიგოზის“ თანადამფუძნებელი ანა ქევხიშვილი აცხადებს, რომ  ნაჭუჭგაცლილი კაკლის, ანუ იგივე ნიგვზის ექსპორტს „ანიგოზი“ გალფის ქვეყნებში, სომხეთსა და აზერბაიჯანში უკვე ახორციელებს. მთავარი მიზანი კი, ევროპულ ბაზრებზე მოხვედრაა.„ვფიქრობ, გაჩნდება ის სწორი დრო და ჩვენი გეგმის მიხედვით, ეს იქნება 2024 წლის ახალი მოსავალი, როდესაც ჩვენ ეს თავისუფალი ნიშა უნდა დავაკმაყოფილოთ იმიტომ, რომ გვაქვს ბევრი უპირატესობა, როგორც ხარისხობრივი, ისე ლოგისტიკური თვალსაზრისით და შეგვიძლია ქართული ნიგოზი ექსპორტზე გავიტანოთ. რაც მთავარია, გვაქვს სურსათის უვნებლობის სტანდარტი, რომელიც არის აუცილებელი ევროკავშირის ბაზრისთვის“, - განმარტავს  „ბიზნესპარტნიორთან“ ანა ქევხიშვილმა.მისივე ინფორმაციით, ჯერჯერობით, ქვეყანაში ძალიან მცირე რაოდენობით არის გაშენებული კაკლის ბაღები. საერთაშორისო ბაზრებზე გაზრდილი მოთხოვნის გამო კი, საჭიროა ფერმერები ამ კულტურით უფრო მეტად დაინტერესდნენ.„დღეს, საქართველოში კაკლის ბაღები უმეტესად კახეთისა და ქართლის რეგიონებში გვხვდება, ჯამურად მათი ფართობი 4500 ჰექტარს შეადგენს. გაშენებული კაკლის 90-95% კი ამერიკული ჩენდლერის ჯიშია. მსოფლიოში ჩილე და არგენტინა მიიჩნევა ტოპ ხარისხის პროდუქტის მწარმოებლებად  და შემიძლია, თამამად ვთქვა, რომ მათთან გათანაბრებული და უკეთესი ხარისხიც კი გვაქვს ჩენდლერის წარმოებაში“, - აღნიშნავს „ანიგოზის“ თანადამფუძნებელი.ანა ქევხიშვილი ადგილობრივ ბაზარზეც  საუბრობს და განმარტავს, რომ ქართულ ნიგოზზე მოთხოვნა საქართველოშიც მკვეთრად გაიზარდა და წელს უკვე მასიურად გამოჩნდა ქართული წარმოების ნიგოზი სავაჭრო ქსელებში, რაც აქამდე არ ფიქსირდებოდა.კაკლის გადამმუშავებელი საწარმო „ანიგოზი“ სოფელ მარტყოფში პანდემიის პერიოდში, კერძოდ 2021 წელს, სოფლის განვითარების სააგენტოს თანადაფინანსებით ამოქმედდა. პროექტში, დაახლოებით, 3 მლნ ლარის ინვესტიცია ჩაიდო. თანამედროვე დანადგარებით აღჭურვილი საწარმო ამჟამად, ორი მიმართულებით მუშაობს, კერძოდ, ფერმერებისგან იბარებს როგორც სველ მდგომარეობაში, ახალ დაკრეფილ კაკალს, ასევე მშრალ კაკალს მეორადი გადამუშავებისთვის.

1713868140

''ქარხანა ბორბლებზე" პროექტი „ქართული ყველის“ მეორე ეტაპია, რომელიც 2023 წელს დაიწყო. საქართველოს ყველის მწარმოებელთა ასოციაციის თავმჯდომარე, ქართული ყველის მკვლევარი ანა მიქაძე-ჩიკვაიძე ''ბიზნესპარტნიორთან" აცხადებს, რომ პროექტის პირველი ეტაპი მეწარმეების აღმოჩენა, ფესტივალების  დაარსება, ყველის პოპულარიზაცია, დახლებზე დაბრუნება და  საწარმოების შექმნა იყო.ეს ეტაპი დასრულდა. თუმცა, მეორე ეტაპი ''ქარხანა ბორბლებზე" უვადოა, რაც ნიშნავს, რომ მუდმივად გაგრძელდება. პარალელურად დაიწყება მესამე ეტაპის განხორციელება - ქართული ყველის შეფუთვა და ქვეყნის გარეთ გატანა.ანა მიქაძე-ჩიკვაიძის ინფორმაციით, პროექტმა  საქართველოს ყველა კუთხე მოიარა და მაქსიმალურად ცდილობს გამოცდილების გაზიარებას მეწარმეებისთვის, რომლებსაც არტიზანული ყველის წარმოების რესურსი აქვთ, მაგრამ  ცოდნის ამაღლება სჭირდებათ. რაც შეეხება ყველის სახეობებს, აღდგენილია მივიწყებული უნიკალური წარმოება, როგორიცაა ტენილი, დამბალ ხაჭო, გვაჯილა,  შუშველა, ნარჩვი და სხვა.  ''ყველა რეგიონში 2-3 ყველი მაინც არის,  რომლის წარმოებაც დაწყებულია. ის სამეურნეო კულტურა, რაც გვაქვს, დავაფიქსირეთ და მსოფლიოს ვუთხარით, რომ ქართული  ყველი უძველესია, როგორც ღვინო, ძირძველი წარმოება გვქონდა, ჭურჭელიც გვაქვს შესაბამისი, არქეოლოგია შესწავლილია, ეთნოგრაფია, საკუთარი ფესტივალი გვაქვს.  ახლა საჭიროა ეს ყველაფერი გარკვეულ სტანდარტთან მივაახლოოთ. ვუზიარებ ინფორმაციას,  მეწარმეებს ვესაუბრები მსოფლიო გამოცდილებაზე, ჩვენთან მიღწეულ მარეგულირებელ დოკუმენტებზე, ვუყვები, რამ შეიძლება მისი საქმიანობის გაჩერება გამოიწვიოს. ამ ინფორმაციის გაზიარებაში კიდევ ერთი ნაბიჯით წავიწევთ წინ ქართული ყველის განვითარებაში. ერთია რომ დიდი ტრადიცია გვაქვს და ყველა რეგიონს აქვს დამახასიათებელი ნიშა, დავრწმუნდით გემოვნურ თვისებაში,  კარგია მეგრული და სვანური სულუგუნი, მაგრამ ასევე უნიკალურია გვაჯილა (ლეჩხუმური სულუგუნი), ამ ტერმინის  არსებობა ბევრმა  დღემდე არ იცის, მაგრამ ეს ყველაფერი დაფიქსირებულია და ლამაზად უნდა შეიფუთოს", - აცხადებს ანა მიქაძე-ჩიკვაიძე.რაც შეეხება პროექტის მესამე ფაზას, ჯერჯერობით უცნობია, კონკრეტულად როდის დაიწყება. როგორც ყველი მკვლევარი განმარტავს, მცირე ფერმერების პრობლემა სურსათის უვნებლობის საკითხია. ძველი ტრადიცია მოშლილია და  აქამდე წარმოება ფაქტობრივად ნებაზე იყო  მიშვებული, რასაც უკვე ორგანიზებული ფორმა უნდა მიეცეს და სფერო განვითარდეს.''პროექტის მიზანია, არტიზანულ საწარმოებში შევიდეს ცოდნა. მაგალითად,  მსოფლიოში საუკეთესო ფრანგული ყველია კამემბერი, რომელსაც თავის დროზე სოფელ კამემბეში მონაზვნები აწარმოებდნენ.  ამას მოჰყვა შემდეგში ამ ობის რაგვარობის შესწავლა. აღმოაჩინეს, რომ  ძალიან სასარგებლოა  ჯარისკაცებისთვის, განსაკუთრებით ომის დროს, უგვარებს გაციების პრობლემას ანუ გამოუჩინეს ყველს შესაბამისი მომხმარებელი. ის ობზე, რომელიც  წარმოიშვა კამემბერის და გორგონძოლას შემთხვევაში (ასევე ობიანი ყველების შემთხვევაში),  მწარმოებლების და სახელმწიფოს მიერ დადგინდა რაგვარობა და მერე უკვე მათი კულტივირება. ახლა მსოფლიოს მასშტაბით შესაძლებელია უამრავი კომპანიისგან შეიძინო სხვადასხვა ტიპის ობი და საკუთარ  წარმოებაში მოიხმარო. ასე ვითარდებოდა ყველის წარმოება მსოფლიოში და ჩვენც ეს გზა უნდა გავიაროთ", - აცხადებს ანა მიქაძე-ჩიკვაიძე ''ბიზნესპარტნიორთან".ცნობისთვის,  პროექტი ''ქარხანა ბორბლებზე" ანა მიქაძე ჩიკვაიძემ 2023 წელს დაიწყო. ამასთან,  2010 წლიდან არის ა(ა)იპ ‘’საქართველოს ყველის მწარმოებელთა გაერთიანება-გილდიის’’ გამგეობის თავმჯდომარე.  ფესტივალების ‘’ქართული ყველი’’ (ავტორი) და კავკასიური ყველი’’ ორგანიზატორი. ქართული ყველის მკვლევარი პროექტს საკუთარი რესურსით ახორციელებს.

1713855081

ღვინის ეროვნული სააგენტოს ფინანსური მხარდაჭერითა და სააგენტოს კონტრაქტორი გერმანული მარკეტინგული კომპანია ff.k Public Relations-ის  ორგანიზებით, საქართველოს გერმანელი ღვინის პროფესიონალების 10-კაციანი ჯგუფი სტუმრობდა.ჯგუფის შემადგენლობაში შედიოდნენ სომელიეები, კომერციული სექტორის და მედიის წარმომადგენლები.5-დღიანი ტურის ფარგლებში, სტუმრები ქართული ღვინის მწარმოებელ კომპანიებს ქართლსა და კახეთში ეწვივნენ,  დააგემოვნეს სხვადასხვა სტილის ქართული ღვინო.ქართული ღვინის პოპულარიზაციისა და საექსპორტო პოტენციალის გაზრდის მიზნით, გერმანულ კომპანია f.k Public Relations-სთან ღვინის ეროვნულმა სააგენტომ თანამშრომლობა  2021 წლიდან დაიწყო. აქტიური პოპულარიზაციის კამპანია  მიმდინარე წელსაც გრძელდება.ევროპაში ღვინის უდიდესი იმპორტიორი ქვეყანა გერმანია ქართული ღვინის სტრატეგიული ბაზრების ჩამონათვალს 2020 წლიდან დაემატა და საექსპორტო ქვეყნების ათეულში სტაბილურად დაიმკვიდრა ადგილი. მიმდინარე წლის პირველ  კვარტალში საქართველოდან გერმანიაში 300 ათასი ლიტრი ღვინოა ექსპორტირებული, ზრდამ  გასული წლის ანალოგიურ პერიოდთან შედარებით 31% შეადგინა.

1713792263

დღეს გამართულ სხდომაზე საქართველოს მთავრობამ განიხილა და მოიწონა გარემოს დაცვისა და სოფლის მეურნეობის სამინისტროს ინიციატივა, რომელიც თუშეთის დაცული ლანდშაფტის 2245 ჰექტრით გაფართოებას ითვალისწინებს. კანონპროექტის მიღების შედეგად, თუშეთის დაცული ლანდშაფტის ფართობი 34 280 ჰექტარი იქნება.კანონპროექტის თანახმად,  თუშეთის დაცული ლანდშაფტის ფარგლებში მოექცევა  სოფელი ტბათანა და მისი მიმდებარე ტერიტორია, რაც მეტად მნიშვნელოვანია რადგან სოფელი ტბათანა და მისი მიმდებარე ტერიტორია თავისი მდებარეობით ერთგვარ მაკავშირებელ დერეფანს ქმნის ბაწარას სახელმწიფო ნაკრძალს, ილტოს აღკვეთილსა და თუშეთის დაცულ ტერიტორიებს შორის, რაც მთლიანად ამ ვრცელ ტერიტორიაზე უზრუნველყოფს ეკოლოგიური პროცესების უწყვეტობას.სოფელ ტბათანისთვის და  მის მიმდებარე ტერიტორიისთვის დაცული ლანდშაფტის სტატუსის მინიჭების საკითხი ეფუძნება „თუშების სათემო საბჭოს“ წინადადებას და შეთანხმებულია ადგილობრივ მოსახლეობასა და თვითმმართველობასთან.გაფართოებულ არეალზეც გავრცელდება დაცული ლანდშაფტის მართვასთან დაკავშირებული რეგულაციები, რაც ხელს შეუწყობს ორი საუკუნის განმავლობაში აქ არსებული დასახლების ისტორიული იერსახის აღდგენას, ბუნებრივი რესურსებით მდგრადი სარგებლობის წახალისებას და ეკოტურიზმის პოტენციალის გაუმჯობესებას.  აღნიშნულ ტერიტორიაზე ეკოტურისტული ინფრასტრუქტურის მოწყობის შედეგად, გაიზრდება ვიზიტორთა რაოდენობა, რაც დადებითად აისახება ადგილობრივი მოსახლეობის სოციალურ-ეკონომიკურ მდგომარეობაზე.აღსანიშნავია, რომ ბიომრავალფეროვნების დაცვის ხელშეწყობის მიზნით, საქართველოში შექმნილია სხვადასხვა კატეგორიის 100 დაცული ტერიტორია და მათი ფართობი 912 ათას ჰექტარზე მეტს შეადგენს, რაც ქვეყნის ტერიტორიის დაახლოებით 13.1%-ია. ჩვენ აქტიურად ვაგრძელებთ ამ მიმართულებით მუშაობას. საქართველოს პარლამენტში წარდგენილია „გურიის ეროვნული პარკის შექმნისა და მართვის შესახებ“ კანონპროექტი, მიმდინარე წელს განხორციელდება კვლევები სამეგრელოსა და ზემო სვანეთში დაცული ტერიტორიების დაარსების და ასევე რაჭაში არსებული დაცული ტერიტორიის გაფართოების მიმართულებით. ვაგრძელებთ ეკოტურისტული ინფრასტრუქტურის განვითარებას.  წელს დასრულდება 15 დაცულ ტერიტორიაზე 1 200 კმ-მდე სიგრძის საფეხმავლო ბილიკების და თანმდევი ტურისტულ-რეკრეაციული ინფრასტრუქტურის მოწყობა, რომლისთვისაც 30 მლნ. ლარზე მეტი იქნა გამოყოფილი. ასევე წელს სულ მცირე 10 ლოკაციაზე შეიქმნება ახალი ეკოტურისტული ინფრასტრუქტურა რისთვისაც 10 მლნ. ლარი იქნება მიმართული.დაცული ტერიტორიების სწორის განვითარების პოლიტიკის შედეგად, 2023 წელს საქართველოს დაცულ ტერიტორიებზე დაფიქსირდა 1 070 000 ვიზიტორი, რაც 2022 წლის მონაცემებთან შედარებით 19%-ით გაზრდილი მაჩვენებელია.

1713777600

ნედლი რძის  დეფიციტის  და ამის გამო გახშირებული ფალსიფიცირების ფაქტების თემა ბოლო წლებია აქტუალურია. როგორც  საქართველოს ყველის მწარმოებელთა ასოციაციის თავმჯდომარე, ანა მიქაძე-ჩიკვაიძე ‘’ბიზნესპარტნიორთან'' აცხადებს, საკითხი ამ დრომდე მოუგვარებელია, ერთ-ერთი მთავარი პრობლემა  კი ამ კუთხით კანონის აღსრულების მექანიზმს უკავშირდება.როგორც ანა მიქაძე-ჩიკვაიძე აღნიშნავს, მიუხედავად იმისა, რომ საკანონმდებლო ბაზა საუკეთესოა, სურსათის უვნებლობის სააგენტოს არც ადამიანური და არც ფინანსური რესურსი აქვს იმ დონეზე, რომ არსებულ გამოწვევას გაუმკლავდეს.ყველის მწარმოებელთა ასოციაციის თავმჯდომარის განცხადებით, რძის წარმოება ქვეყანაში სეზონურია, მარაგები ზამთარში ფაქტობრივად არ არის, რის გამოც დიდი რაოდენობით შემოდის იმპორტული, გაურკვეველი წარმოშობის რძის ფხვნილი და მცენარეული ცხიმები, რასაც მცირე მწარმოებლები თითქმის მასიურად იყენებენ.მისი ინფორმაციით, არაერთი შემთხვევაა ასევე, როცა არაკეთილსინდისიერი მწარმოებლები სოფელთან და გლეხურ მეურნეობებთან ასოცირებულ  სახელებს  ბრენდად იყენებენ და არასათანადო პირობებში წარმოებულ პროდუქტს სოფლის ნაწარმად ასაღებენ.‘’რძის საწარმოების უმეტესობა ისე იხსნება, არც აღიარების კოდი აქვთ და არც შემოწმება აქვთ გავლილი. თუკი ფაქტს სურსათის უვნებლობის სააგენტო აღმოაჩენს, მეწარმეს წარმოება უჩერდება, მაგრამ მაინც არ ჩერდებიან, უკვე სხვა ფართს ეძებენ, სარდაფებში აგრძელებენ საქმიანობას და გაუგონარ პირობებში წარმოებული პროდუქტები (რძე, ყველი და მაწონი) გლეხებთან ასოცირებული სახელებით იბრენდება.  ყველაზე ხშირად კი გამოიყენება ‘’ბებო“, რომელსაც სინამდვილეში სოფელში მცხოვრები დიასახლისების მიერ წარმოებულ პროდუქტთან არაფერი აქვთ საერთო.  თუმცა მსგავსი ეტიკეტირებით ცდილობენ ხაზი გაუსვან, რომ გლეხურია, არ უნდა შეეხონ! ამ დროს  წარმოებული პროდუქტი სერიოზული რისკების შემცველია. კაცმა არ იცის, რა პირობებში და რა ხელით მზადდება“, -  აცხადებს ანა მიქაძე-ჩიკვაიძე.მისი ინფორმაციით, ხარისხის კუთხით პრობლემა ფაქტობრივად არ არის მსხვილ საწარმოებში, სადაც პროდუქტი სტანდარტის დაცვით იწარმოება.რაც შეეხება გამოსავალს, როგორც ყველის მწარმოებელთა ასოციაციის თავმჯდომარე აღნიშნავს, მნიშვნელოვანია რეგლამენტის დაცვა მოხდეს და ამაში თანაბრად ჩაერთოს სამი სუბიექტი:  მომხმარებელი, სახელმწიფო და მწარმოებლები.,,ფერმერის ჩართულობა მნიშვნელოვანია, რადგან წარმოების პროცესში კეთილსინდისიერება მისი მოვალეობაა. არ უნდა მოგატყუოს. სახელმწიფო ვალდებულია, კანონი აღსრულების მხრივ მოაგვაროს სიტუაცია.  თუმცა მომხმარებლისთანა საიმედო პარტნიორი სახელმწიფოს არ ჰყავს.  მყიდველი გამადიდებელი შუშით უნდა ამოწმებდეს, აკვირდებოდეს და ამოწმებდეს  ეტიკეტს და ნებისმიერ დარღვევაზე მოითხოვოს რეაგირება. სხვა არაფერი შველის, რადგან სურსათის უვნებლობის მხრიდან ზომების გააქტიურების მიუხედავად, პრობლემა ვერ გვარდება, გაცილებით ბევრი ფაქტია და ამის კონტროლს ერთი უწყება ფიზიკურად ვერ გასწვდება“, - აცხადებს ანა მიქაძე-ჩიკვაიძე.ცნობისთვის,  საქსტატის მონაცემებით, 2023 წლის IV კვარტალში რძის წარმოებამ 102.8 მლნ ლიტრი შეადგინა, რაც წინა წლის ანალოგიურ მაჩვენებელზე 6.8 პროცენტით მეტია. 2023 წლის რძის წარმოების წლიური მაჩვენებელი 585.4 მლნ ლიტრით განისაზღვრა, რაც 3.6 პროცენტით აღემატება 2022 წლის შედეგს.

1713518404

გერმანიის საერთაშორისო თანამშრომლობის საზოგადოება (GIZ) საქართველოში ახალ პროექტს „ცირკულარული ქალაქის ლაბორატორია“ იწყებს. პროექტის პრეზენტაციას გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი დაესწრო.მინისტრის მოადგილემ GIZ-ის წარმომადგენლებს მადლობა გადაუხადა მხარდაჭერისთვის და აღნიშნა, რომ დონორი ორგანიზაციების ჩართულობა ქვეყნის მწვანე ეკონომიკაზე გადასვლის პროცესში უმნიშვნელოვანესია. აღსანიშნავია, რომ პროექტის სამიზნე ჯგუფია ადგილობრივი ბიზნესი, განსაკუთრებით ქალი მეწარმეები. პროექტი გერმანიის ეკონომიკური თანამშრომლობისა და განვითარების ფედერალური სამინისტროს ფინანსური მხარდაჭერით განხორციელდება.„ნარჩენების მართვა საქართველოს მთავრობისთვის პრიორიტეტული მიმართულებაა. საქართველოს მიღებული აქვს ნარჩენების მართვის სტრატეგია და ეროვნული გეგმა, სადაც ძირითადი ყურადღება სწორედ ნარჩენების პრევენციას, ნარჩენების ხელმეორედ გამოყენებას და რეციკლირებას ეთმობა. შეფუთვის ნარჩენები დღემდე ერთ-ერთ მთავარ გამოწვევად რჩება. საქართველოში წელიწადში დაახლოებით  200-250 ათასი ტონა შეფუთვის ნარჩენი გროვდება, რაც მთელი ნარჩენების 16-17%-ია. ჩვენი მიზანი გარემოს დაცვაზე ორიენტირებული ეკონომიკის ჩამოყალიბებაა“, - განაცხადა სოლომონ პავლიაშვილმა.გერმანიის საელჩოს სამხრეთ კავკასიის განვითარების თანამშრომლობის განყოფილების უფროსის, ლიდია ქრისტმანის განცხადებით, სამართლებრივი ჩარჩოების და პოლიტიკის დოკუმენტების შექმნის მიმართულებით საქართველომ მნიშვნელოვანი ნაბიჯები უკვე გადადგა, ახლა ძირითადი ყურადღება ამ დოკუმენტების იმპლემენტაციას უნდა დაეთმოს.„ვაფასებ საქართველოს მისწრაფებას, დანერგოს ნარჩენების მართვის საერთაშორისო პრაქტიკა. მრავალჯერადი გამოყენების შეფუთვის სისტემების იმპლემენტაცია ცირკულარულ ეკონომიკაზე გადასვლისკენ გადადგმული მნიშვნელოვანი ნაბიჯია. რაც უფრო ნაკლები შეფუთვა გამოიყენება, მით ნაკლები ნარჩენი წარმოიქმნება, ეს პრობლემის მოგვარების გასაღებია. გარდა ამისა, ეს ფინანსური რესურსების დაზოგვის და სათბური აირების გამოყოფის შემცირების საუკეთესო საშუალებაა“, - აღნიშნა ლიდია ქრისტმანმა.პროექტის წარდგენის პარალელურად, პანელური დისკუსია „ცირკულარული ეკონომიკა, ნარჩენების პრევენცია და ხელახალი გამოყენება საქართველოში“ გაიმართა, რომლის ფარგლებშიც საქართველოში ცირკულარული ეკონომიკის განვითარებაზე და ნარჩენების მართვის სისტემების დანერგვის საკითხებზე იმსჯელეს.

1713514434

ბელგიის სამეფოს დედაქალაქ ბრიუსელში გამართულ ღვინით ვაჭრობის მსოფლიო ჯგუფის (WWTG) შეხვედრაზე საქართველოს თავმჯდომარეობის ერთწლიანი პერიოდი და მიღწეული შედეგები დადებითად შეფასდა, - ინფორმაციას ღვინის ეროვნული სააგენტო ავრცელებს.მათივე ცნობით, შეხვედრის გახსნას, საქართველოს დელეგაციასთან ერთად, საქართველოს საგანგებო და სრულუფლებიანი ელჩი ბელგიის სამეფოსა და ლუქსემბურგის დიდ საჰერცოგოში, ევროკავშირთან საქართველოს წარმომადგენლობის ხელმძღვანელი ვახტანგ მახარობლიშვილი დაესწრო და შეხვედრის მონაწილეებს სიტყვით მიმართა.„2023 წლის პირველი მაისიდან აღნიშნული ორგანიზაციის თავმჯდომარეობა საქართველოს ერთი წლის ვადით ამერიკის შეერთებული შტატებიდან როტაციის პრინციპით გადმოეცა. თავმჯდომარეობის პერიოდში ორგანიზაციის საქმიანობის მთავარი კოორდინატორი ღვინის ეროვნული სააგენტო იყო. ორგანიზაციის ძირითადი მიზანია ღვინით ვაჭრობის გამარტივება, ღვინით საერთაშორისო ვაჭრობის ხელშეწყობა და სავაჭრო ბარიერების მოხსნისთვის ერთობლივი ქმედებების განხორციელება“, – აღნიშნულია ღვინის ეროვნული სააგენტოს ინფორმაციაში.ღვინით ვაჭრობის მსოფლიო ჯგუფის (WWTG) წევრ ქვეყნებთან ერთად (საქართველო, აშშ, არგენტინა, ავსტრალია, კანადა, ჩილე, ახალი ზელანდია, სამხრეთ აფრიკა, ურუგვაი) შერხვედრას დამკვირვებელი ქვეყნის სტატუსით, დიდი ბრიტანეთის დელეგაციაც დაესწრო.„მოხარული ვართ საქართველოს ერთწლიანი თავმჯდომარეობის პერიოდით. WWTG-ის წევრი ცხრავე ქვეყანა დიდ სარგებელს იღებს ჯგუფის მუშაობით. ბოლო ერთი წლის განმავლობაში ჩვენ მივაღწიეთ მნიშვნელოვან პროგრესს მთელ რიგ საკითხებში, რაც, საბოლოოდ, ხელს შეუწყობს ღვინით, როგორც სოფლის მეურნეობის ღირებული პროდუქტით ვაჭრობას, სარგებელს მოუტანს ჩვენს ქვეყნებს ექსპორტისა და ღვინით ვაჭრობის გაფართოებით“, - აღნიშნა ამერიკის დელეგაციის წევრმა ჩარლზ ჯეფერსონმა.

1712994060

"ნიამორი" ექსპორტზე გასვლას სექტემბერში გეგმავს. ამის შესახებ კომპანიის დირექტორმა გიორგი ბოჭორიშვილმა "ბიზნესპარტნიორთან" განაცხადა. მოლაპარაკებები მიმდინარეობს ბალტიის ქვეყნებთან და  ესპანეთთან.მისი ინფორმაციით, ეს იქნება კომპანიის პირველი ექსპორტი. ამისთვის კი "ნიამორი" ამ ეტაპზე გარკვეულ პროცედურებს გადის. როგორც ბოჭორიშვილი აცხადებს, კომპანიას საკუთარი ვენახები არ აქვს, პროდუქციას ჩაბარებული ყურძნით აწარმოებს და  ონლაინ ყიდის. საუბარია ჯამში  რამდენიმე ათეული სახეობის ალკოჰოლურ სასმელზე, მათ შორის, ღვინოზე, ჭაჭაზე და ბრენდზე.  გადაამუშავებს.კომპანია „ნიამორი“  ბაზარზე 2017 წლიდან ფუნქციონირებს.გარდა ამისა, კომპანია  მრავალფუნქციური კომპლექსის მშენებლობას მცხეთის რაიონის სოფელ მუხრანში ახორციელებს, რომლის პირველი ნაწილი 2023 წელს დასრულდა, ხოლო მეორე ნაწილის მშენებლობა 2025 წელს არის დაგეგმილი.