1713345412

დადგენილება, რომლითაც ონკოპაციენტებისთვის, სახელმწიფო პროგრამით გათვალისწინებულ მედიკამენტებზე წვდომა ულიმიტოდ ხდება შესაძლებელი, საკანონმდებლო მაცნეზე დღეს გამოქვეყნდა და უკვე ძალაშია.პრემიერ-მინისტრის ხელმოწერილი, მთავრობის დადგენილება გულისხმობს ცვლილებების შეტანას „საყოველთაო ჯანდაცვაზე გადასვლის მიზნით გასატარებელ ზოგიერთ ღონისძიებათა შესახებ“ საქართველოს მთავრობის 2013 წლის 21 თებერვლის №36 დადგენილებაში.საუბარია ცვლილებაზე, რომლის ამოქმედებასაც ონკოპაციენტების ნაწილი თვეების განმავლობაში ითხოვდა. კერძოდ, მათი მოთხოვნა იყო, თითო პაციენტის მკურნალობაზე გამოყოფილი წლიური 25 ათასლარიანი ლიმიტი მოხსნილიყო და სახელმწიფო პროგრამით გათვალისწინებული მედიკამენტების დაფინანსება ულიმიტო გამხდარიყო. ამ მოთხოვნის მიზეზი არის ის, რომ აღნიშნულ თანხაში შედიოდა როგორც მკურნალობის პროცესი და კვლევები, ისე მედიკამენტები. თუმცა პაციენტების ნაწილისთვის, სიმსივნის სახეობიდან გამომდინარე, ძვირადღირებული მედიკამენტები იყო საჭირო, რასაც 25 ათასლარიანი ლიმიტი არ ჰყოფნიდა.ცვლილების ამოქმედება ჯანდაცვის მინისტრმა რამდენიმე კვირის წინ დააანონსა.მიხეილ სარჯველაძის განცხადებით, სახელმწიფოს მიერ დაფინანსებულ მედიკამენტებზე ფინანსური ლიმიტი იხსნება.კერძოდ, საყოველთაო ჯანდაცვის პროგრამის ფარგლებში  ქიმიოთერაპიასთან, ჰორმონოთერაპიასთან და იმუნოთერაპიასთან დაკავშირებული მედიკამენტები სრულად დაფინანსდება, რაც ნიშნავს იმას, რომ აღნიშნული წამლების ღირებულება ონკოპაციენტის მკურნალობისთვის გამოყოფილ წლიურ 25 000 ლარიან ლიმიტს არ გამოაკლდება და ცალკე პროგრამით, ულიმიტოდ დაფინანსდება. 25 ათას ლარს კი პაციენტები სხვადასხვა პროცედურისთვის მოიხმარენ - მათ შორისაა გამოკვლევები, პროცედურები, სხივური თერაპია. ცვლილება შეეხება იმ პაციენტებსაც, რომლებსაც ამ დროისთვის 25 000-ლარიანი ლიმიტი ამოწურული აქვთ.აღსანიშნავია, რომ სახელმწიფო პროგრამა აფინანსებს ნებისმიერ ონკოპაციენტს, მიუხედავად მათი შემოსავლისა და კერძო დაზღვევის ქონისა.jandacva.ge

1713279600

"ბევრი ქვეყანა ვერ იტრაბახებს ისეთი კარგი და ინტენსიური სარეაბილიტაციო პროგრამით, როგორიც საქართველოს აქვს", - ამის შესახებ თბილისის სახელმწიფო სამედიცინო უნივერსიტეტის რექტორმა, კენ ვოკლერის სახელობის სამედიცინო რეაბილიტაციის საუნივერსიტეტო კლინიკის დირექტორმა, პროფესორმა ირაკლი ნატროშვილმა რადიოგადაცემაში „ჯანმრთელობის ლაბორატორია“ განაცხადა.მისი თქმით, საყოველთაო ჯანდაცვის პროგრამის ფარგლებში ინსულტის, თავის ტვინის და ზურგის ტვინის ტრავმული დაზიანებების შემდგომი მდგომარეობების სარეაბილიტაციო პროგრამა 2023 წლიდან ამოქმედდა და ის ძალიან წარმატებით მუშაობს.„პროგრამა 2023 წლდან ამუშავდა და ბევრი ქვეყანა ვერ იტრაბახებს ასეთ კარგი, ინტენსიური სარეაბილიტაციო პროგრამებით, რომლებიც რიგ შემთხვევაში 100, ზოგ შემთხვევაში კი 80 ან 90%-ით ფინანსდება,“ - განაცხადა ირაკლი ნატროშვილმა.შეგახსენებთ იმ კრიტერიუმებს, რომლებსაც პროგრამით სარგებლობის მსურველი უნდა აკმაყოფილებდეს: დიაგნოზის ხანდაზმულობა არ უნდა აღემატებოდეს 24 თვეს.100%-იანი დაფინანსებით სახელმწიფოს მხრიდან სარგებლობენ:„სოციალურად დაუცველი ოჯხების მონაცემთა ერთიან ბაზაში „ რეგისტრირებული  პირები, რომელთა სარეიტინგო ქულა არ აღემატება 70 000-ს;2008 წლის 6 აგვისტოდან საქართველოზე რუსეთის ფედერაციის შეიარაღებული თავდასხმის შედეგად საქართველოს ოკუპირებული ტერიტორიებიდან იძულებით გადაადგილებულ პირთა - დევნილთა ოჯახის წევრებიოკუპირებული ტერიტორიის მიმდებარედ მცხოვრები ოჯახები, გორის, კასპის, ქარელის, ხაშურის, დუშეთის, ონის, საჩხერის, ზუგდიდის, წალენჯიხის მუნიციპალიტეტებში საქართველოს ოკუპირებულ ტერიტორიებთან გამყოფი ხაზის მიმდებარე სოფლებში მცხოვრები პირები.ჯანდაცვის მინისტრის ინდივიდუალური ადმინისტრაციულ-სამართლებრივი აქტით განსაზღვრული სააღმზრდელო საქმიანობის განსახორციელებელი დაწესებულებების, დედათა და ბავშვთა თავშესაფრებისა და სათემო ორგანიზაციების ბენეფიციარები.ზრუნვის სააგენტოს ტერიტორიულ ერთეულებში ბავშვთა სააღმზრდელო დაწესებულებებში, ხანდაზმულთა და შშმ პირთა პანსიონატებში მცხოვრები ბენეფიციარები; მასწავლებლები; სახალხო არტისტები, სახალხო მხატვრები და რუსთაველის პრემიის ლაურეატები;ვეტერანების საქმეთა სახელმწიფო სამსახურის საინფორმაციო ბაზაში რეგისტრირებული ვეტერანები.90%-იანი დაფინანსებით სახელმწიფოს მხრიდან სარგებლობენ:საპენსიო ასაკის სახელმწიფო პენსიის მიმღები პირები (ქალი-60წლიდან , მამაკაცი 65 წლიდან )80%-იანი დაფინანსებით სახელმწიფოს მხრიდან სარგებლობენ:შშმ სტატუსის მქონე პირებისტუდენტები (მათ შორის, პროფესიული სტუდენტები)jandacva.ge

1713258420

საფრანგეთში იგეგმება ახალი კანონის მიღება, რომლის მიხედვითაც, თუ ექიმთან ვიზიტზე ჩაწერილი პაციენტი კონსულტაციაზე არ გამოცხადდება და ამის შესახებ სამედიცინო დაწესებულებას წინასწარ არ გააფრთხილებს, ის 5 ევროთი დაჯარიმდება. ჯარიმას ის იმ შემთხვევაში აირიდებს, თუ დაადასტურებს, რომ გაცდენის მიზეზი საპატიოა. მთავრობა გეგმავს, რომ ამ ზომის შედეგად სხვა პაციენტებისთვის წელიწადში 15-დან 20 მილიონამდე მიღება გამოთავისუფლდება.დაგეგმილ რეფორმას უკვე მოჰყვა კრიტიკა. პაციენტების ასოციაციის პრეზიდენტის ჟერარ რაიმონის თქმით, ეს კანონი მიმართულია არა პაციენტებში პასუხისმგებლობის გრძნობის ამაღლებისკენ, არამედ იმისკენ, რომ მათ თავი დამნაშავედ იგრძნონ.ესაა ერთ-ერთი ნაბიჯი, რომლითაც საფრანგეთის ხელისუფლება ჯანდაცვის სისტემაში არსებული პრობლემების მოგვარებას ცდილობს. ამ პრობლემებს შორისაა „სამედიცინო უდაბნოები“ - მცირე ქალაქები და სოფლები, სადაც ექიმებისა და სამედიცინო სერვისების დეფიციტია. ამასთან დაკავშირებით, პრემიერ-მინისტრმა განაცხადა, რომ შეეცდება იმ სტუდენტების რიცხვის გაზრდას, რომლებიც რთულ სამედიცინო მომზადებას გადიან.მედიცინა საფრანგეთში ერთ-ერთ ყველაზე რთულ საუნივერსიტეტო საფეხურად მიიჩნევა და სტუდენტთა მესამედი სწავლას თავს პირველივე წლის ბოლოს ანებებს. jandacva.ge

1713179831

ფაგების მწარმოებელი კომპანიის „ბიოქიმფარმის“ კონტრიბუციამ საქართველოს ეკონომიკაში, საშუალო და გრძელვადიან პერსპექტივაში, უნდა შეადგინოს იმის მესამედი ან ნახევარი, რასაც ღვინის ექსპორტი განახორციელებს, - ამის შესახებ ფაგების მწარმოებელი კომპანიის „ბიოქიმფარმის“ მენეჯერმა რატი ღოლიჯაშვილმა  გადაცემაში „ბიზნესი რუსთავი 2“ საუბრისას განაცხადა.მისი თქმით, ამ ეტაპზე „ბიოქიმფარმის“ პროდუქცია  8 ქვეყანაშია წარმოდგენილი და 3-5 წელიწადში ეს რაოდენობა 80-მდე უნდა გაიზარდოს.ღოლიჯაშვილის თქმით, საწარმოს ყოველწლიურად შეუძლია აწარმოოს  უნიკალური ქართული ფაგების 30 მილიონი ფლაკონი პრეპარატი. jandacva.ge

1712845323

სამოგზაურო დაზღვევის პროდუქტის მინიმალური მოთხოვნების განსაზღვრის შემდეგ, ვითარება საგრძნობლად შეიცვალა და ცვლილებების ამოქმედებიდან სამ თვეში, პოლისების 99% ახალი მოთხოვნებით იყიდება.ამის შესახებ დაზღვევის სახელმწიფო ზედამხედველობის სამსახურის უფროსმა, დავით ონოფრიშვილმა ბრიფინგზე განაცხადა, სადაც 2023 წლის სადაზღვევო ბაზრის შედეგები შეაჯამა.„როცა ეს ბაზარი გამოვიკვლიეთ აღმოჩნდა, რომ ბოლომდე ადეკვატური არ იყო შეთავაზებები, ამიტომ სერიოზული ცვლილებები განხორციელდა. ეს ცვლილებები 15 იანვრიდან ამოქმედდა და შედეგები უკვე გვაქვს. კომპანიებმა პოლისებში ეს ცვლილებები შეიტანეს. შეგვიძლია ჩავთვალოთ, რომ ამ სამ თვეში, რეალიზება მოხდა და პოლისების 99% ახალი მოთხოვნებით იყიდება,“ - განაცხადა დავით ონოფრიშვილმა.შეგახსენებთ: 15 იანვრიდან ძალაში შევიდა სამოგზაურო დაზღვევის პროდუქტის მინიმალური მოთხოვნები, რომელთა მიხედვით, გაიზარდა დაზღვევის მომსახურების ლიმიტები. კერძოდ:თუ სამოგზაურო დაზღვევის ჯამური ლიმიტი ტოლია ან აღემატება 30,000 ევროს/აშშ დოლარს,გადაუდებელი ამბულატორიული მომსახურების ლიმიტი, უნდა განისაზღვროს არანაკლებ 5 000 ევროსი/აშშ დოლარისა. მანამდე ძირითადად ლიმიტი იყო 1000 – 2000 ევრო/დოლარი.გადაუდებელი ჰოსპიტალური მომსახურების ლიმიტი კი უნდა იყოს არანაკლებ 30,000 ევროსი/აშშ დოლარისა, მანამდე დადგენილი იყო დღიური ლიმიტი, 150-1000-მდე; უმეტესად 400 ევრო/აშშ დოლარი.ამასთან, გადაუდებელი ქირურგიული მომსახურება უნდა იყოს ჯამური ლიმიტის ტოლი, (დადგენილი იყო დღიური ლიმიტი: 150 და 400).თუ გაწეული სამედიცინო მომსახურების ხარჯი იანგარიშება დღიურად, ანაზღაურებას უნდა დაექვემდებაროს, სადაზღვევო პერიოდის დასრულებიდან არანაკლებ 15 დღის ხარჯი.მანამდე ძირითადად შემთხვევებში, ანაზღაურება სრულდებოდა მხოლოდ სადაზღვევო პერიოდთან ერთად.რეგულაციები ამოქმედებისთანავე შეაფასა სადაზღვევო ასოციაციის პრეზიდენტმა - დევი ხეჩინაშვილის თქმით, ცვლილების შემდეგ სამოგზაურო დაზღვევის პაკეტები შესაძლოა, გაძვირდეს, თუმცა ადამიანისთვის, რომელიც უცხოეთში მიდის სამოგზაუროდ, ეს არ იქნება მნიშვნელოვანი გაძვირება იმ გაზრდილ დაცულობასთან შედარებით, რასაც ის მიიღებს.jandacva.ge

1712671200

კონსალტინგური კომპანიის Market.us-ის მონაცემებით, 2032 წლისთვის სამედიცინო ტურიზმის მსოფლიო ბაზარი 35,9 მილიარდ ამერიკულ დოლარს მიაღწევს. 2022 წელს ეს მაჩვენებელი 11,7 მილიარდი იყო. შესაბამისად, ზრდის ყოველწლიური ტემპი  უახლოეს წლებში 12,2% იქნება.მკვლევარები აცხადებრნ, რომ თანამედროვე სამედიცინო ბაზარზე აუცილებელია მოქნილი მიდგომები, ასევე ინოვაციური და ოპერატიული რეაგირება მოთხოვნაზე.ამასთან, სხვადასხვა სახელმწიფოს მთავრობები ქმნიან საკანონმდებლო ბაზებს, რომლებიც მიმართულია უსაფრთხოების ნორმების და ხარისხის დაცვისკენ და რომლებიც სულ უფრო მკაცრდება. ამ რეგულაციების მიზანია მომხმარებელთა მხრიდან ნდობის გამყარება და კონკურენტუნარიანობის გაზრდა.ამიტომ სექტორს უნდა ჰქონდეს უნარი, მოახდინოს ადაპტაცია და ორიენტაცია რთულ ნორმატიულ გარემოსთან და უპასუხოს უმაღლეს საოპერაციო სტანდარტებს.აღსანიშნავია, რომ სამედიცინო ტურიზმში ჩართულ სერვისის მიმწოდებლებს შორის უმეტესობა კერძო კლინიკებია.jandacva.ge

1712584800

ონკოპაციენტების მკურნალობისა და ზოგადად, თანამედროვე სამედიცინო სერვისების დაფინანსების პრობლემა არა მხოლოდ საქართველოში, არამედ ბევრ განვითარებულ ქვეყანაში დგას, რადგან მსოფლიო მედიცინა სწრაფად ვითარდება და ჩნდება ახალი მედიკამენტები და ინსტრუმენტული სერვისები, რაც ძალიან ძვიადღირებულია. ამის შესახებ jandacva.ge-სთან საუბარში სადაზღვევო ასოციაციის ხელმძღვანელმა დევი ხეჩინაშვილმა განაცხადა.როგორც ცნობილია, 5 აპრილს ცნობილი გახდა, რომ ონკოპაციენტები მედიკამენტებს ლიმიტის გარეშე მიიღებენ და 25 ათასლარიანი ლიმიტის კალკულაციიდან ცალკე იქნება გამოტანილი ონკოლოგიური მედიკამენტები, რომლებიც შესაბამისი სახელმწიფო პროგრამითაა გათვალისწინებული.  ცვლილება შეეხება იმ პაციენტებსაც, რომლებსაც უკვე ამ დროისთვისაც შეიძლება ჰქონდეთ ამოწურული აღნიშნული 25-ათასლარიანი ლიმიტი.ამ ცვლილების დაანონსების მიუხედავად, პაციენტების ნაწილმა დღეს მთავრობის ადმინისტრაციასთან აქცია გამართა. მათი მოთხოვნაა, დაფინანსდეს ის ინოვაციური მედიკამენტებიც, რომლებიც სახელმწიფო პროგრამაში არ შედის, ასევე დაფინანსდეს ადრეული დიაგნოსტიკა, გენეტიკური კვლევები და სხვა.საქართველოს ეკონომიკური განვითარების დონის გათვალისწინებით, რამდენად აქვს ბიუჯეტს შესაძლებლობა, ონკოპაციენტების ყველა საჭიროება და თანამედროვე სერვისები დააფინანსოს და ხომ არაა საჭირო სისტემური ცვლილებები, მათ შორის სავალდებულო საბაზისო დაზღვევის შემოღება? Jandacva.ge-მ ამ შეკითხვებზე პასუხისას დევი ხეჩინაშვილი აცხადებს, რომ ფინანსისტი არაა და ამ საკითხზე შესაბამისმა სტრუქტურებმა უნდა იფიქრონ, თუმცა ამბობს, რომ პრობლემა სერიოზულია და პრიორეტიზაციას საჭიროებს.„სახელმწიფო თავად ხედავს, რა შეუძლია და რა არა. თუმცა გადახარჯვის პრობლემა დღეს ძალიან ბევრ ქვეყანაშია, მაგალითად გერმანიაში. თანამედროვე ონკოლოგია ძალიან ვითარდება, მათ შორის როგორც მეთოდოლოგიის, ისე ინსტრუმენტალურ დონეზე და, შესაბამისად, ძალიან ძვირია. სახელმწიფოს სურს დაფინანსება, მაგრამ საიდან უნდა მოიტანოს ეს თანხები, რისი დაზოგვა და რა არასაბიუჯეტო სახსრების გამოძებნა შეიძლება, ეს მისი გადასაწყვეტია. ჩვენ ვსაუბრობთ იმაზე, რომ შემოღებული იქნას სავალდებულო საბაზისო დაზღვევა, რაც ასობით მილიონ ლარს გამოუთავისუფლებდა სახელმწიფო ბიუჯეტს, მაგრამ ეს მოსახლეობაში არაპოპულარული იქნება, რადგან „ჯინი“ უკვე გამოშვებულია და მოქალაქეები ფიქრობენ, რომ ყველაფერი მთავრობამ უნდა დააფინანსოს. ეს რთულად განსახორციელებელი ცვლილებაა, თუმცა დღეს უფრო ადვილია, ვიდრე ადრე, რადგან დღეს საგადასახადო სამსახურის საშუალებით ხელისუფლება კარგად ხედავს, ვის რამდენი შემოსავალი აქვს და ამის საფუძველზე შესაძლებელია სისტემის აწყობა. საჭიროა პრიორეტიზაცია და საზოგადოების კონსენსუსი, რაც საქართველოში ძალიან რთული მისაღწევია. ჩვენთან არავინ კითხულობს, საიდან წარმოიქმნება ფული, სამაგიეროდ ყველგან ისმის „მომეცი-მომეცი“. დასავლეთისგან განსხვავება სწორედ ისაა, რომ იქ ესმით, რომ ფული ციდან არ ცვივა. აქ კი ხალხი შესვეს საჩუქრებზე და შეიქმნა ილუზია, რომ ყველაფერი მთავრობამ უნდა დააფინანსოს,“ - განაცხადა დევი ხეჩინაშვილმამისი თქმით, პაციენტის პოზიციიდან სამართლიანია მოთხოვნა, რომ ხელი მიუწვდებოდეს მკურნალობის თანამედროვე მეთოდებზე, მით უფრო, რომ ქვეყანაში დღეს პრაქტიკულად არავის აქვს ისეთი დაზღვევა, რომელიც ონკოლოგიის თანამედროვე მკურნალობას დააფინანსებდა.შეგახსენებთ, რომ ექსპერტების ნაწილი წლებია, ქვეყანაში საბაზისო, სავალდებულო პაკეტის ამოქმედებას ითხოვს. საუბარია ისეთ პაკეტზე, რომელზე ნაკლები პირობებით სადაზღვევო პაკეტის გაყიდვის უფლება კომპანიებს არ ექნებათ. რაც შეეხება პრემიის გადახდის ვალდებულებას, ის, სხვადასხვა მოდელის მიხედვით, დაზღვეულის შემოსავლებსა და სოციალურ მდგომარეობაზე იქნება დამოკიდებული, მაგალითად, მათ ნაწილს გადასახადს დამსაქმებელი გადაუხდის, ყველაზე მოწყვლად მოსახლეობას კი - მთლიანად სახელმწიფო.

1712390400

ფაგების მნიშვნელობა უახლოეს წლებში, მთელ მსოფლიოში კიდევ უფრო გაიზრდება, რადგან ანტიბიოტიკებისადმი რეზისტენტობა მსოფლიოს ერთ-ერთ გამოწვევად რჩება. ეს პრობლემა კი სულ უფრო ღრმავდება.„ბიოქიმფარმის“ მენეჯერის რატი ღოლიჯაშვილის განცხადებით,  ანტიბიოტიკებისადმი გამძლე ინფექციების მიზეზით მსოფლიოში ყოველწლიურად მილიონ 300 ათასი ადამიანი იღუპება, 2050 წლისთვის კი ამ მიზეზით ყოველწლიურად დაღუპულთა რაოდენობა  10 მილიონს მიაღწევს.ამ ფონზე საქართველოს აქვს უნიკალური შესაძლებლობა, განავითაროს ანტიბიოტიკების უსაფრთხო ალტერნატივის - ფაგების წარმოება. მისი თქმით, ანტიბიოტიკებისადმი რეზისტენტობის პრობლემა განსაკუთრებით პანდემიის დროს გამოჩნდა. ამიტომ, შესაძლო ახალი პანდემიის დროს ეს საფრთხე კიდევ უფრო დიდი იყოს.რატი ღოლიჯაშვილის განცხადებით, ნებისმიერი ვირუსული პანდემიის გვერდით იქნება ანტიბიოტიკური რეზისტენტობა. მისივე განმარტებით, ყველა ფაგი ყველა ანტიბიოტიკს ვერ ჩაანაცვლებს, მაგრამ ყველა ძირითადი ინფექცია შეიძლება ნამკურნალევი იქნას ფაგებით ან ფაგებისა და ანტიბიოტიკების კომბინაციით, როცა ფაგი ანტიბიოტიკის მოქმედებას აძლიერებს.რაც შეეხება პროდუქციის სამიზნე აუდიტორიას, „ბიოქიმფარმის“ ხელმძღვანელის თქმით, მშობლების სეგმენტში ფაგების ცნობადობა 100 პროცენტიანია, რადგან ანტიბიოტიკების გამოყენებას განსაკუთრებით ბავშვებში ვერიდებით. ახლა კი კომპანია კიდევ უფრო აქტიურ და კარგი გაგებით აგრესიულ კამპანიას იწყებს, რათა ფაგების ცნობადობა სხვა სეგმენტშიც გაიზარდოს.შეგახსენებთ, ინოვაციების და ტექნოლოგიების სააგენტოს ათი წლის იუბილესთან დაკავშირებით გამართულ ღონისძიებაზე გამოსვლისას პრემიერ-მინისტრმა ირაკლი კობახიძემ აღნიშნა, რომ  საქართველო ფაგების ტექნოლოგიებში პიონერია და დღეს, როდესაც მსოფლიო მასშტაბით განსაკუთრებით იზრდება ფაგებზე მოთხოვნა, საქართველოს შეუძლია, მსოფლიოს შესთავაზოს მნიშვნელოვანი ტექნოლოგიური პროდუქტები ამ მიმართულებით.jandacva.ge

1712331234

ონკოპაციენტები მედიკამენტებს ლიმიტის გარეშე მიიღებენ. მთავრობასთან შეთანხმებით მიღებული ამ გადაწყვეტილების შესახებ ჯანდაცვის მინისტრმა მიხეილ სარჯველაძემ დღეს, სამინისტროში გამართულ ბრიფინგზე განაცხადა და ცვლილებები ასე განმარტა:„25 ათასლარიანი ლიმიტის კალკლულაციიდან ცალკე იქნება გამოტანილი ონკოლოგიური მედიკამენტები, რომლებიც გათვალისწინებულია შესაბამისი სახელმწიფო პროგრამით. ამგვარად, პრაქტიკულად გამოირიცხება იმის შესაძლებლობა, რომ რომელიმე პაციენტისთვის ლიმიტის გამო ხელმიუწვდომელი გახდეს სახელმწიფოს მიერ დაფინანსებული  მკურნალობის სრული კურსი. ეს ცვლილება შეეხება იმ პაციენტებსაც, რომლებსაც უკვე ამ დროისთვისაც შეიძლება ჰქონდეთ ამოწურული აღნიშნული 25-ათასლარიანი ლიმიტი. დაწყებულია მუშაობა ამ გადაწყვეტილების საფუძველზე შესაბამის ნორმატიული აქტებში ცვლილებების შესატანად, რაც უახლოეს დღეებში განხორციელდება,“ - განაცადა სარჯველაძემ და აღნიშნა, რომ  გაგრძელდება მუშაობა ყველა სხვა მიმართულებით ამ პაციენტებთან დაკავშირებით. შეგახსენებთ, რომ ონკოპაციენტების ნაწილი მათი მკურნალობის დაფინანსებაზე არსებული წლიური 25-ათასლარიანი ლიმიტის მოხსნას და მედიკამენტების მიწოდების უწყვეტობას ითხოვდა. ამ მოთხოვნით მათ 8 აპრილს, მთავრობის ადმინისტრაციასთან აქციაც დააანონსეს.jandacva.ge