1700825520

2023 წლის მესამე კვარტალში მკურნალობის მიზნით საქართველოდან 15 წელზე ზემოთ ასაკის 6200 მოქალაქე გავიდა, რაც შარშანდელ მესამე კვარტალთან შედარებით 2200-ით მეტია.საქსტატის მონაცემებით, 2023 წლის მეორე კვარტალში ეს მაჩვენებელი 4,3 ათასი იყო, პირველ კვარტალში კი 5,3 ათასი.შესაბამისად, მიმდინარე წლის სამ კვარტალში მკურნალობისა და გაჯანსაღების მიზნით საქართველოდან 15800 ადამიანი გავიდა, შარშან იგივე პეერიოდში კი - 8500.jandacva.ge

1700746634

მშობიარეს თანაგადახდის უფლება შენარჩუნებული უნდა ჰქონდეს, რადგან ზოგიერთი მათგანისთვის კომფორტის მხრივ სხვადასხვა სერვისი აუცილებელია.ამის შესახებ საზოგადოებრივი მაუწყებლისთვის მიცემულ ინტერვიუში „დავარაშვილის კლინიკის“ ხელმძღვანელმა დავით დავარაშვილმა განაცხადა.„ისეთი სერვისები, რომლებიც მომსახურების პროცესში აუცილებელი არ არის, მაგრამ აუცილებელია ზოგიერთი პაციენტისთვის კომფორტის მხრივ, იქნება ეს ვიაიპ პალატა თუ სხვა ბევრი ნიუანსი - თუ პაციენტს სურს, რატომ უნდა შევზღუდოთ?“ - განაცხადა დავარაშვილმა.გაგუას კლინიკის საოპერაციო დირექტორის ირაკლი გაგუას თქმით კი ცვლილებების შედეგად მოლოდინი არის, რომ საკეისრო კვეთის წილი უნდა შემცირდეს, თუმცა ამას დასჭირდება დრო და ადაპტირება როგორც კლინიკების და ექიმების, ისე პაციენტების მხრიდან.ცნობისთვის: მიმდინარე წლის 15 ნოემბრიდან  სამშობიაროებს აღარ აქვთ შესაძლებლობა, ბენეფიციარებს დამატებითი თანხები გადაახდევინონ.საყოველთაო ჯანდაცვის პროგრამის ფარგლებში, მშობიარობა და საკეისრო კვეთა, ყველა მოქალაქისთვის სრულად ფინანსდება. დაფინანსება  მოიცავს არჩევით ექიმის აყვანისა და გაუტკივარების საფასურსაც. ასევე, მედიკამენტების, კვების, პალატის, სხვა პირდაპირ  და არაპირდაპირ ხარჯს.DRG მოდელით მშობიარობისა და საკეისრო კვეთის მომსახურების ტარიფები, საყოველთაო ჯანდაცვის პროგრამაში ჩართულ ყველა სამედიცინო დაწესებულებაში, 1 222 ლარით განსაზღვრა. რაც შეეხება ჩვენების გარეშე, პაციენტის მოთხოვნის საფუძველზე ჩატარებულ საკეისრო კვეთას, ან ე.წ. VIP პალატის მომსახურებას, აღნიშნული სერვისები სახელმწიფოს მიერ არ ფინანსდება და ამ მომსახურებების მისაღებად პაციენტმა საყოველთაო ჯანდაცვა ერთჯერადად უნდა დატოვოს და  მშობიარობასა და საკეისრო კვეთასთან დაკავშირებული ყველა ხარჯი თავად დაფაროს.დავარაშვილისა და გაგუას კლინიკებში ახალ ტარიფს დადებითად აფასებენ. შეგახსენებთ, რომ მანამდე სახელმწიფო მშობიარობას 500 ლარით, საკეისრო კვეთას კი 800 ლარით აფინანსებდა. jandacva.ge

1700721776

ხელოვნური ინტელექტის შემქმნელები, რომელიც აუტიზმის ზუსტ დიაგნოზს სვამს, ახლო მომავალში ამ მეთოდის დამტკიცებაზე განაცხადს ამერიკის წამლის სააგენტოში (FDA) შეიტანენ.ინოვაციური სისტემა აანალიზებს თავის ტვინის „ემერტეს“ მონაცემებს და მისი დიაგნოზის სიზუსტე 98,5%-ს აღწევს 24-დან 48 თვემდე ასაკის ბავშვებში.სპეციალისტები აცხადებენ, რომ ესაა სრულიად ინოვაციური მიდგომა, რომელსაც შეუძლია აუტიზმის დროს ადრეული ჩარევის სტრატეგიების შეცვლა და მზადაა კომერციალიზაციისთვის. ზოგი შეფასებით, ეს მიგნება აუტიზმის მართვაში ახალ ერას შექმნის.ხელოვნური ინტელექტის ევოლუციური სისტემა ლუივილის უნივერსიტეტის (საფრანგეთი) მკვლევარის მოჰამედ ჰუდრი ხელმძღვანელობით შეიქმნა.სისტემის ალგორითმი „ემ ერ ტე“-ს მონაცემებს აანალიზებს და მათ ნეიროტიპურ ბავშვებს ადარებს. ტექნოლოგიის ეფექტიანობა დამტკიცდა 226 ბავშვზე ჩატარებული კვლევის შედეგად. ამ ბავშვებისგან 126 ბავშვს აუტიზმი ჰქონდა, 100 კი ტიპური განვითარების იყო. ახალი სისტემის შექმნის მნიშვნელობა იმაშია, რომ მას პოტენციურად შეუძლია რევოლუციის მოხდენა აუტიზმის მართვასა და დიაგნოსტიკაში.ამერიკის დაავადებათა კონტროლის ცენტრის სტატისტიკით, აუტისტური სპექტრის მქონე ბავშვების ნახევარზე მეტს განვითარების კუთხით შემოწმება არ უტარდება, 30%-ს კი 8 წლის ასაკამდე დიაგნოზი არ ესმევა. ადრეულ ჩარევას კი შეუძლია საუკეთესო შედეგების მოტანა აუტიზმის მქონე ადამიანებში, მათ შორის - დამოუკიდებლობისა და IQ-ს მაღალი დონის. გარდა ამისა, ამ სისტემას შეუძლია შეამციროს აუტიზმის დიაგნოსტიკისა და  მართვის ხარჯები. jandacva.ge

1700495255

DRG-ს სისტემა მშობიარობასა და საკეისრო კვეთებზეც გავრცელდა. ამასთან, მათი ტარიფები გაათანაბრა და 1 221,92 ლარით განსაზღვრა. „დიაგნოზთან შეჭიდული ჯგუფების (DRG) მიხედვით დაფინანსების მექანიზმის დამტკიცების შესახებ“ ჯანდაცვის მინისტრის 2022 წლის 31 ოქტომბრის ბრძანებაში ცვლილებები მიმდინარე წლის 15 ნოემბრიდან ამოქმედდა.ბრძანების საინფორმაციო ბარათის თანახმად, საკეისრო კვეთაზე გართულებით, საკეისრო კვეთაზე გართულების გარეშე, ფიზიოლოგიურ მშობიარობაზე გართულებული დიაგნოზებით, ასევე ფიზიოლოგიურ მშობიარობაზე გართულებული დიაგნოზების გარეშე ფასის დასათვლელად, სერვისის მიმწოდებელი კლინიკებისაგან მოხდა მშობიარობის კალკულაციის გამოთხოვა. კერძოდ, კლინიკებისგან გამოთხოვილ იქნა მონაცემები როგორც საკეისრო, ასევე ფიზიოლოგიური მშობიარობისათვის:  სადიაგნოსტიკო კვლევების ხარჯი;  მედიკამენტების ხარჯი; კვების ხარჯი; პირდაპირი და არაპირდაპირი ხარჯები; მოგება;  გაუტკივარების ღირებულება; არჩევითი ექიმის ღირებულება.„ქვეყანაში საკეისრო კვეთის მაღალი მაჩვენებლის გამო, მიზანშეწონილად ჩაითვალა საკეისრო კვეთისა და მშობიარობის ფასის გათანაბრება, რაც შეამცირებს სამედიცინო პერსონალის მოტივაციას საკეისროს სასარგებლოდ. საშუალო შეწონილი მეთოდის გამოყენებით მოხდა ტარიფის განსაზღვრა (1,221.92 ლარი), რომელიც მოიცავს გაუტკივარებისა და არჩევითი ექიმის ღირებულებებს,“ - ნათქვამია ბარათში. შეგახსენებთ, რომ „დიაგნოზთან შეჭიდული ჯგუფების (DRG) მიხედვით დაფინანსების მექანიზმი ქვეყანაში გასული წლის ნოემბრიდან ამოქმედდა.  Jandacva.ge

1700226000

საყოველთაო ჯანდაცვის პროგრამაში შესულმა ცვლილებებმა სამედიცინო ბიზნესის განვითარების გეგმებში მნიშვნელოვანი კორექტივები შეიტანა.ქვეყანაში მოქმედი ერთერთი მსხვილი სამედიცინო ჯგუფი „ვივო მედიქალ გრუპი“ ბოლო ფინანსურ ანგარიშგებაში აღნიშნავს, რომ საყოველთაო ჯანდაცვის პროგრამის დაფინანსების სტრუქტურაში შესული ცვლილებები ძირითადად ეხება პროგრამით დაფინანსებული ტარიფების შემცირებას, რამაც დიდი გავლენა მოახდინა ჯანდაცვის სფეროზე, იმის გათვალისწინებით, რომ საყოველთაო ჯანდაცვის პროგრამა სამედიცინო დაწესებულებების მთლიანი ამონაგების 80%-ზე მეტს აფინანსებს.„ჩვენი ჯგუფის სტრატეგია ბოლო 3 წლის განმავლობაში მიმართული იყო საყოველთაო ჯანდაცვის პროგრამით დაფინანსებული ამონაგების წილის შემცირებისკენ. ეს თანდათანობით მიიღწევა უფრო დახვეწილი ჯანდაცვის მომსახურების დანერგვით, როგორიცაა ჯანდაცვის როგორც ადგილობრივი, ისე უცხოელი ცნობილი პროფესიონალების დაქირავება და მათი გაცნობა საქართველოს მოსახლეობისთვის. ამ სტრატეგიამ გაამართლა, ვინაიდან საყოველთაო ჯანდაცვის პროგრამის დაფინანსების სტრუქტურაში შესულ ცვლილებებს ბევრად ნაკლები გავლენა ჰქონდა ჯგუფის კომპანიებზე, ვიდრე მთელ სფეროზე. ჩვენ ამ სტრატეგიის განხორციელებას მომავალ წლებშიც ვაპირებთ,“ - ნათქვამია დოკუმენტში.ახლო მომავალში ჯგუფი გეგმავს ოპერაციების გაზრდას ამბულატორიული და სასწრაფო დახმარების მომსახურებების მიმართულებით.ჯგუფში 1200-ზე მეტი ადამიანია დასაქმებული, „ვივო მედიქალ გრუპი“ დაფუძნდა 2016 წლის 10 აგვისტოს. მისი შვილობილი საწარმოებია: წამყვანი მრავალპროფილური ცენტრი „თბილისის ცენტრალური საავადმყოფო“, ნ.ბოხუას სახელობის კარდიოვასკულური ცენტრი, სამედიცინო ცენტრი „ინოვა“, „ინოვა ინვიტრო“, „ჟორდანია და ჟორდანია-ჩიქოვანის კლინიკა“, „თბილისის დიაგნოსტიკური ცენტრი“, „თბილისის ცენტრალური ლაბორატორია“, „მედიმპორტი“ (იგი არის ოფიციალური დისტრიბუტორი ისეთი ბრენდებისა, როგორიცაა Bayer AG (გერმანია), Johnson & Johnson (აშშ), Rudolf Medical (გერმანია), Straub Medical (შვეიცარია) და სხვა.)შეგახსენებთ, რომ „ევექსი ჰოსპიტლების“ ფინანსური ანგარიშგების თანახმად, კომპანია ცდილობს რაც შეიძლება გააფართოვოს შემოსავლის წყაროები და, ამ გზით, შეამციროს დამოკიდებულება საყოველთაო ჯანდაცვის პროგრამაზე.jandacva.ge

1700215162

2022 წელს, წინა წელთან შედარებით, ბოჭორიშვილის კლინიკის შემოსავლები 32%-ით შემცირდა, რაც COVID 19-ის პანდემიის სახელმწიფო პროგრამების შემცირებითაა განპირობებული. ამის შესახებ კლინიკის 2022 წლის ფინანსურ და მმართველობის ანგარიშგებაშია აღნიშნული.დოკუმენტის თანახმად, კვლავ ძალიან დიდია შემოსავლებში სახელმწიფო პროგრამების წილი, რომელმაც 2022 წელს 76% შეადგინა, 2021 წელს კი ეს მაჩვენებელი 87.13% იყო.კლინიკა სახელმწიფო დაფინანსების დამოკიდებულების რისკებზე საუბრობს და ფინანსური რისკების კუთხით ასახელებს იმას, რომ არსებობს საყოველთაო ჯანდაცვის მიერ თანხების დაგვიანებით ანაზღაურების, სახელმწიფოს მხრიდან კორექტირებებისა და ფიქსირებული ფასების ფაქტორი.დოკუმენტში ასევე ნათქვამია, რომ საქმიანობის სფერო დიდ წილადაა დამოკიდებული სახელმწიფოს პოლიტიკაზე. 2022 წელს, კლინიკის მიერ მიღებული შემოსავლების დაახლოებით 76%-ი დაფინანსდა სხვადასხვა სახელმწიფო პროგრამების მიერ. „სუბსიდირების ერთ სუბიექტთან თავმოყრა სხვადასხვა რისკების მატარებელია, მითუმეტეს თუ ეს სუბიექტი თავად არის ბიზნეს სფეროს პოლიტიკის განმსაზღვრელი და მარეგულირებელი,“- ნათქვამია კლინიკის ფინანსურ ანგარიშგებაში.ცნობისთვის: 2011 წელს, შპს“ავერსი-ფარმამ“ ღია აუქციონზე იყიდა „სეფსისის საწინააღმდეგო ეროვნული ცენტრის“ და „ინფექციურ დაავადებათა საავადმყოფოს“ ტერიტორია, შენობა-ნაგებობებით. 2014 წელს, შეიქმნა ახალი, შპს „ავერსი-ფარმას“ მიერ დაფუძნებული შპს „აკადემიკოს ვახტანგ ბოჭორიშვილის კლინიკა“ჩადებული იქნა რამდენიმე მილიონი ლარის ინვესტიცია და განახლებულმა კლინიკამ ფუნქციონირება განაგრძო 150 საწოლზე. პაციენტებს მიეწოდათ შემდეგი სერვისები: გადაუდებელი დახმარება, პედიატრია, ჩირქოვანი ქირურგია, მოზრდილთა ინფექციური, გინეკოლოგია, კარდიოლოგია, ბავშვთა და მოზრდილთა რეანიმაცია. 2018 წლიდან კლინიკამ დამატებით მიაწოდა შემდეგი სერვისები: ნევროლოგია, ზოგადი და გადაუდებელი ქირურგია, ტრავმატოლოგია. 2019 წლიდან კი დაემატა მულტიპროფილური და ნეფროლოგიური დეპარტამენტები.jandacva.ge

1700136000

ჯანმრთელობის სახელმწიფო პროგრამების შესრულების პროცესში მოთხოვნილია მთელი რიგი ისეთი მონაცემების დაფიქსირება სპეციალურ ელექტრონულ პროგრამაში, რომელთა დიდი ნაწილი არ უკავშირდება პაციენტის სამედიცინო მომსახურებას და არ ცვლის შემთხვევის შესახებ არსებით ინფორმაციას.ამის შესახებ მარდალეიშვილის კლინიკის 2022 წლის ფინანსურ ანგარიშგებაშია აღნიშნული.დოკუმენტში ვკითხულობთ, რომ ასეთ მონაცემებს შორისაა პაციენტის დაწესებულებაში მისვლის დრო, ფორმა, შეტყობინების დრო, პაციენტის გადახდის ქვითრის ნომერი და ა.შ.„სწორედ ასეთი ტიპის ნებისმიერი გადაცდომა იწვევს არაადეკვატური საჯარიმო სანქციების დაკისრებას, როგორიცაა მომსახურების სრული ღირებულების არ ანაზღაურება და ამავე მომსახურების სამმაგი ოდენობის ჯარიმა,“ - ნათქვამია ანგარიშგებაში. jandacva.ge

1700049600

ფსიქიატრიულ კლინიკებს ახალი ინფრასტრუქტურული სტანდარტები დაუწესდება.ამის შესახებ ჯანდაცვის მინისტრის მოადგილემ ილია ღუდუშაურმა პარლამენტის საფინანსო-საბიუჯეტო კომიტეტზე განაცხადა, სადაც 2024 წლის ბიუჯეტის განხილვა მიმდინარეობდა.დეპუტატმა რომან გოცირიძემ ფსიქიატრიული კლინიკების დაფინანსების საკითხში სამინისტროს მიმართ პრეტენზიები გამოთქვა, რადგან, მისი თქმით, ამ მიმართულებით ბიუჯეტი არ გაზრდილა.ილია ღუდუშაურის თქმით, შარშან ფსიქიკური სერვისების კუთხით დაფინანსება 32 მილიონიდან 50 მილიონ ლარამდე გაიზარდა. წელს კი, შეფასების საფუძველზე და იმის გათვალისწინებით, რომ არსებულ ბიუჯეტშიც იყო ეკონომია, დამატებითი ფინანსები სამინისტროს არ მოუთხოვია, რადგან მკურნალობისთვის გამოყოფილი თანხები სავსებით საკმარისი იქნება.ამასთან, ღუდუშაურის განმარტებით, მკურნალობის გარდა არსებობს მეორე კოდი, რომელიც სამედიცინო ჰოლდინგის საკუთრებაში არსებული დაწესებულებების რეაბილიტაციას ითვალისწინებს და მის ფარგლებში მომავალ წელს ახალი ფსიქიატრიული დაწესებულების მშენებლობა იგეგმება.მისი თქმით,  2023 დაიწყო რუსთავის ახალი, 90-საწოლიანი ფსიქიატრიული დაწესებულების რეაბილიტაცია, რომელიც ახლაც მიმდინარეობს. ასევე 2023 წელსაა  დაწყებული ბედიანში სრულიად ახალი ფსიქიატრიული დაწესებულების მშენებლობა, მანამდე, 2021 წელს კი სურამის ფსიქიატრიული დაწესებულების სრული რეაბილიტაცია განხორციელდა.მინისტრის მოადგილის განცხადებით, ინფრასტრუქტურულ პროექტებში ინვესტიცია 2024 წელსაც გათვალისწინებულია.„ბიუჯეტის გაზრდა და თანხის უბრალოდ დამატება იმ გამოწვევებს, რაც ფსიქიატრიულ დაწესებულებებში არსებობს, ამ ეტაპზე არ შველის. ამისთვის მოვამზადეთ ფსიქიატრიული დაწესებულებების ინფრასტრუქტურის სტანდარტი, რომელიც წლის ბოლომდე დამტკიცდება და ყველას, მათ შორის კერძო ფსიქიატრიული დაწესებუელებას ექნება ვალდებულება, ახალი გამოწვევების და სტანდარტების მიხედვით გარკვეულ პერიოდში დააკმაყოფილონ ეს მოთხოვნები,“ - განმარტა ღუდუშაურმა.მისი თქმით, ინფრასტრუქტურის მიმართულებით გამოწვევები არც ერთი და არც ორი წლის პრობლემა არაა და სამინისტრო ამ საკითხებს ეტაპობრივად მიყვება. jandacva.ge

1699958100

„მედალფა“ სამედიცინო ბაზარზე არსებულ ძირითად რისკებს ასახელებს. როგორც კლინიკის 2022 წლის ფინანსურ ანგარიშგებაშია აღნიშნული, ძირითადი რისკები და გაურკვევლობები შემდეგია:კონკურენტი ორგანიზაციების მიერ კვალიფიციური პერსონალის გადაბირება; საყოველთაო ჯანდაცვის მიერ თანხების დაგვიანებით ანაზღაურება;  ფიქსირებული ფასები და სახელმწიფოს მიერ დადგენილი დაბალი ტარიფები.რისკებს შორის ასევე დასახელებულია ეროვნული ვალუტის კურსის არამდგრადი მდგომარეობა, საყოველთაო ჯანდაცვის მხრიდან სახელშეკრულებო პირობების ცალმხრივი ცვლილებები და მოსახლეობის გადახდის უნარიანობის დაბალი დონე.დოკუმენტის თანახმად, ჯგუფის ოპერირებას თან ახლავს მაღალი დონის სამედიცინო პერსონალის დენადობის რისკი და მათი სწრაფად ჩანაცვლების შესაძლებლობა, რომელმაც შეიძლება გავლენა მოახდინოს მომხმარებლის რაოდენობაზე.რეგიონებში კი ძირითადი პრობლემაა ადგილობრივი, მაღალკვალიფიციური კადრების ნაკლებობა. ჯგუფი ქვეყნის მასშტაბით 5 რაიონში აწვდის მოსახლეობას ამბულატორიულ და სტაციონარულ სერვისებს. თითოეული დაწესებულება პოლიპროფილურია. კომპანიის 100% წილის მფლობელი შპს ავერსი-ფარმაა.jandacva.ge