logo
Loading data...
1701068712
SmartSense ინდუსტრიულ ობიექტებს ხარვეზების შესახებ ინფორმაციას წინასწარ მიაწვდის

ინოვაციურმა სტარტაპმა SmartSense, რომელიც ინდუსტრიულ ობიექტს  ხელოვნური ინტელექტის დახმარებით, მოსალოდნელი ხარვეზის შესახებ ინფორმაციას წინასწარ ატყობინებს, 150 000 ლარიანი GITA-ს გრანტი მოიპოვა.როგორც სტარტაპის მარკეტინგის ხელმძღვანელმა, მაია ბენიამ გადაცემა "ბიზნეს პოსტთან" განაცხადა, საქართველოს ფარგლებს გარეთ მსგავსი ტიპის სერვისი უკვე არსებობს. შესაბამისად, იდეა გაჩნდა, რომ მსგავსი ტიპის შეთავაზება საქართველოშიც ყოფილიყო .მისივე ცნობით, როგორც საზღვარგარეთ, ასევე საქართველოშიც დაინტერესება ძირითადად დიდი და მასიური შენობების მხრიდანაა, სადაც გათბობა/ გაგრილების სისტემები ფუნქციონირებს. შენობა კი რთულ მდგომარეობაში მაშინ აღმოჩნდება, როდესაც ამ ტიპის პრობლემების წინაშე დგება. ამ პრობლემას შემდეგ დიდი ფულადი ზარალი და დროში გაჭიანურებული პროცესები მოჰყვება."ეს არის ე.წ. Software-ზე (კომპიუტერული სისტემის მუშაობასთან დაკავშირებული პროგრამების, პროცედურების და რუტინების მთელი ნაკრები) დამყარებული სერვისი. ტექნიკურად სისტემური პრობლემის დადგენა ხდება, რომელიც Hardwere-დან (გარე და შიდა მოწყობილობები და აღჭურვილობა, რომლებიც საშუალებას გაძლევთ შეასრულოთ ძირითადი ფუნქციები, როგორიცაა შეყვანა, შენახვა, კომუნიკაცია, დამუშავება და სხვა.) soft-ზე გადადის, ამით კი ხდება როგორც არსებული პრობლემების, ასევე მოსალოდნელი პრობლემების გენერირება.  ეს ადამიანებს საშუალებას აძლევს აპლიკაციის საშუალებით პრობლემა დაინახონ. სწორედ soft-ზე პრობლემების გენერირება იყო ის  მთავარი ინოვაციურობა, რამაც GITA-ს 150 000 ლარიანი გრანტი მოგვაპოვებინა," - აცხადებს მარკეტინგის ხელმძღვანელი.რაც შეეხება თავად გრანტს, სტარტაპის გენერალური დირექტორის, მაია ბენიას ინფორმაციით, მოხდება Hardware მოწყობილობების შეძენა და ასევე დეველოპერული გუნდის მობილიზება, რომლების Soft-ს დააფორმირებს.მისივე განმარტებით, კომპანია  განვითარების მიმართულებით აქტიურ მუშაობას აპირებს, რის შესაბამისადაც სხვადასხვა ქართულ და უცხოურ საგრანტო პროგრამებში მონაწილეობას გეგმავს. 

1700064660

ქართულმა სტარტაპმა სიზმრების სოციალური ქსელი შექმნა, რომელიც აზიურ ბაზარზე შესვლასაც გეგმავს

ქართველმა ახალგაზრდებმა სიზმრების სოციალური ქსელი - სახელწოდებით Dreamy  შექმნეს, რომელიც ადამიანს ძილის დროს ნანახი ამბის ვიზუალიზაციის, ანალიზის, შენახვისა და მეგობრებისთვის გაზიარების საშუალებას აძლევს. პროდუქტი ქართული ბაზრისთვის ინოვაციურია. როგორც „ბიზნესპარტნიორს“ Dreamy-ის თანადამფუძნებელმა გიორგი ბუკიამ განუცხადა, სიზმრების ფსიქოანალიზისთვის პლატფორმა ხელოვნურ ინტელექტს იყენებს.„ახალი სოციალური ქსელის გამოყენება საკმაოდ მარტივია და მისი საშუალებით ყველას შეეძლება ძილის დროს ნანახი დაუჯერებელი ამბების არა მხოლოდ სიტყვით, არამედ მოქმედებით გაცოცხლება. ტექსტის, ან ხმის მეშვეობით აპლიკაციას თქვენი სიზმრიდან ფრაგმენტს უყვებით, ხელოვნური ინტელექტი კი მას ვიზუალურ მხარეს სძენს და სიზმრის ფსიქოლოგიურ ანალიზსაც გთავაზობთ“, - აღნიშნა გიორგი ბუკიამ.მისივე განმარტებით, ახალი სოციალური ქსელის პოტენციური მომხმარებელი იქნება ყველა, ვისაც ცხოვრებაში ერთხელ მაინც უოცნებია, რომ საკუთარი სიზმარი გაეცოცხლებინა.რაც მთავარია სიზმრების ქართული სოციალური ქსელი, ქვეყნის ფარგლებსაც გასცდება და ის, საწყის ეტაპზე, აზიურ ქვეყნებში შევა. „აზიური ბაზრები ძალიან ახლოსაა სიზმრებთან და შინაგან სამყაროსთან. ამიტომ, თავდაპირველად გვინდა, რომ ჩინეთის, ინდოეთის და იაპონიის ბაზრებზე მოვსინჯოთ ძალა“, - აღნიშნა გიორგი ბუკიამ.მისივე თქმით, გლობალურ ბაზრებზე მათ მხოლოდ 1 კონკურენტი ჰყავთ, ისიც სიზმრების მხოლოდ ტექსტურ ანალიზს ახდენს და არა ვიზუალიზაციას, შესაბამისად, ამ ტიპის სოციალურ ქსელს განვითარების დიდი პერსპექტივა აქვს.ცნობისთვის, სიზმრების მოყვარულები სწორედ მათთვის შექმნილი სოციალური ქსელით სარგებლობას და საკუთარი სიზმრებისთვის თვალის მიდევნებას, დაახლოებით, 1 წელში შეძლებენ. 3 თვეში კი სოციალური ქსელი სატესტო რეჟიმში გაეშვება და Dreamy-ის ხუთკაციანი გუნდი ეცდება, რომ პროდუქტი კიდევ უფრო დახვეწოს და საინტერესო გახადოს.

1699973093

საქართველო Web Summit 2023-ზე მასშტაბური სივრცით არის წარმოდგენილი

საქართველო მსოფლიოში ერთ-ერთ ყველაზე მნიშვნელოვან ტექნოლოგიურ ღონისძიებაზე, Web Summit 2023 - ზე, წელს მასშტაბური სივრცით არის წარმოდგენილი. საქართველოს ინოვაციების და ტექნოლოგიების სააგენტოსა და ,,აწარმოე საქართველოს“ თანამშრომლობის ფარგლებში, სამიტზე წარსდგებიან ქართული სტარტაპები - Agronnect, Artisio, QuickShipper, OMOFOX, Datamind, Kernel და სხვები, ასევე საერთაშორისო სტატუსის მქონე IT კომპანიები, როგორებიცაა LineAte, Making Science •Sweeft, DevExperts, Leavingstone, Redberry.პორტუგალიის დედაქალაქ ლისაბონში მიმდინარე Web Summit 2023 მასპინძლობს 160 ქვეყნიდან 70 000 - ზე მეტ მონაწილეს, მათ შორის ასეულობით სტარტაპს, ტექნოლოგიურ კომპანიასა თუ სახელმწიფო ორგანიზაციებს მთელი მსოფლიოდან.ვებ სამიტის ფარგლებში საქართველოს ეკონომიკისა და მდგრადი განვითარების მინისტრი ლევან დავითაშვილი მონაწილეობს პანელურ დისკუსიაში ,,Innovate or regulate“.შეგახსენებთ, შარშან, ქართული სტარტაპი Theneo Web Summit 2022 - ის ყველაზე მნიშვნელოვანი სტარტაპ კონკურსის, PITCH-ის გამარჯვებული გახდა.

1699724880

Biliki AI - მსოფლიოში პირველი პერსონალიზირებული ეკო-მოგზაურობის პლატფორმა

ქართულმა სტარტაპმა სრულიად ახალი,  ხელოვნურ ინტელექტზე დაფუძნებული პროდუქტი Biliki AI წარადგინა.როგორც სტარტაპი biliki-ს თანადამფუძნებელი თორნიკე ცირამუა სოციალურ ქსელში წერს, ეს იქნება პირველი ქართული და მსოფლიოში ერთადერთი გლობალური ეკო-მეგობრული მოგზაურობის პერსონალიზებული პლატფორმა. “პლატფორმა ჯერ საწყის ეტაპზეა, მხოლოდ Beta ვერსიაა, ვაპირებთ ბრენდინგზე მუშაობას.პლატფორმაზე: შეგყავთ მიმართულება, სადაც გსურთ გამგზავრება, ბიუჯეტი და ხანგრძლივობა. Biliki AI 30 წამში დააგენერირებს თქვენზე მორგებულ ეკო-მეგობრულ ტურს და თქვენთვის შეარჩევს ეკო-მეგობრულ და მდგრად სასტუმროებს.ჩვენი ხედვაა, მოგზაურობა გავხადოთ ეკო-მეგობრული და დავიცვათ ჩვენი პლანეტა, მდგრადი და პერსონალიზირებული მოგზაურობით. თუკი მოგზაურობას გადაწყვეტთ, ვენეციაში, პარიზში, ბალიზე, ტოკიოში თუ რიო დე ჟანეიროში Biliki AI გაგიწევთ მეგზურობას.“- წერს თორნიკე ცირამუა.

1699620840

დღიური მომსახურე პერსონალის აყვანის გამარტივებული მექანიზმი - როგორია Flexup-ის გეგმები

დღიური მომსახურე პერსონალის აყვანის გამარტივებული მექანიზმი, ანგარიშსწორებისა და ხელშეკრულებების ავტომატიზებული პროცესები და სხვა ფუნქციონალები, რომლითაც ქართული სტარტაპი მომსახურების სფეროში ოპერირებას იწყებს.როგორც "ბიზნესპარტნიორთან"  Flexup-ის თანადამფუძნებელი და დირექტორი თორნიკე აბალაკი აღნიშნავს, პლატფორმის ძირითადი მიზანი რითეილისა და სტუმარმასპინძლობის სექტორთან თანამშრომლობით რაც შეიძლება მეტი ადამიანის დასაქმებაა, დღიური, მოკლევადიანი ან სეზონური სამუშაოების შეთავაზებით."იდეა მე და ჩემს პარტნიორს იდეა უცხოთში ყოფნის დროს გაგვიჩნდა, საშუალება გვქონდა გამოგვეცადა მსგავსი პლატფორმა და დღიურად დავსაქმებულიყავით ინგლისში და ჰოლადიაში, მივხვდით, რომ ასეთი ტექნოლოგიები ბიზნესებს მარტივად უგვარებდა კადრების მოძიების პრობლემას. შემდეგ, საქართველოში ჩავატარეთ ბაზრის კვლევა და მივხვდით, რომ ბაზარზე დიდი პრობლემა იყო. დაახლოებით 1 წლის წინ ჩამოვაყალიბეთ Flexup-ი.პლატფორმაზე ასაკის შეზღუდვა არ არის, თუმცა კვლევის შედეგად დაინტერესება ძირითადად სტუდენტებისგან წამოვიდა, ეს ყველაფერი გამოწვეული იმით, რომ მათ  მოქნილი გრაფიკი სჭირდებათ"-აღნიშნავს, თორნიკე აბალაკი.ვებპლატფორმის მეშვეობით დამსაქმებელს შეუძლია განათავსოს ვაკანსია და შეარჩიოს მისთვის სასურველი კანდიდატურა დროის მოკლე მონაკვეთში. ფლექსაფერმა კი აარჩიოს მისთვის სასრუველი დავალება და წარადგინოს საკუთარი კანდიდატურა უკვე განთავსებულ დღიური საქმიანობაზე.სტარტაპს უკვე ჰყავს 10-მდე პარტნიორი კომპანია, მათ შორის HoReCa სექტორიდან, იქიდან გამომდინარე რომ სტუმარმასპინძლობის სფეროში არასაკმარისი კადრების პრობლემა კიდევ უფრო მწვავედ დგას.როგორც კომპანიაში აცხადებენ, Flexup-ის თავდაპირველი სამინზე აუდიტორია თბილისში ოპერირებადი მომსახურების სექტორის წარმომადგენელი კომპანიებია. თუმცა, სტარტაპის მიზანი ამ ინოვაციური პროდუქტის რეგიონსა და საერთაშორისო ბაზარზე გატანაა.

1699441354

GITA-ს მხარდაჭერით, DataFest Tbilisi 2023 - ის მესამე დღე სტრატაპებსა და ინვესტორებს უმასპინძლებს

საქართველოს ინოვაციების და ტექნოლოგიების სააგენტოს მხარდაჭერით, 9-11 ნოემბერს აღმოსავლეთ ევროპისა და ცენტრალური აზიის მასშტაბით მონაცემთა უდიდესი ფესტივალი DataFest Tbilisi 2023 გაიმართება.ფესტივალის მესამე დღე სტარტაპების, ინვესტორებისა და ტექნოლოგიების შეხვედრის ადგილად იქცევა. DataFest Tbilisi 2023 - ზე მოწვეულია არაერთი ინვესტორი. ფესტივალი იქნება უნიკალური შესაძლებლობა ერთის მხრივ,  სტარტაპის დამფუძნებლებისთვის, მეორეს მხრივ კი ინვესტორებისთვის, გაიგონ უფრო მეტი ერთმანეთის საქმიანობის, ინტერესების შესახებ და დაამყარონ ახალი, საქმიანი კავშირები.11 ნოემბერს ფესტივალი წარმოგიდგენთ  10-ზე მეტი სტარტაპის დამფუძნებლის  გამოსვლას, რომლებიც ისაუბრებენ მონაცემებთან და ხელოვნურ ინტელექტთან დაკავშირებულ მათ მიერ შექმნილ პროდუქტებზე. გარდა ამისა, მოეწყობა სტარტაპ ექსპო, სადაც სტარტაპები ინტერაქციული მეთოდების გამოყენებით, აუდიტორიას საკუთარ საქმიანობას გააცნობენ. გაიმართება პანელური დისკუსიები, სადაც  იმსჯელებენ ისეთ საკითხებზე, როგორიცაა მონაცემებისა  და ტექნოლოგიების გამოყენება სტარტაპებში,  ბიზნესების მიერ მონაცემებისა და ხელოვნური ინტელექტის ეთიკურად და საერთაშორისო რეგულაციების დაცვით გამოყენება და სხვა.  ამასთანავე, მოეწყობა არაერთი ვორქშოფი.შეგახსენებთ, რომ DataFest Tbilisi-ს ბილეთები ხელმისაწვდომია ბმულზე:  ამასთანავე, შესაძლებელია მხოლოდ მესამე დღის ბილეთის შეძენაც.ფესტივალი ყოველწლიურად თავს უყრის იმ ადამიანებს, რომელთა საქმიანობა დაკავშირებულია მონაცემთა მეცნიერებასთან და ვიზუალიზაციასთან - მარკეტერებს, ფინანსისტებს, დეველოპერებს, მონაცემთა ანალიტიკოსებს, ხელოვნური ინტელექტის ინჟინრებს, დიზაინერებს, სტარტაპერებს, ჟურნალისტებს, სამოქალაქო აქტივისტებს და სახელმწიფო მართვის სპეციალისტებს.  ფესტივალმა 2017 წლიდან დღემდე 80-მდე ქვეყნიდან 4 ათასზე მეტ მონაწილეს,  200-ზე მეტ ვორქშოფსა და სპიკერს უმასპინძლა, მათ შორის, ისეთი კომპანიებიდან, როგორიცაა: Google, Meta, და Amazon.  წელს ფესტივალზე სპიკერებად მოწვეულები არიან მონაცემთა ვიზუალიზაციის და ტექნოლოგიის სფეროს წამყვანი ექსპერტები ისეთი კომპანიებიდან, როგორიცაა Flourish, Canva, Chatham House, Macaw.DataFest Tbilisi 2023-ის ორგანიზატორია ForSet — არასამთავრობო ორგანიზაციის, კრეატიული სააგენტოს, დიზაინის სტუდიისა და დეველოპერული კომპანიის უნიკალური ჰიბრიდი. ორგანიზაციის მიზანი მონაცემების, დიზაინისა და ახალი ტექნოლოგიების გამოყენებით სოციალურად მნიშვნელოვან თემებზე საზოგადოების ინფორმირებულობის გაზრდაა.  

1698164936

"₾25 000-მდე ინოვაციების გრანტები რეგიონებისთვის" გამარჯვებულები შიდა ქართლში ცნობილია

საქართველოს ინოვაციების და ტექნოლოგიების სააგენტოს საგრანტო პროგრამის  „25 000 ლარამდე ინოვაციების გრანტები რეგიონებისთვის“ გამარჯვებულები შიდა ქართლში გამოვლინდნენ.შვიდი გამარჯვებული პროექტიდან ოთხს გრანტს გადასცემს GITA, სამ სტარტაპს კი USAID -ის ძლიერი სოფლის პროგრამა დააფინანსებს.გამარჯვებული პროექტები: Strive - ონლაინ „მარკეტფლეისი“, რომელიც კონკურენტუნარიანი მატჩების მოყვარულ ვიდეო-მოთამაშეებს ეხმარება თამაშის მენტორის პოვნასა და „გეიმფლეის“ გაუმჯობესებაში, ხოლო, მეორეს მხრივ, მენტორებს საკუთარი თამაშის უნარების მონეტიზაციის საშუალებას აძლევს. Dreamy - აპლიკაცია არის სიზმრების სოციალური ქსელი, რომელიც საშუალებას აძლევს მომხმარებელს მისი სიზმრების ვიზუალიზაციის, ანალიზის, შენახვისა და მეგობრებთან გაზიარების. სიზმრების ფსიქოანალიზის შესაქმნელად პლატფორმა იყენებს AI-ს და წარმოქმნის ვიზუალიზაციას ფოტოების ან ნახატების გამოყენებით.  მასკოტოპია - პროექტი გთავაზობთ ხელოვნურ ინტელექტზე (შემდგომში AI) დაფუძნებული მასკოტების (ანიმაციური პერსონაჟების ფორმები,რომლებიც ღონისძიებებზე აცვიათ ანიმატორებს. მაგ: მიკი მაუსი, კუნინძა და ა.შ) საწარმოს შექმნას. BAZI - მობილური, ამთვლელი სენსორებით აღჭურვილი აკუსტიკური (ატმოსფეროში ბგერითი ან დარტყმითი ტალღის გამავრცელებელი) სისტემის დამზადება, რომელიც, ხელოვნური ინტელექტის ბაზაზე დამუშავებული მონაცემების საფუძველზე, აგენერირებს სპეციფიკური დიაპაზონის, სიხშირისა და სიგრძის ტალღებს, რომლითაც ხორციელდება უკონტაქტო მანიპულაცია  მცენარეების ვეგეტატიურ ორგანოებზე დამტვერვის საუკეთესო ხარისხის უზრუნველსაყოფად,  ინფორმაციის საფუძველზე ასევე შესაძლებელია დაავადებებისა და მავნებლების გავრცელების რისკის შეფასება და შეტყობინება, სავარაუდო პროდუქტიულობის პროგნოზირება. Kiddos -  საბავშვო ნივთების C2C „რისეილ“ პლატფორმა, რომელიც ეხმარება მშობლებს გაყიდონ მცირეწლოვანი შვილების გამოუყენებელი ნივთები სახლიდან გაუსვლელად. დიჯიტალ ბაზარი - ონლაინ პლატფორმა, რომელიც ხელს შეუწყობს ადგილობრივ ფერმერებსა და მეწარმეებს მათი პროდუქციის ონლაინ გაყიდვაში. ინტერაქციული STEAM წიგნი - სტარტაპის იდეას წარმოადგენს, გამომცემლობის ჩამოყალიბების გზით, საგანმანათლებლო ტიპის ინტერაქციული STEAM წიგნების სერიის გამოშვება, რომლებიც განკუთვნილი იქნება 10 წელზე ზემოთ ბავშვებისა და ახალგაზრდებისათვის და ორიენტირებული იქნება სხვადასხვა სამეცნიერო კონცეფციის სწავლებაზე, როგორიცაა ელექტროენერგია, ბუნება, მწვანე ენერგია და ენერგიის ალტერნატიული წყაროები, რობოტიკა, პროგრამირება და სხვა. რეგიონალური საგრანტო პროგრამის მიზანია, ხელი შეუწყოს საქართველოს რეგიონებში ადგილობრივი ინოვაციური და ტექნოლოგიური ეკოსისტემის გაძლიერებას; ინოვაციური პროდუქტების, მომსახურების, ტექნოლოგიებისა და პროცესების შემუშავება - ათვისებისა და კომერციალიზაციის გზით ინოვაციური და ტექნოლოგიური სტარტაპების შექმნას.USAID-ის ძლიერი სოფლის პროგრამასთან თანამშრომლობით, საგრანტო პროგრამის ბენეფიციარებს მცხეთა-მთიანეთისა და შიდა ქართლის რეგიონებიდან ექნებათ შესაძლებლობა, მიიღონ დამატებითი რესურსები პროექტების განხორციელებისთვის.USAID-ის ძლიერი სოფლის პროგრამა საქართველოს ინოვაციების და ტექნოლოგიების სააგენტოსთან ითანამშრომლებს სამი  სხვადასხვა მიმართულებით. ეს მიმართულებებია: 1) პრე-აქსელერაციის პროგრამები სამეგრელოში, სვანეთში, რაჭა-ლეჩხუმში, შიდა ქართლსა და მცხეთა-მთიანეთში. 2) ტექნოლოგიური კვირეულები კასპში, გორში, მესტიასა და ზუგდიდში, 3) რეგიონალური საგრანტო პროგრამების კომპონენტი. აღნიშნული პროგრამები ხელს შეუწყობს ახალგაზრდებს და ადგილობრივ მეწარმეებს, შექმნან იდეიდან პროდუქტი, განახორციელონ სტარტაპ პროექტები, რაც რეგიონების სოციალურ-ეკონომიკურ გაძლიერებას შეუწყობს ხელს. აღნიშნული თანამშრომლობის ფარგლებში, ადმინისტრაციულ გამყოფ ზოლთან მდებარე თემების მოსახლეობას მიეცემა საშუალება, შეისწავლოს ფინანსებზე წვდომის ალტერნატიული წყაროებისმოძიების მეთოდები და შექმნას დინამიური ცვლილებების მიმართ მდგრადი ეკონომიკური განვითარების პოტენციალი. საგრანტო პროგრამის ფარგლებში უკვე გამოვლინდნენ გამარჯვებულები აჭარის, იმერეთის, გურიის, სამეგრელოს, სვანეთისა და რაჭა-ლეჩხუმის რეგიონებში. სამცხე-ჯავახეთში, მცხეთა-მთიანეთსა და შიდა ქართლში რეგისტრირებულ ფიზიკურ და იურიდიულ პირებს კი 4 სექტემბრიდან საშუალება ჰქონდათ, ელექტრონული პორტალის www.grants.gov.ge  მეშვეობით წარედგინათ განაცხადები. საგრანტო წინადადებები შეაფასა კომისიამ, რომელიც დაკომპლექტებული იყო შესაბამისი პროფილის მოწვეული ექსპერტებით და შერჩეულმა სტარტაპებმა კომისიის წინაშე წარსადგენად გაიარეს გადამზადების სპეციალური კურსი, რომელიც მოიცავდა:  ბაზრის კვლევას, ბაზარზე გასვლის სტრატეგიას, მასშტაბირებასა და ე.წ. „ფიჩინგს“. საგრანტო თანხის მოცულობა არ უნდა აღემატებოდეს 25 000 ლარს.გრანტის მიღება შეუძლია სამიზნე რეგიონებში რეგისტრირებულ ან/და მოქმედ ფიზიკურ პირებს, მეწარმე სუბიექტებს და სტარტაპებს. ასევე არარეგისტრირებულმა პირმა კონკურსის წარმატებით გავლის შემთხვევაში, საგრანტო ხელშეკრულების გაფორმებამდე სავალდებულოა მეწარმე სუბიექტის რეგისტრაცია მოახდინოს შესაბამის რეგიონში.დეტალური ინფორმაცია იხილეთ ვებპორტალზე  www.grants.gov.ge.

1698052092

GITA-ს ორგანიზებით, ქუთაისში პროექტი CITYTHON გაიმართა

საქართველოს ინოვაციების და ტექნოლოგიების სააგენტოსა და ქ. ქუთაისის მერიის ერთობლივი ორგანიზებით, ევროკავშირის  “ინტეგრირებული ტრანსფორმაცია მდგრადი განვითარებისთვის” პროგრამის ფარგლებში განხორციელდა პროექტი CityThon, რომლის ფარგლებში საქართველოს სხვადასხვა რეგიონიდან 24 გუნდი შეირჩა.2 დღის განმავლობაში მონაწილეები მუშაობდნენ აკაკი წერეთლის სახელმწიფო უნივერსიტეტის მულტიფუნქციურ სივრცეში ქუთაისში არსებული მუნიციპალური სერვისების ტექნოლოგიური და ინოვაციური  გზით განვითარებაზე, საბოლოოდ ოცი გუნდი საკუთარი ინოვაციური იდეის პრეზენტაციით ჟიურის წინაშე წასრდგა.პროექტის ფარგლებში გამოვლინდა გამარჯვებული გუნდები Portall და Time Trips, რომლებიც ქუთაისის მერიის მუნიციპალური სერვისების გასავითარებლად (ტურისტული და სატრანსპორტო მიმართულება) დაამზადებენ ინოვაციურ და ტექნოლოგიურ პროდუქტებს. გამარჯვებულ გუნდებს პროდუქტის შესაქმნელად გადაეცა  ჯილდო 5000 ევროს ოდენობით.ღონისძიებას ესწრებოდნენ გერმანიის ელჩი საქართველოში პეტერ ფიშერი,  საქართველოს ინოვაციების და ტექნოლოგიების სააგენტოს თავმჯდომარე ავთანდილ კასრაძე და ქუთაისის მერი იოსებ ხახალეიშვილი.სამუშაო პროცესის ორგანიზება უზრუნველყო კომპანია ქლევერტონმა. პროექტის პარტნიორია ქუთაისის საერთაშორისო უნივერსიტეტი და კომპანია Hotsale.

1697886000

₾150 000-იანი თანადაფინანსების გრანტების პროგრამის მონაწილეების ფინალური ეტაპისთვის მზადება დაიწყო

საქართველოს ინოვაციების და ტექნოლოგიების სააგენტომ 150 000 ლარიანი თანადაფინანსების გრანტების პროგრამა 2023 წლის 13 ივლისს მეთერთმეტედ გამოაცხადა. თანადაფინანსების გრანტების პროგრამის ათი რაუნდის ფარგლებში ჯამურად 195 სტარტაპი დაფინანსდა.150 000 ლარიანი თანადაფინანსების გრანტების პროგრამაში მონაწილეობის პირობები შეიცვალა და დაინტერესებულ პირებს 13 ივლისიდან საშუალება ჰქონდათ, ელექტრონული პორტალის www.grants.gov.ge  მეშვეობით წარედგინათ ბიზნეს იდეა, რომელთა შეფასება განახორციელეს კონტრაქტორმა ექსპერტებმა.  კონკურსით შერჩეული საუკეთესო 150 სტარტაპი გადამზადდა  ბიზნეს გეგმის, ბიუჯეტირების, პროგნოზირებისა და ბაზრის კვლევის მიმართულებით. შემდგომი საფეხური მოიცავდა პორტალზე აპლიკაციის სრულყოფილ შევსებას. განაცხადების შეფასება განახორციელეს საერთაშორისო ექსპერტებმა, როგორც ბიზნეს გეგმის შეფასებით, ასევე გასაუბრებით, რომლის შედეგად გამოვლინდა 51 ფინალისტი.დღეიდან ერთი კვირის განმავლობაში კონკურსანტებს ფინალური ეტაპისთვის, საინვესტიციო კომისიის წინაშე წარსადგენად სპეციალურად ამ პროგრამისთვის, სილიკონ ველიდან  მოწვეული ტრენერები მოამზადებენ: Christopher Burry - მეწარმე, ტექნოლოგიების ლიდერი, ინვესტორი და სპიკერი, აშშ-ს ბაზრის წვდომის ცენტრის (US Market Access Center USMAC) აღმასრულებელი დირექტორი, არის აქტიური ენჯელ ინვესტორი, 2005 წლიდან - მეწარმეების ტრენერი და მენტორი. მისი გამოცდილება მოიცავს სამეწარმეო არქიტექტურას, პროგრამულ უზრუნველყოფას, ინფრასტრუქტურულ ტექნოლოგიებს, საოპერაციო სისტემებს, მეთოდოლოგიებსა და IT სფეროს. ქრისტოფერ ბერის დაფუძნებული აქვს მრავალი კომპანია პროგრამირებისა და სერვისების სფეროში. Gail Christine Gannon - Wave Edge Capital-ის მმართველი დირექტორი და Ensanté LLC-ს დამფუძნებელი.  აქვს მენტორინგისა და დამწყები მეწარმეების მენტორობის 15-წლიანი გამოცდილება; ეხმარება კომპანიებს, აქციონ განსაკუთრებული იდეა რეალობად, სწორად განსაზღვრონ სამიზნე ბაზარი, მოიპოვონ გრანტები და დაარწმუნონ ინვესტორები. გეილ ქრისტინ გენონი ფლობს ჰარვარდის უნივერსიტეტის მაგისტრის ხარისხს  - H. Chan School of Public Health; რეგულარულად მონაწილეობს ბიოტექნოლოგიებისა და ციფრული ჯანდაცვის სფეროში გამართულ საერთაშორისო კონფერენციებსა და საინვესტიციო ფორუმებში. Steve Adelman - სილიკონ ველის Nexus Partners LLC-ს მმართველი დირექტორი. სტივ ადელმანი არის უმაღლესი რანგის სტრატეგიის კონსულტანტი მარკეტინგის, ბიზნესის განვითარების, ორგანიზაციული დაგეგმარების, პარტნიორობისა და ვენჩურული კაპიტალის მართვის სფეროში 25 წლიანი გამოცდილებით. არის სილიკონ ველისWharton Alumni Angels-ის დამფუძნებელი პარტნიორი და ხელმძღვანელი. მისი აკადემიური კვალიფიკაცია მოიცავს პენსილვანიის უნივერსიტეტის ვარტონის სკოლის ხარისხს, ცხოვრობდა და მოღვაწეობდა ოთხ კონტინენტზე. Scott Nesbit - ფართოდ არის დაკავშირებული ბიოტექნოლოგიის, ავტომობილებისა და ვიდეო თამაშების ინდუსტრიებთან. აქვს 20 წელზე მეტი ხნის გამოცდილება, როგორც დამფუძნებელად, ასევე ინვესტორად და მრჩეველის რანგში ბიოტექნოლოგიის, ვიდეო თამაშების, საავტომობილო და უსაფრთხოების ინდუსტრიებში. ბოლოს მან დააფუძნა ინოვაციური COVID-19 დიაგნოსტიკური კომპანია Arion Bio, Inc, ასევე არის მენტორი Berkeley SkyDeck HealthTech-ში. ის არის ექსპერტი ტექნოლოგიებში და გლობალური ბიზნესის წამოწყებასა და მართვაში. Bob Upham - ინტერნეტ ბიზნესის განვითარების გამოცდილი პროფესიონალი, ექსპერტი სტრატეგიულ პარტნიორობებსა და ალიანსებში, API ლიცენზირებაში. Santander InnoVentures-ის, Sutardja Center for Entrepreneurship and Technology (UC Berkeley)-ის, Cyberport Hong Kong-ის მენტორი და მრჩეველი. 2016-2019 წლებში იკავებდა VISA-ს ციფრული პროდუქტების მიმართულების ხელმძღვანელის პოზიციას. გამარჯვებულები 2023 წლის 2 ნოემბერს გამოვლინდებიან - სტარტაპები, რომელთაც ექნებათ შესაძლებლობა, გახადონ თავიანთი კომპანია უფრო წარმატებული და შეძლონ პროდუქტის გლობალურ ბაზარზე გატანა.პროგრამის მიზანია  საქართველოში საერთაშორისო პოტენციალის მქონე ინოვაციური პროდუქტებისა და მომსახურების  შემუშავება, მათი კომერციალიზაცია და ინოვაციური საწარმოების შექმნის სტიმულირება.

1697533645

GITA -ს პროექტი HARDWARE STARTUP INCUBATOR 2.0 საქართველოს ყველა ტექნოპარკს მოიცავს

Hardware Startup Incubator 2.0  წარმოადგენს საქართველოში ყველაზე მასშტაბურ ტექნოლოგიურ პროექტს, რომელიც მიზნად  ისახავს Hardware სტარტაპების განვითარებასა და ამ მიმართულებით რეგიონებში ცოდნის გაღრმავებას. პროგრამა არის მათთვის, ვისაც სურს ინოვაციური და ტექნოლოგიური იდეების რეალობად ქცევა!საქართველოს ინოვაციების და ტექნოლოგიების სააგენტოს ორგანიზებით ხორციელდება პროექტი Hardware Startup Incubator 2.0, რომელიც მიზნად ისახავს საქართველოში ტექნოლოგიური Hardware სტარტაპის იდეის მქონე ადამიანებსა და გუნდებს საწყის ეტაპზევე შეუწყოს ხელი ახალი Hardware სტარტაპების ფორმირებისა და განვითარების პროცესში.Hardware StartUP ინკუბატორი 2.0 ხუთი თვის განმავლობაში ჩატარდება საქართველოს ყველა ტექნოპარკში (თბილისი, ბათუმი, ზუგდიდი, ოზურგეთი, კასპი, თელავი, გურჯაანი, ახმეტა). მონაწილეებს შესაძლებლობა ექნებათ, გაიარონ ტრენინგები ელექტრონიკის, ინდუსტრიული პროდუქტის 3D მოდელირების და პარალელურად, ტექნოლოგიური სტარტაპის ბიზნესის მოდელის განვითარების მიმართულებით.უფრო კონკრეტულად პროექტის მონაწილეები შეისწავლიან: ტექნოლოგიები Hardware-ის პროტოტიპირებისთვის: ელექტრონიკა; Arduino; IoT (საგნების ინტერნეტი) და ავტომატიზაცია, Raspberry Pi პლატფორმაზე; ინდუსტრიული დიზაინი და Hardware პროდუქტის 3D მოდელირება - Autodesk Fusion 360; ტექნოლოგიური სტარტაპის განვითარება, LEAN სტარტაპ მეთოდოლოგია: Canvas ბიზნესს მოდელი; სამიზნე ბაზარი და მომხმარებელი; პრობლემისა და იდეის ვალიდაცია; Rapid პროტოტიპირება; MVP - მინიმალური სიცოცხლისუნარიანი პროდუქტის შექმნა და ტესტირება; პროდუქტისა და ბაზრის თავსებადობა; დაფინანსების წყაროების და ინვესტორების მოძიება; Pitch Deck, Pitching. დასკვნით ეტაპზე, დემო დღეზე, ფინალისტები ჟიურის წევრებს წარუდგენენ პროექტის ფარგლებში, ბიზნესს მენტორებთან ერთად შემუშავებულ ბიზნეს მოდელებს და ტექნოპარკის ფაბლაბში შექმნილ პროტოტიპებს. მონაწილეობა შეუძლია 16 წელს ზემოთ დაინტერესებულ ადამიანებს,  საბოლოოდ პროექტი გააერთიანებს 135 მონაწილეს.სარეგისტრაციო ფორმა: 

info@bp.ge

+995595334912

გამოგვყევით