logo
Loading data...
1714036057
სამგორის რაიონს კიდევ ერთი ვრცელი რეკრეაციული სივრცე შეემატება - ბიუჯეტი ₾8 მლნ-ია

თბილისის მერიის გარემოს დაცვის საქალაქო სამსახური, სამგორის რაიონში, ქინძმარაულის 29-30-31-32 კორპუსებსა და ძმები ოცხელების 25-25 ა-ს მიმდებარედ რეკრეაციულ სივრცეს აწყობს. პროექტს დღეს დედაქალაქის მერი კახა კალაძე მის მოადგილეებთან, ირაკლი ბენდელიანთან და ანდრია ბასილაიასთან ერთად გაეცნო.„ე.წ. ზეემკას დასახლებაში, დაახლოებით 4 ჰექტარზე მოეწყობა პარკი. ეს არის საცხოვრებელ კორპუსებს შორის არსებული სივრცე, სადაც ძირითადად ავტოფარეხები იყო. 80 ავტოფარეხი დაიშალა ამ პროექტის განხორციელების მიზნით. მინდა, მადლობა გადავუხადო  ადგილობრივ მოსახლეობას თანამშრომლობისთვის და მხარდაჭერისთვის. ეს პროექტი, პირველ რიგში, მათთვის კეთდება, რომ ჰქონდეთ სივრცე, სადაც მათი შვილები, შვილიშვილები და თვითონაც დაისვენებენ, განიტვირთებიან. საკმაოდ მასშტაბური პროექტია და მოხარული ვარ, რომ ამ დასახლებაში ასეთი რეკრეაციული სივრცე გაჩნდება“, - განაცხადა კახა კალაძემ.ადგილზე ასევე იმყოფებოდნენ სამგორის რაიონის გამგებელი კახა სამხარაძე და თბილისის საკრებულოს დეპუტატი რევაზ სოხაძე.პროექტის ფარგლებში, მოეწყობა გარე განათების სისტემა, საბავშვო და სპორტული მოედნები, შინაური ცხოველების სასეირნო სივრცე და სასეირნო ბილიკები, ასევე განთავსდება ფანჩატურები. გარდა ამისა, ჩატარდება გამწვანების მასშტაბური სამუშაოები: ტერიტორიაზე მოეწყობა სარწყავი სისტემა, შევა ნოყიერი მიწის ნაზავი, დაირგვება სხვადასხვა სახეობის ნერგი და დაითესება ბალახი.სამუშაოების ღირებულება 8 მილიონ ლარს შეადგენს, ხოლო პროექტის  დასრულება 2025 წლის ზაფხულში იგეგმება.

1713872793

"გაერთიანებული წყალმომარაგების კომპანიის" პრივატიზება არ განიხილება - ინფრასტრუქტურის სამინისტრო

„გაერთიანებული წყალმომარაგების კომპანიის“ პრივატიზება ამ ეტაპზე არ განიხილება. როგორც „ბიზნესპარტნიორს“ რეგიონული განვითარებისა და ინფრასტრუქტურის მინისტრის მოადგილე მზია გიორგობიანმა განუცხადა, სახელმწიფო გეგმავს კომპანია უფრო მეტად გააძლიეროს.„ამ ეტაპზე ვცდილობთ, რომ რაც შეიძლება მეტი ქალაქისა და სოფლისათვის იყოს ხელმისაწვდომი წყალი და ეს იქნება ეტაპობრივი - დაგეგმილია, რომ 2025 წლისთვის მთელი საქართველოს მასშტაბით ქალაქებისთვის იყოს ხელმისაწვდომობა, ხოლო 2030 წლისთვის, უკვე დასახლებების დონეზე. ამ ეტაპზე ჩვენთვის მნიშვნელოვანია, რომ ყველას ჰქონდეს სასმელი წყალი. ჩვენ ვფიქრობთ, რომ უნდა გაძლიერდეს კომპანია, როგორც მენეჯმენტის თვალსაზრისით, ასევე, დასაქმებულთა სახელფასო განაკვეთის ზრდის მიმართულებით.როდესაც ჩვენ კომპანიის გაჯანსაღებაზე ვსაუბრობთ, ასევე, მნიშვნელოვანია, რომ შესაბამისი აღჭურვილობა და ლაბორატორიები ჰქონდეს ოპერირებისთვის. ამ ეტაპისთვის განიხილება, რომ ზოგადად, მაქსიმალურად გაძლიერდეს კომპანია, იყოს მდგრადი და შესაძლებლობა ჰქონდეს მაქსიმალურად მეტი ქალაქი დაფაროს. სხვა მხრივ, ჯერჯერობით, არაფერი არ განიხილება“ - აცხადებს მზია გიორგობიანი.მისივე თქმით, კომპანია მომავალში, როგორც სახელმწიფოს 100%-იან წილობრივ საკუთრებაში არსებული საწარმო, ზოგადად, ერთიან ხედვაში მოექცევა.„წყალმომარაგების კომპანია“ რეგიონული განვითარებისა და ინფრასტრუქტურის სამინისტროს დაქვემდებარებაშია და ბიუჯეტიდან სუბსიდირდება. ის ერთ-ერთი მსხვილი სახელმწიფო კომპანიაა, რომელიც პროგრამებს და პროექტებს მთელი საქართველოს მასშტაბით ახორციელებს. კომპანია ამ დროისთვის ქვეყნის 48 ქალაქში ოპერირებს და 3 მლრდ-ის ღირებულების წყალმომარაგებისა და წყალარინების პროექტებს ახორციელებს.

1713861676

ვაკის რაიონში კომბინირებული დასასვენებელი სივრცეები ეწყობა

ვაკის რაიონში, რამდენიმე მისამართზე დასასვენებელი სივრცეები და სპორტული მოედნები ეწყობა. კერძოდ, სამუშაოები წყნეთის ქუჩა N1-სა და N14-ში, ასევე, ნუცუბიძის II მ/რ-ის I კვარტალში, ჟღენტის ქუჩასა და ნუცუბიძის IV მ/რ-ის N21 კორპუსის მიმდებარედ ხორციელდება, - ინფორმაციას თბილისის მერია ავრცელებს. სკვერები და სტადიონები შესაბამისი ინვენტარით იქნება აღჭურვილი - განთავსდება საპარკო ავეჯი, მოეწყობა განათებისა და სარწყავი ქსელები, საბავშვო-გასართობი მოედნები, დასასვენებელი პავილიონები, სპორტული აქტივობების მოყვარულთათვის კი - ფიტნეს-ზონა და კომბინირებული მოედნები. სკვერებში, ასევე, ჩატარდება გამწვანების სამუშაოები.აღნიშნული პროექტებისთვის, ვაკის რაიონის გამგეობის ბიუჯეტიდან ჯამში, 606 000 ლარი დაიხარჯება.

1713599608

"2025 წლამდე საქართველოს ქალაქები, ხოლო 2030 წლამდე ქვეყნის სრული მოსახლეობა უწყვეტი წყალმომარაგებით იქნება უზრუნვეყოფილი"

“წყლის მსოფლიო სამიტი მნიშვნელოვანი ღონისძიებაა, რომელზეც წარმოდგენილი არიან დარგის წამყვანი მსხვილი კომპანიები და იძლევა საქართველოში მიმდინარე წყალმომარაგებისა და წყალარინების სექტორის განვითარების შედეგებზე და მსოფლიოს მასშტაბით ინდუსტრიაში დაგროვილ გამოცდილებაზე საუბრის კარგ შესაძლებლობას. ასევე, მნიშვნელოვანია როგორც სამიტის ფარგლებში გაზიარებული ინოვაციები, ისე საქართველოს წყალმომარაგების დარგის განვითარებაში წამყვანი კომპანიების სამომავლო უფრო მაღალი ჩართულობის შესაძლებლობის გაჩენა, - აღნიშნა ირაკლი ქარსელაძემ წყლის რესურსების მსოფლიო სამიტის შემაჯამებელი პლენარული დისკუსიის დასრულების შემდეგ. წყლის რესურსების მსოფლიო სამიტი (THE GLOBAL WATER SUMMIT 2024) დიდი ბრიტანეთისა და ჩრდილოეთ ირლანდიის გაერთიანებული სამეფოს დედაქალაქ ლონდონში, გაიმართა, რომლის შემაჯამებელ პანელზე სიტყვით საქართველოს რეგიონული განვითარებისა და ინფრასტრუქტურის მინისტრი ირაკლი ქარსელაძე გამოვიდა.თავის გამოსვლაში, მინიტრმა ისაუბრა ბოლო წლების განმავლობაში საქართველოში განხორციელებული წყალმომარაგებისა და წყალარინების პროექტებსა და მათ შედეგებზე და აღნიშნა, რომ  მიუხედავად მრავალი წარმატებული პროექტისა და სახელმწიფოს მხრიდან სექტორის ყოველწლიურად მზარდი დაფინანსებისა, კვლავ გამოწვევად რჩება ქვეყნის რეგიონების წყალმომარაგების საკითხები.მინისტრის თქმით, სახელმწიფოს მხრიდან წყალმომარაგებისათვის გამოყოფილი მუდმივად მზარდი ფინანსური რესურსი ხელს უწყობს საინვესტიციო პროექტების წარმატებით განხორციელებას და ხელშესახებს ხდის მთავრობის მიერ დასახული გეგმის შესრულებას.  2025 წლამდე საქართველოს ქალაქები, ხოლო 2030 წლამდე ქვეყნის სრული მოსახლეობა უზრუნველყოფილი იქნება უწყვეტი წყალმომარაგებით, რისთვისაც სახელმწიფოს მხრიდან იგეგმება 4 მილიარდ ევროზე მეტი ინვესტიციის განხორციელება, მათ შორის 1 მილიარდ ევროზე მეტი ღირებულების პროექტები უკვე მიმდინარეობს ქვეყნის სხვადასხვა მდებარეობებში.ასევე, აღინიშნა წყალარინების სექტორში გარემოზე მავნე ზემოქმედების შესამცირებლად სახელმწიფოს მიერ გადადგმული კონკრეტულ ნაბიჯები, რისთვისაც აქტიურად მიმდინარეობს თანამედროვე წყალარინების სისტემების მშენებლობა. ამჟამად ექსპლუატაციაში უკვე გაშვებულია  6 გამწმენდი ნაგებობა და მიმდინარეობს 11-ის მშენებლობის პროცესი.მინისტრმა, ასევე, ისაუბრა წყლის სექტორში  კერძო-საჯარო თანამშრომლობის (PPP) მოდელების დანერგვის და ახალი ტექნოლოგიების გამოყენების მნიშვნელობაზე, რაც გააუმჯობესებს მომსახურების ხარისხს, გაზრდის წყლის რესურსების გამოყენების ეფექტიანობას და შეამცირებს გარემოზე მავნე ზემოქმედებას.წყლის მსოფლიო სამიტის მიზანია სექტორის ლიდერების გაერთიანება წყლის რესურსების გამოყენებასთან დაკავშირებულ მსოფლიო გამოწვევებსა და დარგის განვითარების საკითხებზე სადისკუსიოდ.  სამიტში მონაწილე 80-ზე მეტი ქვეყნის 900 დელეგატიდან წარმოდგენილი იყვნენ მსოფლიოს წამყვანი წყლის კომპანიები, საერთაშორისო ორგანიზაციები, წყალმომარაგებაზე პასუხისმგებელი სახელმწიფო უწყებების, თვითმმართველობისა და მარეგულირებელი ორგანოების წარმომადგენლები, ინვესტორები, ინჟინრები, წყლის ტექნოლოგები და სხვა.სამიტის ფარგლებში, ჩატარდა წყლის სექტორის 300 ლიდერის შეხვედრა, სიმპოზიუმები, სამუშაო შეხვედრები, სადისკუსიო პანელები, სადაც იმსჯელეს, როგორც დარგის გამოწვევებზე, ისე ინდუსტრიის განვითარებისთვის ახალი ტექნოლოგიების გამოყენების მნიშვნელობასა და მათი დაფინანსების შესაძლებლობებზე.წყლის მსოფლიო სამიტი, უკვე 15 წელია, კომპანია GWI-ის (Global Water Intelligence) ორგანიზებით იმართება და მისი მიზანია წყლის რესურსების მსოფლიო ინდუსტრიას დაეხმაროს კვლევებზე დაფუძნებული სტრატეგიული გადაწყვეტილებების მიღებაში.

1713433958

ზუგდიდი-ჯვარი-მესტია-ლასდილის გზაზე მეწყრის გამო მოძრაობა დროებით შეზღუდულია

საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის ინფორმაციით, შიდასახელმწიფოებრივი მნიშვნელობის ზუგდიდი-ჯვარი-მესტია-ლასდილის საავტომობილო გზის 89-ე კმ-ზე, გზის სავალ ნაწილზე ჩამოსულია მეწყერი, რომელმაც ჩაკეტა საავტომობილო მოძრაობა.უწყების ინფორმაციით, ამ ეტაპზე  მიმდინარეობს ტექნიკის მობილიზება, რათა უმოკლეს ვადებში გაიწმინდოს  გზის სავალი ნაწილი და აღდგეს საავტომობილო მოძრაობა.

1712904694

შიდა ქართლში, სკრა-ქარელის სარწყავი სისტემის რეაბილიტაცია 2025 წელს დასრულდება

შიდა ქართლში სკრა-ქარელის სარწყავი სისტემის რეაბილიტაცია მიმდინარეობს. ამის შესახებ ინფორმაციას შპს "საქართველოს მელიორაცია" ავრცელებს. კომპანიის ინფორმაციით, ქარელის მუნიციპალიტეტში მაგისტრალური არხის 8,2 კმ-მდე სიგრძის  მონაკვეთზე არსებული დაზიანებული ფილები ახლით შეიცვლება, არხი მონოლითური ბეტონით მოპირკეთდება,  მოეწყობა ბორდიურები. პროექტით გათვალისწინებულია ძამის დიუკერის რეაბილიტაციაც.ჩატარებული სამუშაოები  არხში წყლის შეუფერხებლად გადინებას შეუწყობს ხელს. შედეგად, სარწყავი წყლის მიწოდება 3240 ჰექტარ  სასოფლო-სამეურნეო მიწის ფართობზე გაუმჯობესდება.პროექტის ღირებულება 5,2 მლნ ლარზე მეტია. სარწყავი სისტემის სარეაბილიტაციო სამუშაოები 2025 წლის მარტში დასრულდება.აღსანიშნავია, რომ სკრა-ქარელის სარწყავი სისტემის სარეაბილიტაციო სამუშაოები „საქართველოს მელიორაციის” ტექნიკურმა დირექტორმა ალექსანდრე მიქიაშვილმა  დაათვალიერა და სარწყავი წყლის მიწოდების საკითხებთან დაკავშირებული ინფორმაცია ადგილობრივი ფერმერებისგან მოისმინა. 

1712830822

დიღმის ჭალების რეაბილიტაციის სტრატეგიაზე მუშაობა სრულდება

დიღმის ჭალების რეაბილიტაციის სტრატეგიაზე მუშაობა სრულდება. დოკუმენტი, რომლის მომზადებაშიც ადგილობრივ სპეციალისტებთან ერთად, საერთაშორისო საკონსულტაციო კომპანიაა ჩართული, მიმდინარე წლის ივნისში იქნება მზად.სპეციალისტების შეფასებით, დიღმის ჭალები თბილისის ერთ-ერთი უდიდესი სარეკრეაციო ზონა და ერთადერთი შემორჩენილი ჭალის ტყეა, რომელიც მასშტაბურმა უკანონო კარიერულმა და სამეწარმეო საქმიანობამ და სამშენებლო ნარჩენების ინტენსიურმა განთავსებამ რთულ  მდგომარეობაში ჩააგდო.როგორც თსუ-ს პროფესორი სოსო სალუქვაძე აღნიშნავს, საუბარია დაახლოებით 300 ჰექტარ ტერიტორიაზე, რომლის 60% ამ ეტაპზე საჯარო, მათ შორის მუნიციპალიტეტის საკუთრებაშია. ტერიტორიის ნაწილი კი კერძო საკუთრებაშია მოქცეული.„თუ კონკრეტული ღონისძიებები არ გატარდა, ამ სივრცეში განაშენიანება მოიმატებს. მიუხედავად იმისა, რომ 2019 წელს მიღებული თბილისის მიწათსარგებლობის გენერალური გეგმის მიხედვით,  დიღმის ჭალების ტერიტორია თითქმის სრულად რეკრეაციულ ზონაშია მოქცეული, ადგილზე მაინც მიმდინარეობს განაშენიანება. შესაბამისად, დიღმის ჭალების ერთი ნაწილი არის უკვე კერძო საკუთრებაში და არ არის ასე ადვილი ადგილმონაცვლეობა. თანაც საკუთრების უფლებები დაცული უნდა იყოს. საბედნიეროდ, 60% არის საჯარო საკუთრებაში და ეს იქნება საბაზო კლასტერი, რომელზე დაყრდნობითაც შეიძლება რეაბილიტაციის ჩატარება.“-აღნიშნავს სოსო სალუქვაძე.მისივე თქმით, დიღმის ჭალების რეაბილიტაცია საკმაოდ ხანგრძლივი პროცესი იქნება. "ინტერესი არის ის, რომ ბიომრავალფეროვნება,  ტყის მასივი შენარჩუნებული და აღდგენილი იქნას. გარკვეული მონაკვეთები ძალიან არის დაზიანებული. ეს საკმაოდ ხანგრძლივი პროცესი იქნება და დაგვჭირდება უფრო აქტიური მხარდაჭერა მუნიციპალიტეტისგან.“-აცხადებს  სოსო სალუქვაძე.დიღმის ჭალების რეაბილიტაციის  სტრატეგია 2023 წლის ივნისიდან საერთაშორისო კომპანია SMEC-ის ადგილობრივი და უცხოელი სპეციალისტების მიერ მუშავდება.  სტრატეგიის საბოლოო დოკუმენტი 2024 წლის ივნისში გამოქვეყნდება.

1712757600

რიკოთის ჩქაროსნული მაგისტრალის სამშენებლო სამუშაოების ღირებულება 1 მლრდ ევროა

აღმოსავლეთ-დასავლეთის ჩქაროსნული მაგისტრალის რიკოთის მონაკვეთის სამშენებლო სამუშაოების ღირებულება 1 მლრდ ევროა. პროექტის განსახორციელებლად სასესხო დაფინანსება საქართველოს აზიის განვითარების ბანკმა (ADB) გამოუყო. ფინანსთა მინისტრის მოდგილე ეკატერინე გუნცაძე განმარტავს, რომ ADB საკმაოდ მნიშვნელოვანი პარტნიორია დაფინანსების ინსტრუმენტების მოქნილობის თვალსაზრისით.„აზიის განვითარების ბანკი საქართველოსთვის ერთ-ერთი უმნიშვნელოვანესი სტრატეგიული პარტნიორია. ორგანიზაციასთან საკმაოდ დიდი პორტფელი გვაქვს ისეთი ინფრასტრუქტურული პროექტებისთვის, როგორიცაა აღმოსავლეთ-დასავლეთის ჩქაროსნული მაგისტრალი, სხვა საგზაო პროექტები, ურბანული ინფრასტრუქტურა და ელექტრო გადამცემი ხაზების მიმართულება. დღეის მდგომარეობით, რაც ორგანიზაციასთან ხელმოწერილია, პრაქტიკულად, ყველა პროექტი დასრულების ფაზაშია. უმეტესობა დასრულდება მიმდინარე წლის ზაფხულში, ან წლის ბოლომდე“ - ამბობს ეკატერინე გუნცაძე.მისივე თქმით, პარალელურად, აქტიური მუშაობა მიმდინარეობს კახეთის მიმართულებით საგზაო ინფრასტრუქტურაზე, გარდა ADB-სა, სახელმწიფო სხვა დონორებთანაც ითანამშრომლებს.ამასთან, ფინანსთა მინისტრის მოადგილის განმარტებით, რჩება კიდევ ერთი - სარფის შემოვლითი მონაკვეთი, რომელზეც, ჯერ ხელმოწერილი დოკუმენტი არ არსებობს, თუმცა, ADB-ის მიერ ე.წ. ტექნიკურ-ეკონომიკური შესწავლა გამზადებულია.“ეს შემდგომი, საკმაოდ მსხვილი პროექტი იქნება, უახლოეს პერიოდში ამის ხელმოწერა გათვალისწინებული არ არის, თუმცა, საშუალოვადიან სამოქმედო გეგმაში ნამდვილად ჩასმული გვაქვს” - აცხადებს  ეკატერინე გუნცაძე.

1712744880

ნარიყალას ციხის სარეაბილიტაციო სამუშაოების მეორე ეტაპი დაიწყო

ნარიყალას ციხის მეორე ეტაპით გათვალისწინებული სარეაბილიტაციო სამუშაოები დაიწყო. ადგილზე თბილისის მერი კახა კალაძე მის მოადგილესთან ირაკლი ბენდელიანთან ერთად იმყოფებოდა.დედაქალაქის მერის თქმით, ნარიყალას ციხის რეაბილიტაციის პროექტი ითვალისწინებს შიდა და გარე პერიმეტრის განახლებას და მხატვრულ-დეკორატიული მინათების მოწყობას.„ნარიყალას ციხის რეაბილიტაციის პირველი ეტაპი 2017-2018 წლებში განხორციელდა. გალავნის ერთი ნაწილი რეაბილიტირებულია, დარჩენილი ნაწილი კი ამ პროექტის ფარგლებში, სრულად მიწესრიგდება. განათება შეიცვლება, დაემატება საფეხმავლო ბილიკები. სამუშაოების ფარგლებში, უსაფრთხოებიდან გამომდინარე, ღამის მინათება გამორთული იქნება“, - განაცხადა კახა კალაძემ.თბილისის მერის განმარტებით, სამშენებლო სამუშაოებს ზედამხედველობას გაუწევს კულტურული მემკვიდრეობის სააგენტო.  სარეაბილიტაციო სამუშაოების დასრულება კი 2025 წელს არის დაგეგმილი.ადგილზე მერთან ერთად თბილისის განვითარების ფონდის დირექტორი გიორგი პაპავა, კრწანისის რაიონის გამგებელი ბექა მიქაუტაძე, შპს „თბილსერვის ჯგუფის“ დირექტორი დავით ფაჩულია, კულტურული მემკვიდრეობის ძეგლთა დაცვის სააგენტოს დირექტორის მოვალეობის შემსრულებელი ნიკოლოზ აზნაურაშვილი იმყოფებოდნენ.

1712737406

ჭაბუა ამირეჯიბის გზატკეცილზე მდებარე ფერდზე ქვათაცვენის საწინააღმდეგო ბადეები ეწყობა

თბილისის მერიის ინფრასტრუქტურის განვითარების საქალაქო სამსახურმა ჭაბუა ამირეჯიბის გზატკეცილზე კლდოვანი ფერდის დარჩენილი ნაწილის გამაგრების სამუშაოები დაიწყო.როგორც დედაქალაქის მერმა, კახა კალაძემ თბილისის მუნიციპალიტეტის მთავრობის სხდომაზე აღნიშნა, ტერიტორიაზე ქვათაცვენის საწინააღმდეგო ბადეები ეწყობა, რომელიც ზაფხულის ბოლომდე დასრულდება.„გასულ წელს, ჭაბუა ამირეჯიბის გზატკეცილზე კლდოვანი ფერდის ნაწილის გამაგრების სამუშაოები დავიწყეთ - ჩამოწმენდა, გამაგრება, მოწესრიგება და შეფუთვა შესაბამისი მასალით. მაშინვე ვთქვით, რომ აღნიშნული სამუშაოები ფერდის დანარჩენ ნაწილშიც განხორციელდებოდა. რამდენიმე დღეა ფერდზე ქვათაცვენის საწინააღმდეგო ბადეების მოწყობა დავიწყეთ. პროექტს ინფრასტრუქტურის განვითარების საქალაქო სამსახური ახორციელებს და ზაფხულის ბოლომდე დასრულდება“, - განაცხადა თბილისის მერმა.სამუშაოების მიმდინარეობის პროცესში, უსაფრთხოებიდან გამომდინარე, ტერიტორიაზე ღამის საათებში ტრანსპორტის მოძრაობა შეზღუდულია.

info@bp.ge

+995595334912

გამოგვყევით