1700730699

საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის ინფორმაციით, ჩატარებული გაწმენდითი სამუშაოების შედეგად, საერთაშორისო მნიშვნელობის მცხეთა–სტეფანწმინდა–ლარსის საავტომობილო გზის გუდაური(ფოსტა)–კობის მონაკვეთზე მისაბმელიანი და ნახევრად მისაბმელიანი ავტოტრანსპორტის მოძრაობა აღდგენილია.გარემოს ეროვნული სააგენტოს ცნობით, გუდაური(ფოსტა)–კობის მონაკვეთზე ავტოტრანსპორტის მოძრაობა განხორციელდება გაუჩერებლად გავლის რეჟიმში, მხოლოდ ზვავდამცავი გვირაბების გავლით.მისაბმელიანი, ნახევრად მისაბმელიანი ავტოტრანსპორტის და 30 ადგილზე მეტი ტევადობის ავტობუსების მოძრაობა გვირაბებში განხორციელდება ცალმხრივად. აღნიშნული რეჟიმით მოძრაობა განხორციელდება საპატრულო პოლიციის უშუალო ზედამხედველობით და კოორდინაციით.

1700656302

თბილისის სახელმწიფო საკონცერტო დარბაზის მიმდებარედ არსებულ შადრევანს რეაბილიტაცია ჩაუტარდა. ამის შესახებ დედაქალაქის მერმა, კახა კალაძემ მუნიციპალიტეტის მთავრობის სხდომაზე ისაუბრა.მისი თქმით, სამუშაოები შადრევნის ისტორიული იერსახის შენარჩუნებას ითვალისწინებდა, რისთვისაც, დაახლოებით, ნახევარ მილიონ ლარზე მეტი დაიხარჯა.„ეკოსერვის ჯგუფმა“ თბილისის სახელმწიფო საკონცერტო დარბაზის მიმდებარედ, შადრევნის რეაბილიტაცია განახორციელა. სამუშაოები შადრევნის ისტორიული იერსახის შენარჩუნებას ითვალისწინებდა. რეაბილიტაციის ფარგლებში, სრულად განახლდა შადრევნის კედლის წყლის ფარდა, აუზი, ტუმბო-აგრეგატი, მართვის ოთახი  და დამცლელი მილი; შეიცვალა შადრევნის კედლის ქვედა ფილები და მოპირკეთდა გრანიტით. მოეწყო განათებები, ამომფრქვევები და ელექტროსადენები. სამუშაოების ღირებულებამ, დაახლოებით, ნახევარ მილიონ ლარზე მეტი შეადგინა. აღნიშნული ტერიტორია ჩვენ მთლიანად მოვაწესრიგეთ და დღეს, ყველანაირად კეთილმოწყობილია“, - განაცხადა კახა კალაძემ.მისივე თქმით, ტერიტორიაზე ასევე, განახლდა მიწისქვეშა გადასასვლელები.

1700638985

აღმოსავლეთ-დასავლეთის საერთაშორისო მაგისტრალური გზის (E60-ის) შემადგენელ რიკოთის საუღელტეხილო გზაზე არსებული გვირაბის პარალელურად ახალი გვირაბი გაიჭრა. ჩუმათელეთი-ხევის მონაკვეთზე გაჭრილი ახალი გვირაბის სიგრძე 1800 მეტრია და დღეის მდგომარეობით, ყველაზე გრძელი გვირაბია ქვეყანაში.“მნიშვნელოვანია ამ გვირაბის გაჭრა, ვინაიდან ახალ გვირაბში მოძრაობის გადართვის შემდეგ შესაბამისი სამუშაოები დაიწყება ძველ, არსებულ გვირაბში. ახალი გვირაბის საბოლოო მოსახვის სამუშაოების დიდი ნაწილი შესრულებულია, მოეწყობა საფარი, დასრულდება საინჟინრო და ელექტრო ქსელების მონტაჟი, რის შემდეგაც გვირაბში გაიხსნება ავტოტრანსპორტის მოძრაობა,“ - განაცხადა რეგიონული განვითარებისა და ინფრასტრუქტურის მინისტრმა, ირაკლი ქარსელაძემ, რიკოთის პროექტის ფარგლებში მიმდინარე სამუშაოების დათვალიერებისას.ამავე მონაკვეთზე ავტოტრანსპორტის მოძრაობა გადაერთო ახალ, 2.4 კმ-იან გზაზე. ძველ საგზაო მონაკვეთზე კი, გაგრძელდება პროექტით გათვალისწინებული სამშენებლო სამუშაოები.მინისტრის თქმით, ჩუმათელეთი-ხევის მონაკვეთზე  პროექტით გათვალისწინებული ინტენსიური სამუშაოები მიმდინარეობს 33 ფერდზე. ასევე, დაწყებულია სატენდერო პროცედურები 149-ე კმ-ზე, მიმდინარე წლის დასაწყისში, მონიტორგინის შედეგად  გამოვლენილი პოტენციური მეწყრული უბნის სტაბილიზაციის სამუშაოების ჩასატარებლად.„149-ე კილომეტრზე, წლის დასაწყისში, მონიტორინგის შედეგად აღმოჩენილი იქნა მეწყრის პოტენციური კერა ძველ გზასთან 200 მეტრის მოშორებით, რის გამოც გატარდა შესაბამისი ღონისძიებები და დაწესდა სპეციალური რეჟიმი. ღონისძიებები გრძელდება იმისთვის, რომ უახლოეს მომავალში გაუქმდეს რიკოთზე გადაადგილების სპეციალური რეჟიმი სატვირთო ტრანსპორტისთვისაც. პარალელურად კი, მიმდინარეობს სატენდერო პროცედურები აღნიშნული ფერდის დამუშავებისთვის საჭირო სამუშაოებზე, რაც არ იყო გათვალისწინებული არც პროექტით და არც სამშენებლო სამუშაოების ფარგლებში,“-აღნიშნა ირაკლი ქარსელაძემ.ამ დროისათვის, რიკოთის მაგისტრალური გზის მშენებლობის პროექტით გათვალისწინებული 51 გვირაბიდან  უკვე გაჭრილია 50 გვირაბი და 97 ხიდიდან უკვე აშენებულია 83 ხიდი. აქედან, ავტოტრანსპორტის მოძრაობა უკვე გახსნილია რიკოთის მაგისტრალური გზის 27 კმ-იან, 4 ზოლიან მონაკვეთზე სოფელ ხევიდან და დაბა შორაპნამდე. ხევი-შორაპნის მონაკვეთი მოიცავს 65 ხიდსა და 38 გვირაბს, რომელმაც რიკოთზე გადაადგილების მანძილი 8 კმ-ით, ხოლო გადაადგილების დროს 25 წუთით უკვე შეამცირა. სამშენებლო სამუშაოები აქტიურად მიმდინარეობს ყველა დარჩენილ ხიდსა და გვირაბზე.ჩუმათელეთი-ხევის მონაკვეთის მშენებლობა ევროპის საინვესტიციო ბანკთან (EIB) და მსოფლიო ბანკთან (WB) გაფორმებული სასესხო ხელშეკრულების ფარგლებში მიმდინარეობს.საერთო ჯამში, აღმოსავლეთ-დასავლეთის მაგისტრალური გზის 60%-ზე მეტი (261 კმ) ავტოტრანსპორტისთვის უკვე გახსნილია. სამშენებლო სამუშაოები გრძელდება მაგისტრალური გზის 81 კმ-ზე.

1700638439

საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის ინფორმაციით, ჩატარებული გაწმენდითი სამუშაოების შედეგად, შიდასახელმწიფოებრივი მნიშვნელობის კოდა–ფარცხისი–მანგლისი–წალკა-ნინოწმინდის საავტომობილო გზის კმ94-კმ113 (ფარავანის უღელტეხილი) მონაკვეთზე მსუბუქი ავტოტრანსპორტის მოძრაობა აღდგენილია, ხოლო ლიპყინულის გამო, მისაბმელიანი და ნახევრადმისაბმელიანი ავტოტრანსპორტის გადაადგილება აკრძალულია.

1700578800

სამშენებლო სექტორი კვლავ კვალიფიციური კადრების დეფიციტს განიცდის. ამის შესახებ გადაცემა "ბიზნესპარტნიორს" ინფრასტრუქტურის მშენებელთა ასოციაციის აღმასრულებელმა დირექტორმა, ანა საბახტარიშვილმა განუცხადა.მისი ინფორმაციით, ქვეყანაში კადრების როგორც სექტორიდან, ასევე ქვეყნიდან გადინება აქტიურად მიმდინარეობს. გარდა ამისა, გამოწვევაა კადრების კვალიფიციურობაც, რის გამოც კომპანიები იძულებულები ხდებიან კადრები თავადვე გადაამზადონ."რეფორმა, რომელიც პროფესიული განათლების მიმართულებით ხორციელდება, რომლის თანახმად, კერძო სექტორს პასუხისმგებლობა ეკისრება კადრი თავადვე მოამზადოს, ვფიქრობ, რომ სწორია. ვინაიდან, მათ უკეთ იციან, როგორი კადრი სჭირდებათ. თუმცა, განსახორციელებელი რესურსი, რომელიც კადრის გადამზადებაში უნდა ჩაიდოს, ფაქტობრივად არ არის. ეს რესურსი დამატებითი რისკების დაზღვევაზე, არაპროგნოზირებადი მომავალზე, კრიზისებიდან გამოსვლასა და სხვა კომპონენტებზე ნაწილდება,"-აცხადებს საბახტარიშვილი.ინფრასტრუქტურის მშენებელთა ასოციაციის აღმასრულებელი დირექტორის განმარტებით, ქვეყანაში სულ რამდენიმე თითზე ჩამოსათვლელი კომპანიაა, რომელსაც კადრების მომზადებაში დამატებითი რესურსის გამოყოფა შეუძლია.

1700460783

ყვარლის მუნიციპალიტეტის სოფელ შილდაში #2 საბავშვო ბაღის შენობის სრული რეაბილიტაცია დასრულდა.საქართველოს რეგიონული განვითარებისა და ინფრასტრუქტურის სამინისტროს ინფორმაციით, პროექტი რეგიონებში განსახორციელებელი პროექტების ფონდიდან 1 მილიონ 20 ათასი ლარით დაფინანსდა. ბაღის შენობა, რომელიც 3 ჯგუფზეა გათვლილი, თანამედროვე სტანდარტებთან შესაბამისად რეაბილიტირდა და აღიჭურვა.სოფელ შილდაში, ახლად რეაბილიტირებული საბავშვო ბაღის გახსნის ღონისძიებას რეგიონული განვითარებისა და ინფრასტრუქტურის მინისტრის პირველი მოადგილე ილია ბეგიაშვილი, კახეთის სახელმწიფო რწმუნებული გიორგი ალადაშვილი და ადგილობრივი ხელისუფლების წარმომადგენლები დაესწრნენ.„2023 წელი რეგიონებში განსახორციელებელი პროექტების მიმართულებით მასშტაბური და ნაყოფიერი იყო. 395 მილიონი ლარის ფონდიდან 53 მილიონი ლარის, დაახლოებით, 125 პროექტი მიმდინარეობდა კახეთის რეგიონის მუნიციპალიტეტებში. პროექტების სპექტრი ფართოა - წყალმომარაგების, გზების, ბაღებისა და სპორტული ინფრასტრუქტურის პროექტები და ფაქტობრივად, ყველა პროექტი დასრულების ეტაპზეა,“- რეგიონული განვითარებისა და ინფრასტრუქტურის მინისტრის პირველმა მოადგილემ, აღნიშნა ილია ბეგიაშვილმა.მან, ასევე, ისაუბრა პრემიერ-მინისტრის გადაწყვეტილებით დაწყებულ საბავშვო ბაღებისა და სკოლების მშენებლობა-რეაბილიტაციის მასშტაბური პროგრამების მნიშვნელობაზე,  რომელიც ქვეყანაში რამდენიმე ასეული საბავშვო ბაღისა და სკოლის მშენებლობასა და რეაბილიტაციას ითვალისწინებს.

1700460520

საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის ინფორმაციით, თოვისა და ზვავსაშიშროების გამო, შიდასახელმწიფოებრივი მნიშვნელობის ჟინვალი-ბარისახო-შატილის საავტომობილო გზის კმ67-კმ106 (სოფ. ხახმატი-შატილი) აკრძალულია ყველა სახის ავტოტრანსპორტის მოძრაობა.ამავე საავტომობილო გზის კმ53-კმ67 (სოფ. კორშა-სოფ. ხახმატი) მონაკვეთზე, დასაშვებია მხოლოდ მაღალი გამავლობის (ორი და მეტი წამყვანი ხიდის მქონე) ავტოტრანსპორტის მოძრაობა. ხოლო, დანარჩენი სახის ავტოტრანსპორტის მოძრაობა აკრძალულია.საავტომობილო გზის კმ1-კმ53 (ჟინვალი-სოფ. კორშა) მონაკვეთზე ავტოტრანსპორტის მოძრაობა თავისუფალია.

1700205345

ბათუმში წყალარინების (კანალიზაციის) გამწმენდი ნაგებობების გაფართოება, ასევე ახალი სატუმბი სადგურებისა და რეზერვუარების მშენებლობა იგეგმება.პროექტები გერმანიის რეკონსტრუქციის საკრედიტო ბანკის (KfW) დაფინანსებით ხორციელდება. პროექტის ოთხი ფაზა ბათუმში უკვე წარმატებით განხორციელდა და ახლა უკვე  V ფაზის განხორციელება იწყება. KfW-ის მიერ  დაფინანსებული უკვე განხორციელებულ და დაგეგმილ პროექტებს საქართველოში გერმანიის ელჩი  ერნსტ პეტერ ფიშერი ადგილზე, მედიასთან ერთად, გაეცნო.KfW-ის წარმომადგენელმა და ბათუმის ვიცე-მერმა ლევან დავითაძემ KfW-ის ფინანსური მხარდაჭერით განხორციელებული წყლისა და წყალარინების რეაბილიტირებული ინფრასტრუქტურა, კერძოდ, მახინჯაურის წყლის რეზერვუარი, ადლიის ჩამდინარე წყლების გამწმენდი ნაგებობები და სანიაღვრე სატუმბი სადგური მოინახულეს.აღინიშნა, რომ დაიწყო პროექტების V ფაზის განხორციელება, რაც წყალარინების გამწმენდი ნაგებობების გაფართოებას, სატუმბი სადგურების მშენებლობა-რეაბილიტაციასა და წყლის სამარაგო რეზერვუარის მშენებლობას ითვალისწინებს.პროექტი KfW-ის შეღავათიანი სესხისა და გრანტის ფარგლებში განხორციელდება და ითვალისწინებს:ადლიის წყალარინების გამწმენდი ნაგებობის, სატუმბი სადგურების გაფართოებას, აეროპორტის, ინდუსტრიული და კახაბრის დასახლებების წყალარინების სისტემების მოწყობას, ინჯალოს წყლის სამარაგო რეზერვუარის, წყალსადენის და სასმელი წყლის მკვებავი ხაზის მშენებლობას, მეჯინისწყლის ჭაბურღილების წარმადობის გაზრდას, ჩაქვისწყლის სათავე ნაგებობისა და ჩაქვის გადამცემი მაგისტრალური წყალსადენის რეაბილიტაციას, ხელვაჩაურისა და აეროპორტის წყალმომარაგების ქსელის მოწყობას.აღნიშნული პროექტის განსახორციელებლად 78.8 მილიონი ევრო დაიხარჯება. V ფაზის სამშენებლო სამუშაოები 3-4 წელში უნდა დასრულდეს.ბათუმის ვიცე-მერის განცხადებით, პროექტზე მუშაობა ინტენსიურად მიმდინარეობს და 2024 წლის დასაწყისში პირველი ტენდერი გამოცხადდება.„ბათუმის მუნიციპალიტეტში ინფრასტრუქტურა მნიშვნელოვნად გაუმჯობესდა და ჩატარდა რეაბილიტაცია. კომუნალური ინფრასტრუქტურის ნაწილში მნიშვნელოვანია kfw-ის პროექტის ფარგლებში განხორციელებული სამუშაოები, რომელიც გულისხმობს 4 დასრულებულ ფაზას, სადაც ჯამში 0,5 მლრდ-ლარზე მეტი დაიხარჯა და ქალაქის არეალში გამოიცვალა წყალმომარაგების,  წყალარინებისა და სანიაღვრე სისტემები. მნიშვნელოვნად გაუმჯობესდა წყალმომარაგება.საგულისხმოა ისიც, რომ ბოლო წლებში, ქალაქის მასშტაბები რამდენჯერმე გაიზარდა და ეს გულისხმობს შემოერთებულ ტერიტორიებს, სადაც აღნიშნული სამუშაოების განხორციელება ქალაქისთვის გამოწვევად რჩება, მაგრამ ამ გამოწვევის დასაძლევად გაფორმდა ხელშეკრულება, რომლის ფარგლებშიც დაახლოებით 53 მლნ ევრო სასესხო კომპონენტია და 2 მლნ ევრო საგრანტო კომპონენტი.  25 მლნ ევრო არის ბათუმის თანამონაწილეობა. ჯამში ამ პროექტზე 80 მლნ ევრო დაიხარჯება.მიმდინარეობს პროექტირება, პროექტირების დასრულების შემდეგ გამოცხადდება ტენდერი და დაიწყება სამუშაოები, რაც თავის მხრივ გულისხმობს ჩაქვის სათავე ნაგებობის მშენებლობა-რეაბილიტაციას, ასევე ინჯალოს რეზერვუარისა და შემდგომი დაქსელვის სამუშაოებს. მნიშვნელოვანია წყალარინების მიმართულება, სადაც ადლიის გამწმენდი ნაგებობის გაფართოება იგეგმება, კერძოდ, დამატებითი გამწმენდი ნაგებობის მშენებლობა. ასევე საგულისხმოა ჭაბურღილების ნაწილი, რომელიც უზრუნველყოფს უამინდობის დროს ქალაქის წყალმომარაგებას. ვიმედოვნებთ, რომ მომავალ წლის დასაწყისში საერთაშორისო ტენდერი გამოცხადდება. პროექტი რამდენიმე ეტაპს მოიცავს“, აცხადებს ლევან დავითაძე.

1700134002

დედაქალაქის მერმა კახა კალაძემ საზოგადოებას საქართველოს მთავრობის გადაწყვეტილების დეტალები გააცნო, რომლის მიხედვით, თბილისის მეტროს მოძველებული მატარებლები თანამედროვე, საერთაშორისო სტანდარტის 212 ვაგონით ჩანაცვლდება.დედაქალაქის მერის განცხადებით, აღნიშნული გადაწყვეტილება თბილისის სატრანსპორტო სისტემის რეფორმის მნიშვნელოვანი ნაწილია, რისთვისაც მადლობა გადაუხადა საქართველოს პრემიერ-მინისტრს.„2017 წელს, როდესაც თბილისის მოსახლეობამ აგვირჩია, დავიწყეთ მნიშვნელოვანი რეფორმის განხორციელება და მთელი ამ პერიოდის განმავლობაში ბევრი, საინტერესო, ქალაქისთვის მნიშვნელოვანი ნაბიჯი გადაიდგა ამ მიმართულებით.ბოლო წლების განმავლობაში სრულად განვაახლეთ ავტობუსების პარკი და მთლიანად ჩავანაცვლეთ დანგრეული, გაუბედურებული ყვითელი ავტობუსები, რომელიც სერიოზულ პრობლემას წარმოადგენდა როგორც მგზავრების გადაყვანის, ასევე ეკოლოგიური თვალსაზრისით; მთლიანად განვაახლეთ მიკროავტობუსების პარკი და დღეს თბილისის მოსახლეობას ემსახურება ახალი, თანამედროვე, ევროპული ტიპის ავტობუსები და მიკროავტობუსები. რა თქმა უნდა, რეფორმა გრძელდება და კიდევ ბევრი გვაქვს გასაკეთებელი იმისთვის, რომ კიდევ უფრო გავზარდოთ საზოგადოებრივ ტრანსპორტზე ხელმისაწვდომობა და მისი კომფორტულობა, იმისთვის, რომ საზოგადოებრივ ტრანსპორტს დღის განმავლობაში ყველაზე სწრაფად შეეძლოს გადაადგილება“, - განაცხადა კახა კალაძემ.მისი თქმით, პროექტის განხორციელებისთვის მნიშვნელოვანი ფინანსური რესურსი დაიხარჯება.„პრემიერ-მინისტრ ირაკლი ღარიბაშვილის გადაწყვეტილებით, თბილისის მეტროს ვაგონების განახლებისთვის,  სახელმწიფო ბიუჯეტიდან 475 მლნ ევროს ეკვივალენტი თანხა გამოიყოფა, რითაც მოხდება 212 ერთეული თანამედროვე, საერთაშორისო სტანდარტების შესაბამისი მეტროს ვაგონის შესყიდვა.თბილისის მეტრო საჭიროებს განახლებას. თქვენ იცით, რამხელა სამუშაო ჩატარდა ჩემი მერობის პერიოდში ძალოვანი კაბელების შესაცვლელად. ჩვენ მთლიანად შევცვალეთ დაახლოებით 450 კილომეტრის სიგრძის ძალოვანი კაბელები, რაც უსაფრთხოებისთვის ძალიან მნიშვნელოვანი იყო. ასევე გამნიავებელი სისტემები მთლიანად განვაახლეთ, ახალი აგრეგატები დაყენდა გვირაბებში და ეს პროცესი გრძელდება. არანაკლებ საჭირო და მნიშვნელოვანია მოძრავი შემადგენლობების ჩანაცვლება, რადგან ხშირია ძველი მატარებლების მწყობრიდან გამოსვლის ფაქტი, რაც აფერხებს მთლიანად მეტროპოლიტენის მუშაობას.ამდენად, შეიძლება ითქვას, რომ დღეს თბილისის სატრანსპორტო სისტემის განვითარებისთვის კიდევ ერთი მნიშვნელოვანი გადაწყვეტილება იქნა მიღებული. ეს არის მასშტაბური პროექტი, რადგან აქამდე თბილისის მეტროში საბჭოთა წარმოების მატარებლები არ ჩანაცვლებულა და თბილისს ემსახურება 48 შემადგენლობა 192 ვაგონის სახით, რომელიც გამოშვებულია და ექსპლუატაციაში მიღებულია  1974-1992 წლებში“, - აღნიშნა დედაქალაქის მერმა.კახა კალაძის განცხადებით, აღნიშნული გადაწყვეტილება ერთდროულად რამდენიმე პრობლემას გადაჭრის.„ეს გადაწყვეტილება გადაჭრის არა მარტო ექსპლუატაციიდან გამოსული მატარებლების პრობლემას, არამედ გაზრდილი მგზავრთნაკადის საკითხსაც, რადგან დაგეგმილი პროექტით გათვალისწინებულია არსებულზე მეტი - 212 ერთეული საერთაშორისო სტანდარტის ვაგონის შესყიდვა და ჩანაცვლება, რაც ეტაპობრივად განხორციელდება.  დღეის მდგომარეობით, სამუშაო დღეებში, ნახევარ მილიონზე მეტი მგზავრი გადაჰყავს თბილისის მეტროს, შესაბამისად, სწორედ ამ ადამიანების კომფორტულ, უსაფრთხო მგზავრობას უზრუნველყოფს აღნიშნული გადაწყვეტილება. პირველ ეტაპზე, რამდენიმე დღეში გამოცხადდება ბაზრის კვლევა, ამის შემდეგ გამოვაცხადებთ ტენდერს და  დავიწყებთ აღნიშნული ვაგონების შესყიდვას“, - განაცხადა თბილისის მერმა.