1715597672

ტყავის აქსესუარების მწარმოებელმა კომპანია „ტერმიტის“ პროდუქცია დუბაიში ფრენჩაიზით გაიყიდება. როგორც „ბიზნესპარტნიოთან“ კომპანიის დამფუძნებელი მიხეილ ბერძენიშვილი აცხადებს, ამ ეტაპზე პროდუქტის დამზადების პროცესი მიმდინარეობს და სავარაუდოდ, 15 ივნისს პირველი შეკვეთა გაიგზავნება.მისივე თქმით, ამ ეტაპზე დუბაიში „ტერმიტის“ საფულეები და ჩანთები გაიყიდება.„დაინტერესება გვაქვს რამდენიმე ქვეყნიდან, ევროპაში გვქონდა რამდენიმე მცდელობა და ამ ეტაპზე, მოლაპარაკებების პროცესში ვართ. დუბაიში „ტერმიტი“ როგორც ბრენდი არ გადის, გადის ფრენჩაიზით. ფაქტობრივად, ეს არის პარტნიორობა. ეს ადამიანი ყიდულობს ჩვენს ბრენდირებულ აქსესუარებს და რეალიზებას უკეთებს დუბაიში ონლაინ. თუმცა როგორც ჩვენთვის არის ცნობილი ფიზიკური მაღაზიის გახსნასაც გეგმავს, სადაც „ტერმიტის“ პროდუქციას განათავსებს. ჩვენ გვქონია მსგავსი თანამშრომლობის გამოცდილება მაგალითად, საფრანგეთთან, თუმცა კორონავირუსის პერიოდში შეწყდა.ამჟამად ევროპის ქვეყნებში მსგავსი პარტნიორობის განხორციელებას ტრანსპორტირების ფასი აფერხებს. ძალიან ძვირია საქართველოდან ნებისმიერი ნივთის ტრანსპორტირება. დუბაიში თავად პარტნიორი ანაზღაურებს ტრანსპორტირების ხარჯს.  ამასთან, მაგალითად ტყავის პროდუქტის იმპორტირება გერმანიას გართულებული აქვს და გარკვეულ სერტიფიკატს ითხოვს, რომელიც საქართველოში არ გაიცემა. თუმცა ჩვენი გამოცდილებით შეგვიძლია ვთქვათ, რომ ევროპის ბაზარი ძალიან კარგია და ვცდილობთ, რომ მაინც გავიდეთ“, - აღნიშნა მიხეილ ბერძენიშვილმა.გარდა ამისა, „ტერმიტი“ პროდუქციას amazon-ზეც ყიდის და როგორც მიხეილ ბერძენიშვილი აცხადებს, კომპანიის გაყიდვების 27%-მდე სწორედ amazon-ზე მოდის.„amazon-ზე ყველაზე მოთხოვნადი პროდუქცია სამზარეულოს აქსესუარებია. თუ შევადარებთ გასულ წელიწადნახევარს გაყიდვები აღნიშნული მიმართულებით 40%-მდე არის გაზრდილი“, - აცხადებს ბერძენიშვილი.ცნობისთვის, ტყავის აქსესუარების ბრენდი “ტერმიტი” რამდენიმე ექსპერიმენტური იდეის ცდის შედეგად შეიქმნა. ამ ეტაპზე, კომპანია ქალისა და მამაკაცის ტყავის ჩანთებს, საფულეებს, ქამრებს და სხვა აქსესუარებს ამზადებს.

1715582820

ფინტექის მიმართულებით საქართველო ნამდვილად შეიძლება გახდეს რეგიონალური ჰაბი, - ამის შესახებ ფინტექ ასოციაციის ხელმძღვანელმა დავით კიკვიძემ გადაცემა "ბიზნესპარტნიორში" განაცხადა. მისივე ინფორმაციით, ქართული ბაზარი საერთაშორისო ფინტექ კომპანიებისთვის მიმზიდველი ხდება."განსაკუთრებით აღსანიშნავია საერთაშორისო კომპანიების შემოსვლა ქვეყანაში. გასულ წელს დაახლოებით 5 ფინტექ კომპანია შემოვიდა და კიდევ რამდენიმე კომპანიაა დაინტერესებული. გამოწვევა ძალიან ბევრია. ერთ-ერთი არის ის, რომ საქართველო არის ძალიან პატარა ბაზარი და ამიტომ შეიძლება ბევრისთვის მიმზიდველი არ იყოს, თუმცა მეორეს მხრივ, ქართული ბაზარი ნელ-ნელა რეგიონალური ჰაბი ხდება.  აქ ინფრასტრუქტურა ძალიან გამართულია, შესაბამისად, ყველა ის რესურსი, რაც ფინტექ კომპანიას სჭირდება საქართველოში ამისთვის იდეალური სასათბურე პირობებია. სწორედ, ამიტომ ქართული ბაზარი ხდება სულ უფრო მიმზიდველი ფინტექ მიმართულებით და დიდ იმედს ვიტოვებ, რომ ეს ტენდენცია გაგრძელდება. ერთ-ერთი გამოწვევა არის თავსებადობა, რაც ნიშნავს იმას, რომ ქართული ბაზრის სხვა ბაზრებთან რეგულაციური, ტექნოლოგიური თავსებადობა იყოს შესაძლებელი. ეს გულისხმობს იმას, რომ პატარა ბაზრის პრობლემა ერთი ხელის მოსმით გადაიჭრება. როგორც ქართველ მომხმარებელს, ისე უცხოელ მომხმარებელს შესაძლებლობა ექნება ერთმანეთის პროდუქტები გაცვალონ და მოიხმარონ", - აცხადებს დავით კიკვიძე.ცნობისთვის, ფინტექი არის ფინანსური ტექნოლოგიების მიმწოდებელი კომპანია, რომელიც საინფორმაციო ტექნოლოგიების გამოყენებით ფინანსურ მომსახურებას აწარმოებს.

1715350200

მცენარეთა მოვლის სერვისზე მოთხოვნა, წინა წელთან შედარებით, გაორმაგდა, - ამის შესახებ „ბიზნესპარტნიორთან“ საქართველოში მცენარეების პირველი სასტუმროს - „ბუტკოს“ თანადამფუძნებელმა არჩილ ღოღობერიძემ განაცხადა.მისივე თქმით, "ბუტკო" ფიზიკური მაღაზიისა და ევროპული სტანდარტების ყვავილების სკოლის  გახსნას გეგმავდა, თუმცა სერვისზე გაზრდილი მოთხოვნის გამო აღნიშნული გეგმა დაპაუზდა. "ჩვენ დავიწყეთ მცენარეების მოვლის კურსის ჩატარება, რაზეც დაინტერესება საკმაოდ მაღალია. ყოველ სეზონზე უფრო და უფრო დიდი მოთხოვნაა ჩვენს სერვისზე, უკვე თითქმის ყველა სივრცეში გვხვდება მცენარეები. შესაბამისად, ჩვენი მომხმარებლები არიან როგორც ფიზიკური პირები, ისე კომპანიები, რომლებიც ქირაობენ მებაღის მომსახურებას, თუმცა უდიდესი ნაწილი ფიზიკური პირები არიან. გარდა ამისა, ჩვენ, მოქალაქეებს გარდა ადგილზე მომსახურებისა, ონლაინაც ვუწევთ უფასო კონსულტაციას. ამასთან, მოქალაქეები თავის მცენარეებს გვიტოვებენ მოსავლელად 1 წლით, ან რამდენიმე თვით. უნდა აღინიშნოს, რომ მოკლე პერიოდით მცენარეებს არ ვიტოვებთ, რადგან სტრესულია მათთვის", - აცხადებს ღოღობერიძე. შეგახსენებთ, ყვავილების სასტუმროს სერვისი ინოვაციურია არა მხოლოდ ქართული ბაზრისთვის, არამედ ევროპულისთვისაც და ჯერჯერობით, ასეთი დაწესებულება მხოლოდ ლონდონში ფუნქციონირებს. საქართველოში მცენარეების პირველი სასტუმრო „ბუტკო“ კი 3 წლის წინ ტაბახმელაში გაიხსნა. ახლა კი ის თბილისში მდებარეობს, სადაც არდადეგების, შვებულების თუ სხვა მიზეზით სახლიდან წასვლის პერიოდში, მომხმარებლები თავიანთ მცენარეებს მოსავლელად ტოვებენ.

1715344333

ლაგოდეხის ნაკრძალის ტერიტორიაზე მდებარე ერთადერთი სასტუმრო Wald Hotel Lagodekhi ზაფხულის სეზონზე 90%-იან დატვირთულობას ელოდება. როგორც სასტუმროს მენეჯერი ქეთი კაპანაძე "ბიზნესპარტნიორთან" აღნიშნავს, მათი მომხმარებლების დაახლოებით, 30%-ს კორპორატიული კლიენტები წარმოადგენენ."ზაფხულის სეზონისთვის დაინტერესება უკვე ძალიან მაღალია. უფრო ცნობადი გახდა ჩვენი სასტუმრო და ველოდებით, რომ წინა სეზონზე უკეთესი აქტივობა გვექნება. ჩვენი მომხმარებლები არიან ძირითადად საქართველოს მოქალაქეები,დაახლოებით 10%-ს უცხოელები წარმოადგენენ.ზოგადად, ლაგოდეხის რაიონის მიმართ დაინტერესება იზრდება, თუმცა პანდემიამდელი პერიოდის მაჩვენებლები ჯერჯერობით არ დაბრუნებულა. 2019 წელს 60 000 ტურისტს უმასპინძლა ლაგოდეხის ნაკრძალმა და მას შემდეგ აღნიშნული მაჩვენებელი აღარ დაფიქსირებულა. წელს ნაკრძლის ადმინისტრაციაც უფრო მეტ ტურისტს ელოდება, რადგან დაინტერესება გაზრდილია.კორპორატიული თანამშრომლობა გვაქვს სხვადასხვა კომპანიასთან და შესაბამისად, ჩვენი მომხმარებლების გარკვეულ ნაწილს კორპორატიული კლიენტები წარმოადგენენ", - აღნიშნა ქეთი კაპანაძემ.ცნობისთვის, ლაგოდეხის ნაკრძლის ტერიტორიაზე მდებარე სასტუმროში 45 ნომერი ფუნქციონირებს. ასევე, ტერიტორიაზე განთავსებულია 3 კოტეჯი, მათ შორის, ორი საცხოვრებელი კოტეჯი საუნით, ხოლო ერთი სპა-საუნისთვის. გარდა ამისა, კომპლექსი მოიცავს რესტორანს, ბარს და ორ ღია აუზს.

1715334882

ხვალ და ზეგ, რომ აღარ იქნება დიზელზე და ბენზინზე მომუშავე მანქანა და ელექტრო მანქანა აჯობებს ფინანსურად, ჩვენ დაგვჭირდება დიდი რაოდენობის ელექტროენერგია, რომელიც არ გვაქვს, - ამის შესახებ გადაცემა "ბიზნესპარტნიორში" მზის ენერგიის განვითარების ასოციაციის ხელმძღვანელმა თორნიკე დარჯანიამ განაცხადა. მისივე თქმით, მომავალი ეკუთვნის ელექტრომობილებს, ელექტრიფიცირებას გათბობის და გადაადგილების მიმართულებით."ჩვენი ინტერესია, რომ ენერგეტიკაში იყოს ძალიან დიდი ინვესტიცია, რადგან ქვეყანას ამ თალსაზრისით უზარმაზარი პოტენციალი აქვს.  ასევე, ამან ძალიან დიდი წვლილი შეიძლება შეიტანოს ზოგადი დასაქმების მაჩვენებელში. თუ განვითარებასთან არ მიხვალ, განვითარება მოვა ჩვენთან. დღეს ყველამ იცის რა ღირს ელექტროენერგია, ნავთობის ენერგომატარებლები, რომლებიც შემოდის - ამასთან პირისპირ არის კონკურენციაში შესული განახლებადი ენერგია. ყველა ინვესტორი იკვლევს ბაზარს და ხედავს, რომ ელექტროენერგიაზე იზრდება მოთხოვნა, ამიტომ ბუნებრივია, რომ მათ უჩნდებათ ინტერესი, რომ ამ სფეროში გააკეთონ ინვესტიცია.ინვესტორი ფიქრობს დღეს გააკეთოს ინვესტიცია, რომ ხვალ ელექტრომოწყობილობების დაკმაყოფილება შეძლოს", - აცხადებს თორნიკე დარჯანია.

1715329281

პროდუქციაზე მოთხოვნა, დაახლოებით, 70%-ით გაიზარდა, - ამის შესახებ "სამოსელი პირველის" დირექტორი ანა ნინუა „ბიზნესპარტნიორთან" აცხადებს. მისივე თქმით, "სამოსელი პირველის" მომხმარებლები არიან როგორც ადგილობრივები, ასევე უცხოელები. "მიუხედავად იმისა, რომ ინდივიდუალური შეკვეთების მიღება ამ ეტაპზე შევწყვიტეთ მოთხოვნა და ინტერესი სულ უფრო იზრდება. ინდივიდუალურად ვკერავთ მხოლოდ  საქორწინო კაბებს და ჩოხებს. ამ ეტაპზე მთლიანად ორიენტირებულები ვართ მაღაზიაზე. გვირჩევნია მაღაზიაში იყოს ფართო ასორტიმენტი ზომებში, ვიდრე ინდივიდუალური შეკვეთები მივიღოთ. ძირითადად სულ ცარიელი იყო მაღაზია და ვერ ვასწრებდით შევსებას. ჩვენი მომხმარებლების 40% უცხოელები არიან.რაც შეეხება ფასებს - საქორწინო კაბის ფასი 15 000 ლარამდე მერყეობს. კაბების ფასები კი წინა წელთან შედარებით გაზრდილია.გარდა ამისა, ჩვენ ამ ეტაპზე ვუკერავთ თავდაცვის ძალებს ახალუხებს და ასევე, ფეხსაცმელებს", - აცხადებს ანა ნინუა."სამოსელი პირველი" პანდემიამდე პროდუქციის ექსპორტზე გატანას აპირებდა, თუმცა აღნიშნული გეგმა დააპაუზა. "ჩვენ გვქონდა მოლაპარაკებები ქვეყნებთან, გარკვეულწილად პანდემიამ შეგვიშალა ხელი და შემდეგ ჩვენც ორიენტირება მაღაზიაზე და ადგილობრივ ბაზარზე გადავიტანეთ", - განაცხადა ანა ნინუამ.მანვე აღნიშნა, რომ „სამოსელი პირველის“ მომხმარებელი ძირითადად, საშუალო და მაღალი შემოსავლის მქონე პირები არიან.კომპანია 2009 წელს დაარსდა, ხოლო პირველი მაღაზია 2010 წელს გაიხსნა. ამჟამად ბაზარზე კომპანიას თბილისში ერთი ბრენდული მაღაზია აქვს, რომელიც 2023 წელს გახსნა. კომპანიის მიზანია ხელი შეუწყოს ქართული ეროვნული სამოსისა და აქსესუარების დამზადების ტრადიციების შესწავლასა და გაცოცხლებას, თანამედროვე ქართველთა ყოფიერებაში ეროვნული საქართველოსა და მის ფარგლებს გარეთ წარმოჩენას.

1715314200

შეგვიძლია ვივარაუდოთ, რომ წელს კარგი ხარისხის თხილი 9 ლარამდე ეღირება, - ამის შესახებ გადაცემა "ბიზნესპარტნიორში" "თხილის მწარმოებელთა ასოციაციის" თავმჯდომარემ გიორგი თოდუამ განაცხადა.მისივე ინფორმაციით, 2022 წელთან შედარებით, 2023 წელს თხილის ფასი თითქმის გაორმაგებული იყო. "თუ ჩვენ გავითვალისწინებთ რეკომენდაციებს და ცოდნას, რომელიც უკვე დაგროვდა ჩვენს ინდუსტრიაში და სწორად ჩავატარებთ აგრო ღონისძიებებს მაღალ ხარისხზე ასეთი ფასი მომავალშიც დაფიქსირდება. თავისუფლად შეიძლება მოსავლის რაოდენობის იმ ნიშნულს დავუბრუნდეთ რაც იყო 2019 წელს. 50-55 ათასი ტონის მიღწევა შესაძლებელია იმ გამოცდილებიდან და პრაქტიკიდან გამომდინარე, რაც ჩვენ გაგვაჩნია. ადგილობრივი ბაზრის გარდა, ჩვენი ინფორმაციით, ექსპორტიორები მუშაობენ სხვადასხვა ბაზარზე გასასვლელად. მათ შორის, ჩინეთის, ასევე ევროპის ქვეყნებთან. ამჟამად, სტაბილური საექსპორტო ბაზარი გახლავთ გერმანია და იტალია", - აცხადებს გიორგი თოდუა.

1715249400

"გადავაჭარბეთ ყველანაირ ნიშნულს რაც კი საქართველოში ტურისტის შემოდინების კუთხით გვქონდა", - ამის შესახებ HSC Group Hospitality-ის დამფუძნებელმა გიორგი დოლიძემ გადაცემა "ბიზნესპარტნიორში" განაცხადა. მისივე ინფორმაციით, საქართველოში სასტუმროს ფასები წინა წელთან შედარებით, დაახლოებით, 10%-ით გაზრდილია."ასეთი აპრილი არ გვქონია არც პანდემიამდე, საბედნიეროდ. საქართველოსთვის არის 4 პრიორიტეტული მიმართულება, საიდანაც სტატისტიკურად ყველაზე მეტი ტურისტი შემოდის. ესენია: საუდის არაბეთი, საამიროები, რუსეთი, მეზობელი ქვეყნები, ევროპა და ამას ემატება ინდოეთი და ჩინეთი ძირითადად ჯგუფური ტურების კუთხით.ყველას აინტერესებს ძველი თბილისი, კულტურული, სამლოცველო ტურები და ის ღირსშესანიშნაობები, რაც საქართველოს აქვს, მათ შორის, ზღვა და მთა. ბრენდულ და მაღალი ტიპის სასტუმროში სეზონის ბოლომდე ნარჩუნდება 250-300 დოლარამდე გამოცხადებული ფასები. საშუალო ტიპის, 4 ვარსკვლავიანი სასტუმროები ცდილობენ, რომ შეინარჩუნონ ფასი 140-160 დოლარამდე, ხოლო მცირე ტიპის ობიექტების ფასი 80-100 დოლარამდეა. წინა წელთან შედარებით ფასები, ალბათ, 10%-ით გაზრდილია, ხოლო თუ პანდემიამდელ პერიოდს შევადარებთ 5-დან 10%-მდე გვაქვს გადაჭარბება სასტუმროს ფასების", - აცხადებს გიორგი დოლიძე.

1715244420

მზის ბატარეებმა, ფაქტობრივად, სრულად ჩაანაცვლა  ელექტროენერგიის მოხმარება, - ამის შესახებ სასტუმრო "კოლხიდას" მფლობელმა ხათუნა ლაგაზიძემ "ბიზნესი რუსთავი 2"-თან  განაცხადა. მისივე თქმით, აღნიშნული პროექტი სასტუმროს სამკურნალო-სარეაბილიტაციო სერვისის მიწოდების ვადებსაც გაზრდის."შავი ზღვის სანაპიროს მიმდებარედ პირველია ასეთი მასშტაბის პროექტი.ყველა მოლოდინს გადააჭარბა, რადგან ჩვენ პარტნიორ ორგანიზაციასთან ერთად, რომელმაც დაამონტაჟა მზის ბატარეები ვითვლიდით, რომ ჩვენი წლიური მოხმარების, დაახლოებით, 80%-ს გაწვდებოდა. 5 თვის მონაცემებით თუ ვიმსჯელებთ 100%-ით დაფარა ჩვენი ელექტროენერგიის ხარჯი და მზიანი დღეების დროს პლუსში გადავალთ. რაც საშუალებას მოგვცემს, რომ სეზონი გავზარდოთ. ელექტროენერგია უზარმაზარ ხარჯზე გადიოდა. მოგეხსენებათ, ურეკის ქვიშის სამკურნალო თვისებები და ჩვენ გვინდოდა სეზონი გაგვეზარდა ქვიშის ხელოვნური გათბობის წყალობით. ეს ძალიან ხარჯიანი იყო ენერგო თვალსაზრისით და ამიტომაც სანამ ამ პროექტს არ შევეჭიდებოდით ვერ ვრისკავდით. ახლა სეზონის გახანგრძლივების საშუალება გვექნება", - აცხადებს ლაგაზიძე.ცნობისთვის, ურეკში სასტუმრო "კოლხიდაში" USAID-ის მხარდაჭერით, 5 თვეა 215 კვ/სთ სიმძლავრის მზის ელექტრო სადგური ფუნქციონირებს.