საქართველოს ეროვნული ბანკი "თვის მიმოხილვას" აქვეყნებს.
მიმოხილვაში ქვეყნის საბანკო და საფინანსო სექტორებში არსებული მდგომარეობისა და მაკროეკონომიკური პარამეტრების დეტალურ ანალიზს გაეცნობით. გამოცემის მიზანია ფართო საზოგადოებას ქვეყნის მოკლევადიანი (ერთთვიანი) მაკროეკონომიკური ანალიზი ოპერატიულად მიაწოდოს. ანგარიშში წარმოდგენილი ანალიზი ამ ეტაპზე არსებულ უახლესს ინფორმაციას ეყრდნობა.
ძირითადი ტენდენციები
ინფლაცია
- ინფლაცია სამიზნე 3 პროცენტიან მაჩვენებელთან ახლოს ნარჩუნდება, მარტში წლიურმა ინფლაციამ 3.5% შეადგინა, ხოლო თებერვალთან შედარებით ფასების საერთო დონემ 1.1%-ით მოიმატა
- საბაზო ინფლაციამ, რომელიც სამომხმარებლო კალათიდან მაღალი მერყეობით გამორჩეულ სურსათის, ენერგომატარებლების და სიგარეტის ფასებს გამორიცხავს, 2.4% შეადგინა
- ადგილობრივმა ინფლაციამ მარტში 4.0% შეადგინა
საბანკო სექტორი
- თებერვალში გაცვლითი კურსის ეფექტის გამორიცხვით, სესხები წლიურად 17.4%-ით გაიზარდა
- დეპოზიტების დოლარიზაციამ, თებერვალში, 53.1% შეადგინა
- მთლიანი საკრედიტო პორტფელის დოლარიზაცია 0.1 პპ-ით, 43.1%-მდე შემცირდა
საგარეო სექტორი
- იმპორტი - თებერვალში საქონლის იმპორტი წლიურად 6.6%-ით შემცირდა, რაც უმეტესად სამომხმარებლო საქონლის იმპორტის კლებით იყო განპირობებული
- ექსპორტი - თებერვალში საქონლის რეგისტრირებული ექსპორტი წლიურად 7.1%-ით შემცირდა და 431.5 მლნ აშშ დოლარს გაუტოლდა
- თებერვლის მდგომარეობით, რეზერვების მთლიანმა მოცულობამ კი 4,234.0 მლნ აშშ დოლარი შეადგინა
გამოცემის ნახვა შესაძლებელია ეროვნული ბანკის ოფიციალურ ვებგვერდზე "პუბლიკაციების" რუბრიკაში.
