ამერიკულმა ტექნოლოგიურმა გიგანტმა Amazon-მა TikTok-ის ამერიკული წილის შესყიდვის განაცხადი გააკეთა, – ამის შესახებ New York Times-ი წერს.
როგორც გამოცემა წერს, აღნიშნული წინადადების შემცველი წერილები გაეგზავნა აშშ-ის ვიცე პრეზიდენტ ჯეი დი ვენსსა და ვაჭრობის მდივან ჰოვარდ ლატნიკს. როგორც New York Times-ი წერს, აღნიშნულ საკითხზე Amazon-ის მიერ გაკეთებულ განაცხადს, მოლაპარაკების მონაწილეები სერიოზულად არ აღიქვამენ. თავად Amazon-ში კი კომენტარს არ აკეთებენ.
სტატიაში ნათქვამია, რომ TikTok-ის შეძენა Amazon-ს, Microsoft-ს, Walmart-ს, Oracle-ს, Blackstone-ს და ინვესტორთა რამდენიმე კონსორციუმს სურს.
ცნობისთვის, 2024 წლის გაზაფხულზე აშშ-ის წარმომადგენელთა პალატამ მიიღო კანონი, რომელიც აშშ-ში TikTok-ის აკრძალვის შესაძლებლობას იძლევა, თუ სოციალური ქსელი არ გამოეყოფა ჩინურ კომპანია „ბაითდენსს“. კანონმდებლებმა ჩათვალეს, რომ TikTok-ი აშშ-ის უსაფრთხოებას ემუქრება, რადგანაც ჩინეთის ხელისუფლებას შეუძლია მოსთხოვოს სოციალური ქსელის მფლობელ კომპანიას ინფორმაცია ამერიკელი მომხმარებლების შესახებ.
2024 წელის აპრილში აშშ-ის მაშინდელმა პრეზიდენტმა, ჯო ბაიდენმა კანონს ხელი მოაწერა, ხოლო იანვარში, დონალდ ტრამპის ინაუგურაციამდე რამდენიმე დღის ადრე, დოკუმენტს მხარი სენატმაც დაუჭირა.
თეთრ სახლში დაბრუნების შემდეგ დონალდ ტრამპმა გამოსცა განკარგულება, რომლის ფარგლებში გენერალურ პროკურორს დაავალა ჯო ბაიდენის მიერ ხელმოწერილი კანონის ამოქმედების 75 დღით გადავადება. დონალდ ტრამპმა განაცხადა, რომ TikTok-ი შეძლებს აშშ-ში ფუნქციონირების გაგრძელებას, იმ პირობით, რომ კომპანიის ამერიკული დანაყოფის აქციების 50%-ი ამერიკულ კომპანიას გადაეცემა.
