გადაცემა “ბიზნესპარტნიორის” ღამის ეთერში პარლამენტის წევრმა ვაკო თურნავამ ღია ბანკინგზე და Visa/Mastercard-თან დაკავშირებით დაწყებულ აჟიოტაჟზე ისაუბრა და აღნიშნა, რომ ღია ბანკინგის დანერგვა არა მხოლოდ ტექნოლოგიური პროგრესის ნაწილია, არამედ ევროინტეგრაციის განუყოფელი პირობა, ამიტომ ამაში განსაკუთრებულს ვერაფერს ხედავს. რაც შეეხება VISA და Mastercard-ს, მისი განმარტებით, აქამდე თუ მხოლოდ "ქეშად" ან ბარათით გადახდა იყო შესაძლებელი, ხვალ როდესაც  ღია ბანკინგის  ფუნქციონალს გააქტიურებს მომხმარებელი, ბარათის გარეშე, ანგარიშით შეეძლება ისარგებლოს.

“ე.წ წვდომების გახსნა გამოიწვევს იმას, რომ მაგალითად, ბანკებს მიეცემათ თანაბარი საშუალება, რომ თავიანთ მომხმარებლებს შესთავაზონ იაფი ალტერნატივა. დღეს საქართველოში ბარათებით გადახდის მაჩვენებელი დაახლოებით 90-100 მლრდ ლარია წელიწადში, ეს არის მთლიანი ბრუნვა, რაც ნიშნავს, რომ ამას უფასოდ არავინ გააკეთებს. მიღებული გასამრჯელო საშუალოდ 1.8-2%-მდეა. ეს ნიშნავს, რომ ქვეყანას საბარათე სისტემა დაახლოებით 2 მლრდ ლარი უჯდება, საიდანაც 300-400 მილიონი ქვეყნიდან გადის პირდაპირ Visa/Mastercard-ში. ამაში ცუდი არაფერია, კარგი სერვისის სანაცვლოდ გასამრჯელოს იღებენ, ”-ამბობს ვაკო თურნავა.

მისივე ინფორმაციით,  ეს ინიციატივა არაფერ შუაშია სანქციებთან და Visa/Mastercard-ის საქართველოდან გასვლასთან.

“ეს საერთოდ არც განიხილება არანაირ კონტექსტში და ცალსახად შემიძლია ვთქვა, რომ ეს არის ალტერნატივა, რომელიც ფინანსურ ორგანიზაციებს მისცემს თანაბარ კონკურენტუნარიან გარემოს, ხოლო მოსახლეობას დაუზოგავს ხარჯს. ამისთვის ბაზარი მზადაა, 4 კომპანიაა რომელიც იყენებს აღნიშნულ სისტემას. ყველა კომპანიას შეუძლია შეუერთდეს ამ პროცესს, თუ აქვს შესაბამისი IT მხარდაჭერა.

უკვე 2 წელია ღია ბანკინგი მუშაობს, უბრალოდ ჩემი განცხადების შემდეგ გახდა აქტუალური. ნებისმიერ ადამიანს შეუძლია ახლავე გახსნას რომელიმე ბანკის აპლიკაცია და ისარგებლოს ამ სერვისით.” - ამბობს თურნავა.

მისივე თქმით, თუ ჩვენ გვსურს ევროკავშირში შესვლა, პატივი უნდა ვცეთ, იმ წესებსა და მოთხოვნებს, რაც დაგვიწესეს.

შეგახსენებთ, რამდენიმე დღის წინ, სხვადასხვა მედიასაშუალებებში გავრცელდა ინფორმაცია   იმის შესახებ, რომ თითქოს საქართველოში საგადახდო სისტემების - VISA და MASTERCARD-ის საქმიანობის შეზღუდვა იგეგმება. აღნიშნულთან დაკავშირებით საქართველოს ეროვნულმა ბანკმა განცხადებაც გაავრცელა და განაცხადა, რომ ეს არის დეზინფორმაცია და რეალური ფაქტების მცდარი ინტერპრეტაციის მცდელობა, რომელიც არ შეესაბამება სინამდვილეს.

რაც შეეხება ღია ბანკინგს, ის   ელექტრონული ტექნოლოგიების გამოყენებით სხვადასხვა საფინანსო ორგანიზაციას შორის, მომხმარებლის ინიციატივით, ფინანსურ ინსტიტუტებში არსებული ინფორმაციის დაუყოვნებლივ გაცვლას გულისხმობს.   როგორც სებ-ის ვებ-გვერდზეა აღნიშნული, ღია ბანკინგის ტექნოლოგია უკვე გამოიყენება ისეთ ქვეყნებში როგორიცაა გაერთიანებული სამეფო, ავსტრალია და ევროკავშირის წევრი ქვეყნები. ამასთან, აღსანიშნავია, რომ ევროკავშირის წევრი ქვეყნებისთვის საგადახდო სერვისების განახლებული PSD2 რეგულაციის ფარგლებში მსგავსი არხებით მომხმარებლის მონაცემების გაზიარება სავალდებულოა.