1713240180

"ფაქტები და რისკი, როდესაც ავტომფლობელები ცდილობენ მხოლოდ ტექინსპექტირებისთვის გამართონ ავტომობილები, ნამდვილად არსებობს", - ამის შესახებ ტექინსპექტირების ცენტრების კავშირის თავმჯდომარე „ბიზმესპარტნიორთან“ აცხადებს.გიორგი შიოლაშვილის თქმით, მიუხედავად ამისა, საზოგადოების ცნობიერება დროთა განმავლობაში შეიცვალა და ამაღლდა, რასაც დახარვეზების, ანუ დარღვევების შემცირებული მაჩვენებლებიც მოწმობს.თუმცა, სექტორი გამოწვევებს კვლავ ხედავს, გამოსავალს კი ტექნოპარკის განახლებაში, კონტროლის ახალი მექანიზმების დანერგვაში და ტექინსპექტირების ცენტრების გამართულ მუშაობაში ხედავს."2025 წლიდან, ტექინსპექტირების ცენტრების ახალი მექანიზმი შემოდის, რომელსაც  სახმელეთო ტრანსპორტის სააგენტო განახორციელებს. შესაბამისად, ტექინსპექტირების ცენტრებზე მოხდება ვიდეო მონიტორინგი და გარკვეული ჯგუფები გადაამოწმებენ, თუ რამდენად ობიექტურად ჩატარდა ტექინსპექტირების პროცესი. შესაძლებელია, როდესაც ტექინსპექტირება დასრულდება, ერთი და იგივე ავტომობილი, გადაამოწმოს ამ ჯგუფმა ხელახლა და შეადაროს ტექინსპექტირების ცენტრების მიერ გაცემულ ანგარიშს. თუ ვთქვათ გარკვეული აცდენა იქნება და გარკვეული პარამეტრები არ იქნება დაფიქსირებული ტექინსპექირების ცენტრის მხრიდან, ამ შემთხვევაში გარკვეული საჯარიმო სანქციები იქნება შემოღებული,“ -  აცხადებს გიორგი შიოლაშვილი.შეგახსენებთ, ავტოსატრანსპორტო საშუალებების სავალდებულო ტექნიკური ინსპექტირება 2018 წლის 1 იანვრიდან დაიწყო.

1713175005

ავტომობილების გამონაბოლქვის დადგენილ ნორმასთან შეუსაბამობისთვის 6 თვეში 4 099 პირი დაჯარიმდა, აქედან ყველაზე მეტი დარღვევა დედაქალაქში ფიქსირდება. სამართალდამრღვევებიდან 3 528 - ფიზიკური პირია, ხოლო 571 - იურიდიული პირი. აღსანიშნავია, რომ უმეტესად მსუბუქი ავტომობილებისა და მიკროავტობუსების მძღოლები ჯარიმდებიან.გარემოსდაცვითი ზედამხედველობის დეპარტამენტის მიერ მოწოდებული 6 თვის მონაცემები ასეთია:სულ - 4 099 ჯარიმა თბილისი - 1 895 ქუთაისში - 866 ბათუმში - 744 რუსთავში -  594 3 528 - ფიზიკური პირი 571 - იურიდიული პირი   2 437 - მსუბუქი ავტომობილი 1 449 - მიკროავტობუსი 212 - სატვირთო ავტომობილი 1 - ავტობუსი შეგახსენებთ, რომ საქართველოს გარემოსდაცვითი პოლიტიკის პრიორიტეტული მიმართულება ატმოსფერული ჰაერის გაუმჯობესებაა, სწორედ ამიტომ 2023 წლის 4 სექტემბრიდან, საქართველოს 4 დიდ ქალაქში - თბილისში, რუსთავში, ქუთაისსა და ბათუმში, მოძრავი ავტოსატრანსპორტო საშუალებების გამონაბოლქვის კონტროლი მიმდინარეობს, რომელსაც გარემოსდაცვითი ზედამხედველობის დეპარტამენტი ახორციელებს.ცნობისთვის, ატმოსფერული ჰაერის გაუმჯობესება ევროკავშირთან ასოცირების ხელშეკრულებით ნაკისრი ვალდებულებაცაა.

1713006000

პლატფორმა, რომელიც შინაური ცხოველების მოვლისთვის ყველა საჭირო სერვისს ერთ სივრცეში აერთიანებს.როგორც სტარატპი TATI-ს თანადამფუძნებელი სერგი აბაშიძე "ბიზნესპარტნიორთან" აცხადებს, ხშირად პატრონებმა არ იციან რა სჭირდებათ მათ ოთხფეხა მეგობრებს, გარშემო რა სერვისები არსებობს და სიტყვიერი რეკომენდაციებითა თუ რჩევებით იღებენ გადაწყვეტილებას, რაც გარკვეულ რისკებთანაც შეიძლება იყოს დაკავშირებული. სწორედ ამიტომ, შექმნეს აპლიკაცია, რომელიც ოთხფეხა მეგობრების მოვლას ამარტივებს და ისეთ სერვისებს, როგორიცაა:  გრუმინგი, ვეტერინართან ვიზიტი, გასეირნება, სასტუმრო და სხვა, ერთ სივრცეში უყრის თავს.აპლიკაციის შექმნისას გუნდის თითოეული წევრის ინსპირაციის წყარო სწორედ საკუთარი შინაური ცხოველი იყო."TATI-ს ინსპირაცია არის ჩემი ოთხფეხა მეგობარი ლეო, რადგან როცა ავიყვანეთ არ ვიცოდით გარშემო რა სერვისები არსებობდა და თათი ზუსტად ამ მიზანს ისახავს, რომ მომხმარებელს აჩვენოს თუ მოვლის რა სერვისები არსებობს. იმედი გვაქვს თათის ჩაწერით მომხმარებლებს თავიანთი ოთხფეხა მეგობრების მოვლას გავუადვილებთ,"- ამბობს სერგი აბაშიძე.აპლიკაციაზე მუშაობა გუნდმა 6 თვის წინ დაიწყო, თუმცა 2 თვეა ჩაეშვა და უკვე 1000 რეგისტრირებული მომხმარებელი ჰყავს, რომელთა რიცხვიც ყოველდღიურად იზრდება. პლატფორმის ინოვაციურობა არამხოლოდ ცხოველის მოვლის სერვისების შეთავაზებაშია, არამედ მის დამატებით ფუნქციონალებშიც, მაგალითად მომხმარებელს აქვს დღიური, სადაც შესაძლებელია მნიშვნელოვანი თარიღების, მაგალითად, ვაქცინაციის, ვეტ -კლინიკაში ვიზიტის დაგეგმვა და ამის შესახებ დროული შეტყობინებების მიღება.სტრატაპის თანადამფუძნებლის ბესიკ ექსეულიძის თქმით, აპლიკაცია ნებისმიერი ადამიანისთვის უფასოა, ასევე ერთ მომხმარებელს სისტემაში რამდენიმე ცხოველის დამატება შეუძლია."ჩვენი მთავარი მიზანია ჩავრთოთ თითოეული მიმართულება, ახლა თუ გრუუმინგი გვაქვს ეტაპობრივად ვამატებთ შემდეგ სერვისებს: ზოომაღაზია, გასეირნება, ვერ კლინიკას და ა.შ. და მომხმარებელს შესაძლებლობა ექნება ყველა სერვისით ისარგებლოს, შემდგომ ჩვენი მთავარი მიზანია გავცდეთ საქართველოს ფარგლებს, გავიდეთ სხვა ბაზარზე და მოვახდინოთ პოზიციონირება, როგორც ევროპის, ასევე ჩვენი მეზობელი ქვეყნების ბაზარზე,"-აღნიშნავს ბესიკ ექსეულიძე.აღსანიშნავია, რომ პლატფორმას აქვს ორი მხარე, მომხმარებლების პანელი და პარტნიორი კომპანიების, რომლებსაც საშუალება აქვთ დააკვირდნენ ჯავშნებს, თანამშრომლების ქცევას და მათ შორის აკონტროლონ ფინანსებიც."ჩვენ ბიზნესპარტნიორებს პანელი სთავაზობს მათი სერვისების  ეფექტურ მართვას. აპლიკაციაში რამდენიმე მოდულია, ერთ-ერთია მაგალითად ჯავშნების მოდული, ასევე ფინანსების განკარგვის ნაწილშიც ეხმარება, ხარჯების დათვლაში. გვაქვს თანამშრომლების მოდულიც, სადაც კომპანიებს შეუძლიათ მართონ სამუშაო საათები, დეი ოფები და სხვა."-აცხადებს სტარტაპის CTO დავით სარჯველაძე.TATI-ს გეგმები დიდია, გუნდი საქართველოს ბაზრის ათვისების შემდეგ სხვა ქვეყნებში გასვლასაც გეგმავს, თუმცა უახლოესი გეგმა საგრანტო კონკურსში გამარჯვებაა, რაც დასახული მიზნების ეფექტურად და სწრაფად განვითარებაში დაეხმარებათ.

1711469880

ჩეხეთის ეროვნული ბანკის (CNB)  საბჭომ დღევანდელ სხდომაზე ორკვირიანი რეპოს განაკვეთი 0,5 პროცენტული პუნქტით, 5,75%-მდე შეამცირა.  ამავდროულად, მან იგივე ოდენობით შეამცირა დისკონტის განაკვეთი 4,75%-მდე, ხოლო ლომბარდის განაკვეთი 6,75%-მდე. გადაწყვეტილება ემყარება ზამთრის (თებერვლის) მაკროეკონომიკურ პროგნოზს.გადაწყვეტილებას მხარი ცენტრალური ბანკის ხუთმა წევრმა დაუჭირა, ხოლო ორმა წევრმა მხარი დაუჭირა განაკვეთის 0,75 პროცენტული პუნქტით შემცირებას."ჩეხეთის რესპუბლიკაში ინფლაცია 2%-იან ნიშნულზე დაეცა, ამით ჩვენს ქვეყანაში განახლდა ფასების სტაბილურობა. თუმცა, ბანკის საბჭო ზომიერ ინფლაციურ რისკებს პერსპექტივაში კვლავ ხედავს. საბჭო საჭიროდ მიიჩნევს გააგრძელოს მკაცრი მონეტარული პოლიტიკა და სიფრთხილით მიუდგეს საკითხს. ამასთან, განახლებული ინდიკატორები უფრო მაღალია, მიმდინარე პროგნოზის საბაზისო სცენართან შედარებით.შეხვედრის შემდეგ, ბანკის საბჭო თავის გადაწყვეტილებებს ახალი მონაცემებისა და ინფლაციის პერსპექტივაზე დაყრდნობით მიიღებს. განაკვეთების შემდგომი შემცირების ტემპი ძირითადად დამოკიდებული იქნება დაბალი ინფლაციური გარემოს შენარჩუნების შეფასებაზე, გაცვლითი კურსის განვითარებაზე, ფისკალური პოლიტიკის ეფექტზე ეკონომიკაზე, შრომის ბაზრის მდგომარეობის ანალიზზე და შიდა ან გარე ფაქტორებზე. ასევე საბჭო შეაფასებს საპროცენტო განაკვეთის შემცირების გავლენას საკრედიტო საქმიანობაზე და შემდგომში რეალურ ეკონომიკურ აქტივობაზე,"-ნათქვამია CNB-ის განცხადებაში. ამავდროულად, ბანკი აცხადებს, რომ საპროცენტო განაკვეთის შემცირების პროცესი ნებისმიერ დროს შეიძლება შეჩერდეს ან შეწყდეს ჯერ კიდევ შემზღუდველ დონეზე, თუ ინფლაცია, განსაკუთრებით კი მისი ძირითადი კომპონენტი, არ განვითარდება პროგნოზის შესაბამისად. მიუხედავად იმისა, რომ CNB-მ განაკვეთების თანდათანობით შემცირება 2023 წლის დეკემბერში დაიწყო, ინფლაციის წინააღმდეგ ბრძოლა არ დასრულებულა. საპროცენტო განაკვეთები რეალურად რჩება მნიშვნელოვნად პოზიტიური და აფერხებს ინფლაციას. "ბანკის საბჭო ადასტურებს გადაწყვეტილებას - გააგრძელოს მკაცრი მონეტარული პოლიტიკა, რათა დასტაბილურდეს ინფლაცია გრძელვადიან პერსპექტივაში 2%-იან ნიშნულთან ახლოს,"-აღნიშნულია ბანკის მიერ გავრცელებულ ინფორმაციაში. 

1711439580

ქართული სტარტაპი Halo უკვე რამდენიმე წელია მომხმარებლებს ინტერიერისთვის განსხვავებულ და ორიგინალურ აქსესუარებს სთავაზობს, რომელიც ხის მეტალის და ეპოქსიდის სინთეზით იქმნება.როგორც სტარტაპის თანადამფუძნებელი ანა ერემეიშვილი "ბიზნესპარტნიორთან" აცხადებს, ასორტიმენტი გაამრავალფეროვნეს, რამაც პროდუქციის რეალიზაციისთვის ახალი სივრცის გახსნის აუცილობლობაც შექმნა და მომხმარებელს HALO-ს პროდუქციის შეძენა უკვე “თბილისი მოლშიც” შეეძლებათ."ეს იქნება შესაძლებლობა ჩვენი მომხმარებლისთვის, რომ ადგილზე დაათვალიერონ, მიიღონ კონსულტაცია, სრული ინფორმაცია, შეიძინონ ან გააფორმონ ინდივიდუალური შეკვეთა. ჩვენი სახელოსნო ვარკეთილში მდებარეობს, თუმცა უკვე დიღომშიც შეგვიძლია გავუწიოთ კონსულტაცია ჩვენს მომხმარებლებს.ჩვენი მიზანია გავზარდოთ წარმოება და მეტ ფიზიკურ სივრცეში გავაცნოთ მომხმარებლებს ჩვენი პროდუქცია. ამ ეტაპზე აქტიურად ვმუშაობთ პროდუქციის ახალი ხაზების დამატებაზე და ექსპორტზე, რამდენიმე ქვეყანა შევარჩიეთ და მიმდინარეობს მოლაპარაკებები, ერთ-ერთი მიმართულებით პირველი პარტია რამდენიმე დღის წინ გაიგზავნა და სულ მალე დაიწყება რეალიზაციაც.“- აღნიშნავს, ანა ერემეიშვილი.შეგახსენებთ, რომ საქმე, რომელიც პოსტმანდემიურ პერიოდში მეგობრებმა ერთი პროდუქტით წამოიწყეს, დღეს უკვე 15-მდე სახეობის დეკორაციას აერთიანებს. კომპანია მომხმარებელს განსხვავებული ტექნოლოგიით და მასალით დამზადებულ ხელნაკეთ დეკორატიულ აქსესუარებს სთავაზობს, რომელიც მისაღები ოთახის სარკეებს, ასევე სააბაზანოსა და სამზარეულოს ინტერიერისთვის განკუთვნილ ნამუშევრებს მოიცავს, რაც თავის მხრივ 15 სახეობის პროდუქციას აერთიანებს.

1710760111

ნადირობის სეზონი დასრულდა, თუმცა გასული წლების მსგავსად სექტორში გამოწვევები მრავლადაა, სამონადირეო მერნეობების ფინანსური პრობლემების გარდა, დარღვევების არაერთი შემთხვევა ფიქსირდება, რაც ძირითადად აკრძალული იარაღით ან და აკრძალულ სახეობებზე ნადირობას, მომზიდავი ელექტონული მოწყობილობების გამოყენებას და სალიცენზიო პირობების დარღვევას უკავშირდება.საქართველოში სულ 13 სამონადირეო მეურნეობა არსებობს, ხოლო გასულ სეზონზე, უკანონო ნადირობის 700-მდე შემთხვევა დაფიქსირდა, აქედან 4 სისხლის სამართლის დანაშაულად კვალიფიცირდა, დანარჩენი კი ადმინისტრაციულ სამართალდარღვევად. ამასთან, აღსანიშნავია, რომ აკრძალული იარაღით ნადირობის 344 ფაქტია გამოვლენილი.გარემოსდაცვითი ზედამხედველობის დეპარტამენტის მიერ მოწოდებული სტატისტიკა, რომელიც 2023 წლის 19 აგვისტოდან 2024 წლის 1 მარტის ჩათვლით პერიოდს მოიცავს, ასე გამოიყურება: სულ, სამართალდარღვევების რაოდენობა -  691 უკანონო ნადირობა (სისხლის სამართალი)  - 4 ნადირობა აკრძალული იარაღით, მეთოდით ან საშუალებით - 344 ნადირობა გადამფრენ ფრინველებზე მოსაკრებლის გარეშე - 214 ნადირობა გადამფრენ ფრინველებზე ქალაქის ან მუნიციპალიტეტის ტერიტორიაზე - 10 იმ სახეობაზე ნადირობა, რომელზეც აკრძალულია - 27 ნადირობა აკრძალული იარაღით, მეთოდით ან საშუალებით - 92 ჩამორთმეული ე.წ. მანოკების რაოდენობა - 372 ჩამორთმეული სანადირო თოფების რაოდენობა - 141 გარემოსდაცვითი ზედამხედველობის დეპარტამენტის ბიომრავალფეროვნების კონტროლის სამსახურის უფროსი, მაია ჩხობაძე “ბიზნესპარტნიორთან”  აცხადებს, რომ დეპარტამენტი საქართველოს მთელ ტერიტორიაზე ახდენს კონტროლს და სამწუხაროდ სამართალდარღვევის ფაქტები საკმაოდ ხშირია.“დეპარტამენტმა გააძლიერა მუშაობა, არა მხოლოდ ადამიანური რესურსით, არამედ მონიტორინგის პროცესში სმარტ ტექნოლოგიების გამოყენებით. თუ გადავხედავთ, ძირითადად სამონადირეო მეურნეობები კახეთში, ქვემო ქართლში, მცხეთა-მთიანეთში, ქარელსა და რაჭაშია. ამ ტერიტორიებზე თუ კარგად განვითარდება სამონადირეო ტურიზმი და სამონადირეო მეურნეობაშიც სწორად წარიმართება პროცესები, აქ განვითარებული ეკოტურიზმი საკმაოდ კარგი შემოსავლის მომტანი შეიძლება იყოს ქვეყნისთვის.”-აცხადებს მაია ჩხობაძე.ცნობისთვის, სამონადირეო მეურნებაში დაშვებულია მხოლოდ ცხოველებზე ნადირობა, მის გარეთ კი გადამფრენ ფრინველზე, მონადირეს სეზონის მანძილზე მხოლოდ 10 ლარიანი ქვითრის შეძენა უწევს.სამონადირეო მეურნეობების შექმნის მიზანი გარეულ ცხოველთა სახეობების დაცვა, გამრავლება, მათი საბინადრო პირობების უზრუნველყოფა და ორგანიზებული ნადირობის დაგეგმვაა.

1708683180

წარმოებული პროდუქტი რომ ორგანულად ჩაითვალოს სერტიფიცირებაა აუცილებელი. ბიოლოგიურ მეურნეობათა ასოციაცია "ელკანაში", რომელიც 2000 წევრს აერთიანებს, მიიჩნევენ, რომ ეს არც თუ ისე მარტივი პროცესია, რომელიც ხარჯებთან ერთად დიდ დროსაც მოითხოვს. შედეგად, ხშირია შემთხვეევბი, როდესაც სერტიფიცირებაზე მოთხოვნა ძირითადად ისეთი მეწარმეებისგანაა, რომლებსაც ბიოპროდუქტის გატანა ექსპორტზე უნდათ. ასოციაციაში ასევე ამბობენ, რომ ძირითადად, ღვინის, თაფლისა და თხილის ბიომეურნეობები ჭარბობს""ელკანას" დირექტორი მარიამ ჯორჯაძე აღნიშნავს, რომ ეს არის სექტორი, რომელიც კანონით რეგულირდება, შესაბამისად აუცილებელია კონკრეტული სტანდარტების დაცვის გარდა იყოს გარე შემმოწმებელი, რომელიც არაბიომეურნეობიდან ბიომეურნეობაზე გადასვლის პროცესს ამოწმებს."ყველას არ უნდა ჰქონდეს ბიოსერტიფიკატი, ვერ იხდიან ამის ფულს ან შესაბამის ბაზარზე გასვლა უჭირთ. მეურნესთვის მაინც ისეთი ხარჯია, რომელიც თუ კონკრეტულ ბაზარზე გასვლის საჭიროება არ აქვს, ამ ხარჯის გაწევა არ უღირს."-აცხადებს მარიამ ჯორჯაძე „ბიზნესპარტნიორთან“.საქართველოში არსებობს ბიოწარმოების ხელშეწყობის პროგრამა, რომელიც არაბიომეურნეობიდან ბიომეურნეობაზე გადასვლისას გაწეული ხარჯის ანაზღაურებას გულისხმობს და ხელს უწყობს მეწარმეებს სერტიფიცირებაში. ელკანაში აცხადებენ, რომ მიმართვიანობა არის, ათეულზე მეტმა მწარმოებელმა უკვე ისარგებლა პროგრამით, თუმცა ფინანსდება მხოლოდ სერტიფიკატის მიღება, რაც არაა საკმარისი."მთავარი სამუშაო სერტიფიკატის შემდეგ იწყება, ბაზარზე დამკვიდრებისთვის ბიომეწარმეს მინიმუმ 5 წლიანი დახმარება კიდევ სჭირდება. მსოფლიო ითხოვს ბიოპრ,დუქტს, ტურისტს ზუსტად ადგილობრივი პროდუქტი უნდა. შესაძლებელია ფერმერთა გაერთიანებების შექმნაც"- აცხადებს  "ელკანას" დირექტორი მარიამ ჯორჯაძე.მისივე თქმით, სექტორში განვითარება არის, იზრდება მომხმარებელთა რაოდენობაც, თუმცა არსებულ პოტენციალს ბოლომდე მაინც ვერ ვიყენებთ.ცნობისთვის, სექტორის წარმომადგენლების თქმით, ბიოწარმოებამ მსოფლიოს სასოფლო-სამეურნეო სავარგულების 2%-ს მიაღწია, რაც შეეხება საქართველოს 2016 წელს ეს მაჩვენებელი თუ 0.1 მეათედ პროცენტს შეადგენდა, 2022 წელს 1.3 მეათედ პროცენტს მიაღწია.

1708174800

საქართველოში პარაპლანითა და მსგავსი საშუალებებით ფრენა აღდგა.16 იანვრიდან პარაპლანით ფრენა პილოტების კვალიფიკაციის დადასტურების, საფრენი ადგილების გადამოწმებისა და საფრენი აქტივობების ტიპების განსაზღვრის შედეგადაა დასაშვები.როგორც პარაგლაიდინგის ფედერაციაში აცხადებენ, ამ ეტაპზე ფრენები ნებადართულია 3 ლოკაციაზე, ესაა ბაკურიანი, ანანური და გუდაური.„რაც შეეხება პილოტებს, მათი საერთო რაოდენობა 250-ზე მეტია, ხოლო კვალიფიკაცია დაუდასტურდა 90-მდე პილოტს, რომელთა ძირითადი საქმიანობაც კომერციულია, აქედან 15 თავისუფალი მფრინავია, რომლებიც სხვადასხვა ლოკაციაზე დაფრინავდნენ, თუმცა ყველგან ფრენას უკვე ვეღარ შეძლებენ, მხოლოდ ნებადართულ საფრენ ლოკაციებზე. პარალელურად ვმუშაობთ იმაზე, რომ მაქსიმალურად დავუახლოვოთ ფრენების რეგულაციის წესები საერთაშორისო სტანდარტებს, რაც ნიშნავს, რომ პარაპლანისტებს საკუთარი ფრენებისთვის გამოყოფილი ექნებათ G კლასის საჰაერო სივრცე, გარდა საჰაერო სივრცის იმ ნაწილებისა, სადაც დამატებითი შეზღუდვები მოქმედებს.“-აღნიშნავს ირაკლი კაპანაძე, პარაგლაიდინგის ფედერაციის გამგეობის თავმჯდომარე.შეგახსენებთ, რომ საქართველოს მთავრობის 8 მაისის დადგენილებით დამტკიცდა წესები, რომლებიც ადგენს: საფრენი ადგილების ვარგისიანობის დადგენის მოთხოვნას; ოპერატორის სერტიფიცირების საკითხს; მოთხოვნებს მფრინავის მიმართ; მფრინავთა კატეგორიებს/ქვეკატეგორიებს; მათი მინიჭების/აღიარების და გამოცდის ჩატარების წესს პარაპლანისა და მისი ელემენტების ვარგისიანობის დადგენის მოთხოვნას და შესაბამის პროცედურას; ფედერაციის კომპეტენციასა და უფლება-მოვალეობებს; ზედამხედველობას ფედერაციის საქმიანობაზე წესით გათვალისწინებული შესაბამისი საქმიანობის განსახორციელებლად დაწესებული საფასურების ოდენობას და სხვა. ფრენების პროცესს კი პარაგლაიდინგის ფედერაცია გააკონტროლებს, ხოლო ფედერაციის ზედამხედველობაზე პასუხისმგებლობა ეკონომიკის სამინისტროს დაქვემდებარებულ სამოქალაქო ავიაციის სააგენტოს დაეკისრება.

1708149600

კულტურული მემკვიდრეობის დამცავ ზონებში უნებართვო ან სანებართვო პირობების დარღვევით წარმოებულ მშენებლობებზე სანქციები მკაცრდება. საკანონმდებლო ცვლილება ძალაში 11 იანვარს შევიდა.გამკაცრებული სანქციების მიზანი კულტურული მემკვიდრეობის დამცავ ზონებში უკანონო მშენებლობების აღკვეთა და ერთგვარი პრევენციული მექანიზმის შემოღებაა. უფრო კონკრეტულად, კულტურული მემკვიდრეობის დამცავ ზონაში უნებართვო მშენებლობა, სახელმწიფოს ან მუნიციპალიტეტის საკუთრებაში არსებული უძრავი ქონების შემთხვევაში გამოიწვევს დაჯარიმებას 250 000 ლარით, 25 ათასის ნაცვლად. ხოლო, ჯარიმის ოდენობა კერძო საკუთრებაში არსებული III ან IV კლასის შენობა-ნაგებობის უძრავ ქონებაზე უნებართვო მშენებლობისთვის 20 000-ის ნაცვლად 200 000 ლარი იქნება.როგორც თბილისის მუნიციპალური ინსპექციის უფროსი გოგი ჩიქოვანი  „ბიზნესპარტნიორთან“ აცხადებს, აქამდე არსებული ფინანსური სანქციები ვერ უზრუნველყოფდა  და არ იყო საკმარისი შემაკავებელი ფაქტორი კულტურული მემკვიდრეობის დაცვისთვის.„ჩვენ, მუნიციპალური ინსპექცია ინტენსიურად ვახორციელებთ მონიტორინგს და სამშენებლო სამართალდარღვევის გამოვლენის შემდეგ ხდება კონკრეტული საკითხების შესწავლა შესაბამისი მითითებების და ფინანსური სანქციების განხორციელებაც. დარღვევები შეიძლება იყოს მცირე ხასიათის, ასევე მნიშვნელოვანი სახის, ეს უკავშირდება როგორც ფიზიკური პირების მიერ განხორციელებულ დარღვევებს, ასევე რიგ შემთხვევებში იურიდიული პირების მხრიდან. მოგეხსენებათ, ძეგლზე ნებისმიერი ტიპის სამუშაო, როგორც შიდა ინტერიერის, ასევე ექსტერიერის ნაწილში ექვემდებარება სანებართვო პირობების აღებას, ამიტომ ხშირად იყო შემთხვევები, როდესაც ხდებოდა ისეთი ტიპის სამშენებლო დარღვევები, რაც გამოწვეული იყო არაინფორმირებულობის ან ყოფითი საკითხებიდან.“-ამბობს გოგი ჩიქოვანი.მისივე თქმით, გამოწვევად რჩება მონიტორინგი, განსაკუთრებით მაშინ როდესაც საქმე შიდა სამუშაოებს ეხება.„რთულია ამ დროს მონიტორინგი, როცა საქმე შიდა სამუშაოებს ეხება. ეს არის გამოწვევაც, ვინაიდან, როგორც მოგეხსენებათ, შიდა ტიპის სამუშაოები ჩვეულებრივ შემთხვევაში ნებართვას არ ექვემდებარება, მხოლოდ ძეგლის შემთხვევაში. მაქსიმალურად ვცდილობთ კომუნიკაციას მოქალაქეებთან, ასევე არქიტექტურის სამსახური მუშაობს აქტიურად, რომ არსებული დარღვევები გამოსწორდეს. ჩვენი მხრიდანაც მითითებების გაცემის ერთ-ერთი მთავარი მიზანი არის დარღვევებისგან გამოწვეული ზიანის გამოსწორება და პირვანდელი სახის დაბრუნებას. თუმცა, მხოლოდ ძეგლებზე არა, ეს ეხება დამცავ ზონებშია არსებული შენობების იერსახეს. არსებობს კულტურული მემკვიდრეობის დაცვის საბჭო, რომლის პოზიციის საფუძველზეც ხდება ნებართვის გაცემა.“- აღნიშნავს თბილისის მუნიციპალური ინსპექციის უფროსი გოგი ჩიქოვანი.ცნობისთვის, ჯარიმები გამკაცრდა ასევე I და II კლასის შენობა-ნაგებობების უნებართვო მშენებლობისთვის. ასევე, მშენებარე ობიექტების კონსერვაციის წესის დარღვევისთვის. რაც შეეხება სარეაბილიტაციო სამუშაოებს, ძეგლზე მსგავსი ქმედების  განხორციელება უნებართვოდ 250 000 ლარით დაჯარიმდება, ხოლო, მცირე სარეაბილიტაციო სამუშაოების შემთხვევაში 40 000 ლარით.შეგახსენებთ, რომ აღნიშნული საკანონმდებლო ცვლილება, პარლამენტის მხარდაჭერით, 11 იანვარს შევიდა ძალაში და მისი მთავარი მიზანი უნებართვო მშენებლობების პრევენციაა. რაც შეეხება სტატისტიკას, 2021 წლიდან 2023 წლის ჩათვლით უნებართვო მშენებლობების 170-ზე მეტი შემთხვევა ფიქსირდება.