მთელ მსოფლიოში დღეს ადამიანურ კაპიტალზე არის უფრო მეტი მოთხოვნა, ვიდრე ფინანსურ კაპიტალზე, განსაკუთრებით IT სექტორში - ამის შესახებ ინფორმაციული ტექნოლოგიების ასოციაციის თავმჯდომარემ, თორნიკე თოხაძემ გადაცემა “ბიზნესპარტნიორის” ღამის ეთერში განაცხადა. მისი თქმით, ინვესტორებს აინტერესებთ ადამიანები, რომლებიც აზროვნებენ ინოვაციურად, რომელთაც აქვთ იდეები და რომლებიც ეჭიდებიან გამოწვევებს და ასეთი ადამიანების დეფიციტი გვაქვს საქართელოშიც.
თორნიკე თოხაძის განცხადებით, დიდი კონკურენციის პირობებში, ყველაზე დიდი ყურადღება, როგორც ბიზნესის, ასევე სახელმწიფოსა თუ სხვადასხვა ინვესტორის მხრიდან, სწორედ კვალიფიციური ადამიანური კაპიტალის წვდომის შექმნას უნდა დაეთმოს.
„თუ ბიზნესის გადმოსახედიდან შევხედავთ, აქ პრობლემა ბევრად უფრო კომპლექსურია, ვიდრე რაოდენობრივი საკმარისობა. როდესაც ჩვენ ვსაუბრობთ კვალიფიკაციაზე, ამოსავალ წერტილად ვიღებთ იმას, რომ კვალიფიკაცია არ ნიშნავს უნივერსიტეტის დიპლომს, სერთიფიკატებს ან განვლილი ტრენინგების რაოდენობას. კვალიფიკაცია ნიშნავს ბიზნესის მოთხოვნის დაკმაყოფილებას სრულყოფილად, რასაც ბიზნესი სამუშაოს აღწერის თვალსაზრისით წარუდგენს ბაზარს. ასე მუშაობს ევროპული ბაზარი თავიდან ბოლომდე - ეს კვალიფიკაციის ევროპული განმარტებაა. ბოლო წლებში, ბიზნესმა ბევრად მეტი ტრენინგ ცენტრი და აკადემია შექმნა,გადადგა ნაბიჯები გადამზადების თვალსაზრისით, ასევე იყო სახელმწიფო პროგრამები, გრძელდება უნარების სააგენტოს პროგრამები - არსებობს რაღაც ბაზა, რომელმაც აქამდე მოგვიყვანა, მაგრამ იქიდან გამომდინარე, რომ კონკურენცია არის ძალიან მაღალი და განსაკუთრებით ინვესტორების ყურადღება მიმართულია შუა აზის ბაზრისკენ და ამ კონკურენციაში ჩვენ ცოტა ჩრდილში აღმოვჩნდით - აქ მეტი არის საჭირო,“ - განაცხადა თორნიკე თოხაძემ
ინფორმაციული ტექნოლოგიების ასოციაციის თავმჯდომარის განცხადებით, ამ მიმართულებით საქართველოს ძალიან დიდი პოტენციალი აქვს - გახდეს სიდიდით ნომერ პირველი სექტორი საქართველოში და დაახლოებით 30-35 მლრდ-ის შემოსავალი მოუტანოს ქვეყნის ეკონომიკას. ამისთვის კი, მისივე თქმით, სამუშაო 3 ძირითადი მიმართულებით გვაქვს.
„საქართველოს პოტენციალი აქვს ძალიან დიდი და ამისთვის საჭიროა 3 ძირითადი მიმართულებით მუშაობა. პირველი - ეს არის ადამიანური კაპიტალი და ამ მიმართულებით ასოციაციამ გადადგა ნაბიჯები - შექმნა განათლების პლატფორმები, რომლებიც უკვე მუშაობს და მათი მთავარი განმასხვავებელი დღევანდელი საგანმანათლებლო სისტემებისგან არის ის, რომ თავიდან ბოლომდე ბიზნესის შექმნილია. მოცულობა ბევრად უფრო დიდია, რისი შეთავაზებაც ჩვენ შეგვიძლია ტექნოლოგიური კომპანიებისთვის, ინვესტორებისთვის, ამიტომ ფოკუსი უნდა იქნას გადატანილი ადამიანური კაპიტალის განვითარებაზე,“ - აღნიშნა თორნიკე თოხაძემ.
თორნიკე თოხაძის თქმით, საჭიროა, რომ პარარელურად, სკოლებში დაინერგოს სხვადასხვა ტიპის პროგრამები, საიდანაც ბიზნესი, ბაზარს წელიწადში დაახლოებით 5 - 6 ათასს მომზადებულ კადრს მიაწვდის.
