“სექტემბერში უკვე გაიხსნება GITA-ს ოფისი სან-ფრანცისკოში, სადაც ქართულ სტარტაპებს საშუალება ექნებათ უფრო მჭიდრო ურთიერთობა ჰქონდეთ ამერიკელ ინვესტორებთან და ფონდებთან, რომლებიც “სილიკონ ველიზე” მრავლად არიან.” - ამის შესახებ პარლამენტის წევრმა ვაკო თურნავამ გადაცემა “ბიზნესპარტნიორის” ღამის ეთერში განაცხადა.
მისი თქმით, აქამდე თუ სტარტაპერები თავიანთი ძალებით ცდილობდნენ დაფინანსების წყაროების პოვნას, ახლა უკვე იქაურ ინვესტორებსაც ეცოდინებათ ვის შეიძლება მიმართონ, ამასთან გაიცნონ უფრო მეტი სტარტაპი.
“სან-ფრანცისკო, არის ადგილი, სადაც იკრიბებიან არა მარტო სტარტაპერები, ასევე ინვესტორები, რომლებიც დიდ ენერგიას ხარჯავენ ისეთი სტარტაპების პოვნაში, სადაც ასობით მილიონის ინვესტიცია უნდა განახორციელონ. ამიტომ, ჰაბის გახსნის შემდეგ, ქართულ სტარტაპ სფეროში ბევრად გაუმჯობესებულ კლიმატს უნდა ველოდოთ. ეს ასევე ჩვენი ქვეყნის მიმართ ინტერესს გაზრდის. ჩემი აზრით, ეს ის მომენტია, როდესაც ჩვენი ბაზარი, სტარტაპები მზად არიან იყვნენ წარმოდგენილი “სილიკონ ველიზე.”- ამბობს ვაკო თურნავა.
შეგახსენებთ, რომ აშშ-ში, ქალაქ სან-ფრანცისკოში საქართველოს ფარგლებს გარეთ პირველი ტექნოლოგიური ჰაბი გაიხსნება, რომლის მეშვეობით ქართული სტარტაპ კომპანიები უფრო მარტივად შეძლებენ უცხოეთის ბაზრებზე გასვლასა და საერთაშორისო ინვესტორებთან წვდომას გლობალური ტექნოლოგიებისა და ინოვაციების ცენტრში, ე.წ. სილიკონ ველიზე.
ტექნოლოგიური ჰაბის მეშვეობით შესაძლებელი იქნება საქართველოს ინოვაციების ეკოსისტემით გლობალური ტექნოლოგიური კომპანიების, უცხოური ვენჩურული ფონდებისა და ენჯელ - ინვესტორთა ქსელების დაინტერესება და ქვეყანაში შესაბამისი ინვესტიციების მოზიდვა.
