"ძალიან მოხარულები ვართ, რომ საქართველოში British Airways-ი შემოვიდა. დიდი ხანია არ უფრენია საქართველოს მიმართულებით და მისი დაბრუნება ძალიან დიდი მიღწევაა. ეს ხელს შეუწყობს ტურისტული ნაკადების შემოყვანას საქართველოში, ასევე გაყვანას," - ამის შესახებ ტურიზმის ეროვნული ადმინისტრაციის ხელმძღვანელიმა, მაია ომიაძემ British Airways-ის მიერ ქართული ტურისტული კომპანიებისთვის გამართულ პრეზენტაციის ფარგლებში განაცხადა.
"იმედი გვაქვს გაყიდვები ამ მიმართულებით ძალიან მაღალი იქნება. მთელ მსოფლიოში ბრიტანეთის ავიახაზებს ლოიალური კლიენტების დიდი არმია ჰყავს, ეს კლიენტები როგორც წესი უფრო პრემიული კლიენტები არიან და დიდი იმედი მაქვს, რომ ეს ავიარეისები ხელს შეუწყობს მაღალმხარჯველი ტურისტების შემოყვანას საქართველოში“-განაცხადა ტურისტული კომპანია Via Travel-ის დირექტორმა ნინო ნამგალაძემ.
ცნობისთვის, 31 მარტიდან საქართველოს ავიაბაზარზე გაერთიანებული სამეფოს ფლაგმანმა ავიაკომპანია British Airways-მა დაიწყო ოპერირება - თბილისის საერთაშორისო აეროპორტში კომპანიის A320 ტიპის ხომალდმა 156 მგზავრით პირველი რეისი შეასრულა. შედეგად, 31 მარტიდან ლონდონი და თბილისი ერთმანეთს პირდაპირი საჰაერო მარშრუტით დაუკავშირდებიან.
