საქართველოში ელექტრომობილებზე მოთხოვნა ყოველდღიურად იზრდება - ქართულ ბაზარზე 1 სულ მოსახლეზე, ამ ტიპის მანქანებზე ინტერესი გაცილებით მაღალია, ვიდრე ევროპის სახელმწიფოებში, რასაც ძირითადად, ჩვენი ქვეყნის მასშტაბი განაპირობებს.

როგორც „ბიზნესპარტნიორს“ Espace-ის გენერალურმა დირექტორმა  დავით იოსავამ  განუცხადა, საქართველოს ქალაქები საკმაოდ პატარა ფართობისაა და მათ შორის გადაადგილება, რიგ შემთხვევაში, ელექტრომობილის ერთი დამუხტვითაც არის შესაძლებელი, რაც ამ ტიპის მანქანებზე მოთხოვნას ზრდის.

ის, რომ მომავალი ელექტრომობილებისაა, ადასტურებენ საქართველოს ავტოიმპორტიორთა ასოციაციაშიც. ასოციაციის ხელმძღვანელი ალექსი ნონიაძე ელის, რომ როგორც მთელ მსოფლიოში, ისე საქართველოში ელექტრომობილებზე მოთხოვნა კიდევ უფრო გაიზრდება.

„სწორედ ამიტომ, ვაპირებთ მთავრობას თხოვნით მივმართოთ, რაც სატვირთო ელექტრომანქანების განბაჟებაზე, მსუბუქი ელექტრომობილების მსგავსი შეღავათების დაწესებას გულისხმობს“, - განმარტა ნონიაძემ.

საქართველოში ელექტრმობილებზე გაზრდილ მოთხოვნაზე მიუთითებს ოფიციალური სტატისტიკური მონაცემებიც. მაგალითისთვის, 2025 წლის იანვარ-თებერვალში ქვეყანაში 16 მილიონი დოლარის ღირებულების, 927 ერთეული ელექტრო მანქანა შემოვიდა, რაც გასულ წლებთან შედარებით ყველაზე მაქსიმალური მაჩვენებელია. ამასთან, 2024 წლის ანალოგიურ პერიოდთან შედარებით, თითქმის 100%-იანი ზრდა ფიქსირდება. გასული წლის იანვარ-თებერვალში ქვეყანაში 9 მილიონზე მეტი დოლარის ღირებულების 465 ერთეული ელექტრო მანქანა იყო შემოსული. ელექტრომობილების მთავარი იმპორტიორების სამეულში კი, მიმდინარე წლის პირველი 2 თვის მონაცემებით, აშშ, ჩინეთი და ბელგია არიან.

რაც შეეხება გამოწვევებს, რომლებზეც დარგის ექსპერტები მიუთითებენ - ისინი უმეტესად ფასებს და ელექტრომობილებისთვის საჭირო დამტენების დეფიციტს უკავშირდება.

ავტოიმპორტიორთა ასოციაციის ხელმძღვანელი ალექსი ნონიაძე განმარტავს, რომ საქართველოს მოსახლეობის დიდი ნაწილი მაინც დაბალმსყიდველუნარიანია, ამიტომ აღნიშნული მანქანების ფასები მათთვის მაღალია. ოფიციალური სტატისტიკის მიხედვით, ქვეყანა ერთ ელექტრომობილს საშუალოდ 18 ათას დოლარად ყიდულობს.

„გამოწვევებია ინფრასტრუქტურის ნაწილშიც, ელექტრომობილების სწრაფი დამტენები უმეტესად თბილისშია თავმოყრილი, რეგიონებში კი მათი დეფიციტია, რის გამოც, ელექტრომობილებზე მოთხოვნა ჯერ კიდევ არ არის ისეთი მაღალი, როგორიც უნდა იყოს“, - ამბობს ნონიაძე.

თუმცა, დარგის ექსპერტები აქვე ამბობენ იმასაც, რომ ეს პრობლემა ნელ-ნელა გვარდება. მაგალითისთვის, უახლოეს პერიოდში, თბილისში ელექტრომობილების კიდევ 200-მდე დამტენი დამონტაჟდება. როგორც ცნობილია, თბილისის მერიის ქონების მართვის სააგენტოს მიერ ელექტრომობილების დამტენების განთავსებაზე გამოცხადებულ აუქციონში,  ორმა კომპანიამ გაიმარჯვა, რომლებიც ახალ დამტენებს 198 ადგილზე განათავსებენ. თითოეულ მისამართზე, არანაკლებ 30 კილოვატ საათზე გათვლილი დამტენები უნდა მოეწყოს.