1714018980

ამჟამად, ქართული ავტობაზარი ჩინურ მანქანებს ტესტავს, - ამის შესახებ „ბიზნესპარტნიორს“  ავტოიმპორტიორთა ასოციაციის თავმჯდომარემ, ალექსი ნონიაძემ განუცხადა.მისი თქმით, საქართველოში ჩინეთიდან მანქანების იმპორტის ზრდა შეინიშნება. ოფიციალური სტატისტიკური მაჩვენებლების თანახმად, 2024 წლის პირველ ორ თვეში ქვეყანაში 5 მილიონი დოლარის ღირებულების მანქანა შემოვიდა, რაც წინა წლის ანალოგიურ პერიოდს 80%-ით აღემატება. ამასთან, 658%-ით გაიზარდა იმპორტი 2022 წლის იანვარ-თებერვალთან შედარებით, როცა საქართველოდ ჩინეთიდან 687 ათასი დოლარის ღირებულების ავტომობილი შემოიყვანეს. რაც შეეხება ელექტრო ავტომობილების იმპორტს, აქაც აღმავალი ტრენდი ფიქსირდება.„თუმცა, საბოლოო ჯამში, ჩინური მანქანების წილი ქართულ ბაზარზე დღეს ძალიან მცირეა და მაღალი სტატისტიკური მაჩვენებლები უკავშირდება იმას, რომ წინა წლებში ჩინური მანქანების იმპორტი თითქმის არ ხდებოდა, ან ძალიან მცირე რაოდენობით ხდებოდა“, - აღნიშნა ალექსი ნონიაძემ.ავტოდილერების ნაწილი ფიქრობს, რომ ჩინეთიდან მსუბუქი ავტომობილების იმპორტის ზრდას ხელი, შესაძლოა, ახალმა რეგულაციამ შეუწყო, რომლის მიხედვითაც, 2024 წლის იანვრიდან, საქართველოში 10 წელზე მეტი წლოვანების ავტომობილების იმპორტი აიკრძალა. მათი თქმით, მას შემდეგ, რაც 2013 წლამდე გამოშვებული ავტომობილების შემოყვანა, განბაჟება აიკრძალა, ახალ ავტომობილებზე წამოვიდა მოთხოვნა. ჩინეთი კი ერთ-ერთია იმ ბაზრებიდან, საიდანაც ახალი და ამავე დროს, შედარებით ბიუჯეტური ავტომობილების ჩამოყვანაა შესაძლებელი.„ახლა ქართული ბაზარი ჩინურ მანქანებს ტესტავს, რამდენად გაამართლებს მათი შემოყვანა საქართველოში და შემდეგ გამოიკვეთება, კიდევ გაგრძელდება თუ არა ჩინეთიდან იმპორტი“, - განმარტა ავტოიმპორტიორთა ასოციაციის თავმჯდომარემ.რაც შეეხება საავტომობილო ბიზნესში არსებულ სხვა სიახლეებს და რეალიზაციას როგორც ადგილობრივ, ისე უცხოურ ბაზრებზე - ექსპორტის კუთხით, მიმდინარე წლის პირველ კვარტალში, ავტოდილერები მცირე ზრდაზე საუბრობენ და ამბობენ, რომ დღევანდელი მოცემულობით, საქართველოდან ყველაზე დიდი რაოდენობით მანქანები ყირგიზეთში, ყაზახეთსა და აზერბაიჯანში იყიდება. საექსპორტო ბაზრებზე ყველაზე მოთხოვნადი 20 ათასი დოლარის ღირებულების მანქანებია, მაშინ როცა წინა წლებში ეს მაჩვენებელი 10 ათასი დოლარის ფარგლებში იყო.ადგილობრივ ბაზარზე კი ისევ საავტომობილო პროფიციტია და კვლავ ფინანსური კრიზისის წინაშე არიან ამ ბიზნესით დაკავებული ადამიანები. საქართველოს ავტოიმპორტიორთა ასოციაციაში ამბობენ, რომ ავტოდილერების უმეტესობას უწევს ჩამოყვანილი მანქანები არათუ თვითღირებულებით, არამედ, თვითღირებულებაზე ნაკლებ ფასში გაყიდოს, რადგან, თვეებია ჩამოყვანილი ჰყავთ მანქანები და რეალიზაციას ვერ ახდენენ. აქედან გამომდინარე, ავტომობილების იმპორტის მაჩვენებლებში კვლავ კლება ფიქსირდება. მაგალითისთვის, 2024 წლის იანვარ-თებერვალში საქართველომ 258 მილიონი დოლარის ღირებულების ავტომობილები შეიძინა, რაც წინა წლის ანალოგიურ პერიოდთან შედარებით, თითქმის 36%-ით შემცირებული მაჩვენებელია.

1713932820

საქართველო აპირებს, საერთაშორისო ბაზრებზე უმაღლესი ხარისხის, ნიგვზის მწარმოებელი ქვეყნის სტატუსი დაიმკვიდროს. მწარმოებლები ამბობენ, რომ ამ მიზნისკენ კონკრეტული ნაბიჯების გადადგმა უკვე დაწყებულია .ქართული ნიგვზის პოტენციალის შესახებ  საუბრისას კაკლის გადამმუშავებელი საწარმო „ანიგოზის“ თანადამფუძნებელი ანა ქევხიშვილი აცხადებს, რომ  ნაჭუჭგაცლილი კაკლის, ანუ იგივე ნიგვზის ექსპორტს „ანიგოზი“ გალფის ქვეყნებში, სომხეთსა და აზერბაიჯანში უკვე ახორციელებს. მთავარი მიზანი კი, ევროპულ ბაზრებზე მოხვედრაა.„ვფიქრობ, გაჩნდება ის სწორი დრო და ჩვენი გეგმის მიხედვით, ეს იქნება 2024 წლის ახალი მოსავალი, როდესაც ჩვენ ეს თავისუფალი ნიშა უნდა დავაკმაყოფილოთ იმიტომ, რომ გვაქვს ბევრი უპირატესობა, როგორც ხარისხობრივი, ისე ლოგისტიკური თვალსაზრისით და შეგვიძლია ქართული ნიგოზი ექსპორტზე გავიტანოთ. რაც მთავარია, გვაქვს სურსათის უვნებლობის სტანდარტი, რომელიც არის აუცილებელი ევროკავშირის ბაზრისთვის“, - განმარტავს  „ბიზნესპარტნიორთან“ ანა ქევხიშვილმა.მისივე ინფორმაციით, ჯერჯერობით, ქვეყანაში ძალიან მცირე რაოდენობით არის გაშენებული კაკლის ბაღები. საერთაშორისო ბაზრებზე გაზრდილი მოთხოვნის გამო კი, საჭიროა ფერმერები ამ კულტურით უფრო მეტად დაინტერესდნენ.„დღეს, საქართველოში კაკლის ბაღები უმეტესად კახეთისა და ქართლის რეგიონებში გვხვდება, ჯამურად მათი ფართობი 4500 ჰექტარს შეადგენს. გაშენებული კაკლის 90-95% კი ამერიკული ჩენდლერის ჯიშია. მსოფლიოში ჩილე და არგენტინა მიიჩნევა ტოპ ხარისხის პროდუქტის მწარმოებლებად  და შემიძლია, თამამად ვთქვა, რომ მათთან გათანაბრებული და უკეთესი ხარისხიც კი გვაქვს ჩენდლერის წარმოებაში“, - აღნიშნავს „ანიგოზის“ თანადამფუძნებელი.ანა ქევხიშვილი ადგილობრივ ბაზარზეც  საუბრობს და განმარტავს, რომ ქართულ ნიგოზზე მოთხოვნა საქართველოშიც მკვეთრად გაიზარდა და წელს უკვე მასიურად გამოჩნდა ქართული წარმოების ნიგოზი სავაჭრო ქსელებში, რაც აქამდე არ ფიქსირდებოდა.კაკლის გადამმუშავებელი საწარმო „ანიგოზი“ სოფელ მარტყოფში პანდემიის პერიოდში, კერძოდ 2021 წელს, სოფლის განვითარების სააგენტოს თანადაფინანსებით ამოქმედდა. პროექტში, დაახლოებით, 3 მლნ ლარის ინვესტიცია ჩაიდო. თანამედროვე დანადგარებით აღჭურვილი საწარმო ამჟამად, ორი მიმართულებით მუშაობს, კერძოდ, ფერმერებისგან იბარებს როგორც სველ მდგომარეობაში, ახალ დაკრეფილ კაკალს, ასევე მშრალ კაკალს მეორადი გადამუშავებისთვის.

1713618000

1 უნცია ოქროს ფასმა, შესაძლოა, 3000 დოლარს მიაღწიოს. დარგის ექსპერტების თქმით, ძვირფასი მეტალის ღირებულება ყოველდღიურად ახალ რეკორდს ხსნის. დღეს, მაგალითად, 1 უნცია ოქროს ფასმა 2,395 დოლარს მიაღწია, რაც ერთწლიან პერიოდში 25 პროცენტზე მეტად გაზრდილი მაჩვენებელია. მიმდინარე წლის დასაწყისიდან ამ დრომდე კი, შეიძლება ითქვას, რომ ოქროს ფასი საშუალოდ 350-360 დოლარით არის გაზრდილი. როგორც „ბიზნესპარტნიორს“  Galt & Taggart-ის კვლევების დეპარტამენტის უფროსმა ანალიტიკოსმა  სერგი ყურაშვილმა  განუცხადა, ფასის ზრდის განმაპირობებელი ფაქტორები ჩინეთის მხრიდან მოთხოვნის ზრდას, ასევე ცენტრალური ბანკების მიერ ოქროს ზოდების შეძენას უკავშირდება.„ჩინეთში ოქროს იმპორტი 2024 წლის პირველ ორ თვეში 51%-ით გაიზარდა. რაც შეეხება ცენტრალური ბანკების როლს, მათ გააძლიერეს შესყიდვები ოქროს მიმართულებით, რითიც ცდილობენ საკუთარი რეზერვების დივერსიფიკაციას. მაგალითისთვის, 2020 წლის სექტემბრიდან 2023 წლის დეკემბრის ჩათვლით, ცენტრალურმა ბანკებმა 155 მილიარდი დოლარის ღირებულების ოქროს ზოდები და მონეტები შეიძინეს“, - განმარტავს სერგი ყურაშვილი.ოქროს გაძვირების მიზეზებზე საუბრისას აუცილებლად გასათვალისწინებელია ამერიკის შეერთებული შტატების ფედერალური რეზერვის ფაქტორიც. ანალიტიკოსების განმარტებით, ოქროსა და ამერიკულ დოლარს შორის საპირისპირო მიმართებაა. დოლარის გამყარება ოქროს გაუფასურებას იწვევს, ვალუტის დევალვაცია კი ოქროს გაძვირებას უწყობს ხელს. ყველაზე მნიშვნელოვანი,  რეფინანსირების განაკვეთია, რომლის შემცირება ოქროზე პოზიტიურად აისახება. ამჟამად, ოქროს ფასს სწორედ ამერიკის შეერთებული შტატების ფედერალური რეზერვის მხრიდან მონეტარული პოლიტიკის შემსუბუქების მოლოდინები განსაზღვრავს.ცხადია, არსად წასულა გეოპოლიტიკური გამოწვევებიც, ომი ახლო აღმოსავლეთში, რუსეთ-უკრაინის ომი… ამ ყველა ფაქტორიდან გამომდინარე, ანალიტიკოსები ოქროს კიდევ უფრო მეტად გაძვირებას ელიან და არ გამორიცხავენ, რომ 1 უნიცია ოქროს ღირებულებამ 3000 დოლარს მიაღწიოს.ოქროზე საერთაშორისო ფასების ზრდას ასახვა უკვე ჰქონდა საქართველოზე. საიუველირო კომპანიებში ამბობენ, რომ ახალი წლიდან ამ დრომდე, სუფთა ოქროს ფასი 28 ლარით არის გაზრდილი. ჯამში, 1 გრამის ღირებულება ამჟამად 205-207 ლარია. ოქროს ნაკეთობების მწარმოებლები ამბობენ, რომ ამ ეტაპზე, ცდილობენ  ნაკეთობებზე არსებული ფასები შეინარჩუნონ, თუმცა, თუ უნცია ოქრო კიდევ გაძვირდება, წლის მეორე კვარტლიდან პროდუქციის გაძვირება 5-7%-ის ფარგლებში მოუწევთ.

1713183180

რითეილ სექტორის განვითარების დინამიკაზე "ბიზნესპარტნიორთან" Quadrum Georgia-ს ("ისთ ფოინთის" დამფუძნებელი  კომპანია)  მარკეტინგის დირექტორი თეიკო ლომინაძე  საუბრობს. მისი ინფორმაციით,  თბილისის რითეილ ბაზრით სულ უფრო მეტი  საერთაშორისო ბრენდი ინტერესდება.რითეილ სექტორის წარმომადგენლების თქმით, ასეთი ტიპის ბრენდები განიხილავენ ბაზარზე შემოსვლას როგორც დამოუკიდებელი მაღაზიით, ისე მულტიბრენდულ სივრცეში. ბოლო წლებში, ქვეყანაში ტანსაცმლის, ფეხსაცმლის, თუ სხვა პროდუქციის უამრავმა ახალმა კომპანიამ დაიწყო ოპერირება.„საერთაშორისო ბრენდების მხრიდან გაზრდილი მოთხოვნის ფონზე, იზრდება სავაჭრო ცენტრების დატვირთულობაც. სიამაყით შემიძლია ვთქვა, რომ „ისთ ფოინთი“ დღე 99%-იანი დატვირთულობით მუშაობს და სწორედ ბრენდების მხრიდან გაზრდილი მოთხოვნის გამო გადავწყვიტეთ გაფართოებაც“, - განმარტავს Quadrum Georgia-ს მარკეტინგის დირექტორი.მისივე ინფორმაციით,  პირველი 3 თვის მონაცემების დაჯამება ახლა მიმდინარეობს.„ჯერ ზუსტ პროცენტს ვერ გეტყვით, მაგრამ მცირედი ზრდა შეინიშნება. ეს ზრდა არ არის პროცენტულად ისეთი მასშტაბური, როგორიც 2022 და 2023 წელს იყო, მიგრაციული ეფექტიდან გამომდინარე. თუმცა, მაინც პოზიტიური ტენდენციაა ზრდის შენარჩუნება. ველოდებით, რომ ტურისტული სეზონის გააქტიურებასთან ერთად, ჩვენს სავაჭრო ცენტრში უცხოელი მომხმარებლების რიცხვიც გაიზრდება“, - აღნიშნა ლომინაძემ.მისივე თქმით, დღეისათვის „ისთ ფოინთის“ მომხმარებლების საშუალო დღიური მაჩვენებელი 20-25 ათასი ადამიანია.შეგახსენებთ, "ისთ ფოინთმა“ ფაზა 2-ის მშენებლობა გასულ წელს დაიწყო, შედეგად სავაჭრო ცენტრის ტერიტორია გაიზრდება და სივრცეს, 25 ათასი კვადრატული მეტრის კომერციული ფართები დაემატება.

1712722620

საქართველოდან უცხოეთში სამოგზაუროდ სულ უფრო მეტი ადამიანი მიდის, გაყიდული ტურისტული პაკეტების მაჩვენებელი კი, 2024 წლის პირველ 3 თვეში, წინა წლის ანალოგიურ პერიოდთან შედარებით, საშუალოდ 20-იდან 25- პროცენტამდეა გაზრდილი, - ამის შესახებ „ბიზნესპარტნიორს“ Go Tour-ის დირექტორმა ნინო წიკლაურმა განუცხადა. გამყვან ტურიზმზე მომუშავე კომპანიების ინფორმაციით, გასულ 3 თვეში ყველაზე მოთხოვნადი ევროპის ქვეყნები იყო, ასევე ეგვიპტე, დუბაი და ისეთი ეგზოტიკური მიმართულებები, როგორებიცაა - ინდოეთი, ინდონეზია, ტაილანდი, იაპონია, შრი-ლანკა, მალდივები და კორეა. რაც შეეხება ზაფხულს, ჯავშნების მიღება კომპანიებს უკვე დაწყებული აქვთ და აქაც გაყიდულ პაკეტებში ზრდის ტენდენცია იკვეთება  - ყველაზე მოთხოვნადი ისევ თურქეთის მიმართულებაა, ასევე ევროპის საზღვაო კურორტები.„მიმდინარე წლის ზაფხულში, ევროპული სახელმწიფოებიდან უპირობო ლიდერი გერმანიაა. EURO 2024-იდან გამომდინარე, წელს - მასზე როგორც ტურისტულ მიმართულებაზე მოთხოვნა გაორმაგებულია, არადა ადრე, ზაფხულის პერიოდში გერმანია პოპულარული არასდროს ყოფილა. შედეგად, გაზრდილია როგორც ავიაბილეთების, ისე სასტუმროების ფასები. ჩვენი კომპანია, ჯერჯერობით, EURO 2024-ის ტურისტულ პაკეტებს არ სთავაზობს მომხმარებელს, რადგან არაბუნებრივად მაღალი ფასებია. მიუხედავად იმისა, რომ ჯერ ფეხბურთის ბილეთების რეალიზაცია არ დაწყებულა, კომპანიებში, რომლებიც ამ მიმართულებით მუშაობენ, საშუალო ფასებზე უკვე საუბრობენ და ამბობენ, რომ EURO 2024-ის ტურისტული პაკეტების საშუალო ღირებულება 4000-5000 ლარის ფარგლებშია. საუბარია 3-4-დღიან ტურზე, რაც საკმაოდ ძვირია. თუმცა, იმედის მომცემია პრემიერის გადაწყვეტილება, რომლის მიხედვითაც, ირაკლი კობახიძემ ეკონომიკის სამინისტროს EURO 2024-ისთვის, გერმანიის ორი ქალაქის - კერძოდ დიუსელდორფის და ჰამბურგის მიმართულებით, დამატებითი ავიარეისების, დაბალი ტარიფებით უზრუნველყოფა დაავალა. თუ ავიაბილეთებზე ფასები დაიწევს, ეს EURO 2024-ის პაკეტებზე არსებულ ისედაც მაღალ მოთხოვნას კიდევ უფრო გაზრდის და საქართველოს კიდევ უფრო მეტი მოქალაქისთვის იქნება უზრუნველყოფილი გერმანიაში გადაადგილება, დაბალი ფასებით“, - აცხადებს ნინო წიკლაური.მან ტურისტული პაკეტების ფასებზეც ისაუბრა და თქვა, რომ მოთხოვნასთან ერთად, ისიც წლიდან წლამდე მზარდია. 2024 წლის პირველ კვარტალში ფასები, დაახლოებით, 20%-ით არის დაკორექტირებული.როგორც ნინო წიკლაური აცხადებს, ტურისტული პაკეტების გაძვირების ტრენდი პანდემიის შემდეგ დაიწყო. მაგალითად, გასულ 2023 წელსაც 2022 წელთან შედარებით, მოგზაურობა 20%-ის ფარგლებში იყო გაძვირებული, რაც როგორც ავიაბილეთებზე ფასების მატებამ, ასევე სასტუმროების გაძვირებამ განაპირობა.

1712664877

ტურიზმისა და ავიაციის სფეროში კონკურენცია გაიზრდება, ქვეყანაში ახალი ავიაკომპანიები შემოვლენ და ფასებიც დასტაბილურდება - ამის შესახებ "ბიზნესპარტნიორთან"  Go Tour-ის დირექტორმა ნინო წიკლაურმა მთავრობის ინიციატივაზე საუბრისას განაცხადა. როგორც ცნობილია, მთავრობა დედაქალაქში ახალი აეროპორტის მშენებლობას გეგმავს. "თბილისიდან რაც მეტი ბიუჯეტური ავიაკომპანია იფრენს, ან თუნდაც არა ბიუჯეტური, უბრალოდ კონკურენციის პირობებში დასტაბილურებული ფასებით, ეგ ძალიან გაამარტივებს როგორც ჩვენი მოგზაურების გასვლას მსოფლიოს ნებისმიერ წერტილში, ასევე ძალიან მნიშვნელოვანია შემომყვანი კუთხით იმიტომ, რომ ძალიან ბევრი უცხოელი, თუნდაც - პირობითად ევროპელი, ამჯობინებს გადაფრინდეს 10 და 15 ევროდ გვერდითა ქვეყანაში, ვიდრე გადაიხადოს 300-400 ევრო და ჩამოვიდეს საქართველოში. ამიტომ, ახალი აეროპორტის არსებობა ხელს შეუწყობს ტურისტების უფრო მეტად მოზიდვას ისეთი ბაზრებიდან, საიდანაც არ გვაქვს, ამ ეტაპზე, ძალიან დიდი მოთხოვნა“, - განმარტა ნინო წიკლაურმა.ცნობისთვის, დედაქალაქის მთავარი აეროპორტი ვაზიანში აშენდება, მისი მშენებლობა ჯამურად 1,2 მილიარდი დოლარი დაჯდება. მთავრობაში ვარაუდობენ, რომ ახალი აეროპორტიდან ფრენების განხორციელება 2028 წლის ბოლოდან დაიწყება. აეროპორტს 19 მილიონამდე მგზავრის გადაყვანის შესაძლებლობა ექნება.

1712636346

„თუ ფერმერები თხილის ბაღებს სწორად მოუვლიან და კლიმატური პირობებიც სექტორს ხელს შეუწყობს, წელს ქვეყანა მოსავლის სახით 50 ათას ტონამდე, ან კიდევ უფრო მეტ თხილს მიიღებს“ - ასეთი მოლოდინი აქვთ თხილის მწარმოებელთა ასოციაციაში. ორგანიზაციაში ამბობენ, რომ ამის ფიქრის საფუძველს, თხილის წარმოების მხარდაჭერის პროგრამა აძლევთ, რომელიც წელსაც გაგრძელდა და 2023 წლის მსგავსად, ფერმერები დახმარებას ამჯერადაც მიიღებენ. როგორც „ბიზნესპარტნიორს“  თხილის მწარმოებელთა ასოციაციის აღმასრულებელი საბჭოს თავმჯდომარემ,მერან ჭითანავამ განუცხადა, თხილის სექტორს ჯერჯერობით კლიმატური პირობებიც ხელს უწყობს, მაგალითად წელს არ ყოფილა ყინვა და უამინდობას ხელი არ შეუშლია თხილის ბაღებისთვის. რაც შეეხება უშუალოდ თხილის წარმოების ხელშეწყობის პროგრამას, მის ფარგლებში, თხილის კადასტრში ბაღების რეგისტრაციის პარალელურად, აგროქულების დარიცხვის პროცესი უკვე დაწყებულია და ის 30 აპრილის ჩათვლით გაგრძელდება. სახელმწიფო პროგრამაში მონაწილეობის მისაღებად, ფერმერს საკუთრებაში, ან ფაქტობრივ მფლობელობაში უნდა გააჩნდეს თხილის ბაღი, ჯამურად არა უმეტეს 3 ჰექტარისა.  სუბსიდიის მოცულობა განისაზღვრა 500 ლარით 1 ჰექტარ თხილის ბაღზე. რაც შეეხება ვადებს, ფერმერები აგრომაღაზიებში დარიცხული ქულების გამოყენებას 31 აგვისტოს ჩათვლით შეძლებენ. აღსანიშნავია, რომ თხილის წარმოების ხელშეწყობის პროგრამა საქართველოს ყველა მუნიციპალიტეტში ხორციელდება, გარდა თვითმმართველი ქალაქებისა. მერაბ ჭითანავას თქმით, გარკვეულ დახმარებას მიიღებენ მსხვილი ფერმერებიც. კერძოდ, მთავრობის გადაწყვეტილებით, შეღავათიანი აგროკრედიტის პროექტში ცვლილებები დამტკიცდა, რის მიხედვითაც, თხილის პირველადი წარმოების ქვეკომპონენტში ფინანსდება სამ ჰექტარზე მეტი ფართობის თხილის ბაღებში, მოსავლის მოყვანის ყველა ხარჯი - თითო ჰექტარზე 3 ათასი ლარით. ჯამში სესხის მოცულობა მაქსიმუმ 300 ათასი ლარით განისაზღვრა, თანადაფინანსების ვადა კი - 12 თვით.რაც შეეხება გამოწვევებს, რომლებიც სექტორში ამ დრომდე აწუხებთ - ისინი, ძირითადად, ფერმერთა ცნობიერების და ცოდნის ამაღლებას, ასევე თხილის ბაღების ჯერ კიდევ მცირე ფართობს და კლიმატურ პირობებს უკავშირდება.„ბოლო წლებში, ხშირი ნალექის გამო, საქართველოში თხილის მოსავალი საკმაოდ შემცირებული იყო. მაგალითისთვის, 2021 წელთან შედარებით, როცა ქვეყანაში 55 ათასი ტონა თხილი მოვიდა, მოსავლიანობა 2022 წელს 40 ათას ტონამდე დაეცა. გასულ 2023 წელს, ასევე უხვი ნალექის გამო, ქვეყანამ ისევ დაბალი რაოდენობისა და ხარისხის მოსავალი მიიღო, დაახლოებით 45 ათას ტონამდე, რამაც შეამცირა ფერმერების შემოსავალი. გამოწვევებს შორის კლიმატთან ერთად, შემიძლია დავასახელო ნიადაგის მჟავიანობაც და ეს პრობლემა განსაკუთრებით ბოლო წლებში გამოიკვეთა, კვლევების შედეგად. საქართველოში თხილის გავრცელების რეგიონების უმეტეს ნაწილში, ძირითადად მჟავე, ან სუსტი მჟავე არეს მქონე ნიადაგებია, რაც ხელს უშლის მცენარის ზრდა-განვითარებას. კერძოდ, ნიადაგის მჟავიანობა იწვევს ხეების გახმობას და მოსავლიანობას მკვეთრად ამცირებს“, - აღნიშნავს თხილის მწარმოებელთა ასოციაციის აღმასრულებელი საბჭოს თავმჯდომარე.მისი თქმით, საჭიროა ნიადაგის მჟავიანობის განეიტრალება კირის გამოყენებით. როგორც ჭითანავა განმარტავს, სექტორს ამ პრობლემის გადაჭრაზე მუშაობა და კირის შეტანა თხილის ბაღებში უკვე დაწყებული აქვს.

1712320320

ქართულ ბაზარზე საწვავის კიდევ უფრო გაძვირებას ელიან, რასაც საერთაშორისო ენერგეტიკულ ბირჟაზე მიმდინარე ფასების აღმავალ ტენდენციას უკავშირებენ.დღეისათვის, 1 ბარელი ბრენტის ტიპის ნავთობის ღირებულება 91 დოლარს შეადგენს. რაც შეეხება რუსულ ნავთობს, ბარელი Urals-ის ფასი 74 დოლარის ფარგლებში მერყეობს. ამჟამად, რუსული ნავთობი საერთაშორისო ბირჟაზე, დიდი შვიდეულის მიერ დაწესებულ საფასო ლიმიტზე 14 დოლარით უფრო ძვირად ივაჭრება. საბოლოო ჯამში, საერთაშორისო ენერგეტიკულ ბირჟაზე ფასების ზრდა ფიქსირდება.როგორც „ბიზნესპარტნიორს“  „თიბისი კაპიტალის“ ასოცირებულმა მკვლევარმა რატი კალანდარიშვილმა  განუცხადა, ბოლო ერთ კვირაში, ნავთობი თითქმის ყოველდღიურად 2-3%-ით ძვირდებოდა. წლის დასაწყისიდან ამ დრომდე, კი ბრენტის ტიპის ბარელი ნავთობის ფასი 22%-ითაა გაზრდილი. მისივე თქმით, მიზეზი ისევ გეოპოლიტიკურია და ის, ახლო აღმოსავლეთის ომის გარშემო განვითარებულ მოვლენებს უკავშირდება.წამყვანი საინვესტიციო ბანკების პროგნოზით 2024 წლის ბოლოსთვის, ნავთობის ფასი, სავარაუდოდ, 80-85 დოლარის ფარგლებში იქნება, თუმცა, ეს პროგნოზი ზოგიერთი ბანკის შემთხვევაში 103 დოლარამდეც აღწევს. ანალიტიკოსების განმარტებით, მთელ მსოფლიოში საბაზრო რყევები კვლავ ექსტრემალურად მაღალია, წელს მსოფლიოს ბევრ წამყვან ქვეყანაში საარჩევნო წელია, რაც ასევე გავლენას იქონიებს ნავთობის გლობალურ ფასზე. გარდა გეოპოლიტიკური მოვლენებისა, ნავთობის გაძვირების მიზეზი მისი მოპოვების ხელოვნურად შემცირებაცაა, ოპეკის წევრ ქვეყნებს - საუდის არაბეთსა და რუსეთს ნავთობის წარმოება შემცირებული აქვთ და ისინი ცდილობენ, ამ გაზით, ფასები არაბუნებრივად გაზარდონ და ამით უფრო მეტი შემოსავალი მიიღონ.ბუნებრივია, მსოფლიოს სანავთობო ბირჟებზე მიმდინარე მოვლენების ნაწილია საქართველოც. ნავთობიმპორტიორ კომპანიებში ამბობენ, რომ თუ ბრენტის ტიპის ნავთობის ფასი კიდევ გაიზრდება, ეს საწვავის ფასზე ავტომატურად აისახება. გარდა ამისა, სექტორში სეზონურობაზეც ამახვილებენ ყურადღებას და განმარტავენ, რომ გაზაფხული-ზაფხულის პერიოდში, საწვავის მოხმარება მსოფლიოში ისედაც იზრდება, რაც ფასების მატებასაც იწვევს."ბიზნესპარტნიორთან" საუბრისას, ადგილობრივ კომპანიებში 1-ელი მარტიდან, მომდევნო 6 თვე, რუსეთის მიერ ბენზინის ექსპორტის აკრძალვის საკითხსაც ეხმაურებიან და ამბობენ, რომ ამის გამო, ქართულ ბაზარზე, ბოლო 1 თვეში ყველა ტიპის ბენზინის ფასი 20-დან 30 თეთრამდე ფარგლებში უკვე გაიზარდა.დარგის წარმომადგენლების განმარტებით, საქართველოში რუსეთიდან საწვავის 60%-ზე მეტი შემოდიოდა, ახლა კი ბაზარი სრულად ევროპულ ქვეყნებზე გადაერთო, რამაც ბენზინის ტრანსპორტირების ხარჯები გაზარდა, შედეგად პროდუქტის გაძვირება გამოიწვია. ამჟამად, ქვეყანაში საწვავი ძირითადად, ბულგარეთიდან, საბერძნეთიდან და რუმინეთიდან შემოდის.შეგახსენებთ, საქართველოში ავტოპარკის ზრდასთან ერთად, საწვავის მოხმარება და შესაბამისად, მისი იმპორტიც ყოველწლიურად იზრდება. მაგალითისთვის, გასულ 2023 წელს ბენზინისა და დიზელის საწვავის იმპორტმა მილიონ 208 ათას ტონაზე მეტი შეადგინა, რაც 5,1%-ით მეტი იყო გასული წლის მაჩვენებელზე.

1712226375

ჩეხეთის სკოლებში მოსწავლეები საქართველოში შეკერილ სპორტულ ფორმებს ჩაიცვამენ. ტანსაცმლის მწარმოებელმა კომპანიამ „ნართი“ ჩეხურ მხარესთან მოლაპარაკებას უკვე მიაღწია.როგორც „ბიზნესპარტნიორს“ „ნართის“ თანადამფუძნებელმა თამარ დემურიშვილმა  განუცხადა, ჯერჯერობით, საუბარია პრაღის რამდენიმე სკოლაზე, სადაც ფიზკულტურის გაკვეთილზე „ნართის“ შეკერილ სპორტულ ფორმებს ბავშვები უკვე 2024 წლის სასწავლო წლიდან ატარებენ.„ზოგადად, ქვეყანაში ტექსტილის და მოდის ინდუსტრია სწრაფი ტემპით ვითარდება და ეს კარგად ჩანს საერთაშორისო ბაზრებზე მისი მიღწევებითაც. წლიდან წლამდე სხვადასხვა ტიპის სამოსი სულ უფრო დიდი რაოდენობით გადის უცხოეთში ექსპორტზე. ქართული სამოსის მიმართ განსაკუთრებით მაღალი ინტერესი ევროპულ ქვეყნებშია“, - აღნიშნავს „ნართის“ თანადამფუძნებელი.მისივე განმარტებით, ის, რაც ქართული სამოსის საექსპორტო პოტენციალს ზრდის მისი ხარისხი და კონკურენტუნარიანი ფასია.„ქართული ტანსაცმელი ხარისხობრივად ევროპულს უკვე დაეწია, ამიტომ, მზარდია დამკვეთების რიცხვიც. საექსპორტოდ ყველაზე მოთხოვნადი პროდუქტი კი უნიფორმებია, რომლებიც არანაკლებ პოპულარულია ადგილობრივ ბაზარზეც. შეძლება ითქვას, რომ ჩვენ როცა დავიწყეთ უნიფორმების წარმოება, იმ დროს, ქვეყანაში ეს პროდუქტი თითქმის სრულად იმპორტირებული იყო. ამჟამად, შეიძლება ითქვას, რომ ქვეყანაში წარმოებულმა უნიფორმებმა იმპორტი 95%-ით ჩაანაცვლა“, - განმარტავს „ნართის“ თანადამფუძნებელი.ის  იმ სირთულეებზეც საუბრობს, რომელთა გადალახვაც ქართველ მწარმოებლებს ადგილობრივ, თუ საერთაშორისო ბაზრებზე ცნობადობის მოპოვებამდე მოუწიათ.„რამდენიმე წლის წინ საქართველოში ძნელად იშოვებოდა მაღალი ხარისხის ნედლეული, გამოწვევას წარმოადგენდა მუშახელის პოვნაც. კვალიფიციური მკერავები შრომის ბაზარზე დღემდე დეფიციტურია. ამიტომ, ზოგჯერ გვიწევს ხოლმე გამოუცდელი კადრები ავიყვანოთ და ჩვენით ვასწავლოთ. თუმცა, ამ დამატებითი ძალისხმევის გასაწევად, ჩვენთვის მთავარი მოტივაცია ქართული სამოსის მიმართ მომხმარებლების დიდი ინტერესია“, - აღნიშნავს „ნართის“ თანადამფუძნებელიმეწარმე ადგილობრივ ბაზარზე ყველაზე მოთხოვნად პროდუქტზეც საუბრობს და  აცხადებს, რომ ასეთი სახელობითი სამოსია.„თავდაპირველად, საბავშვო სამოსით დავიწყეთ - ანუ ბავშვის ტანსაცმელს ვაქარგავდით მათ სახელებს. შემდეგ, გავაკეთეთ სადედოფლო ხალათები. იმდენად დიდი ინტერესი და მოთხოვნა წამოვიდა, რომ გავაფართოვეთ ეს ხაზი და დღეს უკვე ყველა ტიპის სამოსზე შეგვიძლია სახელების ქარგვა. მათ შორის, გვაქვს სახელობით სამოსი ჩვენი ოთხფეხა მეგობრებისთვისაც“, - აღნიშნავს  „ნართის“ თანადამფუძნებელი.ცნობისთვის, კომპანია „ნართი“ დღეისათვის ქმნის როგორც ყოველდღიურ და სპორტულ სამოსს, ისე უნიფორმებს, სახელობით და ასევე ოთხფეხა მეგობრების ტანსაცმელს. თამარ დემურიშვილის თქმით, ყოველწლიურად მათ მიერ წარმოებულ სამოსზე მოთხოვნა 20-25%-ით იზრდება.