სააღდგომო ტურის მიმართულებით ისრაელზე მოთხოვნა შემცირებულია, - ამის შესახებ ტურისტული კომპანია Voyager 365-ის გენერალურმა მენეჯერმა გოგა ქუცნიაშვილმა "ბიზნესპარტნიორთან" განაცხადა.
მისივე ინფორმაციით, ტურისტული კომპანია ქართველ დამსვენებლებს წინასწარ აწვდის ინფორმაციას ყველა იმ შესაძლო საფრთხეებსა და რისკებზე, რომელიც ისრაელის საზღვრის კვეთის დროს შეიძლება შეხვდეთ.
"მოთხოვნა ისრაელის მიმართულებით წინა წლებში უფრო მაღალი იყო, ვიდრე მიმდინარე წელს. აღნიშნულის მიზეზი, სავარაუდოდ, ისრაელში მომხდარი საომარ მოქმედებებია", - აცხადებს გოგა ქუცნიაშვილი.
მისივე განცხადებით, ზოგადად, ქვეყანაში მიმდინარე პროცესებმა უარყოფითი გავლენა იქონია გამყვან ტურიზმზე, თუმცა ნელ-ნელა მოთხოვნა აქტიურდება.
"პოპულარული მიმართულებების სია წლიდან წლამდე ფაქტობრივად, არ იცვლება. თურქეთის, საბერძნეთის, იტალიის, ესპანეთის და სხვა ევროპული ქვეყნების მიმართულებების კუთხით ზაფხულის პერიოდში აქტიურად არის მოთხოვნა", - აღნიშნა გოგა ქუცნიაშვილმა.
შეგახსენებთ, რომ ყოველ აღდგომას წმინდა ცეცხლის საქართველოში ჩამოსაბრძანებლად ისრაელში მომლოცველები მიემგზავრებიან.
