“ჩვენი მიზანია საქართველო გავხადოთ რეგიონალური ტექნოლოგიური ჰაბი, რაც ნიშნავს, რომ ქვეყანაში უნდა გვყავდეს ამ სფეროში უფრო მეტი განათლებული ადამიანი, დეველოპერი”- ამის შესახებ პარლამენტის წევრმა ვაკო თურნავამ გადაცემა “ბიზნესპარტნიორის” ღამის ეთერში განაცხადა.

მისი თქმით, ეს სფერო საქართველოში ერთ-ერთი მაღალანაზღაურებადი პროფესიაა, საშუალო ხელფასი 7500-8000 ლარია. ხოლო  უცხოელების ანაზღაურება, რომლებიც ჩვენს ქვეყანაში მუშაობენ საშუალოდ 12-13 ათასი ლარია.

“საქართველოში უკვე 40 000 პროფესიონალია. შარშან IT სერვისების ექსპორტი დაახლოებით 3 მილიარდი ლარი იყო. ეს წილი, რა თქმა უნდა, კიდევ უნდა გაიზარდოს და ვფიქრობ, რომ პოლიტიკური გადაწყვეტილებები, მათ შორის პრემიერის მიერ დაანონსებული სტარტაპების ხელშეწყობის პროგრამა, ეს არის ზუსტად ის კურსი, რაც აღებული აქვს ჩვენს მთავრობას და რამდენიმე წელიწადში ეს ციფრი უნდა გაორმაგდეს.”- აცხადებს ვაკო თურნავა.

მისივე განცხადებით, ამ ეტაპზე რამდენიმე მნიშვნელოვან საკითხზე მიმდინარეობს მუშაობა, როგორიცაა ციფრული ID ბარათი, ასევე ბინადრობის უფლებების გამარტივება პროფესიონალებისთვის, რათა უფრო მეტი კადრი მოიზიდონ, რაც თურნავას თქმით, ჩვენი ქვეყნის ეკონომიკას ძალიან განავითარებს და ის ხალხი, რომელიც აქ ჩამოვა ქართველებთან ერთად უფრო ძლიერ ეკოსისტემას შექმნის. 

შეგახსენებთ, აშშ-ში, ქალაქ სან-ფრანცისკოში საქართველოს ფარგლებს გარეთ პირველი ტექნოლოგიური ჰაბი გაიხსნება, რომლის მეშვეობით ქართული სტარტაპ კომპანიები უფრო მარტივად შეძლებენ უცხოეთის ბაზრებზე გასვლასა და საერთაშორისო ინვესტორებთან წვდომას გლობალური ტექნოლოგიებისა და ინოვაციების ცენტრში, ე.წ. სილიკონ ველიზე. 

ტექნოლოგიური ჰაბის მეშვეობით შესაძლებელი იქნება საქართველოს ინოვაციების ეკოსისტემით გლობალური ტექნოლოგიური კომპანიების, უცხოური ვენჩურული ფონდებისა და ენჯელ - ინვესტორთა ქსელების დაინტერესება და ქვეყანაში შესაბამისი ინვესტიციების მოზიდვა.