"რძის ნიმუშებში აფლატოქსინი გამოვლინდა,"- ამის შესახებ ინფორმაციას სურსათის ეროვნული სააგენტო ავრცელებს. 

"სურსათის ეროვნული სააგენტოს თბილისის საქალაქო სამსახურის ინსპექტორებმა 28 მარტს შპს "ვიმ-ბილ-დან საქართველოში" (ს/კ 204546553 (სოფლის ნობათი) სახელმწიფო კონტროლი განახორციელეს. 

ინსპექტირების შედეგად საწარმოში კრიტიკული შეუსაბამობა არ გამოვლენილა, თუმცა, დაფიქსირდა სურსათის შესახებ ინფორმაციის მიწოდების წესის დარღვევა, რის გამოც ბიზნესოპერატორი დაჯარიმდა სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსის შესაბამისად.

 გარდა ამისა, შპს "ვიმ-ბილ-დან საქართველოს" დაევალა აზერბაიჯანში წარმოებული რძის 5 ნიმუშის აღება (რომლიდანაც ერთი არის ბავშვთა კვებისთვის განკუთვნილი) და აფლატოქსინ M1-ზე გამოკვლევა; ასევე არასწორად ეტიკეტირებული სურსათის ბაზრიდან გამოთხოვა. 

სააგენტოს ზედამხედველობით აღებული ნიმუშები გაიგზავნა აკრედიტებულ ლაბორატორიაში.   ლაბორატორიული კვლევის შედეგად აფლატოქსინ M1-ის გადაჭარბებული ოდენობა დაფიქსირდა ხუთ ნიმუშში. კერძოდ: სასმელი რძე საბავშვო, ულტრაპასტერიზებული - 2,5% ცხიმიანობით - დამზადების თარიღი: 04.02.2025, ვარგისიანობის ვადა: 03.08.2025; სასმელი რძე რჩეული ულტრაპასტერიზებული, 1,5% ცხიმიანობით - დამზადების თარიღი: 12.02.2025, ვარგისიანობის ვადა: 11.08.2025; ⁠ სასმელი რძე რჩეული ულტრაპასტერიზებული, 1,5% ცხიმიანობით - დამზადების თარიღი: 10.02.2025, ვარგისიანობის ვადა: 09.08.2025; სასმელი რძე რჩეული ულტრაპასტერიზებული, 2,5% ცხიმიანობით - დამზადების თარიღი: 09.02.2025, ვარგისიანობის ვადა: 08.08.2025; ⁠სასმელი რძე რჩეული ულტრაპასტერიზებული, 3,2% ცხიმიანობით - დამზადების თარიღი: 02.02.2025, ვარგისიანობის ვადა: 01.08.2025.

 შპს „ვიმ-ბილ-დან საქართველოს“ დაევალა დასახელებული სურსათის პარტიების სარეალიზაციო ქსელიდან ამოღება/გამოთხოვა.  სურსათის ეროვნული სააგენტო მოუწოდებს მომხმარებელს, არ გამოიყენოს აღნიშნული რძე.

აფლატოქსინი წარმოიქმნება ობის სოკოებისაგან. აფლატოქსინ B1-ით დაბინძურებული საკვები ხვდება ცხოველის ორგანიზმში, საიდანაც გადადის რძეში და გარდაიქმნება M1 აფლატოქსინად, რაც საფრთხეს უქმნის ადამიანის ჯანმრთელობას,"-აღნიშნულია სააგენტოს მიერ გავცელებულ ინფორმაციაში. 

შეგახსენებთ, რომ საქართველოში 2024 წლის 1 ივლისიდან, ცხოველის საკვების მწარმოებლებისთვის ამოქმედდა რეგულაცია, რომლის თანახმად აფლატოქსინით დაბინძურებული ცხოველის საკვების გამოყენება აიკრძალა.

აფლატოქსინი არის  კანცეროგენი, რომელიც ადამიანის ორგანიზმში რძისა და რძის პროდუქტების საშუალებით ხვდება და თითქმის ყველა ორგანოს აზიანებს. რძეში კი თავის მხრივ, ცხოველის მიერ მოხმარებული დაბინძურებული საკვებიდან გადადის, სადაც ის არასათანადო პირობებში შენახვის შედეგად ჩნდება.

სურსათის ეროვნული სააგენტოს ვეტერინარიის დეპარტამენტის უფროსის მოადგილემ დავით გოდერძიშვილმა აღნიშნულ რეგულაციაზე მუშაობისას აღნიშნა, რომ ესაა ძალიან საშიში ტოქსინი, რომელიც ღვიძლის, თირკმლის, საჭმლის მომნელებელი და რეპროდუქციული სისტემის დაზიანებას იწვევს, რადგან არის ძლიერი კანცეროგენული ნივთიერება, რომლის დიდი რაოდენობით მიღება კიბოს განვითარებას უწყობს ხელს. მისივე თქმით, ეს ნივთიერება ადამიანის ორგანიზმში მხოლოდ რძის ან რძის პროდუქტებიდან შეიძლება მოხვდეს.

რეგულაციის აღმასრულებელი ორგანო  სურსათის ეროვნული სააგენტოა.