ბიო ღვინოს მწარმოებელი კომპანია "იორა"  იასამნის არყის წარმოებას იწყებს. როგორც კომპანიის დამფუძნებელი კოტე თოფურია ‘’ბიზნესპარტნიორთან“ აცხადებს, მსგავსი პროდუქტი ქართულ ბაზარზე იშვიათია.

საწყის ეტაპზე დაგეგმილია იასამნის არყის 500 ბოთლამდე წარმოება, რომელიც ჯერჯერობით  ქართულ ბაზარზე გაიყიდება, ძირითადად ალკოჰოლური სასმელის  ბუტიკურ მაღაზიებში და ონლაინ, ასევე მიტანის სერვისის მეშვეობით  "გლოვოზე", "ბოლტსა" და "ველი სთორიზე".

მეწარმე ინვესტიციის მოცულობას არ აკონკრეტებს და აღნიშნავს, რომ ახალი ხაზის დამატება კომპანიამ საკუთარი ფინანსური  რესურსით მოახდინა.

პროდუქტი მაღალალკოჰოლური და ნატურალურია. როგორც თოფურია აღნიშნავს, არაყი მთლიანად იასამნის ყვავილისგან ბუნებრივი ინგრედიენტების დამატებით მზადდება. ტექნოლოგიურად კი ხილისგან დამზადებული სასმელისგან რადიკალურად განსხვავებულია. კერძოდ, არაყი მზადდება იასამნის მიცერაციით, რაც ნიშნავს, რომ წარმოების პროცესში ხდება მცენარის ყვავილის გაჯერება სითხით, ამ დროს  გამოიყოფა იასამნის არომატი, რომელიც არაყს დაუვიწყარ გემოს და ფერს აძლევს.

საწყის ეტაპზე 500-მდე ბოთლი იასამნის არყის წარმოება იგეგმება რაც საწყის ეტაპზე ადგილობრივ ბაზარზე გაიყიდება, წარმოებისთვის გამოყენებული ნედლეული - იასამანი ქართულია, რომელიც ველურად იზრდება და კახეთის ტყეებში მრავლადაა გავრცელებული.

‘’ჩვენი ბრენდი ქართულ ბაზარზე ძირითადად ბიო ღვინოებით არის ცნობილი, თუმცა ვაწარმოებთ ასევე ხილის (ტყემლის) არაყს, რისთვისაც საკუთარ ნედლეულს ვიყენებთ. ღვინოც მხოლოდ ‘’იორას“ ვენახების ყურძნისგან იწარმოება. იასამნის არყის სპეციფიკა აბსოლუტურად განსხვავებულია, მასიური წარმოების სახე აქამდე არ აქვს, ყოველ შემთხვევაში, არ მსმენია. ვფიქრობთ, რომ დიდ ინტერესს გამოიწვევს“, - აცხადებს კოტე თოფურია.

მისი ინფორმაციით, ამ ეტაპზე ნედლეული გამზადებულია. გამოხდის პროცესი უახლოეს პერიოდში დაიწყება და ზაფხულის ბოლოს ახალი სასმელი სარეალიზაციოდ მზად იქნება.

ცნობისთვის, ბიო ღვინის მწარმოებელი კომპანია „იორა“ საგარეჯოში, სოფელ ნინოწმინდაში მდებარეობს. კომპანია 7 სახეობის ღვინოს ტრადიციული მეთოდით აწარმოებს.

ბრენდი ქართულ ბაზარზე 2 წლის წინ დაარსდა და ჯერჯერობით მხოლოდ ქართულ ბაზარზე იყიდება.

მარი ჩიტაია