კახეთში მდებარე ბიომეღვინეობა ‘’იორა“ ექსპორტისთვის ემზადება. როგორც კომპანიის დამფუძნებელი კოტე თოფურია "ბიზნესპარტნიორთან“ აცხადებს,  კომპანიის მენეჯმენტი როგორც ევროპის, ასევე აზიის მიმართულებით  რამდენიმე ბაზარს განიხილავს. კომპანიისთვის ამ მხრივ დიდ შესაძლებლობას იძლევა გლობალური გამოფენები, რაც ცნობადობის ზრდასა და ახალი პარტნიორების ძიებაში ეხმარება.

"იორას"  ბრენდით იწარმოება 7 სახეობის ღვინო, როგორიცაა რქაწითელი, რქაწითელი მწვანე, ქისი რქაწითელი, საფერავი, ქისი,  ქისი ბუერა და როზე. წლიური წარმოება დაახლოებით 10 000 ბოთლია. ბიო-ორგანული მეღვინეობა ღვინოს მხოლოდ საკუთარი ვენახებიდან მიღებული მოსავლით ამზადებს.

კომპანია ბაზარზე ორიოდე წლის წინ გამოჩნდა, ამიტომ საწყის ეტაპზე ორიენტირი სწორედ შიდა ბაზარზე გაყიდვებია.

"იორას"  ღვინოები ამ დროისთვის ღვინის ბუტიკ მაღაზიებშია წარმოდგენილი, მათ შორის, ‘’სმაგლერსში“. ამასთან, ‘’იორა“ 11 საოჯახო მარანს შორის ერთ-ერთია, რომელიც ორიოდე კვირის წიბ,  იაპონიის დედაქალაქ ტოკიოში გამართულ გამოფენაში RAW Wine Tokyo მონაწილეობდა.

კოტე თოფურიას განცხადებით, იაპონიის ბაზარზე ბიოღვინოს მიმართ დიდი ინტერესია, რაც ქართველი მეღვინეების  საექსპორტო შესაძლებლობებს ზრდის. მოთხოვნა კი ძირითადად ტრადიციული წარმოების ბიოღვინოს მიმართაა,  რითაც ქართულმა ღვინომ იაპონური მხარის  ყურადღება მიიქცია.

მისი თქმით, იაპონია ერთ-ერთი პერსპექტიული ბაზარია, სადაც შეიძლება "იორას" ალკოჰოლური სასმელი  ექსპორტზე გავიდეს.

მისი თქმით, მოლაპარაკება  პოტენციურ პარტნიორებთან დაწყებულია, მათ შორის საფრანგეთთან და კორეასთან, თუმცა როდემდე გასტანს პროცესი და რა შედეგი დაიდება, მეწარმე ჯერჯერობით ვერ აკონკრეტებს. შესაბამისად, როგორც კოტე თოფურია აცხადებს, რთულია  ვარაუდი, წელს  შეძლებს თუ არა  კომპანიის მიერ წარმოებული პროდუქცია ექსპორტზე გასვლას.

მისი თქმით, მთავარი პროცედურა ცნობადობის ზრდა და ახალი პარტნიორული კავშირებია, რასაც სწორედ გლობალურ გამოფენებში მონაწილეობით ახერხებს.

"ქართული ღვინის ცნობადობის გაზრდისთვის ნებისმიერი საშუალება კარგია. კონკურენციის პირობებში, რაც ღვინის სფეროში მსოფლიოში, აუცილებელია ქართველმა მეღვინეებმა მიიღონ ყველა შესაძლო გამოფენაზე მონაწილეობა. მთავრობა, განსაკუთრებით კი ღვინის ეროვნული სააგენტო, ამ მხრივ  დიდ შესაძლებლობას გვაძლევს. მეწარმეს ყველა სფეროში სჭირდება საკუთარი პროდუქციის გაცნობა მსოფლიოსთვის. ჩვენი მეღვინეობის დარგი რომ მაღალ დონეზე განვავითაროთ, ყველამ  თავისი როლი უნდა შეასრულოს - სახელმწიფომ და მეღვინემაც“, - აცხადებს კოტე თოფურია.

მისი თქმით, ბიოღვინოს მიმართ მოთხოვნა გლობალური მასშტაბით გაზრდილია, ამიტომ თუკი საქართველო ამ ნიშას საფუძვლიანად აითვისებს, ექსპორტზე თავის დამკვიდრებისთვის მეტი შანსი ექნება.

"აზიის ბაზარი ძალიან საინტერესოა, განსაკუთრებით კი  იაპონია, ჩინეთი და სხვა. ტრადიციული ქვეყნებია, შესაბამისად, მეღვინეობაში დიდ ყურადღებას უთმობენ ტრადიციული მეთოდის გამოყენებას, ამ მხრივ კი ჩვენი შესაძლებლობა დიდია. ტოკიოს გამოფენაში მონაწილეობით კიდევ ერთხელ დავრწმუნდი, რომ  ქართული ღვინო იაპონურ გემოებზეა მორგებული, ამიტომ  წარმატებული ვიქნებით, თუ შევძლებთ და იაპონიის ბაზარს სწორედ ასეთ ღვინოს მივაწოდებთ“, - აცხადებს კოტე თოფურია.

ცნობისთვის,  „იორა“ საგარეჯოში, სოფელ ნინოწმინდაში მდებარეობს. ‘’იორას“ ვენახი ივრის პირას,  2,5 ჰექტარ ფართობზეა გაშენებული. კომპანიამ ბიოსერტიფიკატი 2019 წელს მიიღო.

მარი ჩიტაია