ფინანსთა სამინისტროს შემოსავლების სამსახურის ინფორმაციით, სადგურის მოედნის ბაზრობის ტერიტორიაზე ხანძრის შედეგად დაზარალებულ მეწარმეებს 300 000 ლარზე მეტი ღირებულების განადგურებული სასაქონლო-მატერიალური ფასეულობები უკვე ჩამოეწერათ.
მათივე ინფორმაციით, ჩამოწერა საგადასახადო მონიტორინგის დეპარტამენტის თანამშრომლების მიერ განხორციელდა.
შემოსავლების სამსახური განმარტავს, რომ დაზარალებულ მეწარმეებს, სურვილის შემთხვევაში, შეუძლიათ განაცხადით მიმართონ უწყებას გადამხდელის ავტორიზებული გვერდის მეშვეობით. ხანძრის შედეგად განადგურებული ან დაკარგული ფასეულობების ჩამოწერა შესაძლებელია მომსახურების საფასურის გარეშე, 10 სამუშაო დღის ვადაში.
უწყების ცნობით, ჩამოწერის შემდეგ მეწარმეებს აღნიშნულ ქონებასთან დაკავშირებით საგადასახადო ვალდებულებები არ წარმოექმნებათ.
ცნობისთვის, მიმდინარე წლის 30 აპრილს, დაახლოებით დილის 6 საათზე, ვაგზლის მოედნის მიმდებარედ, ე.წ ბორჯომის ვაგზლის ტერიტორიაზე არსებულ ბაზრობაზე გაჩნდა ხანძარი, რის შედეგადაც სრულად დაიწვა დაახლოებით 12 000 მ2 სავაჭრო და სასაწყობო სივრცე.
