სადაზღვევო ინდუსტრია ავტომფლობელთა მესამე პირის სავალდებულო დაზღვევის ამოქმედების მოლოდინშია.

როგორც “გლობალ ბენეფიტს ჯორჯიას" სამეთვალყურეო საბჭოს თავმჯდომარის მოადგილე  ნინა კობახიძე აცხადებს, გარდა იმისა რომ ავტომფლობელთა მესამე პირის პასუხისმგებლობის დაზღვევის ამოქმედებას ევროპასთან ასოცირების ხელშეკრულება გვავალდებულებს, ამ პროდუქტის გარეშე, თავად სექტორის სამომავლო განვითარებაც რთულად წარმოსადგენია. მითუმეტეს იმ ფონზე, როცა აღნიშნული სადაზღვევო პროდუქტი ყველა ევროპულ ქვეყანაში და ასევე ჩვენს მეზობელ ქვეყნებშიც უკვე კარგახანია არსებობს.

„რატომღაც გონიათ, რომ ავტომფლობელთა მესამე პირის სავალდებულო დაზღვევა უფრო მეტად გადასახადია, ვიდრე მოსახლეობის დაცვა. არდა, რეალურად პირიქით არის. გარდაუვალია, ამ პროდუქტის ამოქმედება,  რადგან  თუ სტატუსი მივიღეთ, სტატუსის ქვეყანაში TPL-ის გარეშე ოპერირება წარმოუდგენელია. მგონი, ერთადერთი ვართ სადაც დაზღვევის ეს მიმართულება განვითარებული არ არის.   ჩვენს მეზობელ ქვეყანას ყველას აქვს აღნიშნული პროდუქტი. გარდა იმისა, რომ ევროპასთან ასოცირება გვავალდებულებს, ეს არის დაცვა საკუთარი მოსახლეობის. მე ვფიქრობ, რომ წელს დანამდვილებით უნდა მივიღოთ ეს კანონი. როდის ამოქმედდება, 2024-ის რომელ თვეში, ამას უკვე აღარ აქვს მნიშვნელობა. მთავარია, დროულად შევიდეს პარლამენტში.“-აღნიშნა ნინა კობახიძემ.

როგორც დაზღვევის ზედამხედველობის სამსახურში განმარტავენ, რამდენიმეწლიანი მუშაობის შემდეგ ავტომფლობელთა მესამე პირის სავალდებულო დაზღვევის კანონპროექტი მზადაა და დოკუმენტზე უწყების ჯგუფმა რამდენიმე თვის განმავლობაში აქტიურად იმუშავა.

ავტომფლობელთა მესამე პირის პასუხისმგებლობის სავალდებულო დაზღვევის კანონპროექტს პარლამენტი სავარაუდოდ, საშემოდგომო სესიაზე განიხილავს, სადაც სავალდებულო პოლისების ამოქმედების ვადებიც განისაზღვრება.