Black Friday-ის პერიოდში განსაკუთრებულ აქტივობას ველოდებით, - ამის შესახებ ხელნაკეთი ჩანთებისა და აქსესუარების საწარმო "კოსმოს" თანადამფუძნებელმა სოფი მუხულიშვილმა "ბიზნესპარტნიორთან" განაცხადა.
მისივე ინფორმაციით, მომხმარებლების მხრიდან, აღნიშნულ პერიოდში ფასდაკლებებთან დაკავშირებით, ინტერესი უკვე არსებობს.
"Black Friday-ისთვის, რა თქმა უნდა, ვემზადებით. ჩვენ ყოველთვის მომხმარებლების სურვილებიდან გამოვდივართ ხოლმე და შესაბამის აქციებს ვთავაზობთ მათ. განსაკუთრებულად მოთხოვნად პროდუქციაზე, რომლის შეძენა მომხმარებლებმა ვერ შეძლეს, Black Friday-ის ფარგლებში ფასდაკლებული იქნება და ყველას შეეძლება ყიდვა. ძალიან კარგი შეთავაზებები გვექნება", - აცხადებს სოფი მუხულიშვილი.
მისივე ინფორმაციით, "კოსმოს" პროდუქციაზე მოთხოვნა წლიდან წლამდე თითქმის ორმაგდება, თუმცა ყველაზე მოთხოვნადი პროდუქტი - მამაკაცის ხაზიდან არის საფულეები, ხოლო ქალბატონების ხაზიდან ჩანთები, მათ შორის, ხელით მოხატული ჩანთები და სხვა.
ცნობისთვის, ხელნაკეთი ჩანთებისა და აქსესუარების კომპანია „კოსმო“ 2015 წელს დაარსდა. საწარმო თბილისში, ვაჟა ივერიელის 24-ში, 300 არაგველის მეტროსთან მდებარეობს. მათი პროდუქციისთვის ნედლეულის დიდი ნაწილი არის თურქეთიდან, თუმცა წარმოებაში გამოყენებულია სხვა ქვეყნიდან შემოტანილი მასალა და ასევე, გარკვეული პროცენტული წილი ქართულ ტყავსაც უჭირავს.
„კოსმოს“ ამჟამად 8 ფილიალი აქვს - კერძოდ, 2 ფილიალი ბათუმში და 5 ფილიალი თბილისში, 1 ფილიალი გორში და 3 პარტნიორი მაღაზია ქუთაისში. პროდუქციის რეალიზება „კოსმოს“ ფილიალებში, ონლაინ (სოც. მედია პლატფორმების და საიტის www.cosmo.com.ge საშუალებით) და პარტნიორ მაღაზიებში ხდება.
