თბილისში 2 ახალი მეტროსადგურის მშენებლობა იგეგმება.
"თბილისის სატრანსპორტო კომპანია“ მეტროსადგურების საპროექტო-სახარჯთაღრიცხვო დოკუმენტაციის შედგენის და მშენებლობის შესყიდვის თაობაზე ე.წ. Design-Build(DB) მეთოდით ბაზრის კვლევას ატარებს.
დოკუმენტის მიხედვით, დასაპროექტებელი სადგურების რაოდენობა განსაზღვრულია 4 სადგურით. მათ შორის:
გლდანის მიმართულება 2 სადგური, ვარკეთილის მიმართულება - 2. პროექტის ფარგლებში ასაშენებელი სადგურების რაოდენობა ორითაა განსაზღვრული. მათ შორის, 1- გლდანის მიმართულებაზე, მეორე - ვარკეთილში.
ამასთან, ტექნიკური დავალების თანახმად, მეტროს ხაზის დაგრძელების სავარაუდო ჯამური სიგრძე 5.2 კმ იქნება, მათ შორის გლდანის მიმართულებით - 2.2 კმ, ხოლო ვარკეთილის მიმართულებით 3 კმ.
"პირველ რიგში, წინასაპროექტო კვლევების საფუძველზე, უნდა დაზუსტდეს საპროექტო მეტროსადგურების განთავსების რამდენიმე ლოკაცია მეტროპოლიტენის მშენებლობის სფეროში გამოცდილების მქონე საპროექტო ორგანიზაციის წარმომადგენლებთან ერთად.
პროექტირების დაწყებამდე მიმწოდებელი ვალდებულია, აღნიშნულ ლოკაციებზე განახორციელოს ნებისმიერი (გეოლოგიური, ჰიდროლოგიური, საინჟინრო, კულტურული, საიდუმლო მასალების, საკანონმდებლო და სხვა) წინასაპროექტო მოკვლევითი სამუშაოები საპროექტო სამუშაოების საჭიროებებიდან გამომდინარე. ამასთან, საჭიროების შემთხვევაში საიდუმლო დოკუმენტაციაზე წვდომისათვის პროექტანტს (ან მის წარმომადგენელს) უნდა ქონდეს კანონმდებლობით დადგენილი შესაბამისი დონის დაშვება,"-აღნიშნულია ტექნიკურ დავალებაში.
დოკუმენტში ნათქვამია, რომ სამშენებლო სამუშაოები უნდა დასრულდეს პროექტის დამკვეთთან შეთანხმებიდან არაუგვიანეს 36 თვეში. პროექტის განხორციელების/დასრულების საორიენტაციო ჯამური ვადა შეადგენს 5 წელს.
შეგახსენებთ, თბილისის მეტრო 59 წლისაა. 1966 წლის 11 იანვარს თბილისის მეტროს “დიდუბე- რუსთაველის” 6,5 კმ-იანი მონაკვეთი ოფიციალურად გაიხსნა. მეტროს ინფრასტრუქტურა ყოველწლიურად ფართოვდებოდა და მეტროს ახალი სადგურები ემატებოდა. 1979 წელს გაიხსნა თბილისის მეტროს საბურთალოს ხაზი. 2017 წელს კი მეტროს 23-ე სადგური „სახელმწიფო უნივერსიტეტი“ შეემატა.
