A კლასის ბიზნესცენტრები კონცენტრირებულია ვაკეში და ზოგადად, მთლიანად ბაზრის 60% სწორედ ამ უბანში მდებარეობს, - ამის შესახებ Cushman & Wakefield Veritas-ს სტრატეგიული განვითარებისა და კვლევების მიმართულების ხელმძღვანელმა ნინო მაღრაძემ გადაცემა "ბიზნესპარტნიორში" განაცხადა.
მისივე ინფორმაციით, სავარაუდოდ, უახლოესი 3-4 წლის განმავლობაში თბილისში ოფისების ბაზარს არანაკლებ 100 000 კვ.მ დაემატება.
"საქართველოში ბიზნესცენტრების ოფიციალური კლასიფიკაციის დოკუმენტი არ არსებობს. ვხელმძღვანელობთ საერთაშორისო სტანდარტების მიხედვით. ძირითად შემთხვევაში A კლასს განაპირობებს მდებარეობა და შემდეგ ტექნიკური მახასიათებლები, მათ შორის, არქიტექტურული პროექტი, რემონტი და ა.შ. ამასთანავე მნიშვნელოვანია სერვისები, რომლებსაც ბიზნესცენტრები უნდა სთავაზობდნენ მომხმარებლებს და A კლასის შემთხვევაში ეს გულისხმობს 24/7-ზე რესეფშენს, დაცვას, დასუფთავებას და ა.შ. ძირითადად ეს არის ის კრიტერიუმები, რითაც ჩვენ ვხელმძღვანელობთ, როცა ბიზნესცენტრებთან მიმართებაში კონცეფციის ნაწილზე ვმუშაობთ, თუმცა საქართველოში როგორც ვთქვი, ამის ოფიციალური დოკუმენტი არ არსებობს.
A,B და C კლასის ბიზნესცენტრების შემთხვევაში ჯამში, დღეის მდგომარეობით, თბილისში დაახლოებით, 260 000 კვ.მ გასაქირავებელი ფართია. აქედან, A კლასის ბიზნესცენტრების მოცულობა არის დაახლოებით, 100 000 კვ.მ, B კლასი არის დაახლოებით, 85 000 კვ.მ და დანარჩენი C კლასის ბიზნესცენრებზე ნაწილდება.
რაც შეეხება მიწოდების ნაწილს - ვფიქრობთ, რომ უახლოესი 3-4 წლის განმავლობაში არანაკლებ 100 000 კვ.მ დაემატება ბაზარს, თუმცა წინასწარ რთულია იმაზე საუბარი რა კლასიფიკაციის იქნებიან ეს ბიზნესცენტრები", - აცხადებს ნინო მაღრაძე.
