"დიდი იმედი მაქვს, არანაირი სანქციები არ გვექნება. გამომდინარე იქიდან, რომ ჩვენ, მათ შორის საერთაშორისო სანქციების შესრულების ნაწილში, საერთაშორისო საზოგადოების ძალიან პასუხისმგებლიანი და აქტიური პარტნიორები, წევრები ვართ. ამიტომ, გვექნება დიალოგი, რათა სტაბილური, მათ შორის საკანონმდებლო, გარემო უზრუნველვყოთ, რაც ნეგატივს თავიდან აგვარიდებს",- ამის შესახებ საქართველოს ეკონომიკისა და მდგრადი განვითარების მინისტრმა, ვიცე-პრემიერმა ლევან დავითაშვილმა ჟურნალისტებს განუცხადა.
"ჩვენი ეკონომიკა სტაბილურად იზრდება. მიმდინარე წელს, პირველი 7 თვის განმავლობაში 9.7%-იანი ეკონომიკური ზრდა გვაქვს. ვფიქრობთ, რომ მაღალ ეკონომიკურ ზრდას შევინარჩუნებთ. თქვენ ნახეთ, აზიის განვითარების ბანკის (ADB) პროგნოზის კორექტირება - მათ გადახედეს ზრდისკენ საქართველოს ეკონომიკის ზრდას. ეს მოსალოდნელიც იყო. სხვა საერთაშორისო ორგანიზაციებიც თანხმდებიან, რომ საქართველოში საშუალოვადიან პერსპექტივაში იქნება მაღალი ეკონომიკური ზრდა , ეს იქნება 5.5%.
ჩვენი მოლოდინია, რომ შეიძლება, უფრო მაღალიც იყოს. ჩვენთვის მაღალი ეკონომიკური ზრდა სხვა პარამეტრების სტაბილურობის შენარჩუნებასთან ერთად, მნიშვნელოვანია, რათა ქვეყანამ სახე იცვალოს უკეთესობისკენ და საქართველოში ცხოვრების დონე გაუმჯობესდეს. ამიტომ, პოზიტიური ეკონომიკური პროცესების შენარჩუნება ძალიან მნიშვნელოვანია.
რაც შეეხება ინვესტორების განწყობებს - ინვესტორების განწყობა არის საკმაოდ პოზიტიური. ჩვენ გვაქვს საკმაოდ მიმზიდველი საინვესტიციო გარემო. ამაზე დიალოგი მუდმივ რეჟიმში მიმდინარეობს. დღევანდელი პანელიც საინტერესო იყო და ბევრი პოტენციური ინვესტორი იყო. ამ შემთხვევაში კონკრეტულად ტურიზმის სექტორში, მაგრამ ზოგადად, ასეთი ტიპის საერთაშორისო ღონისძიებებში აქტიურ მონაწილეობას ვიღებთ და გავაგრძელებთ მუშაობას. ბუნებრივია, ქვეყანაში სტაბილურობის შენარჩუნება გვჭირდება, რომ გარემო იყოს ისეთივე პროგნოზირებადი, როგორც ამ წლებში და ქვეყანაში გაგრძელდეს პირდაპირი უცხოური ინვესტიციები, რაშიც დარწმუნებული ვარ, იმიტომ რომ საქართველო მიმზიდველი საინვესტიციო გარემოს მქონე ქვეყანაა”,- განაცხადა ლევან დავითაშვილმა.
