ქუთაისის საერთაშორისო უნივერსიტეტში მედიცინის ინგლისურენოვანი ფაკულტეტი გაიხსნება.
საბაკალავრო პროგრამა 2025-2026 აკადემიური წლიდან, ნეაპოლის ფედერიკო მეორის სახელობის უნივერსიტეტთან თანამშრომლობით განხორციელდება. პროგრამა სტუდენტებს ამზადებს სამედიცინო სფეროს კარიერისთვის (როგორც პრაქტიკულ ისე სამეცნიერო სფეროში).
პროგრამის წარმატებით დასრულებისას სტუდენტები მიიღებენ ორმაგ დიპლომს - როგორც KIU-ს, ისე ნეაპოლის უნივერსიტეტის დიპლომს. სასწავლო პროცესს წარუძღვებიან ქუთაისის საერთაშორისო უნივერსიტეტისა და ნეაპოლის უნივერსიტეტის პროფესორები.
2025-2026 აკადემიური წლიდან ქუთაისის საერთაშორისო უნივერსიტეტი, ნეაპოლის უნივერსიტეტთან თანამშრომლობით, კიდევ ერთი ახალი ინგლისურენოვანი საბაკალავრო პროგრამის - „დიზაინი“ განხორციელებას იწყებს.
ქუთაისის საერთაშორისო უნივერსიტეტი (KIU) ყველაზე მასშტაბური საქველმოქმედო მეგა-პროექტია, რომელიც დამოუკიდებელი საქართველოს ისტორიაში დაარსებულ ერთადერთ საერთაშორისო სახელმწიფო უმაღლეს საგანმანათლებლო დაწესებულებას წარმოადგენს. უნივერსიტეტის იდეა ბიძინა ივანიშვილსა და მის ოჯახს ეკუთვნის – საერთაშორისო-საქველმოქმედო ფონდი „ქართუ“ უნივერსიტეტის განვითარების მიზნით, ერთი მილიარდი ევროს ღირებულების ინვესტიციას ახორციელებს.
ნეაპოლის ფედერიკო II სახელობის უნივერსიტეტი დაარსდა 1224 წელს, ჰყავს 90.000-ზე მეტი სტუდენტი და მსოფლიოში ერთ-ერთ უძველეს სახელმწიფო უნივერსიტეტს წარმოადგენს.
jandacva.ge
