"ბიზნესპარტნიორი"  ყოველკვირეულ რუბრიკას - "ციფრული პარტნიორი" აგრძელებს, სადაც ციფრული მარკეტინგის სწრაფად მზარდ ბაზართან დაკავშირებით არაერთი აქტუალური საკითხის განხილვა და ანალიზი ხდება.

რატომ არის ბიზნესისთვის აუცილებელი ვებსაიტის ოპტიმიზაცია და რა უპირატესობები აქვს SEO-ს სხვა რეკლამირებებისგან განსხვავებით -  ამ თემებზე "ბიზნესპარტნიორთან" რუბრიკის სტუმარმა, SEO სააგენტო "ალპაკას" ხელმძღვანელმა ბონდო ქავთარაძემ ისაუბრა.

- საძიებო სისტემების ოპტიმიზაციაზე საუბრისას გვახსენდება Google, სადაც ადამიანები სასურველ ინფორმაციასა თუ სერვისს ათასნაირი სხვადასხვა ფორმულირებით ეძებენ. როგორ უნდა გავარკვიოთ, რას და როგორ ეძებენ მომხმარებლები Google-ში?

 - საძიებო სისტემებში ყოველდღიურად მილიარდი ძიება ხორციელდება, მათი აბსოლუტური უმრავლესობა სწორედ Google-ის საძიებო პლატფორმაზე მოდის. მნიშვნელოვანია  კომპანიამ იცოდეს საძიებო სისტემაში, თავის ნიშაში, მომხმარებელი რას და როგორ ეძებს. სწორედ აქ არის მნიშვნელოვანი SEO-ს სპეციალისტის ჩართულობა. ის არა მხოლოდ მოიძიებს იმ ასობით თუ ათასობით ფრაზას, რასაც მომხმარებელი ეძებს, არამედ ძიების განზრახვის შესაბამისად დააკლასტერებს მათ და ასევე, უფრო სიღრმისეულად განიხილავს, ანალიზს ჩაატარებს. მაგ. შესაბამისის ხელსაწყოების დახმარებით, გაიგებს რამდენად მარტივი თუ რთულია საძიებო სისტემებში ამ კონკრეტულ ფრაზაზე პოზიციების მოპოვება. ასევე, ფარდობითად გაიგებს, რამდენად ბევრი მომხმარებელი ეძებს ამ საძიებო სიტყვას. მნიშვნელოვანია, რომ საბოლოოდ მიწოდებული მასალა და მომხმარებლის ძიების მოთხოვნა იყოს ერთმანეთის რელევანტური. წინააღმდეგ შემთხვევაში, მომხმარებელი გვერდზე შემოსვლიდან ძალიან მალე დატოვებს ვებსაიტს და კომპანიაც დაკარგავს პოტენციურ მყიდველს. რაც შეეხება იმას, თუ როგორ ხდება ამ საძიებო სიტყვების მოძიება - გეტყვით, რომ არსებობს, როგორც ფასიანი, ასევე უფასო ხელსაწყოები. მათ შორის, თავად Google-ის პლატფორმა,  Google keyword planner,  Youtube, Wordpress, Reddit. ფასიან პლატფორმებს რაც შეეხება - Semrush,  HFS, Keyword Surfer და სხვა.

- რატომ არის აუცილებელი ბიზნესებისთვის ვებსაიტების ოპტიმიზაცია და საძიებო ველის პირველ ათეულში ყოფნას კომპანიებისთვის რა მნიშვნელობა აქვს ? 

- Goole იმდენად ინტეგრირებული გახდა დღეს ჩვენს ცხოვრებაში, რომ  ნებისმიერი ინფორმაციის მოძიებას დაგუგვლას ვეძახით. ამ საძიებო პლატფორმაზე ყოველდღიურად დაახლოებით 8-9 მლრდ. ძიების მოთხოვნა ხორციელდება. საძიებო სისტემებში მოწინავე პოზიციების დაკავება სასიცოცხლოდ მნიშვნელობის შეიძლება იყოს კომპანიებისთვის, რადგან მას ბიზნესისთვის ბევრი სარგებლის მოტანა შეუძლია. ერთი - ორგანული ვიზიტორების ზრდა - სტატისტიკურად დადასტურებულია, რომ ტოპ პოზიციებზე უფრო მეტი მომხმარებელი შედის, ვიდრე ქვემოთ პოზიციებზე მყოფ ვებსაიტებზე. მეორე - გაუმჯობესებული სამომხმარებლო გამოცდილება. SEO ოპტიმიზაციის მიზანია ვებსაიტის ტექნიკური SEO პრობლემების გამოსწორება, მათ შორის, საიტის სტრუქტურის და ნავიგაციის გამოსწორება, რაც საბოლოოდ, მომხმარებელს აძლევს საშუალებას უფრო სწრაფად იპოვონ ის, რასაც ეძებენ ვებსაიტზე. ავტორიტეტულობა და სანდოობა არის უმნიშვნელოვანესი. კონკურენტული უპირატესობა.

- რა უპირატესობები აქვს SEO-ს სხვა რეკლამირებებისგან განსხვავებით?

- პირველი, რაც მახსენდება არის მყისიერი საჭიროების დაკმაყოფილება. რეკლამის დროს პროფესიონალი ადამიანი უშვებს თარგეთირებულ რეკლამას კონკრეტულ სამიზნე აუდიტორიაზე მაშინ, როცა SEO-ს შემთხვევაში ჩვენ „არ დავსდევთ სამიზნე აუდიტორიას“. პირდაპირ რომ ვთქვათ, SEO ორიენტირებულია საძიებო ფრაზებზე. შესაბამისად, ჩვენი ვებსაიტი როდესაც ოპტიმიზირებულია ამ კონკრეტულ საძიებო ფრაზაზე, მომხმარებელი თავად მოდის ჩვენამდე. სწორედ ამიტომ ეძახიან ორგანულ ვიზიტორს ყველაზე ხარისხიან, ყველაზე ლოიალურ ვიზიტორს. როდესაც თქვენი ვებსაიტი არის SEO ოპტიმიზებული, მაშინ, როდესაც მომხმარებელი კონკრეტულ ფრაზას ეძებს საძიებო სისტემებში, თქვენ დროის ნებისმიერ მონაკვეთში ხვდებით მას და რეკლამირებისგან განსხვავებით, ამაში დამატებითი თანხის გადახდა უკვე არ მოგიწევთ. „ალპაკაში“ ჩატარებული მცირე კვლევის თანახმად დავადგინეთ, რომ კომპანიებმა უნდა აკეთონ გამართულად ციფრული მარკეტინგი იმიტომ, რომ ეს კარგად მუშაობს SEO პროცესებზეც.

- არსებობს Google-ის მოტყუების გზებიც,  კომპანიები  ამას როგორ ახერხებენ?

 - Google-ის ე.წ. მოტყუება SEO-ს ერთ-ერთი არაეთიკური მიმდინარეობაა. რეალურად, ამას მოაქვს მოკლევადიანი შედეგი. არის ბევრი პრაქტიკა, რისი საშუალებითაც ჩვენ შეგვიძლია სწრაფად მოვიპოვოთ მოწინავე პოზიციები. ეს ნიშნავს, თამაშის წესების გვერდის ავლით - ვებსაიტის გასპამვით მოწინავე პოზიციების მოპოვებას, თუმცა ეს მოგვიტანს მოკლევადიან შედეგებს.

- ამ ხერხებს იყენებენ თუ არა კომპანიები საქართველოშიც?

- ვერ ვისაუბრებ კონკრეტულად კომპანიებზე, თუმცა ამ პრაქტიკას საქართველოშიც და საერთაშორისო ბაზარზეც მრავლად იყენებენ, დამკვიდრებული პრაქტიკაა. აუცილებლად მინდა აღვნიშნო, რომ ჩვენი SEO სააგენტო „ალპაკა“ აბსოლუტურად ვემიჯნებით Black hat SEO-ს და მსგავს პრაქტიკებს. პირიქით, ჩვენ გვსურს, რომ საქართველოში დავნერგოთ მართებული და გრძელვადიან შედეგებზე ორიენტირებული მეთოდები, ყოველ შემთხვევაში, ჩვენი აგური მაინც დავდოთ ამ მიმართულებით.

-  რამდენ ხანს შეიძლება მოატყუოს ბიზნესმა Google და რა შედეგები შეიძლება მოიტანოს ამან?

 - არ არსებობს დადგენილი დრო, თუ რამდენი ხნით არის შესაძლებელი მსგავსი პრაქტიკებით მოტყუება - ეს მთლიანად Google-ზეა დამოკიდებული. მას მისი პატარა, მცოცავი ბოტები ჰყავს და როდესაც ეს ბოტები აღმოაჩენენ მსგავსი ტიპის ვებსაიტებს, მაშინ ხდება მათი დაპენალება. თუ წარმოვიდგენთ 5-7 წლის წინანდელ მდგომარეობას, მაშინაც მოკლევადიანი შედეგებით იყო წარმოდგენილი, თუმცა შედარებით მუშაობდა. დღეს კი უკვე მნიშვნელოვანია კომპანიებმა არ მიმართონ მსგავსი ტიპის პრაქტიკებს იმიტომ, რომ ეს იქნება უბრალოდ დამანგრეველი შედეგის მომტანი. Google მაინც გიპოვის, საერთოდ გააქრობს ამ ვებსაიტს საძიებო სისტემებიდან და საერთო ჯამში, მივიღებთ იმას, რომ კომპანია დაკარგავს, როგორც ძალიან ბევრ ვიზიტორს, ასევე საერთოდ აღარ იქნება წარმოდგენილი საძიებო სისტემებში, შეუმცირდება გაყიდვების რაოდენობა. ამიტომ, ძალიან მნიშვნელოვანია კომპანიამ სწორად შეარჩიოს  SEO სპეციალისტი თუ SEO სააგენტო. ვითამაშოთ თამაშის წესებით, ეს მნიშვნელოვანია.