რუმინეთში, სამუშაო ვიზიტის ფარგლებში, ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს თავმჯდომარე, ავთანდილ კასრაძე რუმინეთის ეკონომიკის, ციფრული ტრანსფორმაციის, მეწარმეობისა და ტურიზმის მინისტრის მოადგილეებს - იულიან კოსმინ მარგელოიუსა და ვიორელ ბალტარეცუს შეხვდა.
შეხვედრაზე მხარეებმა ხაზი გაუსვეს მთავრობათაშორის ორმხრივ თანამშრომლობას და განსაზღვრეს კონკრეტული მიმართულებები პარტნიორობის გასაღრმავებლად. განსაკუთრებული ყურადღება დაეთმო საერთაშორისო აქსელერაციის პროგრამებში ქართული და რუმინული სტარტაპების ჩართულობას, რაც ხელს შეუწყობს ორი ქვეყნის სამეწარმეო ინოვაციური ეკოსისტემების დაახლოებას. მხარეებმა განიხილეს საუკეთესო პრაქტიკა, რომელიც მიზნად ისახავს ტექნოლოგიური პროექტების კომერციალიზაციას და მათთვის კონკურენტუნარიანი გარემოს შექმნას, როგორც რეგიონულ, ისე საერთაშორისო დონეზე.
როგორც ავთანდილ კასრაძე აღნიშნავს, რუმინეთში გამართული შეხვედრები კიდევ ერთი მნიშვნელოვანი ნაბიჯია საქართველოსა და რუმინეთს შორის ინოვაციების, ტექნოლოგიებისა და ციფრული ეკონომიკის სფეროში პარტნიორობის გაძლიერების მიმართულებით.
"ვიზიტის ფარგლებში შევხვდით, როგორც რუმინეთის ეკონომიკის სამინისტროს ხელმძღვანელობას, ისე ქვეყნის წამყვან კვლევით და ინოვაციურ ინსტიტუტებს, სადაც განვიხილეთ სტარტაპ ეკოსისტემების განვითარება, ტექნოლოგიური მეწარმეობის მხარდაჭერა და ახალი ერთობლივი ინიციატივების შესაძლებლობები", - აცხადებს GITA - ს თავმჯდომარე.
სააგენტოს დელეგაციამ ასევე შეხვედრა გამართა ინფორმატიკის კვლევის ეროვნული ინსტიტუტის (ICI Bucharest) გენერალურ დირექტორთან, ადრიან ვიქტორ ვევერასთან. საუბრის მთავარი თემა ხელოვნური ინტელექტის განვითარება იყო; რუმინულმა მხარემ ქართულ დელეგაციას AI ტექნოლოგიების სახელმწიფო სექტორში ინტეგრირების წარმატებული გამოცდილება გაუზიარა.
სააგენტოს თავმჯდომარე, ასევე, რუმინეთის უმაღლესი განათლების, კვლევისა და ინოვაციების დაფინანსების სააგენტოს (UEFISCDI) ხელმძღვანელს, ადრიან კურაჟს შეხვდა. შეხვედრისას მხარეებმა დეტალურად განიხილეს R&D მიმართულებით დაფინანსების სქემები და საერთაშორისო კონსორციუმებში ერთობლივი მონაწილეობის შესაძლებლობები. საუბარი შეეხო ინოვაციების მართვის ევროპულ მოდელებსა და სამომავლო პარტნიორობის პერსპექტივებს.
GITA -ს თავმჯდომარის თქმით, საქართველო აქტიურად მუშაობს, რომ ჩამოყალიბდეს რეგიონულ ინოვაციურ და ტექნოლოგიურ ჰაბად, შესაბამისად, მსგავსი საერთაშორისო პარტნიორობები მნიშვნელოვან როლს ასრულებს ამ მიზნის მიღწევაში.
“დარწმუნებული ვარ, რომ ამ შეხვედრების შედეგად ჩვენს ქვეყნებს შორის თანამშრომლობა კიდევ უფრო გაღრმავდება და ახალ შესაძლებლობებს შექმნის ინოვაციური კომპანიებისა და ტექნოლოგიური ეკოსისტემებისთვის.”
სამუშაო ვიზიტის დასასრულს, სააგენტოს დელეგაცია Măgurele Science Park-ს ეწვია და პარკის სამეცნიერო-ტექნოლოგიურ ინფრასტრუქტურასა და კვლევით პოტენციალს გაეცნო.
შეხვედრებს საქართველოს საგანგებო და სრულუფლებიანი ელჩი რუმინეთში თამარ ბერუჩაშვილი და სააგენტოს თავმჯდომარის მოადგილე თორნიკე ჯობავა ესწრებოდა.
