2024 წლის 27 სექტემბერს საქართველომ მსოფლიო ტურიზმის დღის აღსანიშნავ ღონისძიებას, თემატიკით: „ტურიზმი და მშვიდობა“, პირველად უმასპინძლა. ამ მოვლენას მსოფლიო პრესა ეხმაურება.
თბილისში გამართული გლობალური ღონისძიების შესახებ გავლენიანი ამერიკული გამოცემის Associated Press-ის ჟურნალისტი, კლაუდია საფონტი, წერს: „საქართველომ დღის სინათლეზე გამოიტანა ტურიზმისა და მშვიდობის საკითხი, მასშტაბურმა ღონისძიებამ სხვადასხვა დარგის და სფეროს მსოფლიო ლიდერები ერთ წერტილში მოაქცია, რათა მათ გამოეკვეთათ ტურიზმის, როგორც მშვიდობის კატალიზატორის, კულტურული ურთიერთგაგებისა და მდგრადი განვითარების ფუნქცია.“
გამოცემის ინფორმაციით, საქართველომ ღონისძიების ფარგლებში 472 მონაწილეს 51 ქვეყნიდან უმასპინძლა.
Associated Press-ს გაეროს მსოფლიო ტურიზმის ორგანიზაციის გენერალური მდივნის ზურაბ პოლოლიკაშვილის ციტატა მოჰყავს: „ტურიზმი მეტია, ვიდრე უბრალოდ ეკონომიკა. ტურიზმის საშუალებით შესაძლებელია ხალხთა შორის ურთიერთთანხმობის გაღრმავება და საბოლოოდ, ჰარმონიული თანაარსებობის მიღწევა. წელს ჩვენი მიზანია ვაჩვენოთ როგორ შეუძლია ტურიზმს თავისი წვლილი შეიტანოს კონფლიქტების მოსაგვარებლად და დაძაბულობის ასაცილებლად“,-აცხადებს ზურაბ პოლოლიკაშვილი.
Associated Press-ის ინფორმაციით წლევანდელი ტურიზმის დღის ღონისძიება ორიენტირებული იყო კერძო სექტორის როლზე მშვიდობის ხელშეწყობად მდგრადი ტურიზმის განვითარების საშუალებით.
მსოფლიო ტურიზმის დღეს გაეროს მსოფლიო ტურიზმის ორგანიზაცია 1979 წლიდან, ყოველი წლის 27 სექტემბერს აღნიშნავს.
