„ჩვენ მნიშვნელოვანი, მაგრამ რთული პროცესის შუა ფაზაში ვართ. ერთი მხრივ, სახელმწიფომ აიღო პოლიტიკური ტვირთი და გულწრფელად, გამჭვირვალედ დაიწყო საუბარი ისეთ პრობლემაზე, რომელიც განსაკუთრებით აწუხებს ჩვენს მოსახლეობას. მეორე მხრივ, ეს გამჭვირვალე პროცესი და დიალოგი მიმდინარეობს კერძო სექტორთან ერთად. დარწმუნებული ვარ, საერთო ძალისხმევით ვუპასუხებთ აღნიშნულ გამოწვევებს და საბოლოო ჯამში, გონივრული ზღვრით შევძლებთ სამომხმარებლო ფასების შემცირებას,“ - ასე შეაჯამა ეკონომიკისა და მდგრადი განვითარების მინისტრმა ტელეკომპანია „რუსთავი 2"-ის ეთერში პროდუქციის ფასებთან დაკავშირებით გამართულ დებატებში თავისი გამოსვლა.
როგორც მარიამ ქვრივიშვილმა აღნიშნა, დებატების მსვლელობისას საუბარი წარიმართა სხვა პრიორიტეტებზეც, რომლებიც უკავშირდება სამომხმარებლო ბაზარზე არსებულ ვითარებას.
„გვქონდა შესაძლებლობა, გვესაუბრა სხვა პრიორიტეტებზეც, რომლებიც ამ გამოწვევასთან ბმაშია და გულისხმობს ადგილობრივი წარმოების ხელშეწყობას, ქართული პროდუქციის მეტად ხილვას ადგილობრივ მარკეტებზე, მათ ხელშეწყობას, მათ შორის, საექსპორტო ბაზრებზე წვდომასთან დაკავშირებით. ჩვენი პოლიტიკა სრულად მიმართულია ეკონომიკური დარგების მხარდაჭერასა და მეწარმეობის გაძლიერებაზე და იმისკენ, რომ თითოეული ჩვენი მოქალაქის კეთილდღეობაზე ერთობლივად ვიზრუნოთ,“ - აღნიშნა მარიამ ქვრივიშვილმა.
შეგახსენებთ, სასურსათო პროდუქტებზე, მედიკამენტებსა და საწვავზე ფასწარმოქმნის შესწავლის მიზნით პარლამენტში დროებითი საგამოძიებო კომისია შეიქმნა. დროებით კომისიას ეკონომიკური პოლიტიკის კომიტეტის თავმჯდომარე შოთა ბერეკაშვილი უხელმძღვანელებს.
საპარლამენტო კომისიამდე ფასებთან დაკავშირებით მუშაობა დაიწყო სამთავრობო კომისიამ. გადაწყვეტილება პრემიერის განცხადებას მოჰყვა, რომლის თანახმადაც საქართველოში სურსათის ფასების მაჩვენებელი ევროპის ქვეყნებთან შედარებით მაღალია. ფასებთან დაკავშირებით საბოლოო დასკვნა აპრილში იქნება.
