„ვფიქრობთ, რომ დაკორექტირების შესაძლებლობა ქირას კიდევ აქვს და შემცირების ტენდენცია გაგრძელდება, თუმცა შემცირების ტემპი აღარ იქნება ისეთი მაღალი, როგორიც იყო გასულ წლებში“, - ამის შესახებ „ბიზნესპარტნიორს“ „თიბისი კაპიტალის“ უფროსმა ასოცირებულმა მკვლევარმა სალომე დეისაძემ  განუცხადა.

მისივე ინფორმაციით, თბილისში ქირის ფასმა მაქსიმუმს 2023 წლის მარტში მიაღწია და 1 კვადრატულ მეტრზე 13 დოლარსაც კი გადააჭარბა, რის შემდეგაც იჯარამ უკვე კლება დაიწყო.

„გასაყიდი უძრავი ქონების ფასებისგან განსხვავებით, ბოლო წლებია, ქირის ფასი თბილისში მუდმივად მცირდება. მაგალითისთვის, დეკემბრის თვის მონაცემებით, გასაქირავებელმა ფასმა 1 კვადრატულ მეტრზე 10.1 დოლარი შეადგინა, რაც 9%-ით ნაკლებია 2024 წლის იმავე პერიოდთან შედარებით. რაც შეეხება ამ საქმიანობიდან მიღებულ შემოსავალს, აქაც კლების სურათი იკვეთება და წლიურად ამონაგები ერთ-ნახევარი პროცენტით არის შემცირებული. კერძოდ, 2025 წლის მონაცემებით, ქირიდან ამონაგები 8.7%-ს შეადგენს. მიუხედავად კლებისა, ეს საკმაოდ მაღალი მონაცემია და სხვა ალტერნატიული აქტივებისგან განსხვავებით, უძრავი ქონება კვლავ რჩება მნიშვნელოვან საინვესტიციო აქტივად“, - განმარტა სალომე დეისაძემ.

„თიბისი კაპიტალის“ უფროსმა ასოცირებულმა მკვლევარმა გასაყიდი უძრავი ქონების ფასების საკითხზეც ისაუბრა.

მისივე ინფორმაციით, ასევე დეკემბრის თვის მონაცემებით, თბილისში 1 კვადრატული გასაყიდი უძრავი ქონების ფასი, საშუალოდ, 1 341 დოლარს შეადგენს, რაც წლიურ ჭრილში, 6%-ით გაზრდილი მაჩვენებელია.

მიუხედავად იმისა, რომ თბილისის უძრავი ქონების ბაზარზე ყოველწლიურად ფასების მატება შეინიშნება, ეს რეალიზაციაზე გავლენას ნაკლებად ახდენს და უძრავი ქონების გაყიდვები მაინც ზრდის მაჩვენებლებს ინარჩუნებს. მზარდია როგორც საჭიროებაზე დაფუძნებული, ისე საინვესტიციო შენაძენი.

„აღსანიშნავია, რომ დედაქალაქში ყველაზე აქტიურად, 50-დან 75 კვ.მ-მდე ფართობის მქონე, ანუ პატარა ბინები იყიდება, რომელთაც მთლიანი გაყიდვების, დაახლოებით, 45 პროცენტი უკავიათ“, - აღნიშნა სალომე დეისაძემ.

ცნობისთვის, გასაყიდი უძრავი ქონება ყველაზე ძვირი მთაწმინდასა და ვაკეში ღირს. ამ ორ უბანში ბინების საშუალო გასაყიდი ფასი 2200 დოლარის ზემოთ ნარჩუნდება.