სომხეთის მთავრობამ „სომხეთის რესპუბლიკის ევროკავშირში გაწევრიანების პროცესის დაწყების შესახებ“ კანონპროექტი დაამტკიცა.
საკითხი სომხეთის საგარეო საქმეთა მინისტრმა, არარატ მირზოიანმა წარადგინა და აღნიშნა, რომ სამოქალაქო ინიციატივის სახით კანონპროექტი პარლამენტს წარედგინა, ახლა კი ხელისუფლებამ უნდა გამოხატოს თავისი პოზიცია.
„თქვენ, ბატონო პრემიერ-მინისტრო, ევროპარლამენტშიც განაცხადეთ, რომ სომხეთი მზად არის, იყოს უფრო ახლოს ევროკავშირთან, რამდენადაც ევროკავშირი ჩათვლის შესაძლებლად. ვგულისხმობ ვიზალიბერალიზაციის პროცესის დაწყებას და მთელ რიგ სხვა ინსტრუმენტებს, რომლებიც გამოიყენება ან განიხილება ევროკავშირთან. ამ ყველაფრიდან გამომდინარე, ვთავაზობთ დადებითი პასუხის გაცემას“, – განაცხადა არარატ მირზოიანმა.
თავის მხრივ, სომხეთის პრემიერ-მინისტრმა, ნიკოლ ფაშინიანმა აღნიშნა, რომ სომხეთის ევროკავშირში გაწევრიანება შესაძლებელია მხოლოდ ეროვნული რეფერენდუმის გზით.
„მთავრობის დე იურე პოზიციაა, რომ მთავრობას არანაირი წინააღმდეგობა არ აქვს ამ კანონმდებლობასთან დაკავშირებით, მაგრამ ასევე მინდა, აღვნიშნო, რას ნიშნავს ეს. ეს არ ნიშნავს სომხეთის ევროკავშირში გაწევრიანებას ამ სიტყვის პირდაპირი მნიშვნელობით, რადგან ამ პუნქტის მიღწევა ან ამ საკითხზე გადაწყვეტილების მიღება არ შეიძლება იყოს კანონის დონეზე ან თუნდაც მთავრობის გადაწყვეტილება. გადაწყვეტილების მიღება შესაძლებელია მხოლოდ რეფერენდუმის გზით, სხვა გზა არ არსებობს“, – განაცხადა ნიკოლ ფაშინიანმა.
1tv.ge
