ახალციხისა და ადიგენის მუნიციპალიტეტებში 2 სკოლა რეაბილიტირდა. საუბარია ახალციხის მე-5 საჯარო სკოლასა და ადიგენის რაიონის სოფელ უდის პირველ საჯარო სკოლაზე. ინფორმაციას საგანმანათლებლო და საემცნიერო ინფრასტრუქტურის განვითარების სააგენტო ავრცელებს.
უწყების ცნობით, განათლების, მეცნიერებისა და ახალგაზრდობის მინისტრმა გიორგი ამილახვარმა, საქართველოს პარლამენტის თავმჯდომარე შალვა პაპუაშვილმა, სსიპ საგანმანათლებლო და სამეცნიერო ინფრასტრუქტურის განვითარების სააგენტოს დირექტორმა ირაკლი კუპრავამ და სამცხე-ჯავახეთის მაჟორიტარ-დეპუტატმა ანტონ ობოლაშვილმა ახალციხისა და ადიგენის მუნიციპალიტეტებში ახლად რეაბილიტირებული სკოლები დაათვალიერეს.
ახალციხის მე-5 საჯარო სკოლის შენობაში, რომელიც 600 მოსწავლეზეა გათვლილი, განახლებულ სასწავლო სივრცეებთან ერთად იფუნქციონირებს საბუნებისმეტყველო და კომპიუტერული ლაბორატორიები, ბიბლიოთეკა, რესურს ოთახი, ექიმის კაბინეტი, სასადილო, სპორტული და სააქტო დარბაზები. შენობა სრულად იქნება ადაპტირებული შეზღუდული შესაძლებლობის მქონე პირებისთვის. ინფრასტრუქტურული პროექტის სახელშეკრულებო ღირებულება 4 590 168.14 ლარს შეადგენს.
მინისტრი, პარლამენტის თავმჯდომარე, სააგენტოს დირექტორი და სახელმწიფო რწმუნებული სამცხე-ჯავახეთის მხარეში სოფელ უდის პირველ საჯარო სკოლასაც ესტუმრნენ და ადგილზე გაეცნენ არსებულ ვითარებას.
აღსანიშნავია, რომ სარეაბილიტაციო სამუშაოების დასრულების შემდეგ სოფელ უდის პირველ საჯარო სკოლაში სასწავლო სივრცეებთან ერთად იფუნქციონირებს საბუნებისმეტყველო და კომპიუტერული ლაბორატორიები, ბიბლიოთეკა, რესურს ოთახი, ექიმის კაბინეტი, სპორტული და სააქტო დარბაზები. რეაბილიტაცია ასევე უტარდება გარე სპორტულ მოედანს. სკოლა სრულად იქნება ადაპტირებული შეზღუდული შესაძლებლობის მქონე პირებისთვის. შენობა გათვლილია 600 მოსწავლეზე და პროექტის სახელშეკრულებო ღირებულება 6 774 164.94 ლარს შეადგენს.
ინფრასტრუქტურული პროექტების განხორციელების შედეგად ახალციხის მე-5 და სოფელ უდის პირველი საჯარო სკოლების მოსწავლეები 2024-2025 სასწავლო წელს ახალ, საერთაშორისო სტანდარტების შესაბამის შენობებში შეხვდებიან. აღსანიშნავია, რომ ორივე სკოლის სარეაბილიტაციო სამუშაოებს სსიპ საგანმანათლებლო და სამეცნიერო ინფრასტრუქტურის განვითარების სააგენტო ახორციელებს. რეაბილიტაციის შემდგომ სააგენტო ასევე უზრუნველყოფს სკოლების აღჭურვას ყველა შესაბამისი სასწავლო რესურსითა და ინვენტარით.
