ლიეტუვაში პირველ ექსპორტს რამდენიმე დღეში განვახორციელებთ, - ამის შესახებ "ძმები ხუციშვილების ღვინის მარნის" თანადამფუძნებელმა გელა ხუციშვილმა "ბიზნესპარტნიორთან" განაცხადა.
მისივე ინფორმაციით, აღნიშნულის გარდა, ღვინის მარანი აქტიურ მოლაპარაკებებს აწარმოებს ლატვიასა და ესტონეთთან. გარდა ამისა, გეგმავს ბალტიისპირეთის ათვისებას.
"ყველაფერი დამოკიდებულია როგორი წარმატებით დაიწყება ლიეტუვაში ჩვენი ღვინოების რეალიზაცია. ამჟამად, ექსპორტზე ჩვენი წარმოების მცირე ნაწილი იყიდება და გვსურს, რომ აღნიშნული მაჩვენებელი გავზარდოთ. ძირითადად, ღვინოს ადგილზე ვყიდით. ძალიან ბევრი სტუმარი მოდის ჩვენთან, რომლებსაც მასტერკლასებსა და დეგუსტაციას ვთავაზობთ. ამჟამად 11 დასახელების ღვინო გვაქვს და ასევე, ჰოლანდიაში გვაქვს საწყობი და ვებგვერდი, სადაც ევროპის ნებისმიერი ქვეყნიდან შესაძლებელია ჩვენი ღვინის შეძენა.
წინა წლის ანალოგიურ პერიოდთან შედარებით, ღვინის რეალიზაციის მაჩვენებელი გაზრდილია, რაც პირდაპირ ტურისტების რაოდენობასთან არის დაკავშირებული. ჩვენი სტუმრები ძირითადად არიან ევროპის ქვეყნებიდან და ასევე, იაპონიიდან მყავს სტუმრები", - აცხადებს გელა ხუციშვილი.
ცნობისთვის, "ძმები ხუციშვილების საოჯახო მარანს" ქვევრში ღვინის დაყენების 2-საუკუნოვანი ტრადიცია გააჩნია. 2015 წელს გელა და გიორგი ხუციშვილებმა აღნიშნული ტრადიცია განაახლეს. მარანი თელავის რაიონში, სოფელ კისისხევში მდებარეობს. მეღვინეობის ღვინო ადგილობრივ ბაზარზე სხვადასხვა ღვინის მაღაზიებში და რესტორნებში იყიდება.
