კომუნიკაციების კომისიამ ხობში „ციფრული მხარდაჭერის პროგრამის“ განხორციელება დაიწყო, რომლის ფარგლებშიც, ხობის მუნიციპალიტეტის მერის მოადგილეებისა და ადმინისტრაციულ ერთეულებში მერის წარმომადგენლებისთვის, საინფორმაციო შეხვედრა გამართა. შეხვედრა პროგრამისა და ციფრული უნარ-ჩვევების განვითარების საჭიროებების შესახებ, ცნობიერების ამაღლებას ემსახურებოდა.
„ციფრული მხარდაჭერის პროგრამის“ ფარგლებში, დაგეგმილია სემინარები ხობის მუნიციპალიტეტის 20 სამიზნე სოფელში, სადაც ადგილობრივები სპეციალისტების დახმარებით ინფორმაციის მოძიების, ელ-ფოსტის გამოყენების, გუგლის რუკითა და თარჯიმნით სარგებლობის, ასევე, ადგილმდებარეობის გაზიარებისა და ონლაინ საკომუნიკაციო საშუალებების გამოყენებაში გადამზადდებიან.
შეგახსენებთ, რომ ციფრული მხარდაჭერის პროგრამა პროექტ Log-in Georgia-ს შემადგენელი ნაწილია, რომელიც ინტერნეტიზაციის სახელმწიფო პროგრამის მხარდასაჭერად ხორციელდება. Log-in Georgia საქართველოს 500,000-მდე სოფლად მცხოვრებისთვის მაღალხარისხიანი ინტერნეტის მიწოდების შესაძლებლობის შექმნასა და ციფრული სერვისების სასარგებლო გამოყენების ხელშეწყობას ისახავს მიზნად. პროექტი მსოფლიო ბანკისა და ევროპის საინვესტიციო ბანკის თანადაფინანსებით ხორციელდება.