საქართველოს კონკურენციის ეროვნული სააგენტოს თავმჯდომარე, ირაკლი ლექვინაძე ეკონომიკური თანამშრომლობისა და განვითარების ორგანიზაციის (OECD) მიწვევით, საფრანგეთის ქ.პარიზში, კონკურენციის შესახებ გამართულ რიგით 22-ე გლობალურ ფორუმზე მოხსენებით წარსდგა.
ირაკლი ლექვინაძემ, პანელურ სესიაზე, საქართველოში კონცენტრაციების კონტროლის, მისი აღსრულების მექანიზმებისა და კარტელებში ეკონომიკური ანალიზის გამოყენების მნიშვნელობაზე დეტალურად ისაუბრა.
კონკურენციის გლობალურ ფორუმს ხელმძღვანელობდნენ: OECD-ის გენერალური მდივანი, მათიას კორმანი, OECD-ის კონკურენციის კომიტეტის თავმჯდომარე, ფრედერიკ ჯენი და სხვები. ღონისძიებაში 100-ზე მეტი ქვეყნის კონკურენციის უწყების ხელმძღვანელი პირი, საერთაშორისო ორგანიზაციების, საჯარო და კერძო უწყებების მაღალი რანგის წარმომადგენლები მონაწილეობდნენ.
დღის წესრიგის თანახმად, გაფართოებული დიალოგის ფორმატში, მთავარი განხილვის საგანს - კონკურენციის პოლიტიკის გაძლიერება, საერთაშორისო პრაქტიკის, ტენდენციების, მიღებული შედეგების, გამოწვევის გაზიარება და სამომავლო, სტრატეგიულად მნიშვნელოვანი საკითხების განხილვა წარმოადგენდა. მათ შორის, სამუშაო შეხვედრების ფორმატში, მონაწილეებმა მიმოიხილეს - თანამშრომლობის პროგრამის ფარგლებში შემუშავებული შესაძლებლობები, კონკურენციის საწინააღმდეგო შეთანხმების დროს მისი გამოვლენისა და აღკვეთის მეთოდები, კონცენტრაციების კონტროლის ეფექტიანი მექანიზმები და ა.შ.
საფრანგეთში გამართულ კონკურენციის გლობალურ ფორუმს ასევე ესწრებოდა - საქართველოს კონკურენციის ეროვნული სააგენტოს ანტიდემპინგურ ღონისძიების დეპარტამენტის უფროსი, ნიკა სერგია.
