ეკონომიკისა და მდგრადი განვითარების მინისტრმა მარიამ ქვრივიშვილმა საქართველო - სერბეთის სავაჭრო-ეკონომიკური თანამშრომლობის ერთობლივი კომისიის მეორე სხდომაში მიიღო მონაწილეობა, რომელიც სერბეთის დედაქალაქ ბელგრადში გაიმართა. კომისიის სხდომა თანათავმჯდომარეების რანგში მარიამ ქვრივიშვილმა და სერბეთის შიდა და საგარეო ვაჭრობის მინისტრმა იაგოდა ლაზარევიჩმა გახსნეს.
როგორც მინისტრმა აღნიშნა, ბოლო წლებში საქართველოსა და სერბეთს შორის თანამშრომლობა მნიშვნელოვნად განვითარდა, რაც ორმხრივ ეკონომიკურ მაჩვენებლებზე აისახა.
„საქართველო და სერბეთი ინარჩუნებენ მჭიდრო თანამშრომლობას ტრანსპორტის სფეროში, განსაკუთრებით სამოქალაქო ავიაციაში, რომელიც მნიშვნელოვან როლს ასრულებს ტურიზმის გაძლიერებასა და ეკონომიკური კავშირების გაძლიერებაში. ჩვენს ქვეყნებს შორის პირდაპირი ფრენების დაწყება მნიშვნელოვანი მიღწევა იყო. Air Serbia ახლა ასრულებს რეისებს ბელგრადი-თბილისი-ბელგრადის მიმართულებით კვირაში სამჯერ“, - აღნიშნა ეკონომიკისა და მდგრადი განვითარების მინისტრმა.
მინისტრმა ხაზი გაუსვა, რომ პირდაპირი ფრენების დაწყების შემდეგ, 2025 წლის მესამე კვარტალში სერბეთიდან საქართველოში ვიზიტორების რაოდენობა მნიშვნელოვნად გაიზარდა. ამასთანავე, პირდაპირმა ფრენებმა შეუწყო ხელი სერბეთიდან ტურისტების რაოდენობის 20%-ზე მეტად ზრდას მიმდინარე წლის პირველ კვარტალში.
„სერბეთი წარმოადგენს მიმზიდველ და მზარდ ტურისტულ ბაზარს საქართველოსთვის და მნიშვნელოვანია გავაგრძელოთ თანამშრომლობა ამ სფეროში კავშირების შემდგომი გაძლიერებისთვის. სამთავრობათაშორისო ტურისტული შეთანხმება და ჩვენი ერთობლივი აქტივობები უკვე იძლევა მყარ საფუძველს ჩვენი თანამშრომლობის ხელშეწყობისა და გაღრმავებისთვის“, - აღნიშნა მარიამ ქვრივიშვილმა.
საქართველო-სერბეთის ვაჭრობისა და ეკონომიკური თანამშრომლობის ერთობლივი სამთავრობო კომისიის მეორე სხდომაში მონაწილეობა მიიღეს ეკონომიკისა და მდგრადი განვითარების მინისტრის მოადგილეებმა გენადი არველაძემ და ირაკლი ნადარეიშვილმა, ასევე საქართველოს მთავრობის ადმინისტრაციის უფროსის მოადგილე ილია შამუგიამ და საბერძნეთსა და სერბეთის რესპუბლიკაში საქართველოს ელჩმა, ლევან ბერიძემ.
