საქართველოს ფოსტასა და საქართველოს საავიაციო უნივერსიტეტს შორის თანამშრომლობის მემორანდუმი გაფორმდა, რომლის მიზანია სტუდენტებისა და კურსდამთავრებულებისთვის დასაქმების, პროფესიული გამოცდილების მიღებისა და კარიერული განვითარების შესაძლებლობების ხელშეწყობა.
მემორანდუმი მხარეებს შორის თანამშრომლობის გაღრმავებასა და ახალგაზრდებისთვის პროფესიული განვითარების ახალი შესაძლებლობების შექმნას ითვალისწინებს.
თანამშრომლობის ფარგლებში, უნივერსიტეტის სტუდენტებსა და კურსდამთავრებულებს ექნებათ შესაძლებლობა, მიიღონ ინფორმაცია საქართველოს ფოსტაში არსებული ვაკანსიების შესახებ, გაეცნონ დასაქმების პერსპექტივებს და ჩაერთონ პროფესიული განვითარების სხვადასხვა აქტივობაში.
პარტნიორობა ასევე ითვალისწინებს საინფორმაციო შეხვედრებისა და დასაქმების ფორუმების ორგანიზებას, ასევე სტუდენტებისთვის სტაჟირებისა და პრაქტიკული გამოცდილების მიღების შესაძლებლობების განხილვას.
საქართველოს ფოსტის გენერალური დირექტორის, გიორგი ერაძის განცხადებით, ახალგაზრდების პროფესიული განვითარებისა და დასაქმების ხელშეწყობა კომპანიისთვის მნიშვნელოვანი მიმართულებაა.
„საქართველოს ფოსტისთვის მნიშვნელოვანია არა მხოლოდ კომპანიის განვითარება, არამედ იმ გარემოს შექმნა, სადაც ახალგაზრდებს საკუთარი შესაძლებლობების გამოვლენის, პროფესიული უნარების განვითარებისა და კარიერული წინსვლის რეალური შესაძლებლობა ექნებათ. გვჯერა, რომ განათლებასა და პრაქტიკულ გამოცდილებას შორის მჭიდრო კავშირი წარმატებული პროფესიული მომავლის ერთ-ერთი მნიშვნელოვანი საფუძველია. სწორედ ამიტომ, საქართველოს საავიაციო უნივერსიტეტთან თანამშრომლობა ჩვენთვის მნიშვნელოვანი ნაბიჯია, რომელიც სტუდენტებსა და კურსდამთავრებულებს მისცემს შესაძლებლობას, უკეთ გაეცნონ შრომის ბაზრის მოთხოვნებს, მიიღონ პრაქტიკული გამოცდილება და საკუთარი ცოდნა პროფესიულ საქმიანობაში გამოიყენონ. მსგავსი პარტნიორობების განვითარება ჩვენი პრიორიტეტია“ - აღნიშნა გიორგი ერაძემ.
აღნიშნული თანამშრომლობა წარმოადგენს მნიშვნელოვან ნაბიჯს საგანმანათლებლო და ბიზნესსექტორებს შორის კავშირების გაძლიერების მიმართულებით. საქართველოს ფოსტა აგრძელებს ისეთი ინიციატივების მხარდაჭერას, რომლებიც ხელს უწყობს ახალგაზრდების პროფესიულ განვითარებას, დასაქმებასა და მათი პოტენციალის რეალიზებას.
