„ჩვენი პროგნოზით, ლარი ფართო სტაბილურობას შეინარჩუნებს“, - ამის შესახებ Fitch Ratings - ის ანალიტიკური გუნდის ხელმძღვანელმა, არვინდ რამაკრიშნანმა "ბიემჯისთან მიცემულ ინტერვიუში განაცხადა.
„როგორც იცით, ეროვნულმა ბანკმა წელს დაახლოებით 1,5 მილიარდი დოლარი შეისყიდა, მაგრამ ლარმა სიმყარე მაინც შეინარჩუნა. ამას რამდენიმე მიზეზი აქვს - ერთია ძლიერი ფულადი ნაკადები ეკონომიკაში; მეორეა ტექნიკური მოცემულობა. მაგ., უცხოური ვალუტის შესყიდვის-გაყიდვის წესები. BMatch პლატფორმის წესების მიხედვით, სებ-ი ვერ შეისყიდის ვალუტას, თუ ტრენდი გაუფასურებისკენაა; მესამეა დეპოზიტების დოლარიზაციის შემცირებაც, რაც უფრო მეტ უცხოურ ვალუტას ათავისუფლებს საბანკო სისტემაში; დაბოლოს, ამას პირდაპირ მაკროეკონომიკურ ფაქტორებთან კავშირი არ აქვს, მაგრამ ბოლო პერიოდში სუსტი დოლარიც ლარს ირიბად დამატებით აძლიერებს“, - აღნიშნა არვინდ რამაკრიშნანმა.
მისივე თქმით, გაცვლით კურსს დიდი მნიშვნელობა ენიჭება საქართველოს საკრედიტო დინამიკისთვის, რადგან ქვეყნის ვალის დაახლოებით 70% უცხოურ ვალუტაშია დენომინირებული.
