შინაური ცხოველებისთვის ტანსაცმლისა და აქსესუარების მწარმოებელ კომპანია PETSUP-ში აცხადებენ, რომ ბოლო წლებში ბაზრის ზრდა შენელდა.
მათივე ინფორმაციით, გაყიდვების მოცულობა საუკეთესო პერიოდთან (2022-2023 წლები) შედარებით დაახლოებით 30%-ით შემცირდა.
როგორც „ბიზნესპარტნიორთან“ კომპანიის დამფუძნებელმა, გიზო სირაძემ განაცხადა, გაყიდვების შემცირების ერთ-ერთ მთავარი მიზეზი ჩინური ონლაინ პლატფორმების, მათ შორის Temu-ს, მზარდი პოპულარობაა.
"სამწუხაროდ, ხშირად მომხმარებელი ხარისხის ნაცვლად უპირატესობას ბიუჯეტურობას ანიჭებს. ცხადია, ადგილობრივი წარმოების ფასები ჩინური ბაზრისგან განსხვავებულია”, - აცხადებს სირაძე.
მისი ინფორმაციით, მიუხედავად შემცირებული მოთხოვნისა, კომპანია სტაბილურობას ინარჩუნებს და ახალი პროდუქტების განვითარებაზე მუშაობს. ტანსაცმლის სეგმენტში კონკურენცია კვლავ შედარებით დაბალია, რაც ბიზნესის მომგებიანობას მნიშვმელოვნად უწყობს ხელს.
ცნობისთვის, PETSUP-ი ბაზარზე 2018 წელს გამოჩნდა. დღეს კომპანია საკუთარ საწარმოსა და სამკერვალოს ფლობს, სადაც პროდუქციის მნიშვნელოვანი ნაწილი ადგილობრივად იწარმოება.
ნია ბაკურაძე
