„არ ვთვლით, რომ იპოთეკური სესხების რაოდენობა მნიშვნელოვნად გაიზრდება, თუმცა არსებული უზრუნველყოფის ქვეშ მომხმარებლები მეტი ფართის შეძენას შეძლებენ.“- ამის შესახებ „ბიზნესპარტნიორს“ საბანკო ასოციაციაში განუცხადეს. როგორც ასოციაციის ანალიტიკური დირექტორი აღნიშნავს, იპოთეკურ სესხებს მთლიანი საკრედიტო პორტფელის დაახლოებით 20% უჭირავს. შესაბამისად, ჯამური პორტფელის 1/5 სწორედ იპოთეკურ სესხებშია აკუმულირებული და ამ ტიპის სესხების მნიშვნელობა საკმაოდ თვალშისაცემია.
„რეგულაციის შერბილების შედეგად, ფიზიკურ პირებს უფრო მეტის სესხების საშუალება ექნებათ. პირობითად, ფიზიკურ პირს თუ ჰქონდა 100 ათასი ლარის ღირებულების უძრავი ქონება და მანამდე შეეძლო აეღო უზრუნველყოფის 85%, ანუ 85 ათასი ლარი, ახლა შეძლებს 90%-ის ანუ 90 ათასი ლარის აღებას. იგივე შეეხო იმ პირებს, რომელთაც უცხოურ ვალუტაში აქვთ შემოსავალი, მათ ჰეჯირებულ მსესხებლებს უწოდებს ეროვნული ბანკი. ეს უპირველესყოვლისა ფიზიკურ პირებს საშუალებას მისცემთ, რომ მეტი უძრავი ქონება შეიძინონ არსებული უზრუნველყოფის ფარგლებში. რა თქმა უნდა, ეს ნიშნავს მეტი ფულის ჩართვას ეკონომიკაში და რეგულაციის შემსუბუქება ირიბად, თანამდევ სექტორებს, მათ შორის სამშენებლო კომპანიებს, სარემონტო საშუალებების რეალიზატორებს და სხვა ბიზნესებს წაახალისებს.“-აღნიშნა დავით რუსიამ.
მისივე ინფორმაციით, იპოთეკურ სესხებთან დაკავშირებული რეგულაციის შერბილება, რომელსაც დროებითი ხასიათი აქვს, სავარაუდოდ მთელი 2025 წლის განმავლობაში შენარჩუნდება.
ცნობისთვის, ფინანსური სტაბილურობის კომიტეტის გუშინდელი გადაწყვეტილებით, იპოთეკური სესხების გაცემასთან დაკავშირებული რეგულაციები მარტივდება. ცვლილების მიზანი უძრავი ქონების ბაზრის წახალისებაა. შედეგად, იპოთეკური სესხის აღებისას, მომხმარებლის პირველადი შენატანი აქამდე არსებული 15%-ის ნაცვლად 10% იქნება. კიდევ ერთი ცვლილებით, მარტივდება იპოთეკური სესხის აღება ჰეჯირებული მსესხებლებისთვის, მათ შორის ემიგრანტებისთვის, რომელთაც შემოსავალი უცხოურ ვალუტაში უდასტურდებათ. ქონებით უზრუნველყოფილი სესხის აღებისას, იპოთეკაში მინიმალური შენატანი მათთვის 30-დან 20%-მდე მცირდება.
მიმდინარე წლის იანვრის მონაცემებით, იპოთეკური სესხების მოცულობა 246 მილიონი ლარია, წინა წელთან შედარებით ზრდა 2%-ია. .
