წინა წლის ანალოგიურ პერიოდთან შედარებით, მიმდინარე წლის ბოლო სამ კვარტალში საქართველოს ეროვნულ ბანკში მომხმარებელთა მიმართვიანობა 16%-ით არის გაზრდილი, ხოლო კომერციულ ბანკებში 20%-ით. ეს ცალსახად მომხმარებელთა ცნობიერების ამაღლებაზე მიუთითებს, - ამის შესახებ ეროვნული ბანკის მომხმარებელთა უფლებების დაცვის დეპარტამენტის უფროსმა ლაშა გზირიშვილმა გადაცემა "ბიზნესპარტნიორში" განაცხადა.
მისივე ინფორმაციით, საფუძვლიანი პრეტენზიის რაოდენობა წლიდან წლამდე, დაახლოებით, 20-25%-ის ფარგლებში მერყეობს.
"ჩვენ არა ერთხელ გვისაუბრია, რომ მომხმარებელთა უფლებების დაცვა ეროვნული ბანკისთვის პრიორიტეტია და არსებობს სხვადასხვა მექანიზმი, რითაც მომხმარებლებს ვეხმარებით, რომ საკუთარი უფლებები დაიცვან. ბევრი წელია არსებობს ცხელი ხაზი, ვიღებთ საჩივრებს და პრეტენზიებს მომხმარებლების მხრიდან და არსებობს სხვადასხვა მარეგულირებელი მოთხოვნები. ბუნებრივია, ბაზარი ვითარდება და ჩვენც იძულებული ვართ, რომ ფეხი ავუწყოთ. სხვადასხვა პერიოდში სხვადასხვა ტიპის გამოწვევები აქვთ მომხმარებლებს, ამიტომ მარეგულირებელი ჩარჩო თანდათან იხვეწება და შესაძლოა ახალი მექანიზმები დაინერგოს, რაც ხელს შეუწყობს მომხმარებელთა უფლებების დაცვას.
მომხმარებელთა უფლებების დაცვის მიმართულებით საერთაშორისო კონფერენციაზე თითქმის ყველა სხვა ქვეყნის მარეგულირებელმა აღნიშნა, რომ წლების განმავლობაში მომხმარებელთა მომართვიანობა იზრდება. ანუ უფრო მეტმა ადამიანმა იცის, რომ შეუძლია ეს მექანიზმი გამოიყენოს, მიმართოს შესაბამის მარეგულირებელს და საკუთარი უფლებების დაცვა სცადოს", - აცხადებს ლაშა გზირიშვილი.
როგორც ცნობილია, თბილისში მომხმარებელთა უფლებების დაცვის მიმართულებით საერთაშორისო კონფერენცია - "კონკურენცია და მომხმარებლების უფლებების დაცვა" გაიმართა, სადაც ღონისძიების ფარგლებში მარეგულირებელი უწყების ხელმძღვანელმა პირებმა ქვეყანაში მომხმარებელთა უფლებების მიმართულებით არსებულ ვითარებასა და მიღწეულ შედეგებზე ისაუბრეს.
ლაშა გზირიშვილის შეფასებით, ამ ტიპის ღონისძიებები საშუალებას იძლევა ეროვნული ბანკის მიღწევები და გამოცდილება სხვადასხვა ქვეყანას გაუზიარონ და ასევე, მათი გამოცდილებაც მოისმინონ.
