logo
Loading data...
მთავარი სოფლის მეურნეობა

სტატია

სოფლის მეურნეობის სამეცნიერო-კვლევით ცენტრსა და ავსტრალიურ კომპანია BRW-ს შორის თანამშრომლობის მემორანდუმი გაფორმდა

სოფლის მეურნეობის სამეცნიერო-კვლევით ცენტრსა და ავსტრალიურ კომპანია BRW-ს შორის თანამშრომლობის მემორანდუმი გაფორმდა

1734335754

სოფლის მეურნეობის სამეცნიერო-კვლევით ცენტრს და ავსტრალიის კომპანიას „ბენთს როუდ ვაინერი“ (Bents Road Winery Pty Ltd) შორის თანამშრომლობის მემორანდუმი გაფორმდა. 

სსიპ სოფლის მეურნეობის სამეცნიერო-კვლევითი ცენტრის ინფორმაციით, მემორანდუმის ფარგლებში, კვლევითი-ცენტრის მხრიდან  ქართული ვაზის ჯიშების შესახებ გაიცემა შესაბამისი რეკომენდაციები, რომლებიც შესაფერისი იქნება გრანიტის სარტყელში (ქვინსლენდი) პრემიუმ სასუფრე ღვინოების წარმოებისთვის.

უწყების ცნობით, კომპანია „ბენთს როუდ ვაინერი“ (BRW), რომელიც 2000 წელს დაარსდა, ავსტრალიის ერთ-ერთ ყველაზე ცივ რეგიონში, სამხრეთ-აღმოსავლეთ ქვინსლენდში, ბალანდეანში (Ballandean) მდებარეობს. შედარებით ცივი კლიმატიდან გამომდინარე, იქაურ ღვინოს ევროპული ჯიშებისთვის დამახასიათებელი ორგანოლეპტიკური პროფილი უყალიბდება.  აღსანიშნავია, რომ კომპანია მუშაობს ქვევრის ღვინოზეც და აქტიურად ეწევა საფერავის პოპულარიზაციას.

სსიპ სოფლის მეურნეობის სამეცნიერო-კვლევითი ცენტრის დირექტორმა, ლევან უჯმაჯურიძემ ავსტრალიის დელეგაციის წევრებს ცენტრში მიმდინარე ადგილობრივი და საერთაშორისო სამეცნიერო ის პროექტებიც გააცნო, რომელიც ქართული ვაზის ადგილობრივი ჯიშების მოძიებას, იდენტიფიკაციას, მიკროვინიფიკაციასა და მათთან დაკავშირებულ საკითხებს ეხება.

მევენახეობა-მეღვინეობის კვლევის სამსახურის უფროსმა დავით ჩიჩუამ ავსტრალიელ სტუმრებს ჯიღაურას ბაზაზე დამზადებული იშვიათი ქართული ვაზის ჯიშებისგან დაყენებული ღვინოები წარუდგინა. ასევე, სტუმრებმა ჯიღაურას ბაზაზე არსებული ამპელოგრაფიული კოლექცია დაათვალიერეს და ვაზის სხვლა-ფორმირების მახასიათებლებს გაეცნენ, რაც მათ ავსტრალიაში გაშენებული  ქართული ვაზის ჯიშების სწორად მართვაში დაეხმარება.

გამოგვყევით