საქართველოსა და აზერბაიჯანს შორის სავაჭრო ბრუნვა მიმდინარე წლის 9 თვეში 40%-ზე მეტით გაიზარდა და 1 მილიარდ დოლარს მიაღწია. ამის შესახებ აზერბაიჯანის პრემიერ-მინისტრმა ალი ასადოვმა საქართველო-აზერბაიჯანის ეკონომიკური თანამშრომლობის მთავრობათაშორისი კომისიის მე-11 სხდომაზე განაცხადა.
მისი თქმით, საქართველო აზერბაიჯანის ერთ-ერთი ძირითადი სავაჭრო პარტნიორია, ხოლო ორ ქვეყანას შორის სავაჭრო-ეკონომიკური ურთიერთობები დადებითი დინამიკით ვითარდება და თანმიმდევრულად ფართოვდება.
ალი ასადოვის განცხადებით, ინვესტიციების მიმართულებითაც თანამშრომლობა აქტიურია. აზერბაიჯანის მიერ საქართველოში განხორციელებული ინვესტიციების მოცულობა, მისივე ინფორმაციით, დაახლოებით 4 მილიარდ დოლარს შეადგენს.
"სავაჭრო-ეკონომიკური ურთიერთობა ძალიან დადებითი დინამიკით ვითარდება და თანმიმდევრულად ფართოვდება. საქართველო აზერბაიჯანის ძირითადი სავაჭრო პარტნიორია. მიმდინარე წლის 9 თვის განმავლობაში სავაჭრო ბრუნვა 40%-ზე მეტად გაიზარდა და გასული წლის ანალოგიურ მონაცემებთან შედარებით 1 მლრდ დოლარს მიაღწია. ინვესტიციების სფეროში ჩვენი თანამშრომლობა ძალიან კარგ დინამიკას აჩვენებს. აზერბაიჯანი საქართველოში ახორციელებს ინვესტიციებს, რაც რიცხვებში დაახლოებით 4 მილიარდ აშშ დოლარს შეადგენს. ჩვენ მიერ ერთობლივად განხორციელებული მეგაპროექტები, მათ შორის სამხრეთის გაზის დერეფანი რეგიონისა და ევროპის ენერგოუსაფრთხოების თვალსაზრისით განსაკუთრებულ როლს თამაშობს", - განაცხადა აზერბაიჯანის პრემიერ-მინისტრმა.
