მონეტარული პოლიტიკის განაკვეთი ზომიერად გამკაცრებულია, რადგან იგი კვლავ აღემატება ნეიტრალურ დონეს, რომელთანაც საშუალოვადიან პერიოდში უნდა დაახლოვდეს. აღსანიშნავია, რომ ნეიტრალური განაკვეთი 7%-ის ფარგლებშია, - ამის შესახებ სებ-ის მონეტარული პოლიტიკის განყოფილების უფროსის მოვალეობის შემსრულებელმა მარიამ ჭანტურიამ გადაცემა "ბიზნესპარტნიორში" განაცხადა.
მისივე ინფორმაციით, ინფლაციისა და ეკონომიკური აქტივობის დინამიკა სებ-ის ცენტრალურ საპროგნოზო სცენართან თანხვედრაშია.
"კომიტეტმა მიმოიხილა მაკროეკონომიკური მდგომარეობა და მნიშვნელოვანი ფაქტორია იმ რისკ-სცენარების ანალიზი, რომელთა რეალიზების შემთხვევაში ინფლაცია შესაძლოა, მიზნობრივი დონიდან გადაიხაროს. ამ რისკების მინიმიზების მიდგომით, კომიტეტმა მიიღო გადაწყვეტილება, რაც პოლიტიკის განაკვეთის უცვლელად შენარჩუნებაში გამოიხატა.
ნოემბრის მდგომარეობით, მოვლენები სებ-ის ცენტრალური საპროგნოზო სცენარის შესაბამისად ვითარდება. აღნიშნულ თვეში ინფლაციის ნორმალიზების ნიშნები გამოვლინდა და მთლიანმა წლიურმა ინფლაციამ 4.8% შეადგინა", - აცხადებს მარიამ ჭანტურია.
ცნობისთვის, საქართველოს ეროვნული ბანკის მონეტარული პოლიტიკის კომიტეტმა 2025 წლის 17 დეკემბრის სხდომაზე მონეტარული პოლიტიკის განაკვეთი (რეფინანსირების განაკვეთი) უცვლელად შეინარჩუნა. მონეტარული პოლიტიკის განაკვეთი 8.0 პროცენტს შეადგენს.
