საკონსერვო წარმოება "კულამ" საქართველოში არსებული ბავშვთა კვების მწარმოებელი გერმანული კომპანია HIPP-ის აქტივები - საწარმო და საწყობი იყიდა.
როგორც კომპანიის დამფუძნებელი ვანო გოგლიძე "ბიზნესპარტნიორთან" აცხადებს, საწარმო ქარელის რაიონის სოფელ აგარაში მდებარეობს, საწყობი კი ხაშურში. შედეგად, "კულა" ხილფაფებისა და ბიო წვენების წარმოების 50%-ით გაზრდას გეგმავს.
გოგლიძის ინფორმაციით, "კულა" აღნიშნულ პროექტში, 4 წლის განმავლობაში, დაახლოებით 4 მილიონი დოლარის ღირებულების ინვესტიციის განხორციელებას გეგმავს. კითხვაზე - HIPP-ის ქარხნიდან რა ბრენდით გამოუშვებს "კულა" ხილფაფებსა და ბიო წვენებს, გოგლიძე აცხადებს, რომ პროდუქცია ბაზარზე "კულას" სახელით გაიყიდება, რადგან HIPP-სგან მხოლოდ აქტივების შეძენა მოხდა და არა სახელის.
"ვაშლის მიღებას და გადამუშავებას წელს დავიწყებთ, თუმცა, 2026-2027 წლებში ქარხანა სრული სიმძლავრით დაიწყებს ფუნქციონირებას. საწარმოს დაახლოებით 7 წელია არ უმუშავია, შესაბამისად, დაგეგმილია მისი მოდერნიზება, რემონტი,"-აცხადებს ვანო გოგლიძე.
კომპანიის დამფუძნებელი არ გამორიცხავს, სამომავლოდ HIPP-ის ქარხანაში ბავშვთა კვების ხაზიც ამოქმედდეს.
კომპანიის დამფუძნებლის ინფორმაციით, წინა წლის ანალოგიურ პერიოდთან შედარებით, ზოგადად, "კულას" გაყიდვები დაახლოებით, 10-12%-ით გაიზარდა. მიმდინარე წელს კი, კომპანია მალაიზიის, სინგაპურისა და იაპონიის ბაზარზე გასვლას გეგმავს.
შეგახსენებთ, საკონსერვო წარმოება "კულა" ნედლეულის 95%-ს ადგილობრივი ფერმერებისგან და გლეხებისგან იბარებს. კომპანია 2009 წლიდან არსებობს და ეკოლოგიურად სუფთა პროდუქტებით გამოირჩევა. ამჟამად "კულას" აქვს 5 საწარმო, აქედან, 4 გორში და 1 ახალციხეში მდებარეობს. კომპანიას თავისი პროდუქცია დაახლოებით, 28 ქვეყანაში გააქვს.
რაც შეეხება ბავშვთა კვების მწარმოებელ გერმანულ კომპანია HIPP-ს, მისი წარმომადგენლობა საქართველოში წლების განმავლობაში ფუნქციონირებდა. კომპანიის საკუთრებაში იყო ქარხანა, რომელიც ბავშვთა კვებისთვის ნედლეულს ამუშავებდა და ექსპორტზე გაჰქონდა. ეს მიმართულება ბოლო რამდენიმე წელია საკმარისი ნედლეულის არ არსებობის გამო შეჩერებული იყო.
